ပတ္တမျာꩻယံအွဉ်ႏငိုꩻ
"ပတ္တမျာꩻယံ အွဉ်ႏငိုꩻတန်ဗဲင်း" သဲင်၊ စိန်ႏ၊ နီႏလာႏ၊ သန္တာႏ၊ လုံးချို-စတဲင် ရတနာႏဖုံႏယို အထီအသွီႏ၊ အယာႏ၊ အပါႏရမီႏ မဉ်ႏဖြားလွဉ်လဲဉ်းသွူနောဝ်ꩻ အောဝ်ႏလွိုႏလွိုႏကာႏကာႏ ဝွေꩻထီသွီႏယာႏ အရောင်ႏထန်ႏလွဉ်၊ အစွန်ꩻသတ္တိအောဝ်ႏလွဉ်ဒျာႏနောဝ်ꩻသွူ။ (ယိုနောဝ်ꩻ အသက်အဲဉ်ထောဝ်း သတ္တဝါႏသွူ။) အသက်အောဝ်ႏ သတ္တဝါႏကထွာဒါႏ အဟိတ်တိရစ္ဆာန်ႏ နုဲင်းဒျာႏဝါးတောင်ꩻ၊ ရူးတလင်ꩻ၊ ထံ-စတဲင်နုဲင်းနောဝ်ꩻဖုံႏလဲ့ ဝွေꩻကံကျင်ꩻ ပါႏရမီႏ အာႏထွိုင်ႏကွဲတလာလာလွဉ်နောဝ်ꩻ အရောင်ႏတဲ့ ကွဲထန်ႏထန်ႏ၊ အငိုꩻတဲ့ ကွဲကွိုင်ႏတန်ႏတန်ႏ(တန်ႏဖို)လွဉ်နောဝ်ꩻသွူ။ ထာꩻသေတရာꩻ ကအောဝ်ႏဒါႏ နီလိုꩻသတ္တဝါႏသီးထဲင်းနောဝ်ꩻ "ယိုနောဝ်ꩻ နီတာႏအကျိုꩻ၊ ဝင်ꩻတာႏအကျိုꩻ၊ ခွိုꩻတာႏ၊ လောကတာႏအကျိုꩻ"ကအောဝ်ႏခွုမ်မာꩻဖေႏဒါႏ အရိယာႏသူႏတောႏကောင်ꩻသီးသꩻဓာတ်၊ လိုꩻယံ၊ လိုꩻမျတ်သီးဖုံႏသူꩻလဲ့ ဝွေꩻဗွေႏသီး နမ်းသက်ခန္ဓာႏဖုံႏနောဝ်ꩻ ဖျတ်အခန်တနွောင်ꩻတောဝ်းနောဝ်ꩻသွူ။ ရတနာႏသဲင်ယံဖုံႏသူꩻ နီမဉ်ႏသေထွꩻ အထီအသွီႏ၊ အစွန်ꩻသတ္တိမꩻ သေအွဉ်ႏသိမ်ꩻဟောဝ်ဟောဝ်တဲင် နီမဉ်ႏလိုႏလွဉ်ရွဉ်၊ မဉ်ႏသမ်းစာလဲ့လꩻဒါႏ အငိုꩻတန်အခန်ထိုနောဝ်ꩻသွူ၊ မဉ်ႏတသေနာႏတောဝ်း ဝွေꩻစွန်ꩻထီယံလဲ့ သေအွဉ်ႏသိမ်ꩻဟောဝ်တောဝ်းတဲင် ထိုꩻထဲ့ထိုꩻမားဒါႏနောဝ်ꩻသွူ။ ဝင်ꩻသေသား မဉ်ႏလွဉ်ဖေႏတန်စွဉ်ႏအငိုꩻယောဝ်း ဝွေꩻတလꩻဗာႏတောဝ်းနောဝ်ꩻသွူ။ စိမ်စွဉ်ႏ ရူးတလင်ꩻသွိုန်ႏထီ၊ ထံသွိုန်ႏထီဖုံႏသူꩻလဲ့ နီမဉ်ႏသေနာႏ ဝွေꩻသီးစွန်ꩻထီယံအကျောင်ꩻနောဝ်ꩻ အွဉ်ႏဒါႏအငိုꩻတန်၊ အခန်ထို၊ သိမ်ꩻဟောဝ်သော့ꩻဒါႏ တတွိုက်ကိုတွော့ꩻ အရေꩻအရာႏ မဉ်ႏတွိုႏလွဉ်နောဝ်ꩻ ကယ်ႏအီဝင်ꩻသက် ပလဲင်ꩻလꩻနောဝ်ꩻသွူ။ နီပအိုဝ်ႏကို လိုꩻဟောဝ်လိုꩻဒါႏ ပိုရတနာႏဖုံႏယိုလဲ့ ဝွေꩻဗွေႏသီးသꩻဓာတ်စွန်ꩻအာႏ၊ ဝွေꩻဗွေႏသီး ပါႏရမီႏစွန်ꩻထီဖုံႏသူꩻနောဝ်ꩻ "ယိုနီခမ်းထီအကျိုꩻ၊ စွိုးခွိုꩻအတာႏ၊ ဘာႏသာႏ သာႏသနာႏအရေꩻထာꩻမာꩻ"ခေ့ꩻလေနီꩻနာꩻ ကျိုꩻစာꩻခွုမ်မာꩻလွေꩻဖေႏဒါႏတဲင် ခမ်းသားနီနာꩻ အောဝ်ႏလိုႏသေနာႏဖေႏဒါႏ အငိုꩻကွိုင်ႏကွိုင်ႏတန်ႏတန်ႏ(တန်ႏဖိုꩻ)တဲင် အောဝ်ႏလိုႏအွဉ်ႏရေꩻ ထိန်ꩻထွားကိုဟောဝ်ဟောဝ်ဖေႏငါႏဝင်ꩻနောဝ်ꩻသွူ။ နီပအိုဝ်ႏခွိုꩻနွယ်ႏ မဲ့နားဖေႏကလေ၊ ထာꩻသေဖေႏကလုမ်းနမ်း၊ အဆင်ႏရန်းဖေႏကအောဝ်ႏ၊ လွူးနမ်းကမ်းကြို ဖေႏကဒါႏ၊ ဖေႏကအုံအောဝ်ႏ အံႏအွꩻလွေꩻသဲင်ꩻဗာႏ သာႏသာႏယာႏယာႏ၊ ငိမ်ꩻငိမ်ꩻချမ်ꩻချမ်ꩻ၊ တွမ်ႏဝင်ꩻအခွင်ꩻအရေꩻ ဖေႏကတသွိုန်နွောင်ꩻအတာႏ ကအောဝ်ႏအွဉ်ငါဖေႏဒါႏ နီစွိုးခွိုꩻကထွာဒါႏ ဗွေႏသံႏဃာႏ၊ ရာႏဇာႏလိုꩻတန်ဖုံႏတရိုꩻတောဝ်း၊ သွဉ်လိတ်ဆရာႏ၊ တဲမ်းလိတ်ဆရာႏ၊ လုမ်ꩻလာꩻဆရာႏတရိုꩻတောဝ်း၊ အနုပညာႏဆရာႏ၊ ဇာတ်ဆရာႏဖုံႏ-စတဲင်နုဲင်းယိုဖုံႏနောဝ်ꩻ ဝွေꩻဗွေႏသီးသꩻရာႏ သွိုန်ႏထီအစွန်ꩻသတ္တိဖုံႏသူꩻ ယံဟောဝ်ငါႏ တွမ်ႏရတနာႏသဲင်ဟောဝ် ပီဝင်ꩻနောဝ်ꩻမꩻ နီနာꩻအောဝ်ႏလိုႏ အွဉ်ႏဖေႏဒါႏဒါႏငါႏ အတန်ႏဖိုꩻနောဝ်ꩻသွူ။ သဲင်ဟောဝ်ပတ္တမျာꩻ ကယိန်းယံ အငိုꩻကယိန်းတန်လဲ့ ရန်ႏသူႏအဆူႏနာႏ စွန်တခွန်ꩻဖုံႏ ကယိန်းလွိုင်ႏ၊ ကယိန်းအာတဲင် နီမဉ်ႏအွဉ်ႏသိမ်ꩻဆုံးဆုံး ဟောဝ်ဟောဝ်တောဝ်းနောဝ်ꩻ ဝင်ꩻထူႏတခွန်ꩻ စွန်ထိုꩻဒါႏ၊ ရူးတလင်ꩻသွိုန်ႏထီ၊ ထံသွိုန်ႏထီသူꩻလဲ့ ဝင်ꩻထွိုင်ႏသေအစွန်ꩻယံအကျောင်ꩻနောဝ်ꩻ ဝင်ꩻတအွဉ်ႏပရီႏပရာႏတောဝ်းနောဝ်ꩻသွူ။ ပုထုဇ္ဇနော ဥမ္မတ္တကော-ဗွေႏဘုရာꩻဟော်ꩻခါꩻအတွိုင်ꩻ "ခွေသီနီနာꩻ နီလိုꩻပုထုဇဉ်ႏသီးဖုံႏယို လိုꩻဗားလွဉ်းလွဉ်း"တဲ့၊ ကွပ်နောဝ်ꩻမꩻ နီလိုꩻသီးယိုနောဝ်ꩻ မဉ်ႏတခုဲင်ႏထွာလꩻဒွိုန်း အရိယာႏပုဂ္ဂိုလ်ႏ၊ မဉ်ႏအောဝ်ႏထွာနေက ပုထုဇဉ်ႏနောဝ်ꩻ ထွာဒျာႏလိုꩻဗားလွဉ်းလွဉ်းနောဝ်ꩻမꩻ နီလိုꩻဗားသီး အသွိုန်ႏသꩻကိုနောဝ်ꩻ ကိလေႏသာႏအပါꩻတဆီ အောဝ်ႏဒင်ႏနေက နမ်းလောင်းကီ ပငါပရာꩻတဲင် ထာꩻမဉ်လꩻ လောဘ၊ ထာꩻသꩻလျားဒေါသ၊ မဲ့တထီႏတောဝ်း အပဲစ်မောဟဖုံႏ အောဝ်ႏတူႏအောဝ်ႏတာႏ၊ အောဝ်ႏဒို့ꩻတခြို့ဗဉ်ႏခါꩻနေက အနမ်း ပငါပရာꩻနောဝ်ꩻသွူ။ ကွပ်စွဉ်ႏကိလေႏသာႏ အောဝ်ႏဖူႏဖါႏ၊ အောဝ်ႏတဗူႏတောဝ်ႏတဗာႏနေကနမ်းလောင်း ပငါပရာꩻတဲင် ဝင်ꩻမဉ်ႏခြွေခြာႏ၊ ဝင်ꩻမဉ်ႏယောင်ꩻရေꩻ၊ ဝင်ꩻမဉ်ႏထွာအတန်၊ ဝင်ꩻမဉ်ꩻမဉ်ႏကျောႏ၊ ဝင်ꩻမဉ်ႏယံကယ်ꩻဝွေꩻသီးနောဝ်ꩻ ကုဲင်းတကေးတကြားဒါႏ၊ ကုဲင်းကျံႏတကုဲင်တေ့ꩻဒါႏဝင်ꩻဖုံႏနောဝ်ꩻသွူ။ ကွပ်နောဝ်ꩻမꩻ လိုꩻကယိန်းခြွေလဲ့ ယိန်းအောဝ်ႏလိုႏလိုႏငါႏ ငေါဝ်းအွီႏအွီႏ၊ ငေါဝ်းချော်ꩻချော်ꩻ၊ ငေါဝ်းပနဲဉ်ႏနဲဉ်ႏ၊ မေတ္တာႏ ကယိန်းအောဝ်ႏလိုႏတန်တန်ငါႏ၊ နီလိုꩻသီးလဲ့ ကယိန်းထွာဝင်ꩻအတန်၊ အဆင်ႏရန်းကယိန်းထင်ႏ၊ အမဉ်ꩻကယိန်းထန်ႏထန်ႏလဲ့ မေတ္တာႏကယိန်းအောဝ်ႏလိုႏတန်ငါႏ၊ ငေါဝ်းကယိန်းအောဝ်ႏလိုႏ အွဉ်ႏအွီႏအွီႏငါႏဝင်ꩻ၊ နောဝ်ꩻမꩻ နီအန္တရာယ်ႏ ရန်ႏသူႏဖုံႏယို ကယိန်းဆေ့ꩻနောဝ်ꩻသွူ။ မဉ်ꩻကယိန်းတန်၊ ရွဉ်ကယိန်းလွိုင်ႏလဲ့ အန္တရာယ်ႏ ကယိန်းအာနောဝ်ꩻမꩻ အောဝ်ႏလိုႏငါႏ မေတ္တာႏတန်၊ အောဝ်ႏလိုႏရက်ပဲင်ꩻဒါႏငါႏဝင်ꩻ၊ အောဝ်ႏလိုႏသညင်ꩻဖေႏဒါႏဝင်ꩻ၊ အောဝ်ႏလိုႏအံႏနွောင်ꩻ နိစ္စက်တောဝ်းတင်ꩻ၊ အောဝ်ႏလိုႏထင်းဖွီ ထီႏပေႏတောဝ်းဝင်ꩻ၊ နောဝ်ꩻမꩻ နီအန္တရာယ်ႏရန်ႏသူႏ အောဝ်ႏတောဝ်းနောဝ်ꩻသွူ။ တဲမ်းလိတ်သား ကမဲဉ်ဒေါ့ꩻငါႏနောဝ်ꩻ လိုꩻကအောဝ်ႏအွဉ်ငါဖေႏဒါႏ နီစွိုးခွိုꩻ ဘာႏသာႏ သာႏသနာႏ ဒုံဆောင်ႏရပ်ရာႏ လွိုင်ႏကွိုန်ꩻသာႏယာႏရေꩻ ထာꩻမာꩻသားဖုံႏယို အန္တရာယ်ႏ အဆူႏနာႏအောဝ်ႏဒါႏတဲင် နီကထွာခမ်းသားမွိုးဖါ၊ တကာႏ၊ တပဲ့ꩻပိုလီꩻဖုံႏယို ဝွေꩻဗွေႏသီး ဖေႏကမော့ꩻဗာႏမွိုန်းတောဝ်း သွီႏသက်အန္တရာယ်ႏဖုံႏနောဝ်ꩻ နီအောဝ်ႏလိုႏထွားလွိုတောဝ်း၊ အောဝ်ႏလိုႏထွားကိုဖေႏငါႏ၊ ရဲဖွောင်ꩻကိုဖေႏငါႏ၊ ထိန်ꩻတီကိုဖေႏငါႏ၊ စွဲးကမ်းကိုဖေႏငါႏဝင်ꩻ ပငါရာꩻနောဝ်ꩻသွူ။ ဝွေꩻဗွေႏသီး ထာꩻယူႏထာꩻတွေꩻ ထာꩻထီႏ၊ ဝွေꩻဗွေႏသီး သꩻရင်ꩻစေႏတနာႏ၊ ကမဲဉ်ဖေႏချံꩻသာႏ၊ ကမဲဉ်ဖေႏငိမ်ꩻချမ်ꩻ၊ ကမဲဉ်ဖေႏတိုꩻတက်၊ ကမဲဉ်ထွာ ကမဲဉ်လꩻ၊ ကမဲဉ်ထီႏဖုံႏယိုနောဝ်ꩻ နီအောဝ်ႏလိုႏဖြော်ဆပ်ꩻချာဖေႏ ကေꩻဇူꩻတရာꩻ အောဝ်ႏအာတန်၊ တန်ႏစွဉ်ႏ တဖြော်ဆပ်ꩻချာနွောင်ꩻဖေႏတောဝ်း ကေꩻဇူꩻတရာꩻလဲ့ ဖေႏအန္တရာယ်ႏမွိုန်း ဝွေꩻဗွေႏသီးငါ၊ ဝွေꩻဗွေႏသီး အန္တရာယ်ႏ အဆူႏနာႏ မဉ်ႏအောဝ်ႏစိန်ႏစွော့ꩻဒါႏလဲ့ အောဝ်ႏလိုႏထွားလွိုတောဝ်း၊ အရေꩻတန်တန်အာအာ အောဝ်ႏလိုႏထွားကူႏညီႏကိုဖေႏငါႏဝင်ꩻနောဝ်ꩻသွူ။ နီပအိုဝ်ႏသီး ပွိုင်းလဲင်ႏစခါနောဝ်ꩻ ပွိုးစွဉ်ႏထွားလွိုဒါႏငါႏဝင်ꩻ၊ ပွိုးစွဉ်ႏ တအွဉ်ႏတန်ႏဖိုꩻဒါႏတောဝ်း နီလိုꩻတန်၊ နီလိုꩻယံသီးဖုံႏတဲင် နီခေါင်းဆောင်တန် နီလိုꩻယံဖုံႏ၊ နီလိုꩻစွန်ꩻထင်သားဖုံႏ၊ စွိုးခွိုꩻတွက်လိုꩻမျိုꩻတာႏ ကစွဉ်ꩻလူႏလွေꩻထိုꩻဗာႏ သွီႏသက်ဖုံႏလဲ့ အောဝ်ႏဗောႏဗာႏထာꩻနောဝ်ꩻသွူ။ ပွိုးနီအွဉ်ႏရေꩻဖေႏကိုတောဝ်း နီလိုꩻတန်၊ နီလိုꩻယံဖုံႏတွော့ꩻ ဝွေꩻဗွေႏသီး ကထွိုင်ႏအဲဉ်ထောဝ်းဒွုမ် နီဒုံဆောင်ႏရပ်ရာႏ စွိုးခွိုꩻကိုနောဝ်ꩻ ဟွိုန်လောက်ꩻကာႏ၊ ကော့ꩻဆုဲင်ꩻဗာႏ နုဲင်းဝါးမောင်ꩻခမ်းလဲ့အောဝ်ႏ၊ ပွိုးစွဉ်ႏ ဝွေꩻဗွေႏသီးတန်ႏခိုꩻစွန်ꩻထီ ထွိုင်ႏတဒို့ꩻရဲဖေႏဒွုမ် နီစွိုးခွိုꩻလိုꩻမျိုꩻ၊ နီဒုံဆောင်ႏရပ်ရာႏနောဝ်ꩻ ဒုံဆောင်ႏပလဲင်ꩻပꩻ၊ စွိုးခွိုꩻခမ်းထီ အခွင်ꩻအရေꩻ ပလဲင်ꩻသုမ်ꩻထိုꩻဗာႏလဲ့ အခေတ်ပေါင်ꩻ၊ အလဲင်ႏပေါင်ꩻ၊ အထွောင်းပေါင်ꩻ တွက်တဒါႏဒွုမ်နောဝ်ꩻသွူ။ ပွိုးနောဝ်ꩻမꩻ ခွိုင်းယိုမာꩻငါနောဝ်ꩻ နီပအိုဝ်ႏသီးဖုံႏ အောဝ်ႏလိုႏထူႏငါႏသွဉ်ခန်ꩻ တန်တန်အာအာတဲင် ပုဂ္ဂိုလ်ႏလိုꩻကျောင်ꩻယံတဲ့နောဝ်ꩻ၊ စွိုးခွိုꩻလိုꩻတန်ယံတဲ့နောဝ်ꩻ၊ လိုꩻပေႏယံတဲ့နောဝ်ꩻ အွဉ်ဝင်ꩻအောဝ်ႏလိုႏထွားကူႏညီႏကိုဖေႏငါႏ အဖဲ့ꩻဖဲ့ꩻအခေါဝ်ခေါဝ်၊ အောဝ်ႏလိုႏထွားရဲထိန်ꩻရဲပ်ကိုဟောဝ်ဟောဝ်ဖေႏငါႏ အန္တရာယ်ႏ အဆူႏနာႏအမျိုꩻမျိုꩻဖုံႏကရိုꩻနောဝ်ꩻ---။ နမ်းသꩻနီပါꩻ ယံချမ်ꩻသာႏ လိုꩻသေလိုꩻဒါႏလိုꩻယံ ပေႏပေႏတန်တန် ကားကအောဝ်ႏ နေးတွမ်ႏစွန်ꩻအာႏထင်ထင်တဲင် အွဉ်ငါယံယံဖေႏသွော့ နီသွဉ်းသီး ပိုလီꩻခမ်းသားတွော့ꩻ ဖူးဝေးမွိုးဖါခမ်းသားလဲ့ ထွားလွိုမွိုန်းတောဝ်း နီလိုꩻတန်၊ လိုꩻပေႏယံဖုံႏတဲင် နီပတ္တမျာꩻသဲင်ယံဖုံႏယို အွဉ်ႏအငိုꩻတန်တန် အခန်ထိုထိုတွော့ꩻ ထိန်ꩻထွားကိုဖေႏသွော့ဝင်ꩻ ပငါပရာꩻအကျောင်ꩻ-တွမ်ႏမေတ္တာႏတဲင်-[၁][၂]