ပအိုဝ်ႏစွိုးခွိုꩻအနာႏဂတ်

"ပအိုဝ်ႏခမ်းကောင်ခမ်းဒွမ်အစွိုꩻဖုံႏတွမ်ႏ ပအိုဝ်ႏလိုꩻတန် အုံကွံလွေꩻ ပအိုဝ်ႏစွိုးခွိုꩻအနာႏဂတ်တာႏ" နေင်ႏ ၂၀၁၅-ဗာႏ၊ မေလာ(၁၇)နီꩻ ဒဲဉ်သီႏဗွေ ပအိုဝ်ႏစွိုးခွိုꩻအဖဲ့ꩻပေါင်ꩻစွုမ်ႏ လွိုင်ႏကွိုန်ꩻရေꩻကွင်ꩻ ဒုံတနွိုင်ရေး၊ ဝေင်ꩻနယ်ႏတောင်ႏကီꩻကို ပအိုဝ်ႏသံႏဃာႏ၊ ပအိုဝ်ႏခမ်းကောင် ခမ်းဒွမ်အစွိုꩻတွမ်ႏ ပအိုဝ်ႏလိုꩻတန်ဖုံႏ အုံကွံလွေꩻ ပအိုဝ်ႏစွိုးခွိုꩻအနာႏဂတ်တာႏ ထာꩻမာꩻနောဝ်ꩻသွူ။ "၂၀၁၅-နေင်ႏ လွိုက်ရွေꩻပွယ်ꩻ ပအိုဝ်ႏခမ်းနယ်ႏ ယံကလꩻဗာႏ အောဝ်ႏလိုႏသော့ꩻဖေႏမဲး၊ အရေꩻတန်လွိုက်ရွေꩻပွယ်ꩻယို လိုꩻတန်ခင်ႏလမ်းမဉ်ႏမဲဉ်ႏ၊ ပညာႏရေꩻတဲ့ယံမꩻ အီႏလꩻအီႏအုပ်ချွုတ်လꩻ၊ လိုꩻကျောင်ꩻ ဆရာႏတကာႏ ဖေႏကအောဝ်ႏမွိုန်းတောဝ်း နီသွံခေါဝ်"ဗွေႏဗွန်စူဠာမုနိ ဒေါ့ꩻလွေꩻဖေႏ ငေါဝ်းဩဝါဒနုဲင်းယိုသွူ။ ဗွေႏဗွန်တန် အာနန္ဒာဝံသ ဝေင်ꩻကိန်ꩻမုဲင်ႏ ထုဲင်ꩻခမ်း"ယိုခါ အွဉ်ႏတယ်ႏဆို့ꩻဓမ္မာႏရုံႏ ဝေင်ꩻဘန်ကောက်ကို၊ ပညာႏရေꩻ သူႏရိန်ႏတက္ကသိုလ်ႏ ဖစ်ပင်ꩻလွဉ် ပအိုဝ်ႏယံတွိုႏဗꩻ အင်တာနေရှင်နယ်ခမ်းတန်အရန်း၊ ပအိုဝ်ႏဖုံႏ မဉ်ႏမဲဉ်ထင်ႏတက္ကသိုလ်ႏ ကိန်ꩻမုဲင်ႏကိုတဲ့လꩻ၊ လိုꩻကျောင်ꩻတဲ့ စွဲးကိုထွားကိုလꩻ၊ သင်္ဃာႏဖုံႏတဲ့လꩻ၊ လိတ်လိုႏဒင်ႏထေ့ တက္ကသိုလ်ႏတဲ့ မဲ့ꩻနီဗွဗႏသီး ထွားကိုဒျာႏ၊ ယိုခါ ပအိုဝ်ႏသင်္ဃာႏ(၁၇)ပါꩻ အောဝ်ႏသင်္ဃာႏတက္ကသိုလ်ႏ၊ အဆေ့ꩻမွေးငါႏ"ထုဲင်ꩻခမ်းကျောင်ꩻနောင်ခံꩻ ဗွေႏဗွန်တန်အာနန္ဒာဝံသ ဝေင်ꩻကိန်ꩻမုဲင်ႏ၊ ပအိုဝ်ႏအနာႏဂတ်ပညာႏရေꩻအတာႏ ဖေႏအပ်လွေꩻ ငေါဝ်းတမာနုဲင်းယိုသွူ။ ပအိုဝ်ႏလိတ်လုဲင်ꩻတွမ်ႏယေန်ႏငဲးအစွိုꩻ ဥက္ကဋ္ဌ ဖြားခွန်ဝင်းကို ဒေါ့ꩻဖေႏလွေꩻငေါဝ်းဩဝါဒ "သေဗာႏပအိုဝ်ႏထုဲင်ꩻခမ်းခရာႏ အယပ်ꩻအခုဲင်ႏယို ခွေသွဉ်းအောဝ်ႏလိုႏစွဲးကိုဗာႏနုဲင်းမုဲင်ꩻ၊ သေမꩻ စဉ်ꩻစာꩻလꩻ၊ ၂၀၀၈-ထွို့ꩻဗူႏပုံႏဥပဒေႏသအလꩻ လꩻလဲဉ်းသွူ ပအိုဝ်ႏနမ်းပဲင်ႏအုပ်ချွုတ်ရေꩻရိုꩻကီလဲ့ လꩻလွုမ်ꩻအမဉ်ꩻ၊ အနမ်းအကဲဉ်အဗဲ့ꩻ အောဝ်ႏအောဝ်ႏဖေႏကထင်းထံႏလꩻ အောဝ်ႏလိုႏကျိုꩻစာꩻ၊ ပအိုဝ်ႏတအောဝ်ႏသော့ꩻတောဝ်း ပအိုဝ်ႏနမ်းပဲင်ႏအုပ်ချွုတ်ခွင်ꩻလꩻ ဟံႏနယ်ႏကိုကအောဝ်ႏဒါႏ ပအိုဝ်ႏဖုံႏ အခွင်ꩻအရေꩻဖေႏကလꩻပီပီဝင်ꩻ အောဝ်ႏလိုကျိုꩻစာ၊ ဖါဖြားတန် ငိမ်ꩻချမ်ꩻရေꩻစွိုꩻနောဝ်ꩻ မဲဉ်လွေꩻ ပီ-အဲန်-အို ပါတီတဖူꩻ၊ ပ-အ-မ-ဖ လိုꩻလီꩻနောဝ်ꩻ မဲဉ်လွေꩻ ပ-အ-မ-ဖတဖူꩻ၊ ၂၀၁၀-ညီႏလာႏခံႏအကို အောဝ်ႏထွာနုဲင်းနောဝ်ꩻ၊ ဖေႏကဗော့ꩻသွီႏတွမ်ႏအစိုႏရနောဝ်ꩻမꩻ တွိုင်ႏပင်ႏအွဉ်ႏထွော့လွေꩻတွမ်ႏ ပီ-အဲန်-အို ပါတီတဖူꩻနောဝ်ꩻသွူ။ နေင်ႏ ၂၀၁၁-ကို ပီ-အဲန်-အို ပါတီကို ပျဿနာႏထွာလွဉ်၊ နောဝ်ꩻမꩻ ခွေသွဉ်းလောဝ်းထေ့ ဖြားတန်၊ ပီ-အဲန်-အို ပါတီတွမ်ႏ ပီ-အဲန်-အေယို အောဝ်ႏလိုႏအွဉ်ႏခေါ်ဒျာႏ၊ ယိုခါ အောဝ်ႏခေါ် အွဉ်ႏခေါ်လဲဉ်း၊ ရွုမ်ꩻထာꩻမာꩻဖုံႏနောဝ်ꩻသွူ၊ ယိုခါ ပ-အ-မ-ဖ ပါတီတဲ့ပေါႏလွဉ်နောဝ်ꩻမꩻ အစွိုꩻအာလွဉ်၊ နေင်ႏ ၂၀၁၅-လွိုက်ရွေꩻပွယ်ꩻကို ကအီႏနွောင်ꩻဗာႏမဲယို မော့ꩻဗာႏလွဉ်သွူအယပ်ꩻအခုဲင်ႏ ပီနုဲင်းနောဝ်ꩻနေနေ ပအိုဝ်ႏလိတ်မူတဲ့ ပꩻလွဉ်နီမျိုꩻ၊ ဖေႏကထွာ တဗာႏချင်ႏ အောဝ်ႏလိုႏဖေႏကျံႏဉာဏ်ႏကို၊ အီႏမာꩻဗာႏနုဲင်းမုဲင်ꩻ အောဝ်ႏလိုႏထွားကို၊ ပအိုဝ်ႏစွိုးခွိုꩻနုဲင်ႏငံႏရေꩻကဏ္ဍကို ဆဋ္ဌမအလဲင်ႏ ပအိုဝ်ႏစွိုးခွိုꩻအစွိုꩻချွုတ် ပါတီညီႏလာႏခံႏဖဲ့ꩻငါ ပီ-အဲန်-အိုတွမ်ႏ ပ-အ-လ-ဖစွိုꩻ ထောင်ညီꩻလဲဉ်းဝင်ꩻ နုဲင်ႏငံႏရေꩻတဖူꩻသွူ၊ ပအိုဝ်ႏဖုံႏပညာႏရေꩻ အာႏဖေႏကတလာ၊ ယံဖေႏစွဲးကို ပင်ႏထိုဝင်ꩻ ကအီႏတယ်ႏဆို့ꩻ ဓမ္မာႏရုံႏ ဝေင်ꩻတန်ဘန်ကောက်ကိုခရာႏ ထွို့ꩻဗူႏလွေꩻ ဓမ္မာႏရုံႏထွာနွောင်ꩻရေꩻကာႏမတီႏ သေဗာႏနုဲင်းနောဝ်ꩻသွူ၊ ယံဖေႏကဖြောင်လို့ဝင်ꩻ၊ စဲင်းလို့ဝင်ꩻ ခွေသွဉ်းတမာဗာႏ၊ ရဲးဆီꩻမွေးတောဝ်း ယံဖေႏ လိုꩻအမျာꩻကသေစဲင်းစဲင်း အောဝ်ႏလိုႏခြုဲင်းနယ်စဲင်းစဲင်းလို့ဝင်ꩻသွူ။ ခမ်းဒွမ် ခွန်တန်နွယ်ႏစွိုꩻ နမ်းခြောင်ꩻတင် နင်ႏယဉ်စိုး"ပညာႏရေꩻကို ပါꩻမဉ်ႏဟဲ့ꩻ ပအိုဝ်ႏပေႏဖုံႏ ကဲဉ်းအာအာအောဝ်ႏကုဲင်ဝင်ꩻ၊ ပအိုဝ်ႏအတာႏ ကအီႏတယ်ႏဆို့ꩻဓမ္မာႏရုံႏ ဝေင်ꩻတန်ဘန်ကောက်ကိုခရာႏ သေဗာႏနုဲင်းယိုတဲ့ သꩻရေꩻငါႏ"ရိုꩻဖေႏနုဲင်းနောဝ်ꩻသွူ။ ပအိုဝ်ႏထုဲင်ꩻခမ်း နမ်းခြောင်ꩻတင် ဖြားပညာႏ "ကအီႏတယ်ႏဆို့ꩻ ဓမ္မာႏရုံႏ ဝေင်ꩻတန်ဘန်ကောက်ကိုခရာႏယိုနောဝ်ꩻ ကွပ်စွဉ်ႏ ပအိုဝ်ႏသံႏဃာႏ ဗွေႏဆရာႏတောႏ အေးစေတီ၊ ဗွေႏဆေရာႏတောႏကျောင်ꩻတန်-စတဲင် ဗွေႏဆရာႏတောႏဖုံႏ တွိုႏလွဉ်ထုဲင်ꩻခမ်း မော့ꩻခွဲးဗာႏ တကာႏပအိုဝ်ႏတွော့ꩻ သꩻရေꩻကီလဲ့ ကအီႏကိန်ꩻထေ့ တကာႏပအိုဝ်ႏနောဝ်ꩻ ခင်ႏလမ်းအဲဉ်ထောဝ်း၊ လယ်ႏခတ်ꩻဗာႏနေးခင်ႏလမ်း၊ ကိန်ꩻဗာႏတကာႏလမ်းလင်နောဝ်ꩻမꩻ တယ်ႏဆို့ꩻဓမ္မာႏရုံႏ ဝေင်ꩻတန်ဘန်ကောက်ကိုခရာႏယို ပေါႏထန်ႏလွဉ်ဗာႏနုဲင်းယို၊ ၂၀၁၅-မဲးဖေႏကသော့ꩻဗာႏ အောဝ်ႏလိုႏဖေႏအာႏတမာ၊ ဖေႏကသဲင်ꩻဗာႏ အောဝ်ႏလိုႏကူႏညီႏလွေꩻ"အကျောင်ꩻ ခြုဲင်းနယ်ဖေႏနုဲင်းယိုသွူ။ ပွယ်ꩻအုံကွံကို ပအိုဝ်ႏသံႏဃာႏ၊ ပအိုဝ်ႏခမ်းကောင်၊ ပအိုဝ်ႏခမ်းဒွမ်အစွိုꩻဖုံႏတွမ်ႏ ပအိုဝ်ႏလိုꩻတန်ဖုံႏ အဖြာꩻနီဆီရပ် ထင်ႏဖေႏအာႏလွေꩻ ပအိုဝ်ႏစွိုးခွိုꩻအနာႏဂတ်တာႏအကျောင်ꩻ လꩻသတင်ꩻသေထွꩻဗာႏနုဲင်းနောဝ်ꩻသွူ။