ပအိုဝ်ႏချင်ꩻရက်ဗဲင်းဝင်ꩻ

"ပအိုဝ်ႏချင်ꩻချင်ꩻ ရက်ဗဲင်းဝင်ꩻ" နီပအိုဝ်ႏလိုꩻမျိုꩻယို မဉ်ႏအွော့ꩻလန်ႏချာ အတိတ်သမဲင်ꩻကိုလဲ့နောဝ်ꩻ၊ အဲ့ꩻမဲ့မဉ်ႏထွားဗာႏတွမ်ႏ ပစ္စုပ္ပန်ႏယိုခါခဲ့ꩻခဲ့ꩻလဲ့နောဝ်ꩻ ကဲဉ်းအာအာ အရက်တောဝ်းအစွိုး၊ အခွိုꩻ၊ အနွယ်ႏ၊ အဆုံꩻဖုံႏနောဝ်ꩻသွူ၊ အထီႏချာ အစွိုးခွိုꩻအလိုꩻမျိုꩻယို ထီႏပေႏချာ၊ ထင်းဖွီချာ၊ တေက်ꩻနျꩻချာ၊ အံႏနွောင်ꩻချာလွ ပငါပရာꩻဖုံႏနောဝ်ꩻသွူ။ ပညာႏသားလဲ့ နေးတွမ်ႏအပညာႏစွန်ꩻအာႏ၊ ရွဉ်သားလဲ့ နေးတွမ်ႏအရွဉ်မာႏန၊ ခွုမ်စူခြွိုင်းသားလဲ့ နေးတွမ်ႏအစွူႏအာႏတွော့ꩻ နွောင်ꩻရာꩻနောဝ်ꩻ အောဝ်ႏအံႏတေက်ꩻနျꩻချာလွဝင်ꩻဖုံႏနောဝ်ꩻသွူ။ လိုꩻသေလိုꩻဒါႏသားလဲ့ ဝွေꩻသီးကသေကဒါႏအတွိုင်ꩻ ငမ်းမွေးစွဉ်ႏဝင်ꩻသေထွꩻလွဉ်ꩻနုဲင်း ပလို့ꩻဗဉ်ႏခါꩻ၊ အွဉ်ႏသေꩻသူႏခါꩻ၊ ဒေါ့ꩻနယ်တောဝ်းဝင်ꩻ၊ သွဉ်နယ်တောဝ်းဝင်ꩻ၊ အွဉ်ႏနယ်တောဝ်းဝင်ꩻ၊ ပလို့ꩻသေꩻသူႏခါꩻလို့ဒျာႏဝင်ꩻဖုံႏနောဝ်ꩻသွူ။ ရွဉ်သားလဲ့ နုဲင်းနောဝ်ꩻနေနေ၊ ထီႏဒျာႏဝင်ꩻရွဉ်တအောဝ်ႏတောဝ်းသားနောဝ်ꩻ မတ်စွဉ်ႏနုဲင်းထွီႏတွော့ꩻ မဉ်ဒေါ့ꩻဝင်ꩻနုဲင်းမုဲင်ꩻဒေါ့ꩻ၊ မဉ်မာꩻဝင်ꩻနုဲင်းမုဲင်ꩻမာꩻ၊ မဉ်ႏဒေါ့ꩻတရာꩻစွဉ်ႏဝင်ꩻလဲ့ ရွဉ်ဆေ့ꩻသားနောဝ်ꩻ အွဉ်ႏထွာစွဉ်ႏဝင်ꩻ တရာꩻသွုမ်ꩻသားကဲဉ်းအာအာ၊ မဉ်ႏလုပ်ꩻမာꩻထူႏငါးယို့ꩻရွဉ်လဲ့ အွဉ်ႏတန်စွဉ်ႏရွဉ်အေႏ ထောက်ဖေႏဝင်ꩻလဲ့ ထောက်ဖေႏဒျာႏ တွမ်ႏခွဉ်းစျူဖုံႏနောဝ်ꩻသွူ။ ခွုမ်စူခြွိုင်းသားလဲ့ ရိုꩻဒျာႏအာႏဏာႏအောဝ်ႏသော့ꩻ ဝွေꩻသီးစူကိုတဲင် မဉ်မာꩻနွောင်ꩻဝင်ꩻနုဲင်းမုဲင်ꩻလဲ့ မာꩻပြွိုင်းပြင်းလေႏကြွို့ꩻဒျာႏ၊ ထီႏအာႏဏာႏ တအောဝ်ႏတောဝ်းသားယို မတ်စွဉ်ႏနုဲင်းဖိုးပနား၊ မီႏမဲဉ်ဆွမ်ꩻလဲ့ ဆွမ်ꩻဒျာႏ၊ မီႏမဲဉ်တွယ်ႏနက်စွိုင်ကျꩻလဲ့ တွယ်ႏနက်စွိုင်ကျꩻဒျာႏ၊ လောက်ꩻအံႏ၊ ဆျာႏအံႏ၊ တွယ်ႏတံႏတငီႏတငါစွဉ်ႏဝင်ꩻဖုံႏလဲ့ အောဝ်ႏဟွိုန်ထီႏဗာႏ ဗောႏဗယ်ႏနောဝ်ꩻသွူ။ အကျောင်ꩻလံꩻခရာႏ နုဲင်းဆꩻကီဖုံႏယို တထွာထွိုက် တထွာသင်ꩻတောဝ်း၊ ကထွာလွဉ်ဗာႏနောဝ်ꩻ ပွိုးစွဉ်ႏနီခွိုꩻချင်ꩻချင်ꩻ ရက်တောဝ်းဝင်ꩻ၊ သꩻဓာတ်ရက်စွိုးခွိုꩻ လိုꩻမျိုꩻအလောင်း အဲဉ်ထောဝ်း၊ ထာꩻထီႏအဲဉ်ႏရောင်ငါႏဝင်ꩻ၊ စွိုးခွိုꩻအလောင်း သစ္စာႏအဲဉ်ထောဝ်းငါႏဝင်ꩻမꩻ ထွာလွဉ်ဗာႏ အခရာႏနုဲင်းဆꩻကီဖုံႏယိုနောဝ်ꩻသွူ။ လိုꩻယို အမဉ်ဒါႏခွိုင်းမုဲင်ꩻဒါႏ၊ အရွဉ်ခံꩻဥစ္စာႏ မဉ်အာနုဲင်းမုဲင်ꩻအာ၊ ဩဇာႏအာႏဏာႏ မဉ်သန်ခွိုင်းမုဲင်ꩻသန် ပေါႏသꩻဓာတ် ရက်စွိုးခွိုꩻလိုꩻမျိုꩻ တအောဝ်ႏတောဝ်း၊ စွိုးခွိုꩻအလောင်း သစ္စာႏမဉ်ႏတအောဝ်ႏဒင်ႏတောဝ်းနောဝ်ꩻ ဝွေꩻနောဝ်ꩻတဖြာꩻ၊ ဝွေꩻသီးဖုံႏနောဝ်ꩻတစွိုꩻ ထွာအီထဲင်း စွိုးခွိုꩻရန်ႏသူႏ၊ စွိုးခွိုꩻအဆူႏအနာႏဖုံႏ၊ ထွာဒျာႏလိုꩻယားကုဲင် မာꩻသီချာ အစွိုးခွိုꩻလိုꩻမျိုꩻနောဝ်ꩻ ပီဝင်ꩻသွူ။ ဥပမာႏပွုံႏခွိုင်ꩻ မဉ်ႏတွိုင်ꩻနယ်ꩻဗာႏ အခရာႏတစွိုးမွိုင် နုဲင်းနီမန်းခမ်းထီကို ယိုခါ လိုꩻမူႏဒါႏလိုꩻမူႏသေ သမ်းခြွေဥစ္စာႏအာ၊ ခမ်းထီအာႏဏာႏ သမ်းအောဝ်ႏသော့ꩻပါထဲင်းအစူကို နုဲင်းဒျာႏမွိုးဖြားစုကြည်နောဝ်ꩻမွိုင် ဝွေꩻမူႏနောဝ်ꩻ ပွိုးစွဉ်ႏအသꩻဓာတ် ရက်ချာအစွိုးခွိုꩻလိုꩻမျိုꩻ၊ အဘာႏသာႏ၊ အခမ်းထီအလောင်း အဲဉ်ထောဝ်းငါႏနောဝ်ꩻမꩻ ဝင်ꩻလိုꩻမျိုꩻ၊ ဝင်ꩻဘာႏသာႏဖုံႏ အောဝ်ႏလွဉ်နွို့ပြုံႏပြင်ႏ၊ အောဝ်ႏလွဉ်စေꩻအံႏဆျာႏတသဉ်ဆော့ဒျာႏ လိုꩻနီခမ်းထီကိုသားဖုံႏနောဝ်ꩻ အောဝ်ႏသေထွꩻဒျာႏ မွေးတောဝ်းနဲ့။ နိပအိုဝ်ႏကိုလဲ့ ထွိုင်ႏသေထွိုင်ႏဒါႏ၊ ပညာႏထွိုင်ႏအောဝ်ႏ၊ ရွဉ်ခံꩻထွိုင်ႏအာ၊ အာႏဏာႏသမ်းအောဝ်ႏသော့ꩻပါ ဝွေꩻသီးစူကို မာꩻဟံႏပွယ်ꩻစာꩻ အံႏစာထိုꩻပအိုဝ်ႏဟံႏနယ်ႏ ဧရိယာႏ နုဲင်းတောင်ႏကီအသောင်အရင်ꩻဖုံႏနောဝ်ꩻ စောင်းမꩻထာꩻဆေ့ꩻဟောင်း၊ တွမ်ႏအာႏဏာႏတဲင် သိမ်ꩻခြေင်ဝင်ꩻဟံႏ စာအံႏတောဝင်ꩻလိုꩻမျိုꩻဘာႏသာႏဖုံႏနောဝ်ꩻ ပအိုဝ်ႏတာႏ သွုမ်ꩻတိန်ꩻငါႏတကားမုဲင်ꩻဟောင်း၊ ကထွာဗာႏနုဲင်းယိုလဲ့ ပွိုးစွဉ်ႏသꩻဓာတ်ရက်စွိုးခွိုꩻလိုꩻမျိုꩻ အဲဉ်ထောဝ်း၊ ပွိုးစွဉ်ႏစွိုးခွိုꩻအလောင်း သစ္စာႏအဲဉ်ထောဝ်း၊ ပွိုးစွဉ်ႏအချင်ꩻချင်ꩻ ရက်တောဝ်းလွဝင်ꩻဖုံႏနောဝ်ꩻသွူ။ ကတဲမ်း၊ ကနယ်ꩻ၊ ကဒေါ့ꩻဗာႏ ပညာႏအောဝ်ႏသား၊ ရွဉ်ခံꩻအောဝ်ႏသား၊ အာႏဏာႏအောဝ်ႏသား နုဲင်းကီဖုံႏယိုနောဝ်ꩻ ယေဘုယျအနေႏ အောဝ်ႏထွာလွေꩻ နီမဲ့ဆꩻလနုဲင်းနောဝ်ꩻတွော့ꩻ တဲမ်းဗာႏ၊ ဒေါ့ꩻဗာႏ၊ နယ်ꩻလွေꩻဗာႏနုဲင်းနောဝ်ꩻသွူ၊ ကတဲမ်း၊ ကနယ်ꩻ၊ ကဒေါ့ꩻလွေꩻဗာႏနုဲင်းယိုအကို ကလျာဏသူႏတောႏကောင်ꩻ ဝံသာနုရက္ခိတ လိုꩻသꩻဓာတ်ရက်စွိုးခွိုꩻသား တပါသော့ꩻတောဝ်းနောဝ်ꩻသွူ။ ဝံသာနုရက္ခိတ ကလျာဏသူႏတောႏကောင်ꩻသီးဖုံႏနောဝ်ꩻ ပေါႏစွိုးခွိုꩻတွက် လိုꩻမျိုꩻတာႏနောဝ်ꩻ ဝွေꩻသီးသွီႏသက်ပီယာႏဖုံႏယို ထွာဗာႏစွဉ်ႏဖါႏဝါထွူ ခွိုꩻရန်ႏသူႏကားကအောဝ်ႏ တွိုက်ꩻခြူဒျာႏစွူစွူနောဝ်ꩻသွူ။ နီပအိုဝ်ႏပိုစွုမ်ႏပါꩻ/ဖြာꩻလဲ့ လွူးဒျာႏသွော့ဝင်ꩻ သူႏတောႏကောင်ꩻ လိုꩻရက်ခွိုꩻသီးသꩻဓာတ်တွော့ꩻ မီႏထီႏ၊ မီႏခွဲး၊ မဉ်ႏမော့ꩻ၊ မဉ်ႏဟွိုန်လွဉ် ပအိုဝ်ႏမော့ꩻအယပ်ꩻအခုဲင်ႏနောဝ်ꩻ နွောင်ꩻရာꩻ၊ ဒါႏရာꩻ၊ သေရာꩻ နေးတွမ်ႏသꩻရက်ခွိုꩻအစဲစ်အမဲဉ်ႏတဗာႏ အွဉ်ဝင်ꩻအောဝ်ႏလိုႏစွီႏကိုငါႏဝင်ꩻနောဝ်ꩻသွူ။ နုဲင်းကလဲဉ်းခိုႏချာနောဝ်ꩻ ထီႏသွူပါꩻအံႏဆျာႏ နီပအိုဝ်ႏ၊ ဟွိုန်သွူပါꩻအံႏနွောင်ꩻနီပအိုဝ်ႏလဲ့ မာꩻနုဲင်းဒျာႏတသေတောဝ်း၊ တထီႏတောဝ်း၊ တဟွိုန်တောဝ်းတွော့ꩻ ဗဲ့ꩻလွဒျာႏအနမ်း ပငါပရာꩻတဲင် ဝင်ꩻလိုꩻမျိုꩻဘာႏသာႏလင် ထီႏနီပအိုဝ်ႏနောဝ်ꩻ အရိုꩻစွဉ်ႏလိုꩻအွူးဟွူခွိုꩻနွယ်ႏကွေႏကွေႏနောဝ်ꩻသွူ။ ပွိုးတမုဲင်ꩻ ပအိုဝ်ႏယို ဝင်ꩻမွော့ရိုꩻဗာႏတွိုႏ လိုꩻအွူးဟွူခွိုꩻနွယ်ႏဟောင်းနဲတဲင် အလိုꩻချင်ꩻချင်ꩻ၊ အဒုံကိုချင်ꩻချင်ꩻ၊ အဖူးဝေးချင်ꩻချင်ꩻငါတဲ့ အံႏနွောင်ꩻမဉ်ႏလꩻအံႏနွောင်ꩻ၊ အံႏဆျာႏမဉ်ႏလꩻ အံႏဆျာႏ၊ လောက်ꩻအံႏလဲဉ်အံႏမဉ်ႏမꩻ လောက်ꩻလဲဉ်ချာလွဒျာႏဝင်ꩻ ကဲဉ်းအာအာနောဝ်ꩻသွူ။ နုဲင်းအာႏဏာႏအောဝ်ႏသားလဲ့ နီလိုꩻမျိုꩻတွမ်ႏပါꩻလိုꩻမျိုꩻ အတရေင်(ပျဿနာႏ)မဉ်ႏထွာလွဉ် တစွိုးစွိုး၊ ဥပမာႏ- ပါꩻကာꩻတလူႏသွူ နီပအိုဝ်ႏဆိုင်ကယ်လဲ့ အောဝ်ႏယွူးဒျာႏ ပအိုဝ်ႏပိုအမာႏ၊ အောဝ်ႏဖေႏတံႏချာဒျာႏ ပအိုဝ်ႏပို၊ အောဝ်ႏအုံဒျာႏ ဝင်ꩻလိုꩻမျိုꩻဘာႏသာႏ အရေꩻကဲဉ်းအာအာနောဝ်ꩻသွူ။ ရွဉ်သားပွယ်ꩻစာꩻခန်းတယောဝ်း နီကွန်ႏယို အခန်ဖေႏကထင်ႏ၊ လုပ်ꩻမာꩻသား ဖေႏကအံႏဗာႏအရေꩻနောဝ်ꩻ တယူႏခံႏဖေႏကိုတောဝ်းတွော့ꩻ ဝင်ꩻမဉ်ႏလွဉ်ဖြေꩻခွိုင်းယိုခွိုင်းနောဝ်ꩻလဲ့ အီႏအွဉ်ႏယွမ်ꩻဖေႏအခန်နောဝ်ꩻ ညာꩻ၊ အောဝ်ႏတေက်ꩻနျꩻခါꩻပါသမ်းထဲင်း ထာꩻလုပ်ꩻသားအလောင်းနောဝ်ꩻသွူ။ ကွပ်နောဝ်ꩻမꩻ နီပအိုဝ်ႏပိုလီꩻသီးဖုံႏဟွေး- ခွိုင်းယိုမာꩻငါ နီလိုꩻချင်ꩻချင်ꩻ အောဝ်ႏလိုႏရက်ငါႏလဲဉ်းသွူဝင်ꩻ၊ နီပအိုဝ်ႏချင်ꩻချင်ꩻ အောဝ်ႏလိုႏတေက်ꩻနျꩻချာမွိုန်းဒွုမ်ဝင်ꩻ၊ အောဝ်ႏလိုႏထင်းဖွီထီႏပေႏချာမွိုန်းတောဝ်း စွိုးခွိုꩻလိုꩻမျိုꩻ၊ နီပအိုဝ်ႏတသေတောဝ်းဖြာꩻ ဖေႏကသေ၊ ကဒါႏတောဝ်းဖြာꩻ ဖေႏကဒါႏ၊ ကယံတောဝ်းဖြာꩻ ဖေႏကယံ၊ ကထင်တောဝ်းဖြာꩻ ဖေႏကထင်နောဝ်ꩻ အွဉ်ဝင်ꩻသွဉ်နယ်သွော့၊ အွဉ်နယ်သွော့၊ ဗွောင်နယ်သွော့၊ မူဖေႏသွော့၊ စွဲကိုသွော့၊ ရက်သွော့ဝင်ꩻ ခွိုꩻပအိုဝ်ႏဖုံႏ ပငါပရာꩻအကျောင်ꩻ---။ ဝင်ꩻလိုꩻမျိုꩻတွမ်ႏ နီလိုꩻမျိုꩻ မဉ်ႏထွာလွဉ် ပျဿနာႏနောဝ်ꩻ မဲဉ်ႏမဲဉ်ႏမာႏမာႏ အုံဒျာႏသွော့ နီလိုꩻဖဲ့ꩻ၊ ဝင်ꩻဘာႏသာႏတွမ်ႏနီဘာႏသာႏ အယပ်ꩻအခုဲင်ႏမဉ်ႏအောဝ်ႏလဲ့ စွဲပင်ႏကိုရီးရီးဖေႏဒျာႏသွော့ နီဘာႏသာႏ၊ မဉ်ႏထီႏ၊ မဉ်ႏခွဲ၊ မဉ်ႏဟွိုန်သွူ နီလိုꩻမျိုꩻတွမ်ႏနီဘာႏသာႏ မော့ꩻထာꩻယပ်ꩻခုဲင်ႏလဲ့ တလဲင်ႏချင်ꩻ ထွိုင်ႏတရူကယ်ႏထန်ႏကိုဖေႏသွော့။ နီလိုꩻမျိုꩻတွမ်ႏ နီဘာႏသာႏ ဝင်ꩻခွေါင်းဆာတတွာထꩻနာဝါယောဝ်း အောဝ်ႏလိုႏသꩻဆာဒါႏ၊ အောဝ်ႏလိုႏသဲင်ꩻသꩻကို၊ မဉ်ႏဟွိုန်ကဲဉ်း၊ ဟွိုန်ဆာဒါႏနောဝ်ꩻမꩻ သꩻဓာတ်ရက်ချာစွိုးခွိုꩻ၊ ဘာႏသာႏယို အီႏတဖြွတ်ꩻထန်ႏလွဉ်၊ သꩻဓာတ်ရက်ခွိုꩻဘာႏသာႏ တဖြွတ်ꩻလွဉ်တသေႏမꩻ ခွိုꩻဘာႏသာႏသွီႏ အောဝ်ႏလျားတသေႏတဲင် သေရက်ချာဒါႏ ခွိုꩻဘာႏသာႏ၊ မဉ်ႏသေရက်ဒါႏ ခွိုꩻဘာႏသာႏမꩻ သေထိန်ꩻထွားကို ခွိုꩻဘာႏသာႏသꩻအောဝ်ႏ၊ ထိန်ꩻထွားကို ခွိုꩻဘာႏသာႏမꩻ ခွိုꩻဘာႏသာႏထိုꩻမားတောဝ်းနောဝ်ꩻသွူ။