ပရိဗိုဇ်တဖြာꩻရီ
"ပရိဗ္ဗာဇကသုတ် (ပရိဗိုဇ်တဖြာꩻရီဘုရာꩻ၊ ဘုရာꩻသျင်ꩻနယ်ချာ)" အတွင်ꩻမော့ꩻနဝ်ꩻခါ- ပုဏ္ဏာꩻလိုꩻမျိုꩻ ပရိဗိုဇ်တဖြာꩻနဝ်ꩻ ဖျော်လွဉ်ဗွေႏဘုရာꩻထျꩻ၊ ရီဗွေႏဘုရာꩻနုဲင်းယို- "ဩဗွေႏဂေါတမ နီဗွေႏကဟော်ꩻဒါႏ တရာꩻနဝ်ꩻ- ၁။ သန္ဒိဋ္ဌိကော- နမ်းတွမ်ႏနမ်း ထီႏ'သေထွိုက်နုဲင်းမုဲင်ꩻ ၂။ အကာလိကော- အခိန်ႏရွေꩻတဝ်း အကျိုꩻဖေႏနုဲင်းမုဲင်ꩻ ၃။ ဧဟိ ပဿိကော- 'လွဉ်လုဲင်း ထွားဟုဲင်း'ဟဲ့ꩻဗွုန်ႏစွဉ်ႏနုဲင်းမုဲင်ꩻ ၄။ ဩပနေယျိကော- သော့ꩻထွိုက်နမ်းကို သꩻဖူꩻနုဲင်းမုဲင်ꩻ ၅။ ပစ္စတ္တံ ဝေဒိတဗ္ဗော- သေထွိုက်ပငါပရာꩻနုဲင်းမုဲင်ꩻ" ပရိဗိုဇ်ပုဏ္ဏာꩻ ရီနီဗွေႏဘုရာꩻနုဲင်းနောဝ်ꩻသွူ။ ပုဏ္ဏာꩻဟွေး- ရာႏဂတဏှာႏနိစ္စက် ခံႏဗာႏသꩻယူႏပက် ပါꩻတဖြာꩻနဝ်ꩻ ဝွေꩻအီႏမော့ꩻထာꩻဒုက္ခတဲ့ ယူႏယာႏဒွုမ်၊ ဝင်ꩻအီႏမော့ꩻထာꩻဒုက္ခတဲ့ ယူႏယာႏဒွုမ်၊ နီယင်ဝင်ꩻယင် အီႏမော့ꩻထာꩻဒုက္ခတဲ့ ယူႏယာႏဒွုမ်၊ ကွပ်ရာႏဂတဏှာႏ ထွာအမာႏ၊ သꩻချမ်ꩻသာႏဒွုမ်။ ပယ်ႏထိုꩻရာႏဂတဲင် သꩻဒုက္ခတဝ်း၊ ဝွေꩻအီႏဒုက္ခ၊ ဝင်ꩻအီႏဒုက္ခယူႏဒါႏ၊ စူꩻတဝ်းတဏှာႏ၊ ထွာတဝ်းထာꩻမာႏ၊ ထွာတဝ်းထာꩻမာႏတွော့ꩻ သꩻချမ်ꩻသာႏ၊ သꩻချမ်ꩻသာႏနဝ်ꩻ နမ်းတွမ်ႏနမ်း သေချာဒျာႏ၊ သꩻချမ်ꩻသာႏစွဉ်ႏ ယိုခါခါ၊ မဉ်ႏယွုမ်းတဝ်းနဝ်ꩻ ပယ်ႏစံꩻရာႏဂ၊ လွောက်ꩻမွုန်းတဏှာႏဟုဲင်း၊ သေဗာႏစွဉ်ႏသနယ်။ ပုဏ္ဏာꩻဟွေး- ပါꩻတဖြာꩻနဝ်ꩻ ဒေါသနိစ္စက် သꩻယူႏပက်တဲင် (သꩻလျားထာꩻတဲင်) ရွို့ꩻပါꩻ၊ တွဲႏနက်ဖဲ့ဗက်ꩻ၊ ကဲင်လောက်သွီႏလီ၊ ကသီထိုꩻစွဉ်ႏတဲ့အဝ်ႏ၊ နမ်းတဲ့စူလွဉ်ꩻ ခင်ႏလွဉ်ꩻ၊ နမ်းကျင်ꩻတဲ့ကုဲင် ထွာကာယဒုစရဲက်၊ ဖြောင်းတဲ့ခွန်းထွမ် ဒေါ့ꩻကျံꩻဒိုႏဝင်ꩻတဲင် ဖြောင်းကျင်ꩻတဲ့ကုဲင်၊ ထွာဝစီဒုစရဲက်၊ သꩻတဲ့လျား ကျံႏမာꩻဆာ၊ ကျံႏမာꩻသီ၊ သꩻကျင်ꩻတဲ့ကုဲင်၊ ထွာမနော်ꩻဒုစရဲက်? ပုဏ္ဏာꩻဟွေး- မဉ်ႏပယ်ႏထိုꩻလꩻ ဒေါသနဝ်ꩻ သꩻယူႏပက်တဝ်း၊ သꩻလျားဗာႏတဝ်း၊ ရွို့ꩻတဝ်းဝင်ꩻ၊ တွဲႏနက်ဖဲ့ဗက်ꩻတဝ်း၊ စူလွဉ်ꩻခင်ႏလွဉ်ꩻတဝ်း၊ ထွာတဝ်းထမုဲင်ꩻမုဲင်ꩻ၊ နမ်းကျင်ꩻကုဲင်တဝ်း၊ ထွာတဝ်းကာယဒုစရဲက်၊ ဖြောင်းတဲ့ခွန်းတဝ်း၊ ထွမ်တဝ်း၊ ဒေါ့ꩻကျံႏတဝ်း၊ ဒိုႏတဝ်းဝင်ꩻတဲင် ဖြောင်းကျင်ꩻကုဲင်တဝ်း၊ ထွာတဝ်းဝစီဒုစရဲက်၊ သꩻလျားတဝ်းဝင်ꩻတဲင် ကျံႏမာꩻဆာ၊ ကျံႏမာꩻသီတဝ်းဝင်ꩻ၊ သꩻကျင်ꩻကုဲင်တဝ်း၊ ထွာတဝ်းမနော်ꩻဒုစရဲက်၊ သꩻချမ်ꩻသာႏနဝ်ꩻနဝ်ꩻ နမ်းတွမ်ႏနမ်း သေချာဒျာႏ၊ သꩻချမ်ꩻသာႏစွဉ်ႏ ယိုခါခါ၊ မဉ်ႏယွုမ်းတဝ်းတဲ့ သꩻလျားမွုန်းထာꩻ၊ ရွို့ꩻမွုန်းပါꩻဟုဲင်း၊ သေဗာႏစွဉ်ႏသနယ်။ ပုဏ္ဏာꩻဟွေး- ပါꩻတဖြာꩻနဝ်ꩻ မောဟဒို့ꩻတခြို့တဲင် မဉ်ႏမာꩻနုဲင်းယို၊ မဉ်ႏဒေါ့ꩻနုဲင်းယို၊ မဉ်ႏကျံႏနုဲင်းယို၊ ခွေအကျိုꩻထွာတဝ်း၊ ဝင်ꩻအကျိုꩻထွာတဝ်း၊ သေတဝ်း၊ ပယ်ႏထိုꩻမောဟ (အဝိဇ္ဇာႏ)နေးဉာဏ်ႏပညာႏမွိုင်ဟ 'နီအကျိုꩻထွာ-ဝင်ꩻအကျိုꩻအာ'ကရိုꩻနဝ်ꩻ နမ်းတွမ်ႏနမ်း သေဗာႏယိုခါခါ၊ သꩻချမ်ꩻသာႏဗာႏစွဉ်ႏ ယိုခါခါ ပငါပရာꩻနဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ တိကနိပါတ်၊ ပရိဗ္ဗာဇကသုတ်)[၁][၂]