ပအိုဝ်ႏခွိုꩻယာႏ
"ပအိုဝ်ႏခွိုꩻယာႏ လိုႏသေနာႏ" ယိုနဝ်ꩻ ရီးရီးအွဉ်အွဉ် အီႏတဲမ်းနယ်လွေꩻ ဗုဒ္ဓဘာႏသာႏအကျောင်ꩻသွူ။ ဗုဒ္ဓဘာႏသာႏကရိုꩻနဝ်ꩻ "ဗုဒ္ဓ"တငွါ၊ "ဘာႏသာႏ"တငွါ ဖꩻဗာႏနီငွါသွူ။ ယိုနီငွါအကို "ဗုဒ္ဓ"ကရိုꩻနဝ်ꩻ ဖြဲ့ꩻပါႏရမီႏ လစ်ꩻသင်္ချေႏပုဲ ကမ္ဘာႏတသဲဉ်တဲင်တွော့ꩻ သစ္စာႏလစ်ꩻပါꩻ မျတ်တရာꩻယို နမ်းလဲ့သေဒါႏ၊ သတ္တဝါႏသီးအတွက် ကဟော်ꩻဖွက်ခြုဲးနယ်နွောင်ꩻဖေႏဒါႏ အရဟံစတဲင် ဂုဏ်ႏတောႏကွတ်ꩻပါꩻ ကဗွေစွုမ်ႏဒါႏလိုꩻနဝ်ꩻ ပါဠိငဝ်းနဝ်ꩻ ဟဲ့ꩻ"ဗုဒ္ဓ"၊ ပအိုဝ်ႏနဝ်ꩻ ဟဲ့ꩻ"ဘုရာꩻ"သွူ။ စဲင်းစဲင်းစဲ့ꩻစဲ့ မီႏဒေါ့ꩻနယ်ဗာႏနဝ်ꩻ ကဖြဲ့ꩻဒါႏပါရမီႏ လစ်ꩻသင်္ချေႏပုဲ ကမ္ဘာႏတသဲဉ်ယိုနဝ်ꩻ ထွာပညာဓိက သဗ္ဗညုတဘုရာꩻသွူ။ မဉ်ႏဖြဲ့ꩻပါရမီႏ သွစ်ꩻသင်္ချေႏပုဲင် ကမ္ဘာႏတသဲဉ်နဝ်ꩻ ထွာသဒ္ဓါဓိက သဗ္ဗညုတဘုရာꩻသွူ။ မဉ်ႏဖြဲ့ꩻပါရမီႏ တဆီသူသင်္ချေႏပုဲင် ကမ္ဘာႏတသဲဉ်နဝ်ꩻ ထွာဝီရိယာဓိက သဗ္ဗညုတဘုရာꩻသွူ။ ဘုရာꩻကရိုꩻနဝ်ꩻ သဗ္ဗညုတဘုရာꩻယို သွံမျိုꩻတမွေးတဝ်းတွော့ꩻ "ပစ္စေကဗုဒ္ဓါႏဘုရာꩻ"ကရိုꩻဘိုလဲ့ အဝ်ႏနေကတမျိုꩻသွူ။ ဖေႏကထွာ ပစ္စေကဗုဒ္ဓါႏဘုရာꩻနဝ်ꩻ ဖြဲ့ꩻဗာႏပါရမီႏ နီသင်္ချေႏပုဲင် ကမ္ဘာႏတသဲဉ်လွုမ်ꩻသွူ။ ပစ္စကဗုဒ္ဓါႏဘုရာꩻယိုနဝ်ꩻ ထွာသွူဘုရာꩻလဲ့ သစ္စာႏလစ်ꩻပါꩻ မျတ်တရာꩻယို ထီႏသေစွဉ်ႏဒျာႏ သေဒျာႏနမ်းတာႏလွုမ်ꩻ၊ လိုꩻလူꩻဗြဟ္မာႏ ဝေနေယျ သတ္တဝါႏအတါက် အီႏဟော်ꩻဖေါႏခြုဲင်းနယ်နဝ်ꩻ တဒါႏတဝ်းတဲင် ပအိုဝ်ႏဟဲ့ꩻ ဘုရာꩻအပေႏစား၊ ပါဠိနဝ်ꩻ ဟဲ့ꩻ"ပစ္စေကဗုဒ္ဓါႏ"သွူ။ ယိုနဝ်ꩻ ဘုရာꩻအမျိုꩻမျိုꩻအကျောင်ꩻ အအဲဉ်ႏစားသွူ။ "ဘာႏသာႏ"ကရိုꩻဒါႏ ပအိုဝ်ႏငဝ်းယိုနဝ်ꩻ အဝ်ႏပါဠိငဝ်း "ဘာသာ"ပြောင်ꩻလုဲင်ႏလွဉ်သွူ။ "ဘာသာ-ဘာႏသာႏ"ကရိုꩻဒါႏငဝ်းယို မီႏချာႏပြန်ႏစွဉ်ႏစွဉ်ႏ ပအိုဝ်ႏငဝ်းနဝ်ꩻ "ငဝ်း"အဓိပ္ပါယ်ႏလꩻနုဲးနဝ်ꩻသွူ။ နဝ်ꩻတွော့ꩻ "ဗုဒ္ဓ-ဘုရာꩻ"တွမ်ႏ "ဘာသာ-ငဝ်း"ယိုထွိုင်ႏပေါင်ꩻစပ် ဟဲ့ꩻညီꩻလွဝင်ꩻနဝ်ꩻ "ဗုဒ္ဓဘာသာ-ဘုရာꩻငဝ်း"အဓိပ္ပါယ်ႏလꩻနုဲင်းနဝ်ꩻသွူ။ နဝ်ꩻမꩻ လိုꩻကနာႏဒါႏ ဘုရာꩻငဝ်း၊ လိုꩻကအုံလွဉ်ꩻ အဝ်ႏလွဉ်ꩻဘုရာꩻငဝ်းနဝ်ꩻ ဟဲ့ꩻ"ဗုဒ္ဓဘာႏသာႏ"သွူ။ နာႏဘုရာꩻငဝ်း အုံလွဉ်ꩻအဝ်ႏလွဉ်ꩻ ဘုရာꩻငဝ်းရိုꩻလဲ့ နာႏတူႏတူႏတေ့ꩻတေ့ꩻနေး၊ အုံအဝ်ႏလွဉ်ꩻတူႏတူႏတေ့ꩻတေ့ꩻနေးနဝ်ꩻ ဝင်ꩻတသေတဝ်း၊ တရာꩻတဝင်ႏတဝ်းတဲင် ဗွေႏဘုရာꩻမွန်စိုးနဝ်ꩻ "အဇ္ဇတဂ္ဂေ ပါဏုပေတံ ဗုဒ္ဓံ သရဏံ ဂစ္ဆာမိ-တဲႏဟန်ႏနီꩻမာꩻငါ အဝ်ႏထွာနေလိုꩻတွင်ꩻ ဗွေႏဘုရာꩻယို ကိုꩻကွယ်ႏဆယ်ꩻကပ်ဒျာႏ"။ "အဇ္ဇတဂ္ဂေ ပါဏုပေတံ ဓမ္မံ သရဏံ ဂစ္ဆာမိ-တဲႏဟန်ႏနီꩻမာငါ အဝ်ႏထွာနေလိုꩻတွင်ꩻ တရာꩻတောႏမျတ်ယို ကိုꩻကွယ်ႏဆယ်ꩻကပ်ဒျာႏ"။ "အဇ္ဇတဂ္ဂေ ပါဏုပေတံ သံဃံ သရဏံ ဂစ္ဆာမိ-တဲႏဟန်ႏနီꩻမာငါ အဝ်ႏထွာနေလိုꩻတွင်ꩻ သံႏဃာႏတောႏမျတ်ယို ကိုꩻကွယ်ႏဆယ်ꩻကပ်ဒျာႏ" ဗွေႏဘုရာꩻမွန်ဆꩻငါ ရွစ်ရိုꩻသွူသရဏာႏဂုဏ်ႏ ငဝ်းနုဲင်းယိုတွော့ꩻ နီနမ်းယို ခံႏထွာလွဝင်ꩻ ဗုဒ္ဓဘာႏသာႏဖုံႏသွူ။ ခေတ်ယိုခါနဝ်ꩻ ဘုရာꩻမွန်တအဲဉ်ထဝ်းဒွုမ်တဲင် ခမ်ႏထူႏတေားလုဲင်ႏ ဘုရာꩻတပဲ့ꩻ ရဟန်ꩻသံႏဃာႏသီးထျꩻသွူ။ ရဟန်ꩻသံႏဃာႏ ကတအဲဉ်ထဝ်းအရပ်၊ ကတအဲဉ်ထဝ်းအခိန်ႏနဝ်ꩻ ခံႏထူႏဗော့ꩻ ဥဒ္ဒိဿစေႏတီႏ ဘုရာꩻရုပ်ထုတောႏဆꩻငါလဲ့ အဝ်ႏလꩻဒျာႏသွူ။ ခေတ်ယိုခါနဝ်ꩻ "အဇ္ဇတဂ္ဂေ ပါဏုပေတံ"ငဝ်းယို ရွစ်ရိုꩻပါဒွုမ်တဲင် ဒွေါင်ႏဒွေါင်ႏဖြွောင်ႏဖြွောင်ႏ ဗုဒ္ဓံ သရဏံ ဂစ္ဆာမိ၊ ဓမ္မံ သရဏံ ဂစ္ဆာမိ၊ သံဃံ သရဏံ ဂစ္ဆာမိ-ရွစ်ဗော့ꩻနုဲင်းနဝ်ꩻလွုမ်ꩻသွူ။ ရွစ်ယိုသွံငွါငါ စွုံႏလင်ႏလဲဉ်းဒျာႏလဲ့ ထွူႏတွုမ်မုꩻ၊ တဉ်ႏခွေါင်မုꩻ ဖေႏကအဝ်ႏ ဒုတိယမ္ပိသွံငွါ၊ တတိယမ္ပိသွံငွါ ထွာညီꩻလွဝင်ꩻ ကွတ်ꩻငွါသွူ။ ဘုရာꩻကဟော်ꩻဒါႏ တရာꩻအတွိုင်ꩻယို အုံအဝ်ႏလွဉ်ꩻ၊ လွောက်ꩻနာႏလွဉ်ꩻဒျာႏလဲ့ မဉ်ႏတဆောက်တယ်ႏတဝ်း သရဏဂုဏ်ႏလဲ့နဝ်ꩻ၊ ဆောက်တယ်ႏသွူ သရဏဂုဏ်ႏတွော့ꩻ မဉ်ႏတအုံအဝ်ႏလွဉ်ꩻတဝ်း၊ မဉ်ႏတလွောက်ꩻနာႏ ကျင်ꩻသုံꩻတဝ်း ဘုရာꩻကဟော်ꩻဒါႏ တရာꩻငဝ်းအတွိုင်ꩻလဲ့နဝ်ꩻ၊ သရဏဂုဏ်ႏလဲ့ ဆောက်တဲႏဒျာႏ၊ ဘုရာꩻငဝ်းလဲ့ နာႏဒျာႏ၊ ကွယ်ႏတွော့ꩻ လွိုဘုရာꩻ၊ တရာꩻ၊ သံႏဃာႏ ရတနာႏသွံပါꩻ အလောင်ႏအလင် တမျိုꩻမျိုꩻ တစွိုးစွိုးယို မဉ်ႏအဝ်ႏကိုꩻကွယ်ႏ၊ မဉ်ႏအဝ်ႏအာႏကွိုꩻ၊ မဉ်ႏအဝ်ႏယွုမ်းအံႏနေလဲ့နဝ်ꩻ ဗုဒ္ဓဘာႏသာႏ တစဲစ်တဝ်း၊ အထီဗွေ ဗုဒ္ဓဘာႏသာႏတထွာနွောင်ꩻတဝ်း ရိုꩻဗာႏနုဲင်းနဝ်ꩻသွူ။ နဝ်ꩻမꩻ လိုꩻယဟန်ႏနဝ်ꩻ ရွစ်ဆောက်တယ်ႏသွူ ဗုဒ္ဓံ သရဏံ ဂစ္ဆာမိ-စတဲင် သရဏဂုဏ်ႏငဝ်းယိုနဝ်ꩻ ရွစ်သမ်းထဲင်း "ဗုဒ္ဓေါ မေ သရဏံ အညံ နတ္ထိ၊ ဓမ္မော မေ သရဏံ အညံ နတ္ထိ၊ သံဃော မေ သရဏံ အညံ နတ္ထိ (ပေါႏလွိုဘုရာꩻ တရာꩻ သံႏဃာႏနဝ်ꩻ ခွေကိုꩻကွယ်ႏအာႏကွိုꩻခရာႏ အဲဉ်ထဝ်း)ငဝ်းနုဲင်းယိုသွူ။ ယိုနဝ်ꩻ ခြုဲင်းနယ်တဲမ်းနယ်ဗာႏ သရဏဂုဏ်ႏအကျောင်ꩻခရာႏ အအဲဉ်ႏတစူးတစိꩻသွူ။ ဗုဒ္ဓဘာႏသာႏကရိုꩻယို ခေတ်ယိုခါနဝ်ꩻ ထေရဝါဒဗုဒ္ဓဘာႏသာႏ၊ မဟာယာနဗုဒ္ဓဘာႏသာႏ အဝ်ႏယင်းနီမျိုꩻသွူ။ ထေရဝါဒဗုဒ္ဓဘာႏသာႏကရိုꩻနဝ်ꩻ ဂေါတမဘုရာꩻ ကဟော်ꩻခါꩻဒါႏ ရဟန်ꩻဝိနယ်ꩻ သိက္ခာႏပုဒ်တောႏဖုံႏယို သေန်ႏလျောႏတွမ်ႏခေတ်လဲ့နဝ်ꩻ၊ သေန်ႏလျောႏတဝ်းလဲ့နဝ်ꩻ တဖျင်တဝ်း၊ တပယ်ႏထိုꩻတဝ်း၊ တထဲမ်းတဝ်း အတွိုင်ꩻတွမ်ႏအတွိုင်ꩻ အွဉ်ႏစွူစွူတဲင် အုံအဝ်ႏလွဉ်ꩻ၊ လွောက်ꩻနာႏလွဉ်ꩻ၊ ကျင်ꩻသုံꩻလွဉ်ꩻနဝ်ꩻ ဟဲ့ꩻ"ထေရဝါဒဗုဒ္ဓဘာႏသာႏ"သွူ။ နီမန်းခမ်း ဗုဒ္ဓဘာႏသာႏယိုခါနဝ်ꩻ ထွာထေရဝါဒဗုဒ္ဓဘာႏသာႏသွူ။ မဟာယာနဗုဒ္ဓဘာႏသာႏကရိုꩻနဝ်ꩻ ဂေါတမဘုရာꩻ ကဟော်ꩻခါꩻဒါႏ ရဟန်ꩻဝိနယ်ꩻ သိက္ခာႏပုဒ်တောႏဖုံႏယို သေန်ႏလျောႏတွမ်ႏခေတ်လဲ့နဝ်ꩻ၊ သေန်ႏလျောႏတဝ်းလဲ့နဝ်ꩻ ပေါႏတကျွိုက်တဝ်း လိုႏဖျင်လဲ့ဖျင်၊ လိုႏပယ်ႏလဲ့ပယ်ႏ၊ လိုႏထဲမ်လဲ့ထဲမ်ထွူတဲင် ကကျွိုက်ဒါႏ၊ ကအဝ်ႏကုဲင်ဒါႏ သိက္ခာႏပုဒ်တောႏဖုံႏယို အုံအဝ်ႏလွဉ်ꩻ၊ လွောက်ꩻနာႏလွဉ်ꩻ၊ ကျင်ꩻသုံꩻလွဉ်ꩻဒါႏ ဗုဒ္ဓဘာႏသာႏအစားနဝ်ꩻ၊ အစွိုꩻနဝ်ꩻနဝ်ꩻ ဂျပန်ခမ်း၊ ခယ်ႏခမ်းကအဝ်ႏဒါႏ ဗုဒ္ဓဘာႏသာႏဗွေႏဗွန် ကကွဉ်ဒါႏကွဉ်ꩻ၊ ကလꩻဒါႏဆဲင်ꩻဖုံႏနဝ်ꩻ ထွာမဟာယာနဗုဒ္ဓဘာႏသာႏသွူ။ နီမန်းခမ်းလဲ့ အီႏထွာစသွူ မဟာယာနဗုဒ္ဓဘာႏသာႏမကောင်း။ တနယ်ꩻ မီႏဒေါ့ꩻဗာႏထဲင်းနဝ်ꩻ ဗုဒ္ဓဘာႏသာႏယို ဘုရာꩻကူꩻထွူနိဗ္ဗာန်ႏ မာꩻလွဉ်ယို နေင်ႏပေါင်ꩻ နီရေင်ငတ်ꩻရျာꩻလွိုအကိုနဝ်ꩻ ဗုဒ္ဓဘာႏသာႏချင်ꩻချင်ꩻလဲ့ ထာꩻကျွိုက်ထာꩻယူႏ ခံႏထူႏချက် တဗွိုန်တဝ်းတဲင် ဂိုဏ်ꩻခွယ်ꩻဂိုဏ်ꩻဖြယ်ဖုံႏနဝ်ꩻ တခမ်းချင်ꩻချင်ꩻလဲ့နဝ်ꩻ ဂိုဏ်ꩻခွယ်ꩻဂိုဏ်ꩻဖြယ် အဝ်ႏအာတန်သွူ။ ဥပမာႏ- ရဟန်ꩻမန်းခမ်းယိုခါနဝ်ꩻ ကျွိုက်ဒျာႏဗုဲင်ဒျာႏ သင်္ကန်ꩻရောင်ႏအတနျာႏအွူႏ၊ အတနျာႏဖြား၊ အတနျာႏတညိုႏလဲ့ ရဟန်ꩻထုဲင်ꩻခမ်းနဝ်ꩻ ဗုဲင်ဒျာႏ သင်္ကန်ꩻအရောင်ႏတသီးရွိုး၊ အတသီးလာ၊ အတသီးချိုဖုံႏသွူ။ ရဟန်ꩻမန်းခမ်းနဝ်ꩻ အတကြော့ꩻတဝ်း မဲ့ကူႏဆွဉ်ႏလဲ့ ရဟန်ꩻထုဲင်ꩻခမ်းနဝ်ꩻ ကြော့ꩻဒျာႏမဲ့ကူႏဆွဉ်ႏသွူ။ ရဟန်ꩻမန်းခမ်းကို နုဲင်းနုဲင်းမဉ်ႏတဲ့ "ရွှေကျင်ဂိုဏ်း"၊ "သုဓမ္မာဂိုဏ်း"၊ "ဝေဠုဝန်ဂိုဏ်း"၊ "ဒွါရဂိုဏ်း"စတဲင် ဂိုဏ်ꩻအဝ်ႏဖျင်ယင်း (၉)ဂိုဏ်ꩻသွူ။ ယိုနဝ်ꩻ ဗုဒ္ဓဘာႏသာႏအကျောင်ꩻခရာႏ တစူးတစိꩻသွူ။ ယိုထွူနဝ်ꩻ မဲဉ်တဲမ်းနယ်ထဲင်း သာႏသနာႏအကျောင်ꩻခရာႏသွူ။ သာႏသနာႏကရိုꩻယိုနဝ်ꩻ နီပအိုဝ်ႏဒုံသောင် သေင်ႏမွူးတန်ထျꩻ၊ မာꩻဖေႏတွမ်ႏဟော်တွော့ꩻ ကကိုꩻကွယ်ႏဒါႏ၊ ကအဝ်ႏလူႏကအဝ်ႏတင်ႏ၊ ကအဝ်ႏရိုႏသေႏဒါႏလူꩻနဝ်ꩻ ဟဲ့ꩻ"သာႏသနာႏ"မွေးတဝ်း၊ ရွမ်ဖြုဲင်ꩻယိုကိုကပါဒါႏ သာႏသနာႏ ကရိုꩻဒါႏငဝ်းနဝ်ꩻ "နီဗွေႏဘုရာꩻ အသွဉ်အသင်၊ အဆုံꩻအမꩻယို ဆရာႏကသွဉ်ဖေႏဒါႏတပဲ့ꩻ၊ တပဲ့ꩻကသွဉ်ထေ့ꩻဒါႏဆရာႏ၊ တနယ်ꩻမီႏဒေါ့ꩻဗာႏနဝ်ꩻ လိုꩻကျောင်ꩻကဟော်ꩻဖေႏဒါႏ တကာႏ၊ တကာႏကနာႏဒါႏ လိုꩻကျောင်ꩻတရာꩻနဝ်ꩻ ဟဲ့ꩻပရိယတ္တိသာႏသနာႏသွူ။ မီႏဒေါ့ꩻဗာႏဒွေါင်ႏဒွေါင်ႏနဝ်ꩻ မဲဉ်လိုꩻကျောင်ꩻကျောင်ꩻ၊ မဲဉ်လိုꩻလမ်းလမ်း သွဉ်ဖေႏသား၊ ဟော်ꩻဖေႏသား၊ ခြုဲင်းဖေႏသားလဲ့နဝ်ꩻ၊ သွဉ်ထူႏနာႏခံႏသားလဲ့နဝ်ꩻ ပရိယတ္တိသာႏသနာႏဒျာႏလို့လို့သွူ။ ပဋိပတ္တိသာႏသနာႏ-ကရိုꩻနဝ်ꩻ ကသွဉ်အတွိုင်ꩻ၊ ကသေကသေကဒါႏအတွိုင်ꩻ အုံလွဉ်ꩻအဝ်ႏလွဉ်ꩻ၊ လွောက်ꩻနာႏကျင်ꩻသုံꩻလွဉ်ꩻနဝ်ꩻ ဟဲ့ꩻပဋိပတ္တိသာႏသနာႏသွူ။ ပဋိဝေဓသာႏသနာႏ-ကရိုꩻနဝ်ꩻ ကသွဉ်ထူႏဒါႏအတွိုင်ꩻ လွောက်ꩻနာႏကျင်ꩻသုံꩻလွဉ်ꩻ၊ ပွါꩻမာꩻအားထုတ်လွဉ်ထွူတွော့ꩻ ကလꩻဒါႏစျာန်ႏတရာꩻ၊ မဂ်တရာꩻ၊ ဖိုလ်ႏတရာꩻ၊ နိဗ္ဗာန်ႏတရာꩻနဝ်ꩻ ဟဲ့ꩻပဋိဝေဓသာႏသနာႏသွူ။ ပွိုင်းဝွို့တွမ်ႏ သာႏသနာႏသွံပါꩻယို အဋ္ဌကထာႏ ဆရာႏကဖေႏသေꩻခါꩻဒါႏ ဥပမာႏနဝ်ꩻ- ပရိယတ္တိသာႏသနာႏနဝ်ꩻ ဗွိုန်နုဲင်းထီနောင်ခြေင်၊ ပဋိပတ္တိသာႏသနာႏနဝ်ꩻ ဗွိုန်နုဲင်းနောင်ကို ကအဝ်ႏသော့ꩻထီ၊ ပဋိဝေဓသာႏသနာႏနဝ်ꩻ ဗွိုန်နုဲင်းနောင်ကို ကအဝ်ႏဒေါ့ꩻသော့ꩻဒါႏ "ဗို"ရိုꩻနဝ်ꩻသွူ။ ဗိုကရိုꩻနဝ်ꩻ ထီမဉ်အဝ်ႏမꩻ ဒေါ့ꩻနွောင်ꩻ၊ ထီကရိုꩻယိုလဲ့ နောင်ဖင်ႏဟံႏမီႏတဉ်ႏခွေါင်မꩻ အုံနောင်၊ ကွပ်နဝ်ꩻမꩻ ဗိုဖေႏကဒေါ့ꩻနွောင်ꩻနဝ်ꩻ အထျꩻအဝ်ႏနောင်ဖင်ႏဟဝ်နဝ်ꩻသွူ။ ဧဝမေဝ- ယိုလဲ့ ဗွိုန်နုဲင်းနဝ်ꩻနေနေ၊ တရာꩻထူꩻတရာꩻမျတ်ကရိုꩻဒါႏ ပဋိဝေဓသာႏသနာႏ၊ ယိုနဝ်ꩻ ပဋိပတ္တိသာႏသနာႏကရိုꩻဒါႏ လွောက်ꩻနာႏကျင်ꩻသုံꩻမုꩻ၊ ပွါꩻမျာꩻအားထုတ်မုꩻအဝ်ႏမꩻ ဝွေꩻလဲ့အဝ်ႏနွောင်ꩻ၊ ပဋိပတ္တိသာႏသနာႏကရိုꩻနာႏ လွောက်ꩻနာႏကျင်ꩻသုံꩻမုꩻ၊ ပွါꩻမျာꩻအားထုတ်မုꩻယိုလဲ့ ပေါႏသွဉ်ထူႏနာႏခံႏမုꩻကရိုꩻဒါႏ ပရိယတ္တိသာႏသနာႏယို တအဲဉ်ထဝ်းလဲ့ စင်းလွောက်ꩻနာႏတဝ်း၊ စင်းပွါꩻမျာꩻအားထုတ်တဝ်းတဲင် သာႏသနာႏသွံပါꩻယိုနဝ်ꩻ ပရိယတ္တိသာႏသနာႏယို ထွာအရွီးအခိုႏ၊ ထွာအခင်ႏခံႏ၊ ထွာအအွတ်ꩻရွီးသွူ။ အီႏဒေါ့ꩻယင်းတနဲꩻ သာႏသနာႏကရိုꩻယိုနဝ်ꩻ အဇ္ဈတ္တိကသာႏသနာႏ၊ ဗာဟိရသာႏသနာႏ အဝ်ႏဖျင်နီမျိုꩻ၊ တိုꩻဖျင်နီစားသွူ။ အဇ္ဈတ္တိကသာႏသနာႏကရိုꩻနဝ်ꩻ သာႏသနာႏနမ်းကို၊ သာႏသနာႏသꩻကို၊ သာႏသနာႏအကျင်ꩻတရာꩻဟဝ်မျိုꩻသွူ။ မီႏဒေါ့ꩻဗာႏလုဲင်း ခြုဲးဆွာꩻဗာႏထဲင်းနဝ်ꩻ နီနမ်းကို၊ နီသꩻကိုယို အုံအဝ်ႏကျင်ꩻသုံꩻလွဉ်ꩻ နီဗွေႏဘုရာꩻအဆုံꩻအမꩻတဲင် တဟဝ်တဝ်း အကုသိုလ်ႏ ကာယကံႏထာꩻမာꩻမျိုꩻယို တမာꩻတဝ်း၊ တဟဝ်တဝ်း အကုသိုလ်ႏကံႏ ထာꩻဒေါ့ꩻမျိုꩻယို တဒေါ့ꩻတဝ်း၊ တဟဝ်တဝ်း အကုသိုလ်ႏမနော်ꩻကံႏထာꩻယူႏမျိုꩻယို တယူႏတဝ်း၊ သျောင်ႏကံထွူတဲင် မီႏပွါꩻမျာꩻအားထုတ်ဒျာႏ သမထဘာဝနာႏ၊ ဝိပဿနာႏဘာႏဝနာႏဖုံႏနဝ်ꩻ ဟဲ့ꩻအဇ္ဈတ္တိကသာႏသနာႏသွူ။ ဗာဟိရသာႏသနာႏ-ကရိုꩻနဝ်ꩻ သာႏသနာႏနမ်းကို၊ သာႏသနာႏသꩻကို၊ သာႏသနာႏကံကျင်ꩻအားထုတ်မုꩻ တမွေးတဝ်း၊ သာႏသနာႏအထန်ႏ၊ သာႏသနာႏအခြုံ၊ သာႏသနာႏအလွိုးဖုံႏနဝ်ꩻ ဟဲ့ꩻဗာဟိရသာႏသနာႏသွူ။ မီႏတဲမ်းလုဲင်း မီႏခြုဲင်းဆွာꩻထဲင်းတစိꩻနဝ်ꩻ သာႏသနာႏနမ်းထန်ႏကထွာဒါႏ ဘုရာꩻစေႏတီႏဖုံႏ၊ ကျောင်ꩻတရွပ်၊ သိမ်ႏ၊ ဓမ္မာႏရုံႏဖုံႏလဲ့နဝ်ꩻ၊ ဗုဒ္ဓဘာႏသာႏ သာႏသနာႏအဝ်ႏနမ်းကိုအကျောင်ꩻ ဖေႏဝင်ꩻကသေတွော့ꩻ ဗုဲင်သင်္ကန်ꩻ၊ ဗုဲင်ရသေ့ꩻ၊ ဗုဲဖီဗွာ၊ ကꩻခွမ်ꩻလာꩻဗွာ၊ ကꩻခွမ်ꩻလာꩻတညိုႏ ယောဂီꩻရောင်ႏ၊ ဟွဲးစွဉ်ႏပတီꩻ၊ ဗုဲင်စွဉ်ႏသင်္ကန်ꩻလဲ့ ပေါႏအဇ္ဈတ္တိကသာႏသနာႏ လွောက်ꩻနာႏကျင်ꩻသုံꩻမုꩻ၊ ပွါꩻမျာꩻအားထုတ်မုꩻ တအဲဉ်ထဝ်းနဝ်ꩻ ပဋိဝေဓသာႏသနာႏကရိုꩻဒါႏ တရာꩻထူꩻတရာꩻမျတ်ယို တလꩻနွောင်ꩻတဝ်းသွူ။ လွောက်ꩻနာႏကျင်ꩻသုံꩻမုꩻ၊ ပွါꩻမျာꩻအားထုတ်မုꩻ ကရိုꩻဒါႏ အဇ္ဈတ္တိကသာႏသနာႏ မဉ်ႏအဝ်ႏနဝ်ꩻ သင်္ကန်ꩻတွမ်ႏရိုꩻပုဲင်ႏ၊ ခွမ်ꩻလာꩻဗွာ ခွမ်ꩻလာꩻဖြေင်းတွမ်ႏရိုꩻပုဲင်ႏ၊ အုံတလီꩻအားထုတ်နေးခန်းလဲ့ တရာꩻတရာꩻမျတ်ယို အဝ်ႏလꩻနွောင်ꩻဒျာႏသွူ။ ယိုနဝ်ꩻ- တဲမ်းနယ်ဗာႏ သာႏသနာႏအကျောင်ꩻခရာႏ တစူးတစိꩻသွူ။ ယိုနဝ်ꩻ အီႏတဲမ်းသွုပ်လွေꩻထဲင်း နီလိုꩻသီးထာꩻအာႏကွိုꩻအကျောင်ꩻခရာႏ တစူးတစိꩻသွူ။ နီလိုꩻသီးယို ပေါႏသဲင်ꩻထွာသွူလိုꩻန၀်ꩻ- ၁။ ဖေႏကခြွေခြာႏချံꩻသာႏ ၂။ ဖေႏကအုံဟဝ်ခြွိုင်ႏသန်ꩻ ၃။ မဉ်ႏထွာဗုဒ္ဓဘာႏသာႏလဲ့ လꩻနွောင်ꩻအီနိဗ္ဗာန်ႏအကျောင်ꩻတရာꩻ ကုသိုလ်ႏထာꩻမာꩻဖုံႏယို ဖေႏကမာꩻဗာႏ။ အချက်ယိုသွံချက် ဖေႏကဗွေစွုမ်ႏနဝ်ꩻ အဝ်ႏမဲဉ်လꩻအဝ်ႏကျိုꩻစာꩻလွဝင်ꩻဖုံႏသွူ။ အချက်ယိုသွံချက် ဖေႏကဗွေစွုမ်ႏနဝ်ꩻ ထုမ်ႏလွထာꩻအာႏကွိုꩻဖုံႏသွူ။ ကထုမ်ႏထာꩻအာႏကွိုꩻနဝ်ꩻ ထာꩻအာႏကွိုꩻမဲဉ်ႏတဝ်း၊ ထာꩻအာႏကွိုꩻမာႏအဝ်ႏတဲင် မဉ်ႏတနꩻထာꩻအာႏကွိုꩻမဲဉ်ႏနဝ်ꩻ နီကမဲဉ်လꩻ နီကမဲဉ်ထွာအတွိုင်ꩻယို လꩻနွောင်ꩻထွာနွောင်ꩻလဲ့ မဉ်ႏတနꩻ ထာꩻအာႏကွိုꩻမာႏနဝ်ꩻ ကမဲဉ်လꩻ ကမဲဉ်ထွာယို လꩻတဝ်း ထွာတဝ်းသွူတကာႏတဝ်း ကအဝ်ႏအလီꩻယို ကွဲးလို့လို့ ကွဲးယွမ်ꩻယွမ်ꩻထဲင်းသွူ။ ဗုဒ္ဓဘာႏသာႏအနေႏ ထာꩻအာႏကွိုꩻမဲဉ်ႏကရိုꩻယို မဉ်ႏတဲမ်းနယ်ဗာႏအအဲဉ်ႏနဝ်ꩻ- ၁။ ဘုရာꩻ၊ တရာꩻ၊ သံႏဃာႏ ၂။ ဒါႏန၊ သီႏလ၊ ဘာႏဝနာႏ ၃။ ကံႏ၊ ဉာဏ်ႏ၊ ဝီရိယ-အဝ်ႏယိုသွံမျိုꩻလွုမ်ꩻသွူ။ လွိုယိုသွံမျိုꩻနဝ်ꩻ မဉ်ႏအဝ်ႏနေလဲ့ အရေꩻတန်ထာꩻအာႏကွိုꩻမျိုꩻ တမွေးတဝ်း၊ တထွာတဝ်းသွူ။ ယိုသွံမျိုꩻနဝ်ꩻ မွော့ရိုꩻဗာႏတွိုႏ ထာꩻအာႏကွိုꩻမဲဉ်ႏဟောင်းကရိုꩻနဝ်ꩻ မီႏတဲမ်းလုဲင်းမီႏခြုဲင်းဆွာꩻထဲင်း ပဉ်မျိုꩻမျိုꩻ ပဉ်ပါꩻပါꩻလဲ့ ရွမ်ဖြုဲင်ꩻအီႏဆွာꩻ တမွိုꩻတမာꩻထာꩻတဲင် တဲမ်းတဝ်းဒွုမ်၊ နေးတွမ်ႏနမ်းထာꩻသေတရာꩻတဲင် စဉ်ꩻစာꩻယွယွ၊ စဉ်ꩻစာꩻစဲင်းစဲင်းဒျာႏသွော့ ပငါပရာꩻသွူ။ ထာꩻအာႏကွိုꩻမာႏကရိုꩻယို မီႏတဲမ်းနယ်ဗာႏ နမူႏနာႏ တစူးတစိꩻနဝ်ꩻ နီကမဲဉ်လꩻ၊ ကမဲဉ်ထွာယို ဖေႏကလꩻ၊ ဖေႏကထွာနဝ်ꩻ ထာꩻအာႏကွိုꩻမဲဉ်ႏဖုံႏ နုဲင်းဆꩻချာယိုဖုံႏနဝ်ꩻ တအာႏကွိုꩻတဝ်းတွော့ꩻ တဖူꩻဖျတ်အနယ်ꩻယိုꩻအနေႏ အာႏကွိုꩻဒျာႏ တေန်ꩻအင်ꩻဖုံႏ၊ အာႏကွိုꩻခြေင်ခြေင်ဒျာႏ လောကီꩻပညာႏ ခေႏယတြာႏတွယ်ႏဓာတ်နယ်ꩻဖုံႏ၊ အာႏကွိုꩻဒျာႏ တဆဲင်ႏတဝ်းတွမ်ႏ ရတနာႏသွံပါꩻ လောကီꩻဂါႏထာႏမန္တန်ႏနယ်ꩻဖုံႏ၊ အာႏကွိုꩻဒျာႏ ထာꩻတောႏထာꩻလောင်ꩻဖုံႏ၊ အာႏကွိုꩻဒျာႏ ပေႏတင်ႏမော်လူꩻဖုံႏ၊ လူꩻအရန်းဖွိုႏစားဖုံႏ၊ အာႏကွိုꩻဒျာႏ လောကီꩻအဆောင်ႏအမျိုꩻမျိုꩻဖုံႏနဝ်ꩻ ဟဲ့ꩻဗာႏထာꩻအာႏကွိုꩻမာႏသွူ။ နီလိုꩻသီးယို "အတ္တာ ဟိ အတ္တနော နာထော"ကရိုꩻဒါႏ ဘုရာꩻတရာꩻဒေႏသနာႏအတွိုင်ꩻ "အာႏကွိုꩻခရာႏ အစဲစ်အမန်ႏနဝ်ꩻ အဝ်ႏနီနမ်းလွုမ်ꩻ"ရိုꩻနုဲင်းနဝ်ꩻတဲင် နီကမဲဉ်လꩻ နီကမဲဉ်ထွာယို နေးတွမ်ႏဉာဏ်ႏထာꩻသေတရာꩻတွော့ꩻ နီနမ်းတွမ်ႏနီနမ်း မဉ်ႏကျိုꩻစာꩻမꩻ လꩻနွောင်ꩻထွာနွောင်ꩻသွူ။ ကျိုꩻစာꩻမုꩻကရိုꩻဒါႏကံႏယိုခါ အဝ်ႏစွဉ်ႏလဲ့ ကံႏလီꩻမဉ်ႏတပါတဝ်း၊ တအဝ်ႏတဝ်းနဝ်ꩻ ကျိုꩻစာꩻတွိုင်ꩻလဲ့ တထွာတဝ်း၊ တအောင်ႏတဝ်းဒွိုန်းသွူ။ လိုꩻသီးယိုနဝ်ꩻ ကိစ္စထာꩻမာꩻအမျိုꩻမုဲင်ꩻတယဝ်း စဉ်ꩻစဉ်ꩻစာꩻစာꩻ ဆင်ႏဆင်ႏချင်ႏချင်ႏ တအဝ်ႏကြွို့ꩻတဝ်း၊ ယွုမ်းယိုꩻစူꩻယိုꩻဒါႏထာꩻတဲင် ကုဲင်းမော့ꩻဒါႏ ထာꩻအာႏကွိုꩻမာႏ၊ ကုဲင်းခွဲးဒါႏ ဆရာႏတုသွူ။ ထာꩻအာႏကွိုꩻမာႏ ဆရာႏတုကရိုꩻနဝ်ꩻ လိုꩻယဟန်ႏနဝ်ꩻ ထီႏလာဘ်လာဘအနေႏတဲင် တသေတဒါႏတဝ်းလဲ့ မာꩻနုဲင်းအသေ အဒါႏယောင်ႏယောင်ႏ၊ သီႏလတအဲဉ်ထဝ်းလဲ့ မာꩻနုဲင်းသီႏလအဝ်ႏယောင်ႏယောင်ႏ၊ သꩻဟဝ်သꩻမျတ် သꩻသူႏတောႏ တအဲဉ်ထဝ်းနဲ့ နုဲင်းစွဉ်ႏသူႏတောႏယောင်ႏယောင်ႏတဲင် မာꩻဒါႏ ဒေါ့ꩻဒါႏ ပွုံႏဆောင်ႏဒါႏတွော့ꩻ လိုꩻထာꩻသ ထာꩻဒါႏဆေ့ꩻသားဖုံႏနဝ်ꩻ ယွုမ်းယိုꩻဒါႏ ယွုမ်းမာႏဒါႏသွူ။ ကွပ်ယွုမ်းယိုꩻထာꩻသားအဝ်ႏအာတဲင်တွော့ꩻ အတုအယောင်ႏသားလဲ့ အဝ်ႏအာတန်သွူ။ နီအထူꩻဒေႏသ (၆)ကိုယို ခွေသွဉ်းကဟွုန်ဗာႏဖိုဒါႏ အတုအယောင်ႏဖုံႏယို မဉ်ႏထေနယ်ဗာႏ နမူႏနာႏပုံႏစံႏ ယဟူးယဟန်ႏနဝ်ꩻ- (က) ဟိုပုံꩻနယ်ႏအခဝ်ကွဉ်ႏ မုဲင်းကောင်အခဝ်ထင်ꩻရပ်ကို ပါꩻတဖြာꩻနဝ်ꩻ ရိုꩻအနမ်း သမ္မာႏယောင်ႏယောင်ႏ၊ သူႏတောႏယောင်ႏယောင်ႏတဲင် လုံးတူႏကဟံးဗွိုန်ဒါႏ တခေါ့ꩻရာႏယို "တခေါ့ꩻခံꩻရာႏ"ကျောႏညာႏနုဲင်းနဝ်ꩻတွော့ꩻ စဲးအထီအွဉ်ႏဝင်ꩻလွဉ်အွꩻ၊ မဉ်ႏအွꩻဗာႏတခေါ့ꩻခံꩻရာႏထီယို သက်ထိုစိုးဆွာꩻ အုံဗာႏနေင်ႏတရျာꩻလွို ရိုꩻနုဲင်းနဝ်ꩻသွူ။ လိုꩻကယွုမ်းသားလဲ့ သံးအဝ်ႏပြုံႏပြင်ႏတဲင် လွဉ်အွꩻလွ၊ လွဉ်လူႏလွဝင်ꩻဖုံႏတွော့ꩻ လုံးတူႏဗွေႏ သူႏတောႏတုနဝ်ꩻ မနဲးစုဲင်ႏဗာႏလွဉ်ꩻစွဉ်ႏဒျာႏသွူ။ (ခ) ဝေင်ꩻနဲႏပင်လောင်ꩻ၊ လွယ်မောင်းဒုံကို သက်လꩻ(၇)နေင်ႏ ပါꩻမူႏပေႏတဖြာꩻနဝ်ꩻ ဝါꩻတအဲဉ်ထဝ်း သန္ဓေႏအဝ်ႏနမ်းလောင်းတဲင် အလောင်ꩻအလျာႏသီး အုံသန္ဓေꩻဝွေꩻနမ်းလောင်း ရိုꩻနဝ်ꩻတွော့ꩻ လွေꩻလူႏလွ၊ လွေꩻလက်ခွဉ်လွဝင်ꩻဖုံႏနဝ်ꩻ အမွိုးအဖါ မနဲးစုဲင်ႏလွဉ်ꩻဗာႏစွဉ်ႏ ရိုꩻနဝ်ꩻသွူ။ ပါꩻမူႏပေႏနဝ်ꩻ ကလူးဒါႏထီနဝ်ꩻ ဒွူႏလွဝင်ꩻ၊ ထူႏလွဝင်ꩻတွော့ꩻ ဝွေႏဒနာႏရောႏဂါႏကင်ꩻရိုꩻနဝ်ꩻတဲင် အွꩻလွဝင်ꩻဖုံႏသွူ။ (ဂ) ဝေင်ꩻနယ်ႏ---၊ အွိုင်ႏ---၊ ဒုံတဒုံကို ပါꩻဖြားတဖြာꩻနဝ်ꩻ ရိုꩻအနမ်းသမ္မာႏသူႏတောႏတဲင် ကွဉ်ကꩻသေႏသေႏစွဉ်ႏ ခွမ်ꩻလာꩻဗွာ၊ လွေꩻမုဲင်မုဲင်ꩻလဲ့ ကင်းတွမ်ႏထီꩻဗွာ၊ ထီꩻခံꩻ၊ ထီႏရဟန်ꩻလိုꩻအကျောင်ꩻနဝ်ꩻ ရိုꩻစွဉ်ႏမျတ်ထွꩻတဝ်းဝွေꩻနုဲင်းနဝ်ꩻ၊ လိုꩻမူႏသီး မီႏလွဉ်ဗေင်ႏထဉ်ႏလဲ့ "အွဉ်ႏသတိꩻတိꩻဟုဲင်း၊ သိကျာꩻလင်ꩻစံႏဒါႏလိုꩻကွေး"ဒေါ့ꩻခါꩻထွူဝင်ꩻနုဲင်းနဝ်ꩻတွော့ꩻ ဝင်ꩻဗေင်ႏခန်း၊ မွူးကွို့ꩻနာꩻနဝ်ꩻ ဝွေꩻလယ်ႏစံႏချာဒျာႏ၊ မွိုက်စွဉ်ႏတခွိုင်းနဝ်ꩻ၊ နဝ်ꩻမဉ်ႏတဲ့ အဝ်ႏကတွမ်ႏ ကေားကေႏညိုႏသား၊ ကေားထင်းတန်သား၊ ကောလူႏတန်ꩻသားသွူ။ (ဃ) မဲင်ꩻခမ်း၊ ဝေင်ꩻနယ်ႏသထုံႏ သာႏသနာႏဟံႏနယ်ႏတထွောင်းကို ဗွေႏဗွန်တပါꩻနဝ်ꩻ အကျင်ꩻစွို့ꩻကျင်ꩻမဲဉ်ႏ အားထုတ်မွေးတရာꩻမကောင်း အွဉ်တဲႏငါႏဘုရာꩻမကောင်း၊ ဓာတ်လုံꩻအောင်ႏမကောင်း နီပအိုဝ်ႏလိုꩻမျိုꩻကိုနဝ်ꩻ ကျောႏမွေးစွဉ်ႏထာꩻ၊ အတကာႏအတပဲ့ꩻ ထီႏဝွေꩻဗွေႏနဝ်ꩻ အရိမေတ္တယျဘုရာꩻလောင်ꩻရိုꩻမကောင်း၊ အရိမေတ္တယျ ဘုရာꩻမွန်ရိုꩻမကောင်း ဒေါ့ꩻအမျိုꩻမျိုꩻ၊ ကျောႏညာႏအမျိုꩻမျိုꩻသွူ။ နီပအိုဝ်ႏဖုံႏလဲ့ ယွုမ်းအံႏကေႏညိုႏလွဝင်ꩻဖုံႏတဲင် လွဉ်လူႏလွဝင်ꩻ၊ လွဉ်တဲႏကိုလွဝင်ꩻဘုရာꩻဖုံႏနဝ်ꩻ ယဖြာꩻဖြာꩻလဲ့ စီꩻပွါꩻကုဲင် ခြေားလွဉ်ꩻနေးစွဉ်ႏလဲ့အဝ်ႏသွူ။ နီပအိုဝ်ႏဒေႏသကို ဘာႏသာႏရေꩻ အတုအယောင်ႏနုဲင်းယိုဖုံႏ ကပေါႏပေါက်ဗာႏနဝ်ꩻ နီပအိုဝ်ႏလိုꩻမျိုꩻယိုနဝ်ꩻ "ပညာႏမီႏဆေ့ꩻ သဒ္ဓါႏလွဉ်ꩻ"ကရိုꩻဒါႏငဝ်းအတွိုင်ꩻ ကွပ်စွဉ်ႏပညာႏဆေ့ꩻ ထာꩻသေဆေ့ꩻတဲင် မွေးတမွေးတဝ်း စဉ်ꩻစာꩻဝွေႏဖန်ႏ ဆင်ႏချင်ႏဒါႏတဝ်းတွော့ꩻ ယွုမ်းယိုꩻယွုမ်းတမွိုꩻဒါႏထာꩻသွူ။ နီပအိုဝ်ႏလိုꩻမျိုꩻယိုနဝ်ꩻ ကွပ်ယွုမ်းယိုꩻဒါႏဝင်ꩻတဲင် ဝင်ꩻလိန်ႏဝင်ꩻလဲဉ်ယိုꩻဟဝ်ငါႏသွူ။ ဘာႏသာႏရေꩻအွဉ်ငါ၊ ဘာႏသာႏရေꩻဆရာႏ အတုအယောင်ႏသားဖုံႏလဲ့ အံႏဗာႏဖွီ အံႏဗာႏယိုꩻတဲင်တွော့ꩻ အတုအယောင်ႏစွဉ်ႏလဲ့ ငမ်းတဝ်းအပဲစ်၊ တငမ်းတဝ်းငါးရုဲင်ꩻသွူ။ အတုအယောင်ႏ ကပေါႏဗာႏ၊ အတုအယောင်ႏကအာဗာႏနုဲင်းယိုနဝ်ꩻ ဒင်ႏပဲစ်စွဉ်ႏ အတုအယောင်ႏသားခြေင်ခြေင်လဲ့ တသင်ꩻတဝ်းနေနေ၊ ကေားဖေႏအာႏ ကေားလူႏတန်ꩻ ယွုမ်းအံႏသားယိုလဲ့ အပဲစ်အဝ်ႏဒျာႏနေနေသွူ။ ကွပ်နဝ်ꩻမꩻ ခွိုင်းယိုမာꩻငါနဝ်ꩻ မဲဉ်ကျောႏမုဲင်ꩻကိုကျောႏ၊ မဲဉ်ပေါႏမုဲင်ꩻကိုပေါႏ အဝ်ႏလိုႏယွုမ်းယိုꩻငါႏတဝ်း၊ မွေးတမွေးတဝ်း၊ စဲစ်တစဲစ်တဝ်း စဲင်းစဲင်းစဲ့စဲ့ သေႏသေႏချာႏချာႏ စဉ်ꩻစာꩻဝွေႏဖန်ႏထွူမꩻ မီႏလိုႏယွုမ်းလဲ့ ကွဲးယွုမ်းငါႏနဝ်ꩻ အမာႏဆေ့ꩻသွူ။ ဘာႏသာႏရေꩻ အတုအယောင်ႏသားယိုနဝ်ꩻ အဝ်ႏလိုႏဖေႏအာႏတဝ်း၊ အဝ်ႏလိုႏလူႏတန်ꩻတန်း၊ အဝ်ႏလိုႏလွေꩻထေ့တဝ်း၊ အဝ်ႏလိုႏသျောင်ႏဝင်ꩻ ပငါပရာꩻ။ အဝ်ႏလိုႏယွုမ်းအံႏ အွဉ်ႏရေꩻဒျာႏ နီကျောင်ꩻရပ်ကို ပငါပရာꩻ၊ အဝ်ႏလိုႏအွဉ်ႏရေꩻဒျာႏ ပရိယတ္တိလိတ်သွဉ်တွိုက်၊ အဝ်ႏလိုႏအွဉ်ႏရေꩻဒျာႏ တရာꩻနယ်ꩻမဲဉ်ႏ ကမ္မဋ္ဌာန်ꩻတွိုက်။ အဝ်ႏလိုႏအာႏကွိုꩻဒျာႏ ဘုရာꩻ၊ တရာꩻ၊ သံႏဃာႏအစဲစ်အမဲဉ်ႏ၊ အဝ်ႏလိုႏယွုမ်းအံႏဒျာႏ ဒါႏန၊ သီႏလ၊ ဘာႏဝနာႏ၊ အဝ်ႏလိုႏယွုမ်းအံႏဒျာႏ ကံႏ၊ ဉာဏ်ႏ၊ ဝီရိယ၊ လိုႏအာႏကွိုꩻငါႏတဝ်းဝင်ꩻ၊ လိုႏကွိုꩻချာဒျာႏနီနမ်းအကျောင်ꩻ။ ။ = သေနာႏသွော့၊ ယူႏဒါႏသွော့၊ လိန်ႏမာႏသွော့။ = တငွို့ငါႏမွိုန်း၊ ဒွိုန်ငါႏမွိုး၊ ယံလက်ꩻစွိုန်း။[၁][၂]