ပအိုဝ်ႏစွိုးခွိုꩻအရန်း

"ပအိုဝ်ႏစွိုးခွိုꩻအရန်း ခမ်းထီနဲင်ႏငံႏရေꩻ ပွယ်ꩻအုံကိုမ်နဝ်ꩻ မာꩻနွောင်ꩻလဲဉ်းလဲ့ ပအိုဝ်ႏဖြွမ်းဗူႏရေꩻယို ဗွေဖွိုင်ꩻဗွေဝန်ႏတဝ်းဒွုန်း" ယိုခါ ခမ်းခြွဉ်းဗူႏသမ္မတ မန်းခမ်းထီယို အဝ်ႏမာꩻလွေꩻခမ်းခြွဉ်းဗူႏညိမ်ꩻချံꩻရေꩻညီႏလာႏခံႏ ၂၁-ရျာꩻဗူႏပင်ႏလုံ အုံကိုမ်ခမ်းထီရေꩻပွယ်ꩻနဝ်ꩻသွူ။ ပွိုးစွဉ်ႏအကျောင်ꩻနဝ်ꩻတဲင် ၂၀၁၇-ဗာႏ၊ ဖေဖော်ဝါရီလာ တယ်ႏ ၁၆-နီꩻ ဗꩻလွေꩻ ၂၀-နီꩻနဝ်ꩻ ပအိုဝ်ႏစွိုးခွိုꩻနဝ်ꩻ မာꩻလွေꩻလိုꩻမျိုꩻအလွောက်ꩻ စွိုးခွိုꩻအရန်း ခမ်းထီရေꩻပွယ်ꩻအုံကိုမ် ပအိုဝ်ႏနမ်းပဲင်ႏအုပ်ချွုတ်ချွင်ꩻလꩻဒေႏသအွဉ်ငါခန်ꩻတန် ဝေင်ꩻဟိုပုံꩻကိုနဝ်ꩻသွူ။ ပထမအလဲင်ႏ ညိမ်ꩻချံꩻရေꩻညီႏလာႏခံႏ ၂၁-ရျာꩻဗူႏပင်ႏလုံအထွူ လိုꩻမျိုꩻအလွောက်ꩻ စွိုးခွိုꩻအရန်းနဲင်ႏငံႏရေꩻပွယ်ꩻအုံကိုမ်ယို စောက်ꩻစွိုးခွိုꩻနဝ်ꩻ ထွာမꩻလွေꩻခွင်ꩻလꩻအွဉ်ရီးဝင်ꩻ စောက်ꩻစွိုးခွိုꩻအရန်းနဲင်ႏငံႏရေꩻပွယ်ꩻအိုကိုမ်နဝ်ꩻသွူ၊ စောက်ꩻလိုꩻမျိုꩻထွူ မꩻလွေꩻခွင်ꩻကလꩻ လိုꩻမျိုꩻအလွောက်ꩻပွယ်ꩻအုံကိုမ်နဝ်ꩻ ထွာပအိုဝ်ႏစွိုးခွိုꩻ ခမ်းထီရေꩻပွယ်ꩻအုံကိုမ်နဝ်ꩻသွူ။ ဒေႏသအလွောက်ꩻ ပွယ်ꩻအုံကိုမ်ကိုနဝ်ꩻ တနင်္သာရီတွိုင်ႏဒေႏသတန်ကို ထွာမာꩻလွေꩻအွဉ်ထွူလဲဉ်းနဝ်ꩻသွူ။ မိဉ်ႏထွားနုဲင်းယို လိုꩻမျိုꩻအလွောက်ꩻပွယ်ꩻအုံကိုမ်နဝ်ꩻ စောက်ꩻထွူပအိုဝ်ႏစွိုးခွိုꩻ မာꩻလွေꩻနွောင်ꩻနဲင်ႏငံႏရေꩻ ပွယ်ꩻအုံကိုမ်ယို ပအိုဝ်ႏခမ်းထီရေꩻ ဖျင်ဆင်မုအဝ်ႏထွူ မိဉ်ႏရိုꩻနုဲင်းနဝ်ꩻလဲ့ ဟန်ႏသနီꩻ ပအိုဝ်ႏလိုꩻမျိုꩻ အကိုတွမ်ႏအကိုဒျာႏနဝ်ꩻ ကမာꩻနဲင်ႏငံႏရေꩻပွယ်ꩻအုံကိုမ် အခေႏနေႏအလꩻ ဖျင်ဆင်မုတဗွေဖွိုင်ꩻတဝ်းဒွိုန်း၊ ဖြွမ်းဗူႏမု တဗွေဝန်ႏတဝ်းဒွိုန်းနဝ်ꩻ အဝ်ႏထီႏဗာႏနဝ်ꩻသွူ။ မန်းခမ်းထီ ညိမ်ꩻချံꩻရေꩻထာꩻမာꩻရဲဉ်ႏတွော့ꩻ မာꩻလွေꩻလွဉ်ꩻဗာႏ ပအိုဝ်ႏစွိုးခွိုꩻခမ်းထီရေꩻ ပွယ်ꩻအုံကိုမ်တမွေးတဝ်းသွူ။ ပအိုဝ်ႏတွမ်ႏပအိုဝ်ႏကိုဒျာႏမိဉ်ႏလဲ့ ပအိုဝ်ႏလိုꩻမျိုꩻ ခမ်းထီရေꩻရာႏအတာႏတဲ့နဝ်ꩻ၊ ပအိုဝ်ႏစွိုးခွိုꩻကို တစွိုꩻတွမ်ႏတစွိုꩻ ဖြွမ်းဗူႏရေꩻအတာႏတဲ့နဝ်ꩻ ပအိုဝ်ႏအရေꩻ ပွယ်ꩻအုံကိုမ်ယို အဝ်ႏလိုႏမာꩻဒျာႏရင်ꩻသွူ၊ ပအိုဝ်ႏခမ်းထီရေꩻယို အဝ်ႏလိုႏအုံကိုမ်လွေꩻဒျာႏရင်ꩻနဝ်ꩻသွူ။ နုဲင်းယိုခါ ပအိုဝ်ႏစွိုးခွိုꩻကို အချင်ꩻချင်ꩻ ဖြွမ်းဗူႏရေꩻတာႏ အဝ်ႏလိုႏအုံကိုမ်ဝင်ꩻကရိုꩻယို အစွိုꩻပငါပရာꩻနဝ်ꩻ နမ်းတွမ်ႏနမ်းထာꩻယူႏ ထာꩻခံႏထူႏသား ယွုမ်းအံႏတွော့ꩻ အီႏထွိုင်ႏမော့ꩻခွဲး အုံကိုမ်ချာနဝ်ꩻ တရိုꩻတဝ်းဒွုမ်၊ ခမ်းထီအစိုႏရအွဉ်ငါတွော့ꩻ အဝ်ႏလိုႏမာꩻသွူမဉ်ႏတဲ့ ဖြွမ်းဗူႏမုꩻတဗွေဖွိုင်ꩻ တဗွေဝန်ႏလို့တဝ်းဒွုန်းနဝ်ꩻ တွိုႏမုဲင်ꩻခါမꩻ ပအိုဝ်ႏလိုꩻမျိုꩻယို အီႏမော့ꩻခွဲးအုံကိုမ်ထွာဝင်ꩻဟောင်း၊ နဝ်ꩻဖုံႏနဝ်ꩻ အွဉ်ႏခန်းတယဝ်း အဆုဲင်ꩻသွတ်ꩻ ပအိုဝ်ႏခမ်းသားအရေꩻယို ပါꩻမုဲင်ꩻမာꩻဖေႏဟောင်း၊ မာꩻဖေႏတဝ်းတယဝ်း ပအိုဝ်ႏခမ်းသားနဝ်ꩻ နမ်းတွမ်ႏနမ်းထွိုင်ႏမာꩻဒျာႏတဲ့ အဝ်ႏထွာနွောင်ꩻဒျာႏသွူ။ မဉ်ႏဒေါ့ꩻယင်း မန်းခမ်းထီကမာꩻဗာႏ ညိမ်ꩻချံꩻရေꩻ၊ နဲင်ႏငံႏရေꩻပွယ်ꩻအုံကိုမ်နဝ်ꩻ ကွပ်စွဉ်ႏလိုꩻမျိုꩻ တမျိုꩻတွမ်ႏတမျိုꩻအခါႏ ပဋိပက္ခအဝ်ႏထွာစဲ့ꩻပွယ်ꩻ တဆွိုးတဝ်း၊ တွောင်းတွာတသွုန်မု တထွာတဝ်း၊ အခွင်ꩻအရေꩻယို တလꩻတဝ်း၊ နဝ်ꩻမꩻ နုဲင်းယိုဖုံႏ တွောင်းတွာမု ဖေႏကအဝ်ႏလွဉ်၊ ခမ်းထီညိမ်ꩻချံꩻမု ဖေႏကထွာလွေꩻနဝ်ꩻ မာꩻလွေꩻဗာႏ ခမ်းထီညိမ်ꩻချံꩻရေꩻညီႏလာႏခံႏပွယ်ꩻနဝ်ꩻသွူ။ ခမ်းထီညိမ်ꩻချံꩻရေꩻညီႏလာႏခံႏပွယ်ꩻကိုယို အီႏအုံကိုမ်လွေꩻ၊ အီႏဆွေꩻနွေꩻတမုဲင်ꩻဖုံႏဟောင်း၊ အီႏအုံကိုမ်လွေꩻ ခမ်းသားသီးအရေꩻ၊ လိုꩻမျိုꩻစွုမ်ႏကအဝ်ႏသော့ꩻဒါႏ မန်းခမ်းထီယို ဖေႏကညိမ်ꩻခွꩻတသေႏသေႏနဝ်ꩻ အီႏပုံႏဖောႏလွေꩻဗာႏ ခမ်းထီအပုံႏအပွိုင်နုဲင်းမုဲင်ꩻ "ခမ်းသားသီး မိဉ်အုံအဝ်ႏလွေꩻ တွမ်ႏခမ်းထီစနစ်နုဲင်းမုဲင်ꩻ၊ ခမ်းသားသီးတာႏ ပညာႏရေꩻ၊ ခြွိုင်ႏသန်ꩻရေꩻ၊ စီꩻပွါꩻရေꩻ၊ လိုꩻမုရေꩻ အဖဲ့ꩻဖဲ့ꩻအခဝ်ခဝ်ယို လိုမ်းဗဉ်ႏမု လိုမ်းကိုမ်ႏမု ဖေႏကအဝ်ႏတသေႏသေႏနဝ်ꩻ မိဉ်ႏကျင်ꩻသွုံꩻလွေꩻ ခမ်းထီပေါ်လစီ မူဝါဒနုဲင်းမုဲင်ꩻ"ကရိုꩻဒါႏဖုံႏယို ခမ်းသားသီးနမ်းဗွေႏချာ မိဉ်ႏပါဝင်ႏအုံကိုမ်ဒျာႏမꩻ ခမ်းသားသီး ကမိဉ်ထွာကမိဉ်အုံဒါႏ ခမ်းထီဖုံႏ ပွိုင်ဆင်တွာလွေꩻအီ အခေႏခံႏနဝ်ꩻသွူ။