ပအိုဝ်ႏစွိုးခွိုꩻသီး အသက်သွီႏဖြွိꩻ

လောကကိုယို အသက်တအဲဉ်ထောဝ်း သေင်ႏဝါႏစတဲင်အဝိဉာာဏကဖုံႏတဲ့နဝ်ꩻ၊ အသက်ကအောဝ်ႏဒါႏလိုꩻသီး စတဲင်သဝိဉာာဏက ပုဂ္ဂိုလ်ႏသတ္တဝါႏဖုံႏတဲ့ꩻနဝ်ꩻ ၊တန်ထိုပြွူႏဖြိုရေꩻ ကွုန်ꩻဟွိုင်ꩻမွန်ဗန်တရေꩻ အီအတာႏ အရေꩻတန်သွတ်ꩻ အုံနောင်ခရာႏအသက်သွီႏဖြွီꩻယိုနဝ်ꩻ အောဝ်ႏဗာႏဒျာႏရင်ꩻသွူ။ ကွပ်ပွိုးစွဉ်ႏ အုံနောင်အာႏကွိုꩻခရာႏအသက်သွီႏဖြွီꩻယို အထီအသွီႏအလွောက်ꩻ တပီတောဝ်ႏဝင်ꩻ အကွာႏဝင်ꩻဖုံႏတဲင် တန်ထိုတသွောင်းကွိုန်ꩻဟွိုင်ꩻမုꩻ၊ မွန်ဗန်ပြွူးဖြွိုမုꩻဖုံႏယိုတဲ့ အပီတောဝ်ႏ ဒွုမ်ဝင်ꩻ ဆေ့ဆေ့ꩻအာအာ အကွာႏဝွေးစွဉ်ႏဝင်ꩻဖုံႏနေနေနဝ်ꩻသွူ။

ကွပ်နဝ်ꩻမꩻတဲင်အသက်တအဲဉ်ထောဝ်း သေင်ႏဝါႏ ၊အမွူးအဆုံꩻအတာႏ ဖေႏကမွန်ဗန် ဖေႏကကွိုန်ꩻဟွိုင်ꩻ၊ အဒီႏအကောဝ်ႏအရာႏဖုံႏဖေႏကထွာနဝ်ꩻ၊အရေꩻတန်သွတ်ꩻတဗာႏ၊ မွန်ဗန်ကွိုန်ꩻဟွိုင်ꩻမုယို ကမာꩻတရတ်နွောင်ꩻအီဒါႏ အန္တရယ်ႏအမျိုꩻမျိုꩻဖုံႏယို၊ ရဲးဆီꩻကမ်းဟောဝ်ဟောဝ်ဖေႏဗာႏ ၊ ထဲမ်သွော့ꩻမဲဉ်ႏမဲဉ်ႏဖေႏဗာႏ အဆာႏ၊ သေဗာႏသဲင်ႏဝါႏအကယ်ꩻ၊ သေနာႏဗာႏရာႏသီႏဥတုအခွအလျားတွော့ꩻ ၊ ဆို့ꩻရုဲင်ခိန်ႏမဉ်ႏတွိုႏလဲ့ꩻ ဆို့ꩻရုဲင်ဗာႏနဝ်ꩻသွူ၊ ကွပ်ပွိုးအကျောင်ꩻခရာႏနဲင်ႏယိုနဝ်ꩻ ထွာအီသဲင်ႏဝါႏ အဒီႏအရာႏ အကောဝ်ႏသီး အသွီႏသက်နဝ်ꩻသွူ။ ဝွေꩻသီႏမဉ်ႏတရျာႏငီႏနဝ်ꩻ၊ အမွူးအပင်ဖုံႏတဲ့ အီႏမွန်ဗန် ကွိုင်ꩻဟွိုင်ꩻ အမွူးအပင်ဖုံႏတဲ့ꩻ အီႏကွိုင်ꩻဟွိုင်ꩻနဝ်ꩻသွူ။ အဒီႏအရာႏသီႏ အရသာႏ အထီအသွီႏအီႏဗွေနဝ်ꩻသွူ။

ပွိုးတမုဲင်ꩻနဲတဲင် စွိုးခွိုꩻတခွိုꩻကထင်ႏထိုဗာႏနဝ်ꩻ သရက်စွိုးခွိုꩻယိုအရေꩻတန်သွတ်ရိုꩻဗာႏနဲင်ႏနဝ်ꩻနဲကရိုꩻနဝ်ꩻ ကဉ်းထွားစမ်ꩻခယ်ႏတွမ်ႏဂျူးသီးလိုꩻမျိုꩻသူꩻ ဝင်ꩻကရက်စွိုးခွိုꩻတဲင် ဝင်ꩻလိုꩻမျိုꩻအွဉ်ငါ ထိုနာႏသာႏတဲ့နဝ်ꩻ၊ ဝင်ꩻယိုꩻယာႏအဒေါ့ꩻအဖြောဝ်ႏဖုံႏတဲ့နဝ်ꩻ ၊ ဝင်ꩻထင်ႏဖွီထင်ႏပေႏတေဝ်း၊ ယားတဝ်း၊ ဝင်ꩻမက်စွိုးခွိုꩻသမဲင်ꩻဖေႏတာႏဝန်ႏတဲင် ဝင်အွဉ်ႏရေꩻဝင်ꩻထူႏသုံꩻတွော့ꩻ မဲဉ်ဖျော်ခမ်းမုဲင်ဖျော် ဝင်ꩻစွိုးခွိုꩻယိုအေဝ်ႏမွန်ဗန်ဒျာႏ အဝ်ႏယံဒျာႏသွူ၊

နီပအိုဝ်ႏတဲ့ နဲင်းနဝ်ꩻနေနေသွူ၊ မဉ်တွိုႏမုဲင်ꩻကိုတွိုႏ မဲဉ်ဖျော်မုဲင်ꩻကိုဖျော် သꩻရက်စွိုးခွိုꩻမဉ်ႏအေဝ်ႏနဝ်ꩻ လိုꩻမျိုꩻတဲ့မွန်ဗန်ဒျာႏသွူ၊ သရက်ရိုꩻကီလဲ့ ရက်ကွို့တွမ်ႏသꩻလုမ်ꩻနဝ်ꩻတလꩻတေဝ်ႏ သွူ၊ ပေါႏရက်လိုꩻမျိုꩻနဝ်ꩻ လိုꩻမျိုꩻဂုဏ်သိက္ခာကထဲ့အီဒါႏ အဒေါ့ꩻ အဖြောဝ်ႏ အအုံအေဝ်ႏ ဖုံႏနဝ်ꩻ အေဝ်ႏလိုႏထိန်ꩻဝင်ꩻမꩻ ဟဲ့ဗာႏ သꩻရက်စွိုးခွိုꩻသွူ၊