ပအိုဝ်ႏခမ်းသားသီးအခါႏ
"ပအိုဝ်ႏခမ်းသားသီးအခါႏ ပဒေႏသရာဇ်စနစ်ကုဲင်အမွီႏ အဝ်ႏပြွူႏဖြိုသဲင်ꩻလွဉ်လဲဉ်း တနီꩻတစိꩻစိꩻ" ကညလဲဉ်းဒါႏ နေင်ႏပေါင်ꩻတဆီတောႏတွင်ꩻကို ပအိုဝ်ႏလိုꩻမျိုꩻသီးယို တောႏလန်ႏရေꩻသမဲင်ꩻ အဝ်ႏကုဲင်သေꩻနဝ်ꩻ ပအိုဝ်ႏပိုတွိုင်ꩻစွုမ်ႏဖြာꩻ အဝ်ႏသေထွꩻဒျာႏဝင်ꩻနဝ်ꩻသွူ၊ ပအိုဝ်ႏတောႏလန်ႏရေꩻမိဉ်းရိုꩻသွူလဲ့ ပထမတောႏလန်ႏရေꩻ၊ ဒုတိယတောႏလန်ႏရေꩻ အဝ်ႏနဝ်ꩻသွူ။ တောႏလန်ႏရေꩻသꩻဓာတ် ကတန်ထိုလွဉ်ဗာႏနဝ်ꩻ ကောပ်စွဉ်ႏဒျာႏ ထီႏတောႏငါႏ ခေတ်စနစ်ကုဲင် ကတေက်ꩻနျꩻဒါႏ ပအိုဝ်ႏလိုꩻမျိုꩻသီးဖဝယို တမိဉ်ခံႏတဝ်း၊ တခံႏနွောင်ꩻတဝ်းနဝ်ꩻသွူ၊ မိဉ်းထွားချာနုဲင်းပဒေႏသရာဇ်စနစ်ကိုယို ကထွာခမ်းသားနဝ်ꩻ ထေင်းထမ်ႏဗာႏ ဗွူခွဉ်ႏ၊ အခွဉ်ႏအစွိုးစွိုးဖုံႏ၊ တောမ်ႏထာꩻတောႏထာꩻလောင်ꩻတွော့ꩻ ယားကုဲင်ခမ်းသားသီးဖဝ ခမ်းသားသီးစီꩻပွါꩻနဝ်ꩻသွူ၊ တောမ်ႏအညမ်းသွတ်ꩻပညာႏရေꩻစနစ်တဲင် ခမ်းသားသီး မဲ့နားဖေႏကလေမွုန်း၊ ဖေႏကသေမွုန်း၊ ဖေႏကဒါႏမွုန်းနဝ်ꩻ အဝ်ႏရဲးပေ့ꩻ၊ အဝ်ႏတေက်ꩻနျꩻခါꩻတသေႏသေႏနဝ်ꩻသွူ။ နဝ်ꩻမ ကလိုပ်ꩻကမာꩻတွော့ꩻ ကလꩻလွဉ်ယိုအကို ထွိုင်ႏထေင်းထမ်ႏဗာႏအာငါႏ ဗွူခွဉ်ႏဟူခွဉ်ႏ အခွဉ်ႏအမျိုꩻမျိုꩻနဝ်ꩻ ကထွာခမ်းသားသီး အံႏအွꩻတာႏ လိုမ်းကိုမ်ႏနွောင်ꩻတဝ်းဒွုမ်၊ ခြွိုင်ႏသန်ꩻရေꩻတာႏ၊ ပညာႏရေꩻတာႏ၊ အလူႏအတန်ꩻတာႏ အလွန်းအလွို အဝ်ႏကုဲင်တဝ်းဒွုမ်နဝ်ꩻသွူ၊ နဝ်ꩻလုမ်ꩻတကာႏတဝ်း စွုမ်ႏနီꩻစွုမ်ႏလာ ဗွောင်တသေႏ ထာꩻတောႏထာꩻလောင်ꩻတဲင် ကထွာခမ်းသားသီးနဝ်ꩻ သေလိုပ်ꩻသေမာꩻ၊ သေထိုမ်ႏဒွုမ်စီꩻပွါꩻ၊ သေထိုမ်ႏဒွုမ်ထာꩻသေတရာꩻတဲင် ကထဲ့ဖွိုႏတဲ့ ယိန်းထဲ့ဖွိုႏထဲင်းထဲင်း၊ အနာလွို လိုꩻမျိုꩻသွတ်ꩻထိုꩻအီနွောင်ꩻဒါႏ စစွဉ်ႏအနယ်ꩻအမျိုꩻမျိုꩻ ကအဝ်ႏယားကုဲင် ပအိုဝ်ႏလိုꩻမျိုꩻခမ်းသားသီးယို ပအိုဝ်ႏသီး ယံကလွစ်ထန်ႏနွောင်ꩻနဝ်ꩻ တောႏလန်ႏဗာႏစနစ်ကုဲင်နဝ်ꩻသွူ။ စနစ်ကုဲင် ကအဝ်ႏယားပအိုဝ်ႏလိုꩻမျိုꩻ ပအိုဝ်ႏခမ်းသားသီးနဝ်ꩻ အွိုးတခေတ် အွိုးတခိန်ႏကို ပအိုဝ်ႏအွဉ်ငါတန်သီး အဆက်ဆက်ယို တောႏလန်ႏလွေꩻတဲင် ပအိုဝ်ႏလိုꩻမျိုꩻသီး အဝ်ႏတေက်ꩻနျꩻခံႏဗာႏဖဝ၊ အဝ်ႏပေ့ꩻမဲ့နားဖဝခါႏ မွန်ဗန်လꩻ ဗꩻဟန်ႏနီꩻနဝ်ꩻသွူ၊ ကွဲးတွော့ꩻ ပဒေႏသရာဇ်စနစ်ကုဲင်ယို တွိုႏနုဲင်းဟန်ႏသနီꩻ ပအိုဝ်ႏခမ်းသားသီးအခါႏ ထိုꩻမားလဲဉ်းနဲ့ဟောင်း၊ ထိုꩻမားဒွုန်းဟောင်း။ မိဉ်းဒေါ့ꩻဗာႏ ပဒေႏသရာဇ် စောက်ꩻဖါးသီးနဝ်ꩻ အဝ်ႏတဝ်းဒွုမ်လဲ့ ဝွေꩻသီးစနစ်၊ ပဒေႏသရာဇ်စနစ် အလူးအတအွိုယို တစွုတ်ꩻထိုꩻတဝ်းဒွုန်း၊ အလူးအလွီးယို အဝ်ႏစွေးအဝ်ႏဗွို့ꩻခြောႏ၊ အဝ်ႏမွန်ဗန်နေဒွုန်းနဝ်ꩻသွူ၊ ပအိုဝ်ႏခမ်းသားသီးအခါႏ ပဒေႏသရာဇ်စနစ် အဝ်ႏမွန်ဗန်တေ့ꩻနွိုင်ႏနေကထာꩻနဝ်ꩻ ပအိုဝ်ႏသီး အဝ်ႏလိုႏအွဉ်ႏသတိငါႏနဝ်ꩻသွူ။ ပဒေႏသရာဇ်စနစ်မာႏ အမျိုꩻမုဲင်ꩻဖုံႏယို အဝ်ႏမွန်ဗန်တေ့ꩻနေကထာꩻနဝ်ꩻ အခွဉ်ႏ၊ ထာꩻတောႏထာꩻလောင်ꩻ၊ ဖေင်ꩻဖင်ꩻမွန်ꩻမန်ꩻ၊ ပေ့ꩻမဲ့နားဖုံႏယို ပွိုင်းလဲင်ႏစခါ ကောပ်စွဉ်ႏပအိုတ်ႏသီး တကျွိုက်တဝ်းနဝ်ꩻမꩻ ပအိုဝ်ႏသီး တောႏလန်ႏတွိုက်ꩻထန်ႏထိုꩻနဝ်ꩻသွူ၊ စနစ်ကုဲင်ယားဒါႏလိုꩻ၊ ယားဒါႏလိုꩻမျိုꩻကရိုꩻနဝ်ꩻ ကောပ်စွဉ်ႏပအိုဝ်ႏသီး အဝ်ႏသေနဝ်ꩻမꩻ ပအိုဝ်ႏသီးနဝ်ꩻ တွိုက်ꩻထန်ႏဗာႏနဝ်ꩻသွူ။ ပအိုဝ်ႏလိုꩻမျိုꩻသီး ငမ်းလိုꩻမျိုꩻထိုꩻမား၊ ငမ်းလိုꩻမျိုꩻကုဲင်မꩻ ကတွိုက်ꩻထန်ႏထိုꩻလဲဉ်းသွူဒါႏ ပဒေႏသရာဇ်နစ်ကုဲင်ယို ထွိုင်ႏတွိုႏဟန်ႏသနီꩻ ပအိုဝ်ႏသီးအကို အဝ်ႏမွန်ဗန်၊ အဝ်ႏကျင်ꩻသုံꩻချာနဝ်ꩻ ပအိုဝ်ႏသီး ဟဝ်အွဉ်ႏသတိငါႏသွူ။ အခွဉ်ႏမိဉ်ႏရိုꩻသွူ ဗꩻတွိုႏဟန်ႏသနီꩻ ပအိုဝ်ႏခမ်းသားသီးယို ခရောင်ꩻခရာႏ တသေရိုမ်းတဝ်း၊ အကျောင်ꩻခရာႏ တသေတဝ်း၊ အခွဉ်ႏအမျိုꩻမျိုꩻယို အဝ်ႏသော့ꩻဗာႏ၊ အဝ်ႏဖေႏဗာႏ၊ အဝ်ႏခံႏဗာႏနေကနဝ်ꩻသွူ။ အနယ်ꩻတမဲဉ်ႏတဝ်းအခွဉ်ႏ၊ အမျိုꩻတမွေးတဝ်းအခွဉ်ႏ၊ ဗဟိုႏထွဉ်ႏဒျာႏတစွိုး၊ ဆꩻလကေပ်ꩻဒျာႏတမျိုꩻ၊ ခွေမိဉ်ကေပ်ꩻတခွုင်းမုဲင်ꩻတဲ့ ကေပ်ꩻဒျာႏ၊ နာꩻမိဉ်ကေပ်ꩻတခွုင်းမုဲင်ꩻတဲ့ ကေပ်ꩻဒျာႏ၊ တိကျမူဝါဒတအဲဉ်ထဝ်းအခွဉ်ႏစနစ်ယို ပအိုဝ်ႏတန်ကေပ်ꩻနုဲင်းမုဲင်ꩻတဲ့ ပအိုဝ်ႏပေႏအဝ်ႏဖေႏဗာႏဒျာႏတေ့ꩻတေ့ꩻနဝ်ꩻသွူ။ ထာꩻတောႏထာꩻလောင်ꩻမိဉ်းရိုꩻသွူလဲ့ ပအိုဝ်ႏတန်တယ်ႏအစ ဗꩻတွိုႏပအိုဝ်ႏပေႏလို့လို့ အလူးအဝ်ႏစွေႏ၊ အအေႏအဝ်ႏခြောႏနေက ကတူႏထာꩻယူႏကိုနဝ်ꩻသွူ၊ အလူႏအတန်ꩻတာႏ ဝါႏတွင်ꩻစာႏဂသောမ်ꩻတာႏ၊ ရပ်ကိုဒုံကို တယ်ႏဆို့ꩻကျောင်ꩻတာႏ မိဉ်းလူႏခံႏ၊ မိဉ်ႏကေပ်ꩻကောက်နဝ်ꩻ အွို့ꩻသောင်ခြင်ꩻအမျိုꩻမျိုꩻ၊ မိဉ်ႏတွိုႏထာꩻတောႏထာꩻလောင်ꩻဖဲ့ꩻနဝ်ꩻ အာထဲင်းအလူႏအတန်ꩻ ပွန်းဆီပွန်းရျာꩻလဲ့ တငမ်းတဝ်းအလို့၊ အဝ်ႏလမ်းစာအံႏ၊ အဝ်ႏဟံႏစာကြောင်း တောႏလောင်ꩻဒျာႏနဝ်ꩻသွူ၊ ယိုနဝ်ꩻလဲ့ ပဒေႏသရာဇ်စနစ်ကုဲင် အလူးတစွုတ်ꩻတဝ်းဒွုန်းနဝ်ꩻသွူ။ ဖေင်ꩻဖင်ꩻမွန်ꩻမန်ꩻယိုလဲ့ ယားကုဲင်အီလိုꩻ၊ မာꩻထိုꩻမားနွဗာင်ꩻအီ စွိုးခွိုꩻလက်နက်ခြွိုင်းခြိုꩻတမျိုꩻကရိုꩻနဝ်ꩻ ပွိုင်းလဲင်ႏခါ ပအိုဝ်ႏတန်ပအိုဝ်ႏပေႏသီး အဝ်ႏသေနဝ်ꩻမꩻ တွိုက်ꩻထန်ႏထိုꩻနဝ်ꩻသွူ၊ ထွိုင်ႏတွိုႏခေတ်ယိုခါ ပအိုဝ်ႏတန်ပအိုဝ်ႏပေႏသီးနဝ်ꩻ ဖေင်ꩻဖင်ꩻမွန်ꩻမန်ꩻယို ပအိုဝ်ႏလိုꩻမျိုꩻတာႏ အန္တရာယ်ႏအဝ်ႏအီ၊ နီနမ်းအတာႏ အန္တရာယ်ႏအဝ်ႏအီ၊ နီလမ်းအတာႏ အကျိုꩻစီꩻပွါꩻထဲ့သုမ်ꩻအီဒါႏယို အဝ်ႏလိုႏသေ အဝ်ႏလိုႏအွဉ်ႏသတိငါႏထွူ၊ ပွိုးဖေင်ꩻဖင်ꩻမွန်ꩻမန်ꩻတွော့ꩻ ပအိုဝ်ႏလိုꩻယွဲးသီးဖဝ တဖူꩻဖေႏကတရွို့ꩻအီဗာႏမွုန်းနဝ်ꩻ အဝ်ႏလိုႏတွိုက်ꩻထန်ႏချာ၊ အဝ်ႏလိုႏထွားနုဲင်းငါႏ ပအိုဝ်ႏအွဉ်ငါတန်သီး ခင်ႏကာနဝ်ꩻသွူ။ ကကေပ်ꩻဒါႏ အခွဉ်ႏဖုံႏယို တရာꩻဝင်ႏနဲ့ ဝင်ႏတဝ်းနဲ့၊ ထာꩻတောႏထာꩻလောင်ꩻယို ခမ်းသားသီးကျင်ꩻကုဲင်အီနဲ့ ကုဲင်အီတဝ်းနဲ့၊ သျေင်ႏကံသင်ꩻနဲ့ သင်ꩻတဝ်းနဲ့၊ ဖေင်ꩻဖင်ꩻမွန်ꩻမန်ꩻယို သုံꩻစွယ်ꩻဖြေꩻစာသင်ꩻနဲ့ သင်ꩻတဝ်းနဲ့နဝ်ꩻ အဓိက ကထွာဒါႏ ခမ်းသားသီးတဖြာꩻစီႏ အဝ်ႏလိုႏဆင်ႏချင်ႏသေချာနွောင်ꩻ၊ အွဉ်ႏသတိꩻချာနွောင်ꩻ ထာꩻသေတရာꩻယို ထွာအထျꩻသွူ၊ ထာꩻသေတရာꩻယိုဖုံႏ ဖေႏကအဝ်ႏမွုန်းနဝ်ꩻ ပေ့ꩻမဲ့နား။ နဝ်ꩻမꩻ ပဒေႏသရာဇ်စနစ်ကုဲင် အသန်သွတ်ꩻပေ့ꩻမဲ့ ပေ့ꩻနားနယ်ꩻယို တယံတဝ်းလဲ့ ပအိုဝ်ႏသီးအအဝ်ႏသေသေ၊ ဟန်ႏသနီꩻ ပအိုဝ်ႏသီးအချင်ꩻချင်ꩻကို တဖြာꩻတွမ်ႏတဖြာꩻအခါႏ အဝ်ႏပေ့ꩻချာလွဝင်ꩻမဲ့နား၊ ပအိုဝ်ႏခမ်းသားသီး ဖေႏကသေ ဖေႏကဒါႏမွုန်းနဝ်ꩻ အဝ်ႏပေ့ꩻခမ်းသားသီးမဲ့နားယို ပအိုဝ်ႏဒုံယဟန်ႏတောမ်ႏ ပအိုဝ်ႏအွိုင်ႏယဟန်ႏဖုံႏနဝ်ꩻ အဝ်ႏထွာနေကနဝ်ꩻသွူ၊ ခမ်းသားဒုံသားသီး ကအီႏလꩻအီဒါႏ ထာꩻသေတရာꩻဖဲ့ꩻ နုဲင်းလိတ်သေသင်ꩻဖုံႏယို ဖေႏစာဖေႏဟော်ꩻတဝ်း ခမ်းသားသီးနဝ်ꩻ ထွာကျင်ꩻသုံꩻချာလဲဉ်း ပဒေႏသရာဇ်စနစ်အမွီႏနဝ်ꩻသွူ။[၁][၂]