နီပအိုဝ်ႏရပ်ရာႏ

"နီပအိုဝ်ႏရပ်ရာႏ ကထဲ့ဖွိုႏဗာႏနောဝ်ꩻ" ပအိုဝ်ႏလိုꩻမျိုꩻယိုခါ လိုꩻသေလိုꩻဒါႏပညာႏသားဖုံႏ၊ လိုꩻလꩻဘွဲသားဖုံႏလဲ့ ထွိုင်ႏအာ၊ ခြွိုင်ႏသန်ꩻရေꩻ၊ လိုꩻမုꩻရေꩻ၊ စီꩻပွါꩻရေꩻ၊ အကွဉ်အကꩻ၊ အအံႏအအွꩻဖုံႏလဲ့ ထင်ႏထိုလွဉ်၊ ယံလွဉ်လဲဉ်းသွူတကာႏတောဝ်း ကဲဉ်းအာအာ တဒုံတွမ်ႏတဒုံ လွေꩻသဲင်ꩻချာငါတာႏ တဖူꩻဖုံႏလဲ့နောဝ်ꩻ သာႏယာႏလွဉ်လဲဉ်း တနီꩻတစိꩻစိꩻတဲင် နီပအိုဝ်ႏဘဝ၊ နီပအိုဝ်ႏအုံအောဝ်ႏမုꩻ အဆင်ႏအရန်း အီႏတသွောင်းထင်ႏထိုလွဉ်၊ အီႏလွိုင်ႏကွိုန်ꩻလွဉ်ထဲင်းဗာႏ အမဲဉ်ႏနောဝ်ꩻသွူ။ လိုꩻမျိုꩻတမျိုꩻယို အီႏလꩻလွဉ်ဗာႏ အခွင်ꩻအရေꩻတမျိုꩻမျိုꩻနောဝ်ꩻ အထျꩻအောဝ်ႏဒျာႏ အွဉ်ငါဆောင်ဖုံႏ၊ လိုꩻသေလိုꩻဒါႏဖုံႏ၊ လိုꩻကျလိုꩻယံဖုံႏ ခွုမ်စံႏနယ်ꩻထာꩻမာꩻရဲဉ်ႏယံယံနောဝ်ꩻသွူ။ လိုꩻယံလိုꩻဒါႏ လိုꩻလိန်ႏမာႏ ခေါင်းဆောင်ဟောဝ် အဆက်ဆက်ကအွဉ်နယ်၊ ကသွဉ်နယ်ဒါႏ တဖူꩻရဲဉ်ႏဟောဝ် ထာꩻမာꩻရဲဉ်ႏဟောဝ်ဖုံႏယို ကထွာပိုလီꩻဖုံႏ နေးထူႏနာႏခံႏလွောက်ꩻနာႏလွဉ်ꩻ ထောင်လွဉ်ꩻနောဝ်ꩻမꩻ နီကရေႏဒါႏ နီခမ်းနီရပ်ရာႏ လွိုင်ႏကွိုန်ꩻသာႏယာႏရေꩻယို လꩻလွဉ်ဗာႏ၊ အောင်ႏမျင်ႏထင်ႏထိုဗာႏနောဝ်ꩻသွူ။ ကွဲတွော့ꩻ ယိုခါ မဉ်ႏထွားစဲစ်ချာ နီပအိုဝ်ႏရပ်ရာႏတွမ်ႏ ဖူးဝေးခမ်းရင်သားအလင်ဖုံႏ ဒုံဆောင်ႏရပ်ရာႏနောဝ်ꩻ အကွာႏဝင်ꩻနုဲင်းမုဲင်ꩻ? ဖူးဝေးသီး ချင်းယူႏထွားဒျာႏ ရိတ်ခေႏစံꩻချာဒျာႏနောဝ်ꩻမꩻ နီအီႏထီႏ၊ အီႏသေနာႏလွဉ်ဗာႏ လိုꩻမုꩻရေꩻ၊ စီꩻပွာꩻရေꩻ၊ တဖူꩻတထာ ဆွိုကသွုပ်ရေꩻနောဝ်ꩻသွူ။ နီပအိုဝ်ႏရပ်ရာႏကို ဒုံတဒုံ၊ အွိုင်ႏတအွိုင်ႏ (ယဟန်ႏ)ကထင်ႏထိုဗာႏ၊ ကလွိုင်ႏကွိုန်ꩻလွဉ်ဗာႏတတွာယို မဉ်ႏထွားထောင်ချာ အထျꩻအထောင်ꩻနောဝ်ꩻ- (၁) ဖေႏအာႏပိုလီꩻပညာႏရေꩻ (၂) လွောင်ꩻဗူႏရေꩻဟောဝ် (၃) နာႏဖြားဒုံဖြားဆောင်ႏငေါဝ်း၊ နာႏပုဂ္ဂိုလ်ႏလိုꩻတန်ငေါဝ်း (၄) လိုꩻကုဲင်းလိုꩻဒါႏ လိုꩻလိန်ႏမာႏဖုံႏ အောဝ်ႏသော့ꩻအာ (၅) လိုꩻရက်ချာစွိုးခွိုꩻလိုꩻမျိုꩻ ဒုံဆောင်ႏဖုံႏလွိုင်ႏအာ-စတဲင် အကျောင်ꩻခရာႏယံဖုံႏယို မူႏမူႏခိုခိုပေႏတန်ဖြားဆား ဝင်ꩻလွောက်ꩻနာႏ၊ ဝင်ꩻထောင်လွေꩻလွဉ်ꩻနွောင်ꩻနောဝ်ꩻမꩻ ဝင်ꩻရပ်ရာႏဝင်ꩻဒုံဆောင်ႏ လွိုင်ႏကွိုန်ꩻထင်ႏထိုလွဉ် ရိုꩻဗာႏနုဲင်းနောဝ်ꩻသွူ။ အောဝ်ႏကုဲင် နီပအိုဝ်ႏရပ်ရာႏ ကထဲ့ဖွိုႏဒါႏ အကျောင်ꩻခရာႏ မဉ်ႏဒေါ့ꩻဗာႏနောဝ်ꩻ- (၁) လိုꩻလွꩻလိုꩻလွင်ꩻအာ (၂) လိုꩻစူꩻယိုꩻထာꩻသားအာ (၃) လိုꩻအာႏကွိုꩻချာတောဝ်းနမ်း (၄) ဖေႏအာႏဒါႏတောဝ်းဝင်ꩻ (၅) လွူးငါႏသꩻတကေးဖုံႏ-စတဲင် အကျောင်ꩻခရာႏနုဲင်းယိုဖုံႏနောဝ်ꩻ ထွာအီငါႏ နီရပ်ရာႏ နီဒုံဆောင်ႏ ထဲ့ဖွိုႏအီအကျောင်ꩻခရာႏဖုံႏနောဝ်ꩻသွူ။ နီရပ်ရာႏ ကထဲ့ဖွိုႏအီဒါႏ အကျောင်ꩻခရာႏထဲင်းတမျိုꩻနောဝ်ꩻ ဒုံတွိုင်ꩻကဲဉ်းအာအာ ယိုခါနောဝ်ꩻ ယားကုဲင်ငါႏသေင်ႏဝါႏ၊ စာအာငါႏသွို့ꩻခြံဟံႏယာႏ၊ ထိန်ꩻသိမ်ꩻချာဒါႏတောဝ်း သေင်ႏတနွိုင် ထီအုံႏ၊ ထီခြောင်၊ ထီနောင်ဖုံႏ၊ အွဉ်ႏရေꩻတောဝ်း ဒုံဆောင်ႏဧရိယာႏဖုံႏတဲင် နီရပ်ရာႏ ထဲ့ဖွိုႏအီဗာႏနောဝ်ꩻသွူ။ ကွပ်နောဝ်ꩻမꩻ ယိုမာꩻငါ ကထွာဒါႏ ပအိုဝ်ႏခမ်းသား လိုꩻသီးဖုံႏဟွေး- နီရပ်ရာႏ နီဒုံဆောင်ႏ ဖေႏကယံ ဖေႏကလွိုင်ႏကွိုန်ꩻထင်ႏထိုလွဉ် ပီနုဲင်းဝင်ꩻရပ်နောဝ်ꩻ နီအောဝ်ႏလိုႏအွဉ်ဝင်ꩻ တွိုင်ႏပင်ႏဒေါ့ꩻဟောဝ်ဟောဝ်ဝင်ꩻတွော့ꩻ အောဝ်ႏလိုႏပင်ႏတသွောင်ထိုလဲဉ်း နီပအိုဝ်ႏရပ်ရာႏအကျောင်ꩻ အွဉ်ႏဟွိုန်နယ်လွေꩻဗာႏ နီပအိုဝ်ႏခမ်းသားအမျာꩻသီးဖုံႏသွူဩ။