နီဂရိုးလိုꩻမျိုꩻ

အဝ်ႏ ဝီခီပီးဒီးယား ကို

"နီဂရိုးလိုꩻမျိုꩻ" ပွိုင်းလဲင်ႏ ကွပ်စွဉ်ႏလိတ်လုဲင်ꩻ၊ လိတ်အုပ်ဖုံႏကေꩻဇူꩻတရာꩻတွမ်ႏ အုံဆွိုးတဝ်း၊ အဝ်ႏကျိုꩻစာꩻတွူႏတရန်လွေꩻတဲင် ကမ္ဘာႏလောင်းကို အထဲ့ဖွိုႏသွတ်ꩻတွမ်ႏ အတိုꩻတက်ထင်ႏထိုသွတ်ꩻလိုꩻမျိုꩻတမျိုꩻ အောဝ်ႏအကျောင်ꩻ "မစ္စတာကက်ဆင်ပင်"ကတဲမ်းဒါႏ (ကြီးပွားရေး)လိတ်စောင်ႏကို ဟော်ꩻထွားသေထွꩻဗာႏနောဝ်ꩻသွူ။ လိုꩻမျိုꩻနောဝ်ꩻ နီဂရိုး(ဟဲ့ꩻ)ကပ္ပလီလိုꩻမျိုꩻဒျာႏ၊ ဟန်ႏနီꩻကမ္ဘာႏလောင်းကို ကပ္ပလီဖုံႏနောဝ်ꩻ တိုꩻတက်ထင်ႏထိုမုꩻယို လဲဉ်းရီးလဲဉ်းဝင်ꩻဆꩻငါ၊ အမေႏရိကန်ႏ ခါးလားစဲ့ꩻပွယ်ꩻတန်ကထွာအခိန်ႏ စာႏရင်ꩻအလꩻ ကပ္ပလီလိုꩻမျိုꩻ ဆေ့ꩻအာအောဝ်ႏ(၁၄)သန်း၊ ကပ္ပလီလိုꩻမျိုꩻ ၉၀% နောဝ်ꩻ တဲမ်းလိတ်၊ ဟော်ꩻလိတ်ဒါႏလိတ်တဲင် ၁၀% နောဝ်ꩻ တွမ်ႏအမေႏရိကန်ႏလိုꩻမျိုꩻယို အရန်းဖေႏနေးကတသွိုန်ထွꩻဝင်ꩻနောဝ်ꩻ အောဝ်ႏကျိုꩻစာꩻလွေꩻတသေႏနောဝ်ꩻသွူ။ အမေႏရိကန်ႏခမ်းကို ကပ္ပလီလိုꩻမျိုꩻ ကလꩻဒါႏဘွဲ့ အလောင်ႏအလင်ပါတောဝ်း၊ နီဂရိုးလိုꩻမျိုꩻ ဆရာႏဝွန်ႏတန်အရန်း အောဝ်ႏအဖြာꩻပေါင်ꩻ(၆)သောင်ႏလွို၊ နီဂရိုးလိုꩻမျိုꩻ သတင်ꩻစာႏတွိုက် အဝ်ႏ(၂၇၀)၊ နီဂရိုးလိုꩻမျိုꩻ ရွဉ်ဘဏ်တွိုက် အဝ်ႏ(၃၀)၊ နီဂရိုးလိုꩻမျိုꩻ အသက်အာႏမခံႏကုမ္ပဏီႏအဝ်ႏ(၆၇)ထွောင်းသွူတကာႏတောဝ်း ပွိုင်းဝွို့တွမ်ႏ အာႏရဲင်ꩻခွုမ်ပဆိုးသားဖုံႏတရိုꩻတဝ်း၊ အနုပညာႏဖဲ့ꩻတရိုꩻတောဝ်း ကမ္ဘာႏလောင်းကိုနဝ်ꩻ တိုꩻတက်ထင်ႏထိုထင်ႏသျာꩻမွေးစွဉ်ႏ၊ ယိုခါ အမေႏရိကန်ႏခမ်း သမ္မတဘားရက်အိုဘားမားနောဝ်ꩻ ထွာဒျာႏလိုꩻဖြေင်းကရိုꩻဒါႏ နီဂရိုးခွိုꩻနွယ်ႏဒျာႏနောဝ်ꩻသွူ။ နီဂရိုးလိုꩻမျိုꩻနောဝ်ꩻ ပွိုင်းလဲင်ႏကလဲဉ်းခိုႏချာ မဟာမစာႏ ထွာဗာႏကမ္ဘာႏ"သွဉ်းသယ်ႏ"ဘဝ ခံႏဗာႏဝင်ꩻနိစ္စက်အံႏနွောင်ꩻ အမျိုꩻမျိုꩻအစားစား၊ ဖေႏနေးကလွစ်ထန်ႏလꩻ"သွဉ်းဘဝ"ကိုနဝ်ꩻ နီဂရိုးလိုꩻမျိုꩻယို ကျိုꩻစာꩻသွဉ်မွေးစွဉ်ႏလိတ်၊ ထုမ်ႏမွေးစွဉ်ႏစီꩻပွာꩻရေꩻ၊ အချင်ꩻချင်ꩻ ရက်မွေးစွဉ်ႏလို့ဝင်ꩻ၊ သꩻရက်စွိုးခွိုꩻတွမ်ႏ လွောင်ႏဗူႏမုꩻယို အာတလာယံကျမွေးစွဉ်ႏဟန်ႏသနီꩻ ကမ္ဘာႏလောင်းကို နီဂရိုးလိုꩻမျိုꩻ ကတိုꩻတက်ထင်ႏထို ထင်ႏသျာꩻတွိုႏဆွိုက်ဗာႏ ဘဝနုဲင်းယိုနောဝ်ꩻ ကွပ်စွဉ်ႏပွိုင်းလဲင်ႏ လိတ်လုဲင်ꩻ၊ လိတ်အုပ်ဖုံႏကေꩻဇူꩻတရာꩻတွမ်ႏ အုံဆွိုးတဝ်း၊ အောဝ်ႏကျိုꩻစာꩻတွူႏတရန်လွေꩻ အကျိုꩻတရာꩻဒျာႏနောဝ်ꩻသွူ။ နီသွဉ်းသီး ပအိုဝ်ႏလိုꩻမျိုꩻလဲ့ ပွိုင်းလဲင်ႏအောဝ်ႏတွမ်ႏခမ်း၊ အောဝ်ႏတွမ်ႏထီ၊ အောဝ်ႏတွမ်ႏလိုꩻမျိုꩻ တင်ႏတင်ႏတယ်ႏတယ်ႏ တဲႏစစွဉ်ႏ သာႏသနာႏသက္ကရာဇ်(၁၆၀၁)ဗာႏနေင်ႏ၊ ကောႏဇာႏသက္ကရာဇ်(၄၁၉)ဗာႏနေင်ႏ၊ ခရဇ်သက္ကရာဇ် အေဒီ(၁၀၇)ဗာႏနေင်ႏ ပေါက္ကံႏခွန် အနုရုဒ္ဓါႏကဟဲ့ꩻဒါႏ အနောႏရထာႏခွန် ကထွိုင်ႏလွဉ်တွိုက်ꩻယားကုဲင်ထိုꩻ ပအိုဝ်ႏခမ်း သထွုံႏတန်နဝ်ꩻ ပအိုဝ်ႏလိုꩻမျိုꩻဘဝယို ဗွိုန်ပီစွဉ်ႏဒျာႏ လာမားဟာ၊ အနာႏဂတ်ဆꩻငါတွက်တာႏ ထီႏတဝ်းဒွုမ်တမုဲင်ꩻမုဲင်ꩻ၊ ခံႏဗာႏဝင်ꩻနိစ္စက်နွောင်ꩻအံႏအမျိုꩻမျိုꩻ၊ ထွာဗာႏဝင်ꩻ"သွဉ်း"သဲႏ၊ မော့ꩻဗာႏထာꩻဒုက္ခအစားစားနဝ်ꩻသွူ။ သုဝဏ္ဏပအိုဝ်ႏခမ်းကို အနောႏရထာႏခွန် ပင်ꩻသဲင်ꩻထိုꩻ ပိဋကတ်အစွုံႏ(၃၀)၊ ဆွမ်ꩻသဲင်ꩻပါ ပုဂ္ဂိုလ်ႏနုဲင်းဆꩻလယို- ၁။ ခွန်မနုဟာႏ၊ စူနီပင်နောဝ်ꩻ စွိုင်ကျꩻသေꩻခါꩻတွမ်ႏ တဖြွီꩻခံꩻ။ ၂။ ခွန်မနုဟာႏ၊ မိဖုရာꩻတန် သီရိမာစူနီပင် စွိုင်ကျꩻသေꩻခါꩻ တွမ်ႏတဖြွီꩻခံꩻ။ ၃။ ခွန်မနုဟာႏ ပိုခို သုဓမ္မမင်ꩻသာꩻ အရွယ်ႏ(၁၅)နေင်ႏရပ်နောဝ်ꩻလဲ့ စွိုင်ကျꩻနေးတွမ်ႏ တဖြွီꩻခံꩻနေနေ။ ၄။ ခွန်ခွိုꩻနွယ်ႏမင်ꩻသာꩻ နင်ꩻသမီꩻဖုံႏတွမ်ႏ မူꩻမတ်ဝွန်ႏတန်စွိုꩻဖုံႏနောဝ်ꩻ စွိုင်တဗန်ႏနေး တွမ်ႏတဖြွီꩻရွဉ်။ ၅။ တောက်ꩻလုံး၊ တောက်ꩻသေင်ႏ အနုပညာႏသားဖုံႏ၊ တဲမ်းပကီႏသား၊ လက်သမာꩻတွမ်ႏ စူမုပညာႏသျင်ႏစွိုꩻဖုံႏ စွိုင်ကျꩻတဗန်ႏနေး တွမ်ႏတဖြွီꩻတောင်ꩻ။ ၆။ မောင်းမိဿံ အချွေႏအရံႏတွမ်ႏ သထုံႏ(သုဲင်ꩻထုမ်ႏ)ဝေင်ꩻပအိုဝ်ႏခမ်းသားဖုံႏ ဝွေꩻသီးစူယာꩻဖဲ့ꩻစေႏကို ဒိုဖြောင်နေး တွမ်ႏတဖြွီꩻသောဝ်ႏဖုံႏတဲင် သွီႏအောဝ်ႏရီႏလင်ꩻတစက်စက်နောဝ်ꩻသွူ။ ခွန်နီပါꩻတွမ်ႏမင်ꩻသာꩻဖုံႏ၊ မူꩻမတ်ဖုံႏ၊ ပအိုဝ်ႏခမ်းသားဖုံႏနောဝ်ꩻ စဲ့ꩻပေါက္ကံႏဖုံႏ မိုးနေးတွမ်ႏနꩻလျော်ꩻတဲင် ဝေင်ꩻပေါက္ကံႏမွူးရောင်ႏဆꩻလကို နꩻလျော်ꩻရောင်ႏခဗုတ်ဗိတ်နေးစွဉ်ႏ၊ ခွန်တွမ်ႏပအိုဝ်ႏခမ်းသားဖုံႏလောင်ႏလွိုးနောဝ်ꩻ နွူႏစွဉ်ႏစွုမ်ႏဖြာꩻ သွူတကာႏတောဝ်း ပေါက္ကံႏခမ်းသားဖုံႏ ပထိုလူးတွမ်ႏယုဲင်ꩻထီ၊ စူယာꩻလောင်းလဲ့ သွီႏထီတနျာႏနျာႏဖုံႏ အောဝ်ႏရီႏလင်ꩻတစက်စက်ထွူတကာႏတောဝ်း ယင်ဟန်ႏသစားနောဝ်ꩻ အောဝ်ႏငွိုးတအွုက်လွေꩻပါသားလဲ့ အောဝ်ႏနောဝ်ꩻသွူ။ ခမ်းထီလဲ့သွုမ်ꩻ ခွန်နင်ꩻပါ ဟော်နန်ꩻလဲ့ခါ ထိုꩻမားလဲဉ်း သꩻဆာဟွိုန်ကဲဉ်း နီပအိုဝ်ႏ ယိုခါလဲင်ꩻတွိုႏ သွဉ်းဘဝ ခံႏဗာႏဒုက္ခ ဝင်ꩻဆꩻလ။ နီပအိုဝ်ႏလိုꩻမျိုꩻ ဖေႏနေးကလွစ်ထန်ႏလꩻ "သွဉ်း"ဘဝနောဝ်ꩻ တဲႏစစွဉ်ႏ ၁၉၂၉-ဗာႏနေင်ႏကို ကထွာဒါႏ ဖြားတန်ကောင်ခဲႏတွမ်ႏ ခွိုꩻရက်ခေါင်းဆောင်ဖုံႏ၊ သွꩻဟောဝ်ရုဲင်းဖက်ဖုံႏ တခေတ်ထွူတခေတ် နွို့လွေꩻတွိုက်ꩻပွယ်ꩻတဲင် ဖေႏလွေꩻဗာႏ အနီꩻအရင်ꩻနောဝ်ꩻ တွက်နွောင်ꩻတောဝ်းဒွုမ်နောဝ်ꩻသွူ။ အဒွေါင်ႏတဗာႏ မဉ်ႏဒေါ့ꩻဗာႏနဝ်ꩻ တဲႏယင်း ၁၉၉၁-ဗာႏနေင်ႏ၊ ဧပြီလာ(၁၁)နီꩻ စွိုးခွိုꩻခေါင်းဆောင်တန် ဖြားတန်စင်ꩻဖါအောင်ႏခမ်းထီ အွဉ်ကတူႏ ထူႏလွေꩻငိမ်ꩻချမ်ꩻရေꩻတွမ်ႏ နဲင်ႏငန်ႏတောႏအစိုႏရမာꩻငါနောဝ်ꩻ ပအိုဝ်ႏဟံႏနယ်ႏလဲ့ ခွꩻသꩻလွဉ်၊ ပအိုဝ်ႏဖဝလဲ့ အရောင်ႏလေလွဉ်၊ ထင်ႏသျာꩻလွဉ်၊ ယိုခါနောဝ်ꩻ ပအိုဝ်ႏလိုꩻမျိုꩻ ခေတ်ပညာႏဒါႏသားဖုံႏ၊ ခွိုꩻရက်သꩻဓာတ် အဝ်ႏပုဂ္ဂိုလ်ႏဖုံႏ၊ သဌေꩻရွဉ်သားဖုံႏ ပေါႏထန်ႏအာလွဉ်လဲဉ်းနောဝ်ꩻသွူ။ ၂၀၀၈-ဗာႏနေင်ႏ နဲင်ႏငန်ႏတောႏအစိုႏရ ကတဲမ်းထွို့ꩻဒါႏ အခေႏခံႏဖွဲ့ဗူႏပွုံႏအလꩻ (၁)ဟိုပုံꩻဝေင်ꩻနယ်ႏ (၂)သီႏသဲင်ႏဝေင်ꩻနယ်ႏ (၃)ပင်လောင်ꩻဝေင်ꩻနယ်ႏ-စတဲင် (၃)ဝေင်ꩻနယ်ႏယို နဲင်ႏငန်ႏတောႏအွဉ်ႏထွော့လွေꩻဖေႏ ပအိုဝ်ႏနမ်းပဲင်ႏအုပ်ချုပ်ခွင်ꩻလꩻ ဟံႏနယ်ႏနောဝ်ꩻသွူ။ နီကအီႏလꩻလွဉ်ဗာႏ နမ်းပဲင်ႏအုပ်ချုပ်ခွင်ꩻလꩻ ဟံႏနယ်ႏ(၃)ဝေင်ꩻနယ်ႏကို ကနွို့ဗာႏတွိုက်ꩻပွယ်ꩻနောဝ်ꩻ ယပ်ꩻခုဲင်ႏငါႏတောဝ်းရိုꩻကီလဲ့ ကလꩻထွူလဲဉ်း နမ်းပဲင်ႏအုပ်ချုပ်ခွင်ꩻလꩻ ဟံႏနယ်ႏ(၃)ဝေင်ꩻနယ်ႏယို ဖေႏနေးကသွုမ်ꩻတိန်ꩻခွိုန်ꩻချာမွိုန်းယို ကအီႏထိန်ꩻဗာႏနောဝ်ꩻ ယပ်ꩻငါႏနောဝ်ꩻသွူ။ နမ်းပဲင်ႏအုပ်ချုပ်ခွင်ꩻလꩻဟံႏနယ်ႏ ဖေႏနေးကတဉ်ႏခွေါင်ညဆွာꩻနောဝ်ꩻ ရက်ခွိုꩻပအိုဝ်ႏပေႏဖုံႏ ကားကအောဝ်ႏ နေးတွမ်ႏရက်ခွိုꩻသꩻဓာတ်တဗာႏတဲင် မဉ်ႏလွိုက်လွေꩻဒျာႏ- (၁)ဖြားဒုံတဲ့နောဝ်ꩻ (၂) အွိုင်ႏတာႏဝွန်ႏခံႏတဲ့နောဝ်ꩻ (၃) ဝေင်ꩻနယ်ႏတာႏဝွန်ႏခံႏတဲ့နောဝ်ꩻ (၄) ခမ်းတာႏဝွန်ႏခံႏတဲ့နောဝ်ꩻ (၅) ပြည်နယ်အရန်း လွတ်တောႏနမ်းခြောင်ꩻတင်တဲ့နောဝ်ꩻ (၆) ပြည်သူ့လွှတ်တောႏတွမ်ႏ အမျိုးသားလွတ်တောႏအရန်း နမ်းခြောင်ꩻတင်တဲ့နောဝ်ꩻ မဉ်ႏလွိုက်ချာဒျာႏ နီစွိုးခွိုꩻ၊ နီလိုꩻမျိုꩻမꩻ နီပအိုဝ်ႏဟံႏနယ်ႏယို အီႏတဉ်ႏခွေါင်လꩻနောဝ်ꩻသွူ။ ကလဲဉ်းခိုႏချာ မဟာမစာႏ နီဂရိုးလိုꩻမျိုꩻဘဝတွမ်ႏ ပအိုဝ်ႏလိုꩻမျိုꩻခံႏဗာႏဝင်ꩻ နိစ္စက်နွောင်ꩻအံႏနောဝ်ꩻ ကွာႏတောဝ်းလို့ဝင်ꩻ၊ နောဝ်ꩻမꩻ နီပအိုဝ်ႏဘဝယို လွစ်ထန်ႏလꩻစလဲဉ်း "သွဥဉ်း"ဘဝတဲင် ယိုမာꩻငါ နီပအိုဝ်ႏလိုꩻမျိုꩻ ကမ္ဘာႏလောင်းကို ထင်ႏထင်ႏသျာꩻသျာꩻ ဖေႏနေးကအုံတဲင်တသွောင်းနွောင်ꩻနောဝ်ꩻ ရက်ခွိုꩻပအိုဝ်ႏဖုံႏ ကားကအောဝ်ႏ ကျိုꩻစာꩻသွဉ်မွေးမွေးသွော့လိတ်၊ ကျိုꩻစာꩻထုမ်ႏမွေးမွေးသွော့ စီꩻပွါꩻရေꩻ-ခွိုင်းယိုမာꩻငါ နီပအိုဝ်ႏလိုꩻမျိုꩻယို ယံလွူးသွော့သꩻဓာတ် နုဲင်းနီဂရိုးလိုꩻမျိုꩻအကျောင်ꩻ တမာသောင်ႏသာလွေꩻဗာႏ ရက်ခွိုꩻပအိုဝ်ႏ ခွန်နင်ꩻသီးဖုံႏ နုဲင်းယိုနောဝ်ꩻသွူ။ နမ်းသꩻနီပါꩻ ယံခွꩻသꩻဒျာႏတဲင်-[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ခွန်ချွန်း-မုဲင်းကောင်
  2. မောင်းမွူးခံꩻ အမုဲင်-၁၇၊ မဲ့ငါ-၁၄