ပအိုဝ်ႏတစွိုးခွိုꩻ

"ပအိုဝ်ႏတစွိုးခွိုꩻလုမ်း အလံႏတောႏယို ကအဝ်ႏသုင်ꩻဒါႏ နဲင်ႏငံႏပါတီအလီႏနဝ်ꩻ အဝ်ႏလိုႏစဉ်ꩻစာꩻသုင်ꩻသပ်ယူႏချာလဲဉ်း" မြန်မာခမ်းထီကို တယ်ႏစ ၂၀၁၀-ဗာနဝ်ꩻ လွေꩻဒီမိုကရေစီ နဲင်ႏငံႏရေꩻစနစ်တဲင် မာꩻလွေꩻအွဉ်ႏလွေꩻနေး လွိုက်ရွေꩻပွယ်ꩻနဝ်ꩻသွူ၊ နဝ်ꩻမꩻ မြန်မာခမ်းသားတွိုင်ꩻယို မိဉ်ႏမိဉ်နွို့ပါ နွို့မာꩻနဲင်ႏငံႏရေꩻလဲ့ နွို့ခုမ်မာꩻနွောင်ꩻဒျာႏ အခွင်ꩻအရေꩻဖုံႏယို အဝ်ႏလꩻလွဉ်နဝ်ꩻသွူ၊ မိဉ်ႏမိဉ်နွို့ပါ ခုမ်မာꩻနဲင်ႏငံႏရေꩻနဝ်ꩻ ထွို့ꩻဗူႏတယ်ႏထောင်ႏနွောင်ꩻဒျာႏ နဲင်ႏငံႏရေꩻပါတီဖုံႏနဝ်ꩻသွူ။ မိဉ်ႏမိဉ်ထွို့ꩻဗူႏ တယ်ႏထောင်ႏနဲင်ႏငံႏရေꩻပါတီနဝ်ꩻ ကထွာဒါႏ နဲင်ႏငံႏရေꩻပါတီအစွိုꩻအဗူႏလက္ခဏာႏ အစွိုꩻအလံႏတောႏ၊ အစွိုꩻတံꩻဆိတ်တောမ်ႏ အစွိုꩻမိဉ်ꩻ-စတဲင် အဝ်ႏလိုႏလွဉ်ဗာႏနဝ်ꩻသွူ၊ နဲင်ႏငံႏရေꩻပါတီဖုံႏ မတ်ပုံတင်နယ်ꩻဥပဒေႏကို ပုဒ်မွူး၁၄(ခ)အလꩻ နဲင်ႏငံႏရေꩻပါတီတဗာႏ အလံႏတောႏတံဆိတ်ယို သော့ꩻနုဲင်းတုနဲင်း နဲင်ႏငံႏတောႏ အလံႏတောႏတံꩻဆိတ်၊ ခမ်းနယ်ႏတောမ်ႏတွိုင်ႏ အလံႏတောမ်ႏတံꩻဆိတ်၊ နဲင်ႏတောႏအသိအမတ်ကပျုဒါႏ အစွိုꩻအလံႏတောမ်ႏတံꩻဆိတ်နဝ်ꩻ သုင်ꩻလꩻတဝ်း၊ အဝ်ႏနုဲင်းနဝ်ꩻတဲင် ကထွာနဲင်ႏငံႏရေꩻပါတီ NLD ပါတီတဲ့နဝ်ꩻ၊ ကြံ့ခိုင်ရေးပါတီတဲ့နဝ်ꩻ တောမ်ႏပါတီလောင်ႏလင်ဖုံႏနဝ်ꩻ အလံႏတောမ်ႏတံꩻဆိတ်ယို တသုင်ꩻဗွိုန်တဝ်း ခမ်းထီအလံႏတောႏသွူ။ ဗွိုန်နုဲင်းနဝ်ꩻနေနေ ခမ်းနယ်ႏအရန်း၊ လိုꩻမျိုꩻအရန်း နဲင်ႏငံႏရေꩻပါတီ SNID ပါတီတဲ့နဝ်ꩻ၊ SNDP ပါတီတဲ့နဝ်ꩻ တောမ်ႏပါတီလောင်ႏလင်ဖုံႏတဲ့နဝ်ꩻ တသုင်ꩻဗွိုန်တဝ်း ဖြောဝ်ꩻခမ်းနယ်ႏ အလံႏတောႏနဝ်ꩻ အဝ်ႏထီႏဗာႏနဝ်ꩻသွူ။ "ပြည်ထောင်စုထဲကပအိုဝ်း"ကရိုꩻဒါႏလိတ်အုပ်ကိုယို ပွိုင်းဝွို့တောမ်ႏ ပအိုဝ်ႏလိုꩻမျိုꩻဂုဏ်ႏအင်္ဂါႏ လက္ခဏာႏဖုံႏ၊ ပအိုဝ်ႏယိုꩻယာႏထုင်ꩻစံႏဖုံႏ၊ ပအိုဝ်ႏစီꩻပွါꩻရေꩻဖုံႏ၊ ပအိုဝ်ႏစွိုးခွိုꩻအလံႏတောႏတောမ်ႏ တံꩻဆိတ်စတဲင် ပအိုဝ်ႏလိုꩻမျိုꩻခရာႏ စွုမ်ႏစွုမ်ႏလင်ႏလင်ႏ အဝ်ႏပါသော့ꩻနဝ်ꩻသွူ၊ ပအိုဝ်ႏလိုꩻမျိုꩻ အလံႏတောမ်ႏတံꩻဆိတ်ယို တမုဲင်ꩻကရိုꩻနဝ်ꩻ နဲင်ႏငံႏတောႏ အသိအမတ်ပျုခါꩻလဉ်းနဝ်ꩻ ပအိုဝ်ႏစွုမ်ႏဖြာꩻ သေထွꩻဒျာႏနဝ်ꩻသွူ။ နဝ်ꩻမꩻ ပအိုဝ်ႏလိုꩻမျိုꩻ၊ ပအိုဝ်ႏစွိုးခွိုꩻ တစွိုးခွိုꩻလုမ်း အလံႏတောႏယို ပအိုဝ်ႏစွိုးခွိုꩻအစွိုꩻ နဲင်ႏငံႏရေꩻပါတီ ကထူႏသုင်ꩻဒါႏ နဲင်ႏငံႏရေꩻပါတီအလံႏနဝ်ꩻ အဝ်ႏလိုႏစဉ်ꩻစာꩻ သုင်ꩻသပ်ယူႏချာလဉ်းနဝ်ꩻသွူ။ အစွိုꩻတစွိုꩻကရိုꩻနဝ်ꩻ အပေႏပေႏလုမ်ꩻနဝ်ꩻသွူ၊ လိုꩻမျိုꩻတမျိုꩻကရိုꩻနဝ်ꩻ ပရီႏပရာႏမွေးတဝ်း၊ ပေႏပေႏပါႏပါႏမွေးတဝ်းသွူ၊ လိုꩻမျိုꩻတမျိုꩻကရိုꩻယို အဓိပ္ပါယ်ႏလဲဉ်းဆုံးယော့ ထွူႏတွုမ်ငါႏနဝ်ꩻသွူ၊ ပအိုဝ်ႏလိုꩻမျိုꩻတမျိုꩻယို မိဉ်ႏအွဉ်ႏထွာဗော့ꩻဒျာႏ ပအိုဝ်ႏစွိုးခွိုꩻအစွိုꩻတစွိုꩻနဝ်ꩻ အဓိပ္ပါယ်ႏကင်ꩻလွဉ်ꩻငါႏနဝ်ꩻသွူ၊ ထွာတဲ့ တထွာသင်ꩻတဝ်းနဝ်ꩻသွူ။ ပအိုဝ်ႏခမ်းသားတွိုင်ꩻစွုမ်ႏဖြာꩻယို ထွာပအိုဝ်ႏစွိုးခွိုꩻ၊ ထွာပအိုဝ်ႏလိုꩻမျိုꩻလွဉ်းလွဉ်းနဝ်ꩻသွူ၊ ကွဲးတွော့ꩻ ပအိုဝ်ႏခမ်းသားတွိုင်ꩻစွုမ်ႏဖြာꩻနဝ်ꩻ ပအိုဝ်ႏစွိုးခွိုꩻအစွိုꩻနွို့ တမွေးလို့တဝ်း စွုမ်ႏဖြာꩻနဝ်ꩻသွူ၊ နဝ်ꩻမꩻ ပအိုဝ်ႏခမ်းသားတွိုင်ꩻ၊ ပအိုဝ်ႏခမ်းသားအမျာꩻ၊ ပအိုဝ်ႏအမျိုꩻသာꩻ၊ ပအိုဝ်ႏတစွိုးခွိုꩻလုမ်းကပဲင်ႏဒါႏ ပအိုဝ်ႏစွိုးခွိုꩻအလံႏတောႏယို သုင်ထူႏလွေꩻ ပအိုဝ်ႏစွိုးခွိုꩻအစွိုꩻပါတီအလံႏနဝ်ꩻ ကထွာပအိုဝ်ႏခမ်းသားသီး အီႏလက်ခံႏနေဟောင်း၊ အွဉ်ႏတဖေင်ꩻသင်ꩻတဝ်း ပအိုဝ်ႏခမ်းသားသီးသဖော်ꩻထာꩻ၊ ပအိုဝ်ႏခမ်းသားသီးကဏ္ဍနဝ်ꩻသွူ။ မိဉ်ႏအဝ်ႏထူႏသုင်ꩻစွူစွူဒျာႏ နဲင်ႏငံႏရေꩻပါတီအလံႏနဝ်ꩻ ဝွန်ႏတွိုႏလွဉ်အီနွောင်ꩻ ပအိုဝ်ႏခမ်းသားသီးအလောင်းနဝ်ꩻသွူ၊ အချက်ယိုနဝ်ꩻ ကထွာပအိုဝ်ႏခမ်းသားသီး မိဉ်ႏသေနာႏထွꩻတဝ်း၊ မိဉ်ႏသေတဝ်းလဲ့ ကထွာနဲင်ႏငံႏရေꩻပါတီသားနဝ်ꩻ အဝ်ႏလိုႏထီႏဖေႏ၊ ထွားဖေႏငါႏ ခမ်းသားထံꩻသာꩻသီးအတာႏ အပဲစ်တွိုႏနွောင်ꩻအီနုဲင်းမုဲင်ꩻဖုံႏနဝ်ꩻသွူ။ မဲးပွယ်ꩻမိဉ်ႏတွိုႏတွိုႏ ကထွဉ်ႏဒါႏ ပအိုဝ်ႏခမ်းသားစွုမ်ႏလမ်းစွုမ်ႏပါႏ ယွိုင်ႏပအိုဝ်ႏအလံႏယို ကထွာပအိုဝ်ႏခမ်းသားတွိုင်ꩻအတာႏ ယွိုင်ႏဗာႏနဲ့၊ ယိုင်ႏဗာႏတဝ်းနဲ့ သျုတ်ရောꩻလဲဉ်းဝင်ꩻနဝ်ꩻသွူ၊ ခမ်းသားတဖြာꩻယို နဲင်ႏငံႏရေꩻပါတီအစွိုꩻမုဲင်ꩻတရိုꩻတဝ်း လွစ်လွစ်တခြင်ခြင် နွို့ပါခွင်ꩻအဝ်ႏတဲင် ယဟန်ႏသားနဝ်ꩻ NLD၊ ကြံ့ခိုင်ရေး၊ တစည၊ ပအမဖ-စတဲင် ပါတီစွုမ်ႏအဝ်ႏနဝ်ꩻသွူ။ နဝ်ꩻမꩻ မိဉ်ႏထွာဒျာႏ ပအိုဝ်ႏလိုꩻမျိုꩻအလံႏတောႏနဝ်ꩻ ပအိုဝ်ႏခမ်းသားသီး အဝ်ႏပါခန်းအစွိုꩻမုဲင်ꩻမုဲင်ꩻလဲ့ အီႏအဝ်ႏယွိုင်ႏဒျာႏနေနေနဝ်ꩻသွူ၊ နဲင်ႏငံႏရေꩻပါတီထွိုင်ႏထူႏသုင်ꩻတဲင် ပအိုဝ်ႏအလံႏတောႏခမ်းစွဉ်ႏလဲ့ မိဉ်ႏထွားမိဉ်ႏယူႏလွေꩻဒျာႏ နုဲင်းပြဲင်ႏဖက်ပါတီအနေႏနဝ်ꩻ ပါꩻမုဲင်ꩻပါတီ ပါꩻမုဲင်ꩻဖေႏအာႏချာဒျာႏနဝ်ꩻသွူ၊ ပေါႏလွိုသွူ ပအိုဝ်ႏစွိုးခွိုꩻအစွိုꩻနွို့နဝ်ꩻ လိုꩻအလင် တယွိုင်ႏတဝ်းနဝ်ꩻ အဝ်ႏထီႏဗာႏနဝ်ꩻသွူ။ မဲးပွယ်ꩻမိဉ်ႏတွိုႏ ယွိုင်ႏဗာႏပအိုဝ်ႏအလံႏယို ပအိုဝ်ႏခမ်းသားတွိုင်ꩻစွုမ်ႏဖြာꩻတာႏ အဆင်ႏတပြေႏတွိုင်ꩻတဝ်း ထီႏနုဲင်းနဝ်ꩻသွူ၊ ပအိုဝ်ႏခမ်းသားယဟန်ႏယို အဝ်ႏခုမ်မာꩻဝွန်ႏထံꩻဖုံႏ၊ အဝ်ႏခုမ်မာꩻကျေးရွာအုပ်ချုပ်ရေးမှူးဖုံႏ အဝ်ႏနေနေနဝ်ꩻသွူ။ ဝွန်ႏထံꩻတဲ့နဝ်ꩻ၊ အုပ်ချုပ်ရေးမှူးတဲ့နဝ်ꩻ ထေင်းထမ်ႏခမ်းထီဝွန်ႏသားယို ပွိုင်းဝွို့ ခွိုင်းဝွို့ နဲင်ႏငံႏရေꩻပါတီ လꩻတဝ်းလာꩻလာꩻသွူ၊ မိဉ်ႏနုဲင်းပအိုဝ်ႏလိုꩻမျိုꩻအလံႏတွော့ꩻ ယိုင်ႏနဝ်ꩻ ပအိုဝ်ႏခမ်းသားတဖြာꩻအတာႏ တထွာတဝ်းတမုဲင်ꩻမုဲင်ꩻလဲ့ ကွပ်ထွာလဲဉ်းပါတီအလံႏတဲင် ဝွေꩻသီးမိဉ်ႏပွိုင်းဝွို့နဝ်ꩻ ကထွာဝွေꩻသိး ပအိုဝ်ႏခမ်းသားတဖြာꩻအနေႏ တလွစ်ကင်ꩻတဝ်းဒွုမ် ဥပဒေႏနဝ်ꩻသွူ။ ဗွိုန်နုဲင်းနဝ်ꩻနေနေ ဖေႏမဲးပွယ်ꩻနီꩻယို တောမ်ႏမဲးယုံႏ ခါႏအခြဲမ်(၅၀၀)ကို ချောက်မဲး၊ ထွို့ꩻဗူႏမဲး လꩻတဝ်း၊ အီလွဉ်ဗော့ꩻ ပါတီတဗာႏဗာႏ လိုဂိုအလံႏတံꩻဆိတ်ကဗွို့ꩻဒါႏ ကုံႏ၊ တောင်းပွို၊ ဆဲင်ꩻ-စတဲင်လꩻတဝ်း၊ ယိုဖုံႏနဝ်ꩻ အဝ်ႏနုဲင်းယိုတဲင် ပအိုဝ်ႏလိုꩻယွဲးသီး ကဲဉ်းအာအာနဝ်ꩻ ကွပ်ရက်ငါႏပအိုဝ်ႏအလံႏတွော့ꩻ မိဉ်ႏဆꩻဆဲင်ꩻတဲ့နဝ်ꩻ၊ ဆꩻတောင်းပွိုတဲ့နဝ်ꩻ ဆꩻပယ်ပါ ပအိုဝ်ႏအလံႏဖုံႏအဝ်ႏနဝ်ꩻသွူ၊ မိဉ်းတွိုႏမွူးနီꩻနဝ်ꩻ ရိုꩻသာꩻငါႏ ခမ်းသားတဖြာꩻ ကွပ်တသေတဝ်း ဥပဒေႏတဲင် မိဉ်းကꩻဆဲင်ꩻလွေꩻ မာꩻပအိုဝ်ႏအလံႏကဗွို့ꩻဒါႏ ဆဲင်ꩻ၊ တောင်းပွိုနဝ်ꩻ လွစ်ကင်ꩻတဝ်း ဥပဒေႏနဝ်ꩻသွူ။ ပါတီမိဉ်းအဝ်ႏထူႏသုင်ꩻစွူစွူ ပအိုဝ်ႏလိုꩻမျိုꩻအလံႏယို ပအိုဝ်ႏခမ်းသားတွိုင်ꩻသီးအတာႏ ထွာလွဉ်နွဗာင်ꩻနုဲင်းမုဲင်ꩻနဝ်ꩻ ယူႏစဲင်းစဲင်းထွူ မာꩻလွေꩻသင်ꩻနုဲင်းမုဲင်ꩻ၊ ထွာလွေꩻသင်ꩻနုဲင်းမုဲင်ꩻ-ယူႏလꩻသင်ꩻလဲဉ်းဝင်ꩻအကျောင်ꩻ ခမ်းသားငေါဝ်း အယ်ဒီဝာာစွိုꩻ တဲမ်းဖြုဲင်ꩻဒင်ႏနယ်ဗာႏနဝ်ꩻသွူ။