ပအိုဝ်ႏနဲင်ႏငံႏရေꩻအစွိုꩻ

"ပအိုဝ်ႏနဲင်ႏငံႏရေꩻအစွိုꩻသီး ကဖြွမ်းဗူႏဗာႏဝင်ꩻ နုဲင်းဟန်ႏသနီꩻနဝ်ꩻ မာꩻအီထာꩻမုဲင်ꩻအတာႏဟောင်း" ဟန်ႏသနီꩻ ပအိုဝ်ႏနုဲင်ႏငံႏရေꩻရုဲင်ꩻတသွိုးမုယို မိဉ်းထွားချာနဝ်ꩻ မြန်မာခမ်းထီ ကအဝ်ႏမာꩻလွေꩻဒါႏ ညိမ်ꩻချံꩻရေꩻတဖူꩻစဲဉ်ႏကို အဝ်ႏပါလွဉ်ꩻ၊ အဝ်ႏမာꩻလွေꩻ လိုꩻမျိုꩻတမျိုꩻနေနေနဝ်ꩻသွူ၊ မြန်မာခမ်းထီငိမ်ꩻချံꩻရေꩻ ထွာစဲဉ်ႏကို ခမ်းထီအစိုႏရနဝ်ꩻ ခမ်းရင်ꩻသားလိုꩻမျိုꩻစုမ်ႏ၊ လိုꩻစွိုꩻစုမ်ႏ ဖေႏကပါလွဉ်နွောင်ꩻ အဝ်ႏကျိုꩻစာꩻ၊ အဝ်ႏဖစ်ဟဲ့ꩻလဲ့ ငိမ်ꩻချံꩻရေꩻသက်တန်ꩻ နီနေင်ႏအကို တပါလွဉ်လို့နွောင်ꩻတဝ်းဒွုန်းနဝ်ꩻလဲ့ အဝ်ႏထီႏဗာႏဒျာႏဝင်ꩻနဝ်ꩻသွူ၊ ယိုခါ ကပါလွဉ်ထဲင်းယင်းနဝ်ꩻ အဝ်ႏမဲင်ꩻအစွိုꩻတောမ်ႏ လားဟူအစွိုꩻနဝ်ꩻသွူ။ ဗꩻတွိုႏလွဉ်ဟန်ႏနီꩻ အဝ်ႏခမ်းခြွဉ်းဗူႏညိမ်ꩻချံꩻရေꩻညီႏလာႏခံႏကို ကအွဉ်ႏထွော့ဒါႏ လိုꩻမျိုꩻစုအလွောက်ꩻ နုဲင်ႏငံႏရေꩻအုံကိုမ်ပွယ်ꩻဖုံႏ၊ ဒေႏသအလွောက်ꩻ နုဲင်ႏငံႏရေꩻအုံကိုမ်ပွယ်ꩻဖုံႏ၊ အကျောင်ꩻခရာႏအလွောက်ꩻ နုဲင်ႏငံႏရေꩻအုံကိုမ်ပွယ်ꩻဖုံႏယိုနဝ်ꩻလဲ့ ဒေႏသယဟန်ႏကို၊ လိုꩻမျိုꩻယဟန်ႏကိုနဝ်ꩻ အဝ်ႏမာꩻလွေꩻထွူလဲဉ်း ပထမအခြွိုက်ဖုံႏနဝ်ꩻသွူ၊ နဝ်ꩻအကို ပအိုဝ်ႏလိုꩻမျိုꩻသီးလဲ့ ပအိုဝ်ႏတစွိုးလုမ်းဆဲင်ႏရာꩻ စွိုးခွိုꩻအရန်း အုံကိုမ်နုဲင်ႏငံႏရေꩻပွယ်ꩻအပါ မော့ꩻခွဲးသား ပွယ်ꩻခင်ႏလမ်း(၁၃)ထွောင်းယိုဖုံႏနဝ်ꩻ မာꩻလွေꩻထွူလဲဉ်းနဝ်ꩻသွူ။ အီႏခုမ်မာꩻလွေꩻ ပအိုဝ်ႏလိုꩻမျိုꩻ စွိုးခွိုꩻအရန်း နဲင်ႏငံႏရေꩻအုံကိုမ်ပွယ်ꩻတာႏ ထွို့ꩻဗူႏလွေꩻ ပအိုဝ်ႏကိုကအဝ်ႏဒါႏ စူခုမ်ခြွိုင်းအစွိုꩻ၊ နဲင်ႏငံႏရေꩻပါတီစွိုꩻဖုံႏ တောမ်ႏပအိုဝ်ႏလိုꩻမုရေꩻအစွိုꩻစုမ်ႏဖုံႏ ကပါဒါႏ စွိုးခွိုꩻအရန်း နဲင်ႏငံႏရေꩻအုံကိုမ်ပွယ်ꩻ ထွာနွောင်ꩻရေꩻကောႏမတီႏနဝ်ꩻသွူ၊ နဝ်ꩻမꩻ ပအိုဝ်ႏသီးတစွိုးခွိုꩻလုမ်း စွိုးခွိုꩻအရန်း နဲင်ႏငံႏရေꩻအုံကိုမ်ပွယ်ꩻ ပထမအခြွိုက် ကထွူအောင်ႏမျင်ႏလွေꩻယိုနဝ်ꩻ ပအိုဝ်ႏကို ခုမ်စူခြွိုင်းစွိုꩻ၊ နဲင်ႏငံႏရေꩻပါတီစွိုꩻ၊ လိုꩻမုရေꩻအစွိုꩻ တောမ်ႏပအိုဝ်ႏခမ်းသားသီးယို လွောင်ႏဗူႏလဲဉ်းဝင်ꩻကရိုꩻနဝ်ꩻ အွဉ်ႏနယ်လွေꩻနွောင်ꩻထွူလဲဉ်း အာႏရဲင်ꩻနဝ်ꩻသွူ။ ပအိုဝ်ႏခုမ်စူခြွိုင်းစွိုꩻ၊ ပအိုဝ်ႏနဲင်ႏငံႏရေꩻပါတီစွိုꩻ၊ ပအိုဝ်ႏလိုꩻမုရေꩻအစွိုꩻ တောမ်ႏပအိုဝ်ႏခမ်းသားသီး ခမ်းကောင်ခမ်းဒေါမ်ယို ကောပ်ဖြွမ်းဖြွမ်းဗူႏဗူႏ မာꩻလွေꩻညီꩻတဲင် အဝ်ႏပအိုဝ်ႏစွိုးခွိုꩻနဲင်ႏငံႏရေꩻအုံကိုမ်ပွယ်ꩻကိုတရန်း ပအိုဝ်ႏလိုꩻမျိုꩻသီး နဲင်ႏငံႏရေꩻကဏ္ဍ၊ စီꩻပွါꩻရေꩻကဏ္ဍ၊ လိုꩻမုရေꩻကဏ္ဍတောမ်ႏ ဟံႏယာႏတောမ်ႏသဘာဝအသောင်အရင်ꩻကဏ္ဍ ဆဲင်ႏရာꩻကဏ္ဍအလွောက်ꩻ လိတ်ယာႏဖုံႏယိုတဲ့ ဒင်ႏထင်ႏနွောင်ꩻလဲဉ်း ခမ်းခြွဉ်းဗူႏညိမ်ꩻချံꩻရေꩻ ညီႏလာႏခံႏကိုနဝ်ꩻသွူ။ နုဲင်းယိုခါ အဝ်ႏဒုတိယအလဲင်ႏ ခမ်းခြွဉ်းဗူႏညိမ်ꩻချံꩻရေꩻ ညီႏလာႏခံႏကို ကထင်ႏလွဉ်ဒါႏ လိုꩻမျိုꩻအလွောက်ꩻလိတ်ယာႏဖုံႏ၊ ဒေႏသအလွောက်ꩻလိတ်ယာႏဖုံႏ၊ အကျောင်ꩻခရာႏအလွောက်ꩻ လိတ်ယာႏဖုံႏယို အခေႏခံႏလွေꩻ လိတ်ယာႏနဝ်ꩻအလောင်းဖုံႏတဲင် အွဉ်ႏထွော့လွဗꩻလဲဉ်း ခမ်းခြွဉ်းဗူႏသဘောꩻတူႏလိတ်ချုပ် အကွို့ꩻ(၁)နဝ်ꩻသွူ။ နဝ်ꩻမꩻ နုဲင်းဖူးဝေးလိုꩻမျိုꩻလင်ဖုံႏ ဗꩻတွိုႏဟန်ႏသနီꩻ လိုꩻမျိုꩻအရန်း နဲင်ႏငံႏရေꩻအုံကိုမ်ပွယ်ꩻတဲ့နဝ်ꩻ၊ လိုꩻမျိုꩻအလွောက်ꩻ မော့ꩻခွဲးခမ်းသားပွယ်ꩻတဲ့နဝ်ꩻ တခုဲင်ႏမာꩻဗာႏတဝ်းဒွုန်းသားတဲ့ အဝ်ႏနေကနဝ်ꩻသွူ၊ ကောပ်စွဉ်ႏလိုꩻမျိုꩻရေꩻအလꩻ ထွို့ꩻဗူႏလွောင်ႏဗူႏနွောင်ꩻတဝ်းဒွုန်းဝင်ꩻတဲ့အဝ်ႏ၊ တနွို့နွောင်ꩻတဝ်းဒွုန်း ခမ်းထီညိမ်ꩻချံꩻရေꩻထွာစဲဉ်ႏကိုတဲ့ အဝ်ႏနဝ်ꩻမꩻတဲင် တမာꩻနွောင်ꩻတဝ်းဒွုန်းနဝ်ꩻသွူ။ ဟန်ႏသနီꩻ နဲင်ႏငံႏရေꩻ အပြောင်ꩻအလုဲင်ႏကို လွောင်ႏဗူႏမုꩻ အာႏကလာထဲင်း ပအိုဝ်ႏသီးတဲ့ အဝ်ႏနဝ်ꩻသွူ၊ ခမ်းနယ်ႏကအဝ်ႏထွူလဲဉ်းဒါႏ လိုꩻမျိုꩻတန်ဖုံႏနဝ်ꩻ လွောင်ႏဗူႏထဲင်းပအိုဝ်ႏသီး အဝ်ႏဗောႏထာꩻသွူ၊ လိုꩻမျိုꩻလွောင်ႏဗူႏမုအာႏ၊ လိုꩻမျိုꩻဖြွမ်းဗူႏမုရဲင်ꩻယို အွဉ်ႏအထျꩻတဲင် ခုမ်စူခြွိုင်းသား အဝ်ႏနီသိုမ်စွိုꩻလဲ့ နဲင်ႏငံႏရေꩻအကို လိုꩻမျိုꩻလွောင်ႏဗူႏမု အွဉ်ႏဆငါတဲင် ဝင်ꩻဖြွမ်းဗူႏဝင်ꩻ တစွိုꩻချင်ႏတသꩻချင်ႏ၊ ခံႏထူႏချက်တခြောင်ꩻချင်ႏဖုံႏနဝ်ꩻသွူ၊ စောက်ꩻလိုꩻမျိုꩻနဝ်ꩻ ခုမ်စူခြွိုင်းစဲ့ꩻ တဲမ်းထွို့ꩻစူမုဲင်(NCA)လိတ်ချုပ်ကို အဝ်ႏသိုမ်စွိုꩻလဲ့ စောက်ꩻလိုꩻမျိုꩻအတာႏ မာꩻလွေꩻနဲင်ႏငံႏရေꩻ အဝ်ႏဒျာႏတခြောင်ꩻချင်ႏ၊ ဒေါ့ꩻငဝ်းထန်ႏဒျာႏ တငွါချင်ႏသွူ။ တညတဝ်းဒွုန်းနဝ်ꩻလဲ့ စောက်ꩻနဲင်ႏငံႏရေꩻပါတီ(ကရင်ပြည်နယ် ဒီမိုကရေစီနှင့် ဖွံ့ဖြိုးတိုးတက်ရေးပါတီ၊ ကရင်ဒီမိုကရက်တစ်ပါတီနှင့် စည်းလုံးညီညွတ်ေသာ ကရင်အမျိုးသားဒီမိုကရက်တစ်ပါတီ)ယိုသိုမ်ပါတီနဝ်ꩻ ယာကုဲင်ထွူ ဖြွမ်းခြွဉ်းထွာလွေꩻ (ကရင်အမျိုးသားဒီမိုကရက်တစ်ပါတီ)စောက်ꩻအမျိုꩻသာꩻ ဒီမိုကရက်တစ်ပါတီနဝ်ꩻသွူ။ ဟန်ႏသနီꩻ ပအိုဝ်ႏသီး ကမာꩻညီꩻလွဉ်နဲင်ႏငံႏရေꩻ၊ ကပါဝင်ႏလွဉ်ညိမ်ꩻချံꩻရေꩻထွာစဲဉ်ႏကို ပအိုဝ်ႏနဲင်ႏငံႏရေꩻအစွိုꩻဖုံႏ ကဖြွမ်းဗူႏမာꩻညီꩻလွဉ်ဝင်ꩻဖုံႏယို မိဉ်းထွားချာနဝ်ꩻ တညငါႏတဝ်းဒွုန်းနဝ်ꩻသွူ၊ ပအိုဝ်ႏနဲင်ႏငံႏရေꩻအစွိုꩻသီး၊ ပအိုဝ်ႏလိုꩻမုရေꩻအစွိုꩻသီး ကဖြွမ်းဗူႏဝင်ꩻယိုနဝ်ꩻ ရေႏရွယ်ႏလွေꩻ ဗꩻတွိုႏတခွုင်းမုဲင်ꩻဟောင်း၊ ညိမ်ꩻချံꩻရေꩻပွယ်ꩻယို မိဉ်းထွူးထိုꩻလဲ့ အွဉ်ႏသဝ်ꩻယိုꩻယင်းဒျာႏဟောင်း၊ ညိမ်ꩻချံꩻရေꩻပွယ်ꩻယိုငါ တလꩻတန်ꩻထွူသွတ်ꩻဒွုန်း ဖြွမ်းဗူႏမုဖုံႏယို ပြုဲင်လီထိုꩻချာသွူဟောင်း။ ပအိုဝ်ႏနဲင်ႏငံႏရေꩻအစွိုꩻသီး တဖြာꩻတောမ်ႏတဖြာꩻ၊ တစွိုꩻတောမ်ႏတစွိုꩻယို အခိန်ႏအခါႏယိုခါနဝ်ꩻ ပအိုဝ်ႏလိုꩻမျိုꩻအတာႏ ပအိုဝ်ႏနဲင်ႏငံႏရေꩻ၊ ပအိုဝ်ႏအခွင်ꩻအရေꩻ ဖေႏကသုမ်ꩻဗာႏမွုန်း၊ အဝ်ႏလိုႏစွီႏစူမာꩻငီꩻလဲဉ်းဝင်ꩻ တောမ်ႏသဘောꩻထာꩻ အမွေးအမဲဉ်ႏတွော့ꩻ မိဉ်းဖြွမ်းဗူႏမာꩻလွေꩻငီꩻဝင်ꩻနဝ်ꩻ ဟဝ်ယံမွေးငါႏသွူ။ မိဉ်းတမွေးတဝ်း တဖြာꩻတောမ်ႏတဖြာꩻယို မိဉ်းတယုမ်းအံႏနွောင်ꩻတဝ်း၊ တစွိုꩻတောမ်ႏတစွိုꩻယို မိဉ်းတစင်ဗွာနွောင်ꩻတဝ်း၊ မိဉ်းဖြွမ်းဗူႏလွဝင်ꩻ တောမ်ႏအယောင်ႏအဆောင်ႏနဝ်ꩻ ပအိုဝ်ႏလိုꩻမျိုꩻသီး လွောင်ႏဗူႏမု၊ ပအိုဝ်ႏလိုꩻမျိုꩻသီးဖြွမ်းဗူႏမုယို တတဉ်ႏခွေါင်နွောင်ꩻတဝ်း၊ ညဆွာꩻတာႏနဝ်ꩻသွူ၊ အဝ်ႏဖြွမ်းဗူႏလဲဉ်းသွူ မဉ်းယုမ်းနာႏသောႏဒျာႏ လိုꩻအလင်ငေါဝ်းနဝ်ꩻလဲ့ ပအိုဝ်ႏလိုꩻမျိုꩻသီးယို ကျိုꩻစာꩻခန်းနုဲင်းမုဲင်ꩻတယဝ်း အီႏထွာဗာႏဒျာႏဒွုန်းက ဝင်ꩻဆျာပေႏ၊ ဝင်ꩻဗွူႏထူႏခြဲစ်ꩻလွေꩻမုဲင်ꩻတဲ့ အဝ်ႏလွေꩻဗာႏဒွုန်းကနဝ်ꩻသွူ။