ပအိုဝ်ႏနဲင်ႏငံႏရေꩻပါတီ

"ပအိုဝ်ႏနဲင်ႏငံႏရေꩻပါတီ ကအဝ်ႏနီဗာႏ ဖေႏထူႏခုမ်မာꩻငီꩻဝင်ꩻ မိဉ်ႏဒါႏနဝ်ꩻ" ပအိုဝ်ႏလိုꩻမျိုꩻယို ခမ်းအဲန်ထဝ်း၊ ထီအဲန်ထဝ်းဒွုန်းခန်းစွောန်ႏလဲ့ အွိုးပအိုဝ်ႏလိုꩻမျိုꩻရေꩻ၊ ပအိုဝ်ႏစွိုးခွိုꩻရေꩻ၊ ပအိုဝ်ႏခမ်းသားနဲင်ႏငံႏရေꩻ အခွင်ꩻအရေꩻဖုံႏယို ပအိုဝ်ႏတောမ်ႏပအိုဝ်ႏ ဖန်ဆင်ꩻချာခွင်ꩻ၊ အွောန်ငါချာခွင်ꩻ၊ ပအိုဝ်ႏဒေႏသတောမ်ႏ ပအိုဝ်ႏအခေႏအနေႏကို ပအိုဝ်ႏနမ်းပဲင်ႏအာႏဏာႏ အသုဲင်အမောင်ꩻ(ပအိုဝ်ႏတောမ်ႏပအိုဝ်ႏ အခေႏအနေႏကို ပအိုဝ်ႏသီးနမ်းပဲင်ႏ အချုပ်အချာအာႏဏာႏ)ယို အဝ်ႏလိုႏအဝ်ႏချာငါႏသွူ၊ တွိုႏစွောန်ႏအခေႏအနေႏနုဲင်းမုဲင်ꩻမုဲင်ꩻတယဝ်း ပအိုဝ်ႏလိုꩻမျိုꩻအရေꩻ၊ ပအိုဝ်ႏခမ်းသားနဲင်ႏငံႏရေꩻ မာꩻပဲင်ႏခွင်ꩻအာႏဏာႏယို အဝ်ႏလိုႏအွောန်ႏစွꩻလွောတ်တဝ်း။ ကလဲန်းတလာကို ခမ်းသားငေါဝ်းအယ်ဒီတာထာꩻထီႏကို တဲမ်းသုင်ꩻသပ်လွေꩻလဲန်း "ပအိုဝ်ႏတစွိုးခွိုꩻလုမ်း နဲင်ႏငံႏရေꩻ မဟာဗျူဟာ တအဝ်ႏတဝ်းနဝ်ꩻ ကောပ်စွောန်ႏပအိုဝ်ႏတစွိုးခွိုꩻလုမ်း အွောန်ငါယံ တအဲန်ထဝ်းဒွုန်း"ကရိုꩻဒါႏအတွိုင်ꩻ ပအိုဝ်ႏစွိုးခွိုꩻအစွိုꩻချုက်(ပီအဲန်အို)ပါတီတဲ့ မိဉ်လွေꩻနုဲင်းမုဲင်ꩻလွေꩻဒျာႏ၊ ခမ်းခြွောန်းဗူႏပအိုဝ်ႏစွိုးခွိုꩻအစွိုꩻချုက်(ပအမဖ)ပါတီတဲ့ မိဉ်လွေꩻနုဲင်းမုဲင်ꩻလွေꩻဒျာႏ၊ တလွေꩻငီꩻနွောင်ꩻတဝ်းလွဝင်ꩻ ပအိုဝ်ႏတစွိုးလုမ်း မူဝါဒဆꩻလယိုနဝ်ꩻ အွောန်ႏနယ်တမုဲင်ꩻဟောင်းနဲးတဲ့ ပီအဲန်အိုကိုတဲ့ အွောန်ငါခုမ်မာꩻနွောင်ꩻဒျာႏ အစွိုꩻကိုလုမ်ꩻ၊ တဲက်ဆဲင်ႏတောမ်ႏ ပအိုဝ်ႏတစွိုးခွိုꩻလုမ်းအရန်းယို အွောန်ငါခုမ်မာꩻနယ် တအဝ်ႏတဝ်း၊ ဗွိုန်နုဲင်းနဝ်ꩻနေနေ ပအမဖကိုတဲ့ အွောန်ငါခုမ်မာꩻလွေꩻဒျာႏ အစွိုꩻအရန်းလုမ်ꩻ၊ တဲက်ဆဲင်ႏတောမ်ႏ ပအိုဝ်ႏတစွိုးခွိုꩻလုမ်းအရန်းယို အွောန်ငါခုမ်မာꩻလွေꩻ တအဝ်ႏတဝ်း။ ဟန်ႏသနီꩻ ပအိုဝ်ႏသီးနဲင်ႏငံႏရေꩻ အခေႏအနေႏယို ဥပဒေႏဆꩻလအလꩻ ပအိုဝ်ႏနဲင်ႏငံႏရေꩻပါတီ အဝ်ႏနီဗာႏနဝ်ꩻ အချင်ꩻချင်ꩻ သေနာႏမုမိဉ်းအဝ်ႏ၊ အချင်ꩻချင်ꩻ ဖေႏထူႏခုမ်မာꩻငီꩻဝင်ꩻမိဉ်းဒါႏနဝ်ꩻ ပအိုဝ်ႏနဲင်ႏငံႏရေꩻတာႏ ထွာအကျိုꩻအဝ်ႏသွူ၊ ထွာမုဲင်ꩻနဲးတဲင် ပအိုဝ်ႏပါတီအဗာႏမုဲင်ꩻတယဝ်း တောမ်ႏမဟာႏမိတ် နဲင်ႏငံႏရေꩻပါတီလင်ဖုံႏ အဖေႏအထူႏ စူလွောန်ꩻခင်ႏလွောန်ꩻ မိဉ်းထွာခိန်ႏ၊ အယပ်ꩻအခုဲင်ႏ မိဉ်းအဝ်ႏခိန်ႏ၊ ပအိုဝ်ႏပါတီအစွိုꩻအနေႏ နွို့ခုမ်မာꩻသော့ꩻ မိဉ်းတဖုဲင်ႏတဝ်းခိန်ႏဖုံႏ၊ ပအိုဝ်ႏပါတဗာႏဗာႏအနေႏ နွို့ခုမ်မာꩻသော့ꩻ မိဉ်းတလꩻတဝ်းဒုမ်ခိန်ႏဖုံႏကို အဝ်ႏကုဲင်ဒါႏ ကအဝ်ႏလွောတ်ပအိုဝ်ႏနဲင်ႏငံႏရေꩻပါတီ တဗာႏဗာႏယို နွို့ခုမ်မာꩻသော့ꩻလုဲင်ႏနွောင်ꩻ။ မိဉ်းထွားချာ တယ်ႏ ၂၀၁၀-လွိုက်ရွေꩻပွယ်ꩻ အဝ်ႏပအိုဝ်ႏစွိုးခွိုꩻအစွိုꩻချုက် ပါတီတဗာႏလုမ်ꩻတဲင် ပီအဲန်အိုပါတီနဝ်ꩻ မာꩻလွေꩻအဖေႏအထူႏ တောမ်ႏကြံ့ခိုင်ရေးပါတီနဝ်ꩻသွူ၊ ကွဲးတွော့ꩻတဲင် အခိန်ႏထွိုင်ႏကာႏ အခါႏထွိုင်ႏလွောန်ꩻခိန်ႏနဝ်ꩻ ကမာꩻခါꩻဒါႏဝင်ꩻ နဲင်ႏငံႏရေꩻ အဖေႏအထူႏဖုံႏယို ဝင်ꩻယားကုဲင်ထိုꩻကတိတဲင် ခမ်ႏဗာႏလဲန်းတလဲင်ႏ၊ ထွိုင်ႏတွိုႏဖျင် ၂၀၁၅-လွိုက်ရွေꩻပွယ်ꩻ မာꩻဖျင်ယင်း အဖေႏအဖူႏတလဲင်ႏ ကတိဖုံႏ ဆေ့ꩻတောမ်ႏအာကုဲင်ထိုꩻတဲင် ခမ်ႏဗာႏယင်းတလဲင်ႏ၊ ယိုလဲင်ႏခါ တွိုႏလွောန် ၂၀၂၀-လွိုက်ရွေꩻပွယ်ꩻကို ထွားချာ ၂၀၁၀-၂၀၁၅ လွိုက်ရွေꩻပွယ်ꩻခိန်ႏတောမ်ႏ မဟာႏမိတ်ကမာꩻဝင်ꩻ အဖေႏအထူႏ အကျိုꩻတရာꩻအလꩻ ဟန်ႏနေင်ႏ ၂၀၂၀-လွိုက်ရွေꩻပွယ်ꩻယို ကထွာပအိုဝ်ႏစွိုးခွိုꩻအစွိုꩻချုက် (ပီအဲန်အို)ပါတီနဝ်ꩻ တောမ်ႏမဟာႏမိတ်ကြံ့ခိုင်ရေးပါတီယို မာꩻလွေꩻတဝ်းဒုမ် အဖေႏအထူႏအကျောင်ꩻ ဒေါ့ꩻလဝ်းကေႏညာႏစဝ်းလွေꩻနုဲင်းနဝ်ꩻ သေထွꩻဗာႏသွူ။ ပအိုဝ်ႏခမ်းသား ကအုံအဝ်ႏလွေꩻဒါႏ ခင်ႏလမ်းဒေႏသကို ပီအဲန်အိုပါတီယို အီႏနွို့ခေးလွေꩻ မဲးခင်ႏလမ်း(၃၅)ထွောင်းနဝ်ꩻ ထေထန်ႏလွေꩻလဲန်း လွတ်တောႏနမ်းခြောင်ꩻတင်လောင်ꩻသီး အမိဉ်ꩻစာႏရင်ꩻ(၃၅)ဖြာꩻနဝ်ꩻသွူ။ ကွဲးတဲင် အခိန်ႏထွိုင်ႏတွိုႏ မွူးနီꩻထွိုင်ႏတွိုက်နဝ်ꩻ ကထွာပအိုဝ်ႏနဲင်ႏငံႏပါတီ ပီအဲန်အိုယို မာꩻလွေꩻတဝ်းဒုမ်တောမ်ႏ မဟာႏမိတ် အဖေႏအထူႏ ဆုင်ꩻဖျတ်ခါꩻနုဲင်းနဝ်ꩻလဲ့ ကောပ်စွောန်ႏပအိုဝ်ႏနဲင်ႏငံႏရေꩻသီး အာႏပေႏချက်တဲ့မွေးမွေး၊ တောမ်ႏမဟာႏမိတ် အဖေႏအထူႏယို မိဉ်မာꩻတွော့ꩻ မာꩻဗာႏတဲ့နဝ်ꩻ၊ မိဉ်မာꩻတဝ်းတွော့ꩻ မာꩻဗာႏတဲ့နဝ်ꩻ၊ ဝင်ꩻခုမ်လꩻထိုꩻလဲန်း ပအိုဝ်ႏနဲင်ႏငံႏရေꩻအသုဲင်၊ ဝင်ꩻသဲန်ꩻလꩻထိုꩻလဲန်း ပအိုဝ်ႏနဲင်ႏငံႏရေꩻအဆုမ်ႏနဝ်ꩻသွူ။ ၂၀၁၀-လွိုက်ရွေꩻပွယ်ꩻခိန်ႏ တောမ်ႏမဟာမိတ် အဖေႏအထူႏ ကတိထွိုင်ႏကုဲင်နဝ်ꩻ ထိုမ်ႏယင်းတဖူꩻတလီးအနေႏ ပအိုဝ်ႏပါတီလင်ꩻအဝ်ႏတဝ်းတဲင် တောမ်ႏဝိဇ္ဇာႏတမ်ꩻဆိတ်တွော့ꩻ ဖျင်ဆင်လွဗꩻနမ်းတဖြာꩻပုဂ္ဂလလဲ့ အောင်ႏမျင်ႏလꩻတဝ်းနဝ်ꩻသွူ၊ ကွဲးတဲင် ၂၀၁၅-လွိုက်ရွေꩻပွယ်ꩻကိုနဝ်ꩻ ပအိုဝ်ႏပါတီအဝ်ႏလွောန်လဲန်းနီဗာႏလဲ့ နဲင်ႏငံႏရေꩻအဖေႏအထူႏအခါႏ ကခံႏဗာႏယို အချင်ꩻချင်ꩻ တယူႏလꩻတဝ်းဒျာႏလွဝင်ꩻ၊ အချင်ꩻချင်ꩻ တအွောန်ႏရေꩻတဝ်းဒျာႏလွဝင်ꩻ။ ယိုခါ ၂၀၂၀-လွိုက်ရွေꩻအီႏတွိုႏ ဝင်ꩻယမ်းလွောန်လဲန်း ပအိုဝ်ႏနဲင်ႏငံႏရေꩻအမာႏ၊ ဝင်ꩻယမ်းလွောန်လဲန်း ပအိုဝ်ႏနဲင်ႏငံႏရေꩻ အာႏပေႏချက်တဲင် ပအိုဝ်ႏဒေႏသကို နဲင်ႏငံႏရေꩻအတာႏ အီႏချာႏလုဲင်ႏ မဟာႏမိတ်ပါတီလင် မဲ့နားနုဲင်းမုဲင်ꩻ၊ အကွက်ꩻနုဲင်းမုဲင်ꩻနဝ်ꩻ ပအိုဝ်ႏနဲင်ႏငံႏရေꩻပါတီ အဝ်ႏနီဗာႏယို အဝ်ႏလိုႏဖေႏထူႏခုမ်မာꩻငီꩻလဲန်းဝင်ꩻ၊ အဝ်ႏလိုႏသုင်ꩻဒါႏဒါႏနဝ်ꩻ အွောန်ႏနယ်လွောန်လဲန်း အခေႏအနေႏနဝ်ꩻသွူ။ ပီအဲန်အို နဲင်ႏငံႏရေꩻပါတီတဲ့ လွေꩻတောမ်ႏခမ်းခြွောန်းဗူႏ လွိုက်ရွေꩻပွယ်ꩻ ကောမသိဉ်ဥပဒေႏ ဖေႏခွင်ꩻချက် ထွာတရာꩻဝင်ႏနဲင်ႏငံႏရေꩻပါတီတဗာႏအတွိုင်ꩻ ပအဖမ နဲင်ႏငံႏရေꩻပါတီတဲ့ လွေꩻတောမ်ႏခမ်းခြွောန်းဗူႏ လွိုက်ရွေꩻပွယ်ꩻကောမသိဉ် ဥပဒေႏဖေႏခွင်ꩻချက် ထွာတရာꩻဝင်ႏ နဲင်ႏငံႏရေꩻပါတီတဗာႏနုဲင်းနုဲင်းတဲင် ပအိုဝ်ႏနဲင်ႏငံႏရေꩻပါတီအချင်ꩻချင်ꩻ အဝ်ႏလိုႏမုဲင်အွောန်ႏသေ(အသိအမှတ်ပြု)ငါႏလွဝင်ꩻထွူ နဲင်ႏငံႏရေꩻလောကကို ကကျုံႏတလူႏလွောန်ဒါႏ နဲင်ႏငံႏရေꩻအလိန်ႏအလဲန်ဖုံႏယို ထွားတဝ်းပါတီ ပငါပရာꩻအကျိုꩻတရာꩻ ထွားဒျာႏပအိုဝ်ႏလိုꩻမျိုꩻ အကျိုꩻတရာꩻတွော့ꩻ အဝ်ႏလိုႏခံႏကုဲင်တဝ်း ပအိုဝ်ႏလိုꩻမျိုꩻသီး ဒေႏသနဲင်ႏငံႏရေꩻ မာꩻပဲင်ႏခွင်ꩻအာႏဏာႏနဝ်ꩻသွူ။ နုဲင်းဟန်ႏသနီꩻ ပအိုဝ်ႏနဲင်ႏငံႏရေꩻ အခေႏအနေႏအလꩻ ပအိုဝ်ႏဒေႏသကို နဲင်ႏငံႏရေꩻမာꩻပဲင်ႏခွင်ꩻ၊ ပအိုဝ်ႏလိုꩻမျိုꩻခြာနဲင်ႏငံႏရေꩻ မာꩻပဲင်ႏခွင်ꩻနဝ်ꩻ ပအိုဝ်ႏလိုꩻမျိုꩻသီး တပဲင်ႏချာတဝ်းဒုမ်၊ ကောပ်ဒျာႏ ပအိုဝ်ႏနဲင်ႏငံႏရေꩻ အွောန်ငါသီး နမ်းအကျိုꩻစီꩻပွါꩻတဲင် နုဲင်းယိုခါ ပအိုဝ်ႏခမ်းသားသီး နဲင်ႏငံႏရေꩻအခွင်ꩻအရေꩻယို ထဲ့သုမ်ꩻလွောန်ဗာႏလဲန်း၊ ကောပ်ဒျာႏ ပအိုဝ်ႏနဲင်ႏငံႏရေꩻအွောန်ငါသီး နမ်းအစွိုꩻအကျိုꩻစီꩻပွါꩻတဲင် ပအိုဝ်ႏခမ်းသားသီး ကံႏကျမ်ႏမာႏ နီတောမ်ႏနီ ဖန်ဆင်ꩻချာခွင်ꩻအဝ်ႏတဝ်းဒုမ်စူကို။ နုဲင်းယိုခါ ပအိုဝ်ႏဒေႏသအတာႏ ပအိုဝ်ႏခမ်းသားအတာႏ ပအိုဝ်ႏနဲင်ႏငံႏရေꩻယို ရိုꩻကီ ပအိုဝ်ႏနဲင်ႏငံႏရေꩻအစွိုꩻအဗူႏ၊ ပအိုဝ်ႏနဲင်ႏငံႏရေꩻပါတီသီး ခုမ်မာꩻဖေႏနုဲင်းနဝ်ꩻလဲ့ ပအိုဝ်ႏနဲင်ႏငံႏရေꩻအသုဲင်အမောင်ꩻ အာႏဏာႏ(ပအိုဝ်ႏနဲင်ႏငံႏရေꩻအချုပ်အချာအာႏဏာႏ)ယို ပအိုဝ်ႏနဲင်ႏငံႏရေꩻပါတီသီး တပဲင်ႏတဝ်းဒုမ်၊ ပအိုဝ်ႏခမ်းသားနဲင်ႏငံႏရေꩻ အချုပ်အချာအာႏဏာႏယို ခံႏဗာႏလဲန်းဝင်ꩻစောက်ကာꩻ။ နဝ်ꩻမꩻ ပအိုဝ်ႏစွိုးခွိုꩻအတာႏ ပအိုဝ်ႏခမ်းသားအတာႏ ခံႏထူႏအွောန်ငါခုမ်မာꩻလွေꩻဖေႏဒါႏ ပအိုဝ်ႏနဲင်ႏငံႏရေꩻအစွိုꩻ၊ ပအိုဝ်ႏနဲင်ႏငံႏရေꩻပါတီသီး ကခုမ်သုင်ꩻဒါႏ နဲင်ႏငံႏရေꩻမူဝါဒ၊ ကခုမ်သုင်ꩻဒါႏ နဲင်ႏငံႏရေꩻခံႏထူႏချက်ဖုံႏယို အဝ်ႏလိုႏသုင်ꩻသပ်ချာစဲင်းစဲင်းလဲန်းအကျောင်ꩻ ခမ်းသားငေါဝ်းအယ်ဒီတာစွိုꩻ တမာတဲမ်းဖြုဲင်ꩻဗာႏသွူ။