ပအိုဝ်ႏခမ်းသားအတာႏ
"ပအိုဝ်ႏခမ်းသားအတာႏ တာႏဝွန်ႏခံႏမုတွမ်ႏ ဒီမိုကရေသီအဒီႏအရာႏ အဝ်ႏလꩻလဲဉ်းနဲ့" မန်းခမ်းနေင်ႏ အလီꩻအွဉ်ႏကုဲင်ချာ နွို့ကူꩻငါနေင်ႏတသာ အခိန်ႏခါႏကာႏလကိုနဝ်ꩻ ခမ်းထီအစိုႏရလဲ့ပြောင်ꩻလုဲင်ႏတသာတွော့ꩻ အစိုႏရတသာစူကိုနဝ်ꩻ ကလဲဉ်းခိုႏချာ ပွိုင်းဝွို့တွမ်ႏနဲင်ႏငံႏရေꩻပဲစ်မုတဲင် ကအဝ်ႏခံထောင်ႏသား၊ ကခံႏဗာႏထွို့ꩻတရာꩻသားဖုံႏ လွစ်ငိမ်ꩻချံꩻသာႏ အွဉ်ႏစွꩻဖေႏ ဧပြီလာတွင်ꩻကိုနဝ်ꩻသွူ။ နဝ်ꩻမꩻ မန်းခမ်းထီ နေင်ႏတသာ မင်္ဂလာႏအဝ်ႏခိန်ႏယို အစိုႏရတသာစွိုꩻလဲ့ တွမ်ႏပဲစ်မုပဲစ်တံႏ ကအဝ်ႏတွိုႏကအဝ်ႏခံႏဗာႏ ခမ်းသားထီသားအတာႏ လွစ်ငိမ်ꩻချံꩻသာႏ ကအွဉ်ႏစွꩻလွေꩻဖေႏနုဲင်းယိုနဝ်ꩻ ခမ်းသားသီး ကလွိုက်ဒင်ႏဒါႏအစိုႏရယို ထွာရီးသွတ်ꩻ ထွားခုမ်မာꩻချာ ခမ်းသားအရေꩻနဝ်ꩻသွူ။ ဒီမိုကရေစီ ကရိုꩻဒါႏ ခမ်းသားအုပ်ချုပ်ရေꩻစနစ်ယို ကအုပ်ချုပ်ဒါႏ ခမ်းထီအာႏဏာႏနဝ်ꩻ အဝ်ႏဒျာႏခမ်းသားစူကိုသွူ၊ ကွပ်ခမ်းသား ထောက်ခံႏလွိုက်ဒင်ႏတွော့ꩻ ထင်ႏထွာအစိုႏရတဲင် ခမ်းသားဖေႏအပ်ဒါႏ အာႏဏာႏ၊ ခမ်းသားကထောက်ခံႏဒါႏယို အွဉ်ႏဒျာႏတန်ႏဖိုꩻ၊ ခမ်းသားအရေꩻယို အွဉ်ႏအရေꩻခုမ်မာꩻလွေꩻနဝ်ꩻ ဒီမိုကရေစီအစိုႏရသီး တာႏဝွန်ႏနဝ်ꩻသွူ။ ၂၀၁၅-မဲးပွယ်ꩻကို ကွပ်ခမ်းသားသီး ထောက်ခံႏဖေႏအာႏတဲင် အဲန်အယ်ဒီ ထင်ႏထွို့ꩻဗူႏလꩻနွောင်ꩻအစိုႏရ၊ ထွာအစိုႏရ လꩻမွူးနီꩻပဲင်ႏကိုအခိန်ႏတွင်ꩻ သမ္မတတွမ်ႏနဲင်ႏငံႏတောႏ အတွိုင်ႏပင်ႏခံႏ ဒေါ်အောင်ဆန်းစုကြည်သီး ဒေါ့ꩻလွေꩻနေင်ႏသာငဝ်းငွါ မိန်းခွန်းနဝ်ꩻသွူ၊ မဉ်ႏထွားယင်းနုဲင်း သမ္မတဦးထင်ကျော် ငဝ်းမိန်းခွန်းကိုနဝ်ꩻ ကွပ်စွဉ်ႏခမ်းသားထုယို ထောက်ခံႏဖေႏအာႏမဲး လွိုက်ရွေꩻပွယ်ꩻကိုနဝ်ꩻတဲင် နီသွဉ်းသီး အစိုႏရတသာစွိုꩻယိုလဲ့ ပြောင်ꩻထူႏလꩻနွောင်ꩻဗာႏ ခမ်းထီတာႏဝွန်ႏအကျောင်ꩻ၊ အစိုႏရတသာယို ခမ်းထီအတာႏ အမျိုꩻသာꩻသဗော့ꩻဆွိုင်ꩻရေꩻ(အမျိုးသားရင်ကြားစေ့ရေး)၊ ခမ်းကိုငိမ်ꩻချံꩻရေꩻ၊ ဒီမိုကရေစီဖက်ဒရယ်ပြည်ထောင်စုမူ ကခေႏခံႏဒါႏ ထွို့ꩻဗူႏပုံႏ အခေႏခံႏဥပဒေႏပေါႏလွဉ်ရေꩻ၊ လိုꩻမုအံအဝ်ႏဖဝ ထင်ႏထိုရေꩻဖုံႏယို မဉ်ႏဖောႏလွေꩻအနမ်းအခြုံနဝ်ꩻ ခမ်းသားသီး ယံခြွဉ်းခုမ်မာꩻညီꩻအကျောင်ꩻဖုံႏနဝ်ꩻသွူ။ နဝ်ꩻသွူတကာႏတဝ်း နီသွဉ်းသီးအစိုႏရ ချို့ꩻယွင်ꩻချက်ဖုံႏယိုတဲ့ ဝွေႏဖန်ႏယီးနယ်၊ အဝ်ႏလိုႏမာꩻသင်ꩻဒါႏဖုံႏယို ဖေႏကျံႏဉာဏ်ႏ အွဉ်ႏနယ်နွောင်ꩻဒျာႏနဝ်ꩻ အဝ်ႏဒွူႏယောင်းလွေꩻဆွုမ်ႏ ခမ်းသားသီးပါဝင်ႏမုꩻနဝ်ꩻ ထီႏဗာႏနဝ်ꩻသွူ။ မဉ်ႏထွားနုဲင်း နဲင်ႏငံႏတောႏအတွိုင်ႏပင်ႏခံႏ ဒေါ်အောင်ဆန်းစုကြည်ငဝ်းငွါ မိန်းခွန်းကိုနဝ်ꩻလဲ့ နီသွဉ်းသီးအစိုႏရနဝ်ꩻ ရေႏမိုးလွေꩻ အမျိုꩻသာꩻသꩻဗော့ꩻဆွိုင်ꩻရေꩻအစိုႏရတဲင် ခမ်းသားကဖေႏ နီသွဉ်းသီးထောက်ခံႏမဲးတဲ့နဝ်ꩻ၊ တဖေႏတဝ်းနီသွဉ်းသီး ထောက်ခံႏမဲးတဲ့နဝ်ꩻ အစိုႏရယို အီႏထူႏတာႏဝွန်ႏဒျာႏအကျောင်ꩻ၊ ငင်းယာႏသꩻအင်ယာႏ တခွဲꩻချာꩻတဝ်း ဒီမိုကရေစီနယ်ꩻအလꩻ ခမ်းသားကလွိုက်ဒင်ႏဒါႏ အစိုႏရယို လိုꩻတွိုင်ꩻအတာႏ၊ ခမ်းသားထီသား ကားကအဝ်ႏအတာႏ ထူႏတာႏဝွန်ႏဗာႏအကျောင်ꩻ၊ နီခမ်းထီယို တရာꩻဥပဒေႏတခြို့ရေꩻကရိုꩻဒါႏ ခမ်းသားထီသား ကားလိုꩻအတာႏ နေးထူႏတရာꩻ ဥပဒေႏအရဲးအကမ်း ဖေႏကအဝ်ႏဗာႏ၊ တရာꩻဥပဒေႏကရိုꩻနဝ်ꩻ တရာꩻတွောင်းတရျားဗာႏ၊ မွေးမဲဉ်ႏစွို့ꩻစွဉ်ႏ တရာꩻဥပဒေႏလိုမ်းဗဉ်ႏမုယို ခံႏစာꩻဗာႏဗွိုန်ဗွိုန်အတွိုင်ꩻ တရာꩻဥပဒေႏ ဖေႏပဲစ်မုယိုလဲ့ ခံႏထူႏဗာႏပီပီ ကရိုꩻဒါႏ တရာꩻဥပဒေႏအရဲးအကမ်းယို အဝ်ႏဗာႏတသွိုန်သွိုန်ဝင်ꩻ စတဲင်အဝ်ႏပါလွေꩻနုဲင်းနဝ်ꩻနဝ်ꩻ ထီႏဗာႏနဝ်ꩻသွူ။ တွမ်ႏဒီမိုကရေစီနယ်ꩻအလꩻ ခမ်းသားလွိုက်ဒင်ႏတွော့ꩻ ကထင်ႏလွဉ်ဒါႏ အစိုႏရတသာယို ခမ်းသားသꩻဆန္ဒအရေꩻယို အွဉ်ႏအထျꩻတွော့ꩻ အီႏခုမ်မာꩻလွေꩻ အခေႏအနေႏနဝ်ꩻ အီႏတဗွိုန်တဝ်း နုဲင်းစဲ့ꩻအာႏဏာႏဗွေႏ အစိုႏရစူကိုခိန်ႏ ခမ်းသားသꩻဆန္ဒ ကမဉ်ထွာတမုဲင်ꩻမုဲင်ꩻထွာ ဝွေꩻသီးမဉ်မာꩻတမုဲင်ꩻတဲ့ အဝ်ႏမာꩻဒျာႏနဝ်ꩻသွူ။ နဝ်ꩻမꩻ မဉ်ႏတဲက်ထွားတွမ်ႏ မန်းခမ်းထီအခေႏနေႏနဝ်ꩻ ကွပ်ခမ်းသားသီး သေနာႏလွဉ် ဒီမိုကရေစီတဲင် တွမ်ႏဒီမိုကရေစီအာႏတွော့ꩻ မာꩻပြောင်ꩻလုဲင်ႏနွောင်ꩻ အစိုႏရနဝ်ꩻသွူ။ ယိုခါ မန်းခမ်းထီနဝ်ꩻ ခမ်းသားသီး ကမဲဉ်ထီႏကမဲဉ်လꩻဒါႏ ဒီမိုကရေစီအစိုႏရနဝ်ꩻ အဝ်ႏလွဉ်လဲဉ်းလဲ့ တွိုႏခမ်းရင်ꩻသားလိုꩻမျိုꩻပေႏခြာနဝ်ꩻ ဒီမိုကရေစီနယ်ꩻယို အဗွေတဗာႏ ကျင်ꩻသုံꩻခွင်ꩻအဝ်ႏလꩻနေဟောင်း၊ ကျင်ꩻသုံꩻခွင်ꩻကလꩻအတွိုင်ꩻ ဒီမိုကရေစီအစိုႏရ အစဲစ်အမဲန်ႏ ထန်ႏလွဉ်နေဟောင်း--။ တွမ်ႏပအိုဝ်ႏခမ်းသား ထောက်ခံႏမဲးတွော့ꩻ ကထွာလꩻလွဉ်ဒျာႏ ပအိုဝ်ႏခမ်းသား နမ်းခြောင်ꩻဖုံႏ သေနာႏအွဉ်ႏတန်ႏဖိုꩻဒျာႏ ပအိုဝ်ႏခမ်းသား ဖေႏအာႏမုတဲင်တွော့ꩻ ပအိုဝ်ႏခမ်းသားအတာႏ တာႏဝွန်ႏခံႏဖေႏမု၊ တရာꩻဥပဒေႏတွောင်းတသွုန်မု ဖေႏကအဝ်ႏနဝ်ꩻ လိုႏအွဉ်ႏရေꩻမာꩻလွေꩻဖေႏငါႏနဝ်ꩻသွူ။[၁][၂]