ပအိုဝ်ႏခမ်းနယ်ႏ ပေါႏထန်ႏရေꩻတာႏ ပအိုဝ်ႏခမ်းသားအာႏ အရေꩻတန်

"ပအိုဝ်ႏခမ်းနယ်ႏ ပေါႏထန်ႏရေꩻတာႏ ပအိုဝ်ႏခမ်းသားအာႏ အရေꩻတန်" ခမ်းသားလွိုက်ဒင်ႏတွော့ꩻ ကထွာထင်ႏလွဉ်လꩻဒါႏ ခမ်းသားအစိုႏရစွိုꩻ အွဉ်ဟိုငါတဲင် မာꩻလွေꩻသွုပ်ယင်း မန်းခမ်းထီတာႏ ညိမ်ꩻချံꩻရေꩻတဖူꩻရဲဉ်ႏနဝ်ꩻသွူ၊ ခမ်းခြွဉ်းဗူႏညိမ်ꩻချမ်ꩻရေꩻ ညီႏလာႏခံႏ ၂၁-ရျာꩻဗူႏပင်ႏလုံ အုံကိုမ်နဲင်ႏငံႏရေꩻဗွောင်ပွဲꩻယို မာꩻလွေꩻ တယ်ႏ ၂၀၁၆-ဗာႏ၊ ဩဂုတ်လာ ၃၁-နီꩻ ဗꩻလွေꩻ စက်တင်ဘာလာ ၃-နီꩻ နေပြည်တော် မြန်မာကွန်ဗဲန်းရှင်း-၂ကိုနဝ်ꩻသွူ။ ၂၁-ရျာꩻဗူႏ ပင်ႏလုံညီႏလာႏခံႏကို အစိုႏရ၊ လွတ်တောႏ၊ တပ်မတောႏ နမ်းခြောင်ꩻတင်သီး၊ ခမ်းရင်ꩻသားခုမ်ခြွိုင်း စဲ့ꩻအစွိုꩻအဗူႏနမ်းခြောင်ꩻတင်သီး၊ နဲင်ႏငံႏရေꩻပါတီနမ်းခြောင်ꩻတင်သီးတွမ်ႏ ပါထွိုက်ပါသင်ꩻဒါႏ နမ်းခြောင်ꩻတင်သီး အဒဝ်ႏဒဝ်ႏဖုံႏယို ထင်ႏဒင်ႏသွင်ꩻ လိတ်ထာꩻထီႏ၊ လိတ်သဘောꩻထာꩻ အဝ်ႏလွေꩻ(၇၂)ဖြာꩻသွူ၊ ခမ်းရင်ꩻသားခုမ်ခြွိုင်းစဲ့ꩻစွိုꩻ အဝ်ႏ(၂၁)စွိုꩻအကို ထင်ႏလွဉ်နွောင်ꩻ (၁၇)စွိုꩻသွူ။ ညီႏလာႏခံႏပွဲꩻ ယိုတလဲင်ႏနဝ်ꩻ အုံကိုမ်အွဉ်ႏထွော့ချက်ဖုံႏ၊ ဆုံꩻဖျတ်ချက်ဖုံႏယို တမာꩻတဝ်း၊ ထွာဒျာႏစုရောမ်လွေꩻ နမ်းခြောင်ꩻပငါပရာꩻသီး ထင်ႏဒင်ႏသွင်ꩻ လိတ်သဘောꩻထာꩻ၊ လိတ်ထာꩻထီႏဖုံႏနဝ်ꩻသွူ၊ ၆-လာတလဲင်ႏ အီႏမာꩻလွေꩻတဲင် မဉ်ႏတွိုႏခါးလားကမာꩻ ဆုဲင်ꩻညီႏလာႏခံႏတလဲင်ႏနဝ်ꩻ ခမ်းနယ်ႏဒေႏသအလွောက်ꩻ အုံကိုမ်ပွဲꩻတဲ့နဝ်ꩻ၊ လိုꩻမျိုꩻအလွောက်ꩻ အုံကိုမ်ပွဲꩻတဲ့နဝ်ꩻ၊ အကျောင်ꩻခရာႏအလွောက်ꩻ အုံကိုမ်ပွဲꩻတဲ့နဝ်ꩻ သဲင်ꩻမာꩻချာဗာႏနဝ်ꩻသွူ၊ မဉ်ႏသဲင်ꩻမာꩻ အုံကိုမ်ပွဲꩻနုဲင်းနဝ်ꩻမꩻ ဆုဲင်ꩻညီႏလာႏခံႏတာႏ ထွာခါꩻဖျင်ဆင်မုနဝ်ꩻသွူ။ နဝ်ꩻမꩻ မဉ်ႏနုဲင်းပအိုဝ်ႏလိုꩻမျိုꩻယိုလဲ့ ဖြဝ်ꩻခမ်းနယ်ႏ၊ မဲင်ꩻခမ်းနယ်ႏ၊ စောက်ꩻခမ်းနယ်ႏ၊ စောက်ꩻတနျာႏခမ်းနယ်ႏ၊ ပဂိုꩻတွိုင်ႏတွမ်ႏ ရန်ႏကုန်ႏတွိုင်ꩻ စတဲင်အဝ်ႏအုံခန်း ခမ်းနယ်ႏ၊ တွိုင်ꩻမုဲင်ꩻကိုတယဝ်း ပအိုဝ်ႏတစွိုးခွိုꩻလုမ်းအတာႏ ကတဲက်ဆဲင်ႏလို့ဒါႏ နဲင်ႏငံႏရေꩻ၊ စီꩻပွါꩻရေꩻ၊ လိုꩻမုရေꩻ၊ လိုမ်းဗဉ်ႏရေꩻတွမ်ႏ ဟံႏယာႏတွမ်ႏသဘာဝ အသောင်ရင်ꩻအရေꩻဖုံႏယို ဖြွမ်းဝင်ꩻအုံကိုမ် တဲမ်းထွို့ꩻလွေꩻဒျာႏမꩻ အီႏစုမ်ႏယာႏလွေꩻလို့ တစွိုးခွိုꩻတာႏနဝ်ꩻသွူ။ မဉ်ႏထွားနုဲင်း ၂၁-ရျာꩻဗူႏ ပင်ႏလုံညီႏလာႏခံႏကို ပအိုဝ်ႏလိုꩻမျိုꩻခမ်းသားထုနမ်းခြောင်ꩻ ထင်ႏခွင်ꩻအဝ်ႏလꩻသိုမ်စွိုꩻကို သိုမ်စွိုꩻလို့ ကထင်ႏဒင်ႏသွင်ꩻဒါႏ လိတ်သဘောꩻထာꩻ ခံႏထူႏချက်ဖုံႏယို မဉ်ႏထွားချာယင်း အသုဲင်ဒူႏနဝ်ꩻ- ပအိုဝ်ႏစွိုးခွိုꩻအစွိုꩻချုပ်အနေႏ PNO ပါတီအွဉ်အကိုရေꩻ ခွန်ထွန်းရွှေ ဒင်ႏသွင်ꩻလွေꩻသဘောꩻထာꩻနဝ်ꩻ "ယိုခါ ပကတိအခေႏနေႏအလꩻ ပအိုဝ်ႏလိုꩻမျိုꩻယို နမ်းပဲင်ႏအုပ်ချုပ်ခွင်ꩻလꩻ တွိုႏအရန်းတဲ့နဝ်ꩻ၊ နွို့ခမ်းခြွဉ်းဗူႏအရန်း၊ ခမ်းနယ်ႏတသာ ပေါႏထန်ႏရေꩻကိုတဲ့နဝ်ꩻ ထာထွိုက်တန်ႏလဲဉ်း လိုꩻမျိုꩻတမျိုꩻတဲင် ဆုဲင်ꩻချာမဉ်ႏတယ်ႏဆို့ꩻလွေꩻ ဒီမိုကရေစီခမ်းထီနဝ်ꩻ ဗွိုန်နုဲင်းလိုꩻမျိုꩻလောင်ႏလင် ကစံႏစာꩻထွိုက်စံႏစာꩻသင်ꩻ၊ ကလꩻထွိုက် ကလꩻသင်ꩻဒါႏ အခွင်ꩻအရေꩻဖုံႏယို လꩻရေꩻအတာႏ ယံကဖောႏလွေꩻ"အဝ်ႏနုဲင်းနဝ်ꩻသွူ။ ပအိုဝ်ႏစွိုးခွိုꩻ လွစ်ထန်ႏရေꩻအစွိုꩻချုပ်အနေႏ PNLO ခုမ်ခြွိုင်းစဲ့ꩻစွိုꩻဥက္ကဋ္ဌ ခွန်မြင့်ထွန်း ဒင်ႏသွင်ꩻလွေꩻ သဘောꩻထာꩻနဝ်ꩻ "မဉ်ႏတယ်ႏဆို့ꩻလွေꩻသွူ တွောင်းတသွုန် ဖက်ဒရယ်မူ ခမ်းထီတန်နဝ်ꩻ နမ်းပဲင်ႏပျဌာန်းခွင်ꩻ အဗွေတဗာႏ ကအဝ်ႏဒါႏ ပအိုဝ်ႏစွိုးခွိုꩻခမ်းနယ်ႏတဖြုံႏ ပေါႏထန်ႏရေꩻယို ထွာပအိုဝ်ႏစွိုးခွိုꩻလွစ်ထန်ႏရေꩻအစွိုꩻချုပ် အွဉ်ႏတစွိုးခွိုꩻလုမ်းဆဲင်ႏရာꩻ အန္တိမအင်းမိုးချက်နဝ်ꩻသွူ"အဝ်ႏနုဲင်းနဝ်ꩻသွူ။ ခမ်းခြွဉ်းဗူႏ ပအိုဝ်ႏစွိုးခွိုꩻအစွိုꩻချုပ် ပအမဖ ပါတီအွဉ်အကိုရေꩻ ခွန်စိုးမြင့်နဝ်ꩻ "အခေႏခံႏလွေꩻတွမ်ႏ ပအိုဝ်ႏနမ်းပဲင်ႏ အုပ်ချုပ်ခွင်ꩻလꩻဒေႏသယိုခါတဲင် ဖြဝ်ꩻခမ်းအခဝ်နဝ် ပအိုဝ်ႏလိုꩻမျိုꩻကအဝ်ႏဒါႏ ၄၀ ရျာꩻခေါင်ꩻလွို ဝေင်ꩻနယ်ႏလောင်ႏလင်ဖုံႏယို အွဉ်ႏခြွဉ်းတဲင် တွမ်ႏခမ်းနယ်ႏတသာ ပေါႏထန်ႏခွင်ꩻ ဥပဒေႏအလွောက်ꩻ အွဉ်ႏထွာပျဌာန်းဖေႏသော့ꩻ ပအိုဝ်ႏစွိုးခွိုꩻခမ်းနယ်ႏအကျောင်ꩻ"အဝ်ႏလွေꩻနုဲင်းနဝ်ꩻသွူ။ ကဒင်ႏသွင်ꩻလွေꩻ အခရာႏအကျောင်ꩻဖုံႏယို အလုဲင်းအာတန်အကို တဲက်ဆဲင်ႏတွမ်ႏ ပအိုဝ်ႏလိုꩻမျိုꩻခမ်းသားထံꩻသာꩻအလောင်း အဓိကအထျꩻအင်းမိုးချက် ခံႏထူႏချက်ဗွိုန်ပီဒျာႏလွဝင်ꩻနဝ်ꩻ ထီႏဗာႏနဝ်ꩻသွူ၊ ကွဲးတွော့ꩻ အစွိုꩻမုဲင်ꩻမုဲင်ꩻ မာꩻခန်းတယဝ်း ပအိုဝ်ႏခမ်းသားရဲင်ꩻအာႏနဝ်ꩻ ထွာအထျꩻနဝ်ꩻသွူ။ နဝ်ꩻမꩻ PNO PNLO ပအမဖ ယိုသိုမ်စွိုꩻ ပအိုဝ်ႏစွိုးခွိုꩻအတာႏ ကအီႏလွေꩻငါဒါႏ ပအိုဝ်ႏခမ်းထီရေႏပုံႏပွိုင်ဖုံႏ၊ ပအိုဝ်ႏခမ်းနယ်ႏ ပေါႏထန်ႏရေꩻဖုံႏယို ဗွိုန်ပီလဲဉ်းသွူဝင်ꩻလဲ့ ပအိုဝ်ႏခမ်းသား ထာꩻထောက်ခံႏယို ဖေႏကထန်ႏတငွါချင်ႏနဝ်ꩻ တွမ်ႏတမျိုꩻသာꩻလုမ်း အုံကိုမ်အရန်းတဲ့နဝ်ꩻ၊ တွမ်ႏပအိုဝ်ႏတစွိုးခွိုꩻလုမ်း ညီႏလာႏခံႏပွဲꩻတဲ့နဝ်ꩻ အဝ်ႏလိုႏထူႏလွေꩻလဲဉ်း ရဲင်ꩻအာႏနဝ်ꩻသွူ။ ညီႏလာႏခံႏငါယိုတလဲင်ႏကို ပအိုဝ်ႏတစွိုးခွိုꩻလုမ်းတာႏ ခမ်းထီရေꩻ၊ နဲင်ႏငံႏရေꩻယို သꩻရာႏတဖြုံႏငဝ်းတငွါ ဖေႏကထွာနဝ်ꩻ အမျိုꩻသာꩻအုံကိုမ်ပွဲꩻအရန်းတဲ့နဝ်ꩻ၊ ပအိုဝ်ႏတစွိုးခွိုꩻလုမ်း ညီႏလာႏခံႏပွဲꩻတဲ့နဝ်ꩻ ခမ်းကောင်ခမ်းဒေါမ် ဖြွမ်းဖြွမ်းဗူႏတဲင် အဝ်ႏလိုႏမာꩻလွေꩻသင်ꩻလဲဉ်းအကျောင်ꩻ တဲမ်းဖြုဲင်ꩻဒင်ႏနယ်ဗာႏသွူ။