ပဝါႏရဏာႏအကျောင်ꩻ
"တင်ꩻကျွစ်ဗွေနီꩻ ကမာꩻဗာႏ ပဝါႏရာႏ"အကျောင်ꩻ
နီဗွေႏဘုရာꩻ အဝ်ႏအုံသတင်ꩻသွုံꩻ သာဝတ္ထိခမ်း၊ ကျောင်ꩻဇေႏဝွန်ႏကိုအတွင်ꩻ သွꩻပေႏဟောဝ်လို့ဝင်ꩻ စင်ꩻဖုံႏနဝ်ꩻ ဆိုႏဝါႏ ကောသလခမ်း ကျောင်ꩻဒုံတန်တကျောင်ꩻကို၊ "နီယိုဖုံႏနဝ်ꩻ ယံကလွောင်ႏဗူႏဗူႏသေႏသေႏ-ဖေႏကလွစ်အာငေါဝ်း၊ ခံႏဒေါ့ꩻရီတဝ်းလို့ဝင်ꩻ၊ ဝါႏတွင်ꩻသွံလာ"ဝါႏဆိုႏငါနဝ်ꩻ ဒေါ့ꩻသေꩻခါꩻလို့တင်ꩻနုဲင်းနဝ်ꩻသွူ။
ပေါႏခလဲ့ꩻတွိုႏ လိုႏမာꩻထမုဲင်ꩻတဲ့ မာꩻတေ့ꩻတေ့ꩻဗော့ꩻနုဲင်းနဝ်ꩻ၊ မဉ်ႏအဝ်ႏလိုႏယွုတ်ထာꩻ တပါꩻမဉ်ႏနွောင်ꩻတဝ်း၊ ဟဲ့ꩻငေါဝ်းနေးဒွုမ်၊ ဝင်းနေးတွမ်ႏစူ၊ ပေါႏထွူထိုꩻညာꩻ၊ တပါꩻတွမ်ႏတပါꩻ ခံႏဒေါ့ꩻရီတဝ်းလို့ဝင်ꩻ၊ ဝါႏတွင်ꩻသွံလာနုဲင်းနောဝ်ꩻသွူ။
ထွုံꩻစံႏအတွိုင်ꩻ ပေါႏဝါႏထန်ႏနဝ်ꩻ မဉ်ဗော့ꩻဗော့ꩻမဉ်ညာꩻညာꩻ လွေꩻကန်းတော့ꩻ ဗွေႏဘုရာꩻလွဉ်းလွဉ်း၊ ကွပ်နဝ်ꩻမꩻ ဝွေꩻဗွေႏသီးတဲ့ ပယွုမ်းယဲ့စွုမ်ႏပါꩻ လွေꩻကန်းတော့ꩻ ဗွေႏဘုရာꩻတဲင် အွီႏအဲင်နစ်သက် ဗွေႏဘုရာꩻ စွော့ꩻတက်ဆွုမ်ႏနုဲင်းယို- "တပဲ့ꩻရဟန်ꩻသီးဖုံႏဟွေး- - ကစ္စိ ခမနီယံ - အုံဟောဝ် အဝ်ႏသန်ꩻလွနေဟောင်း - ကစ္စိ ယာပနီယံ - အဆင်ႏပြေႏလွနေဟောင်း - သမဂ္ဂါ - ဖြွမ်းနေလို့ဝင်ꩻဟောင်း - သမ္မောဒမာနာ - သꩻရောင်းသꩻရေꩻနေလို့ဝင်ꩻဟောင်း - အဝိဝဒမာနာ - ထေင်ဖိုတောဝ်းလို့ဝင်ꩻကရို" ဗွေႏဘုရာꩻ ရီနုဲင်းနောဝ်ꩻသွူ။ "ဘုရာꩻမျတ်ဗွေႏဩ- နီသွဉ်းသီး အုံဟောဝ်ခြွိုင်ႏသန်ꩻလွဒျာႏ၊ အဆင်ႏပြေႏဒျာႏ၊ ဖြွမ်းဒျာႏလို့ဝင်ꩻ၊ သꩻရေꩻဒျာႏလို့ဝင်ꩻ၊ ထေင်ဖိုတဝ်းလို့ဝင်ꩻ ဗွေႏဩ" "ရဟန်ꩻသီးဖုံႏဟွေး- ဖြွမ်းဗူႏသꩻရေꩻ၊ ထေင်တဝ်းလို့ဝင်ꩻ၊ ဝါႏတွင်ꩻသွံလာ ချမ်ꩻချမ်ꩻသာႏသာႏ၊ သီဝါႏဆိုႏ အပွုံႏမုဲင်ꩻဟောင်း" တွိုႏနဝ်ꩻတွော့ꩻ ဝွေꩻဗွေႏသီး လောဝ်းဒေါ့ꩻလို့လို့ မာꩻပွုံႏမာꩻနယ်ꩻ၊ အုံပွုံႏအုံနယ်ဖုံႏနဝ်ꩻတဲင် "ဒေါ့ꩻရီတဝ်း ရဟန်ꩻကာႏကအဝ်ႏ စုလို့လို့ဗာႏသိမ်ႏကို၊ ဗွေႏဘုရာꩻ ထွဉ်ႏဖစ်လောဝ်းလို့ဝင်ꩻနုဲင်းယို- "ဩဗွေႏ- ခွေသွဉ်းဖစ်လဝ်း စောဝ်းသံဃာႏဗွေႏဩ၊ ထီႏတရိုꩻတဝ်း၊ ဟွုန်တရိုꩻတဝ်း၊ ယူႏမာႏခရာႏအဝ်ႏတရိုꩻတဝ်း နီဗွေႏသီး သညင်ꩻသွော့ခွေသွဉ်း၊ ဒေါ့ꩻဖေႏသွော့ခွေသွဉ်း၊ မဲ့ꩻခွေသွဉ်း မာꩻစင်ꩻထိုꩻယင်း ခွေသွဉ်းအပဲစ်ဗွေႏဩ"တပါꩻထွူတပါꩻ ကဖစ်လောဝ်းလို့ဝင်ꩻနုဲင်းနဝ်ꩻနဝ်ꩻ ဟဲ့ꩻ"မာꩻပဝါႏရဏာႏ"နဝ်ꩻသွူ။(ဝိနယ၊ မဟာဝဂ္ဂ၊ ပဝါရဏာက္ခန္ဓက)[၁][၂]