ပအိုဝ်ႏလိုꩻမျိုꩻဖေႏ

အဝ်ႏ ဝီခီပီးဒီးယား ကို

"ပအိုဝ်ႏလိုꩻမျိုꩻ ဖေႏကထင်ႏထိုနဝ်ꩻ အဝ်ႏလိုႏအွဉ်ႏဖေႏအာအာဒျာႏ လိုꩻယွဲးသီးစိုန်ꩻထီဆဲင်ႏရာꩻ ခေးပြဲင်ႏပွဲꩻ" လိုꩻမျိုꩻတမျိုꩻ၊ ခမ်းထီတဖြုံႏ ကထင်ႏထိုဗာႏထာꩻယို အရေꩻတန်သွတ်ꩻ အခေႏခံႏသွတ်ꩻနဝ်ꩻ ကောပ်စွဉ်ႏဒျာႏ လိုꩻမျိုꩻနဝ်ꩻအကို၊ ခမ်းထီနဝ်ꩻအကို လိုꩻဖုံႏ ခမ်းသားသီးဖုံႏ ထာꩻသေထာꩻဒါႏ ဉာဏ်ႏပညာႏ အထီအသွီႏ အဝ်ႏနဝ်ꩻသွူ၊ ဟန်ႏသနီꩻ ကပြွူႏဖြို ကထင်ႏထိုလဲဉ်းဒါႏ ခမ်းထီဖုံႏနဝ်ꩻ ဝွေꩻသီးခမ်းထီကို ကအဝ်ႏဒါႏ ခမ်းသားထီသားဖုံႏယို ပညာႏဖေႏကယံ၊ ထာꩻယူႏထာꩻတွေꩻ ဖေႏကထင်၊ သွဉ်ထူႏသွဉ်လွူꩻ လိတ်လုဲင်ꩻဖေႏကကုဲင်း၊ လိုꩻယွဲးသီးဖုံႏတဲ့ စိုန်ꩻယံထွူ ဖေႏကယိန်းယံထဲင်းထဲင်းနဝ်ꩻ ဝင်ꩻဖန်ဆင်ꩻနေး နယ်ꩻအမျိုꩻမျိုꩻစွဉ်ႏဒျာႏနဝ်ꩻသွူ။ ဝင်ꩻပင်ႏထိုမွေး တောမ်ႏပညာႏရေꩻစနစ်ဖဲ့ꩻတဲ့နဝ်ꩻ၊ ထိုမ်ႏထောင်ထွား ပညာႏမျိုꩻစုမ်ႏတာႏ ပညာႏရေꩻစင်တာဖုံႏတဲ့နဝ်ꩻ၊ လိုꩻယွဲးသီး အထီအသွီႏယို တဖြာꩻတောမ်ႏတဖြာꩻ ခေးပြဲင်ႏထွင်ႏဆထဲင်း ဖေႏကထွာနဝ်ꩻ မာꩻဖေႏနေး ဉာဏ်ႏခေးပွယ်ꩻဖုံႏတဲ့နဝ်ꩻ၊ ခေတ်တသွုပ်ထွူတသွုပ်ယို လိုꩻယွဲးလိုꩻဒါႏ ပညာႏသျင်ႏ ဖေႏကပေါႏထန်ႏအာအာထဲင်းနဝ်ꩻ ကထွာအွဉ်ငါသားသူꩻ ဝင်ꩻဗွောင်ဖေႏ ပညာႏရေꩻတဖူꩻ ယံမုဲင်ꩻရာꩻ ဟဝ်မုဲင်ꩻရာꩻနဝ်ꩻသွူ။ ခမ်းထီဖေႏကထင်ႏထိုတဲ့နဝ်ꩻ၊ ခမ်းထီကို ထေကွန်ႏဖေႏကလွိုင်ႏတဲ့နဝ်ꩻ၊ ခမ်းထီလိုမ်းဗဉ်ႏရေꩻတာႏ နျူးကလီးယားဖုံႏ လက်နက်ခြွိုင်ႏခြိုꩻဖုံႏ စဲ့ꩻအာႏရဲင်ꩻဖုံႏ ဖေႏကတလာတဲ့နဝ်ꩻ၊ ခမ်းထီစက်မုဖဲ့ꩻဆဲင်ႏရာꩻ ဖေႏကထွန်ꩻကာꩻတဲ့နဝ်ꩻ၊ ခမ်းထီတာႏ ထာꩻခုမ်ပဆိုးဖဲ့ꩻဆဲင်ႏရာꩻ ဘောလုံးတောမ်ႏ ထာꩻခုမ်းဆိုးအမျိုꩻစုမ်ႏဖုံႏ ဖေႏကတသွောင်းတဲ့နဝ်ꩻ၊ ခမ်းထီစီꩻပွါꩻရေꩻဖဲ့ꩻတဲ့နဝ်ꩻ၊ ခြွိုင်ႏသန်ꩻရေဖဲ့ꩻတဲ့နဝ်ꩻ၊ ပညာႏရေꩻဖဲ့ꩻတဲ့နဝ်ꩻ စတဲင်ဖေႏကပင်ႏထိုနွောင်ꩻယို အထီအသွီႏအဝ်ႏလိုꩻဒါႏပညာႏသားတောမ်ႏ အနယ်ꩻပညာႏယို ထွာအထျꩻသွူ။ ထွားနုဲင်းဟန်ႏသနီꩻ အမေႏရိကန်ႏခမ်းတန်ဖုံႏယို ကအွဉ်ငါနွောင်ꩻနေးဗာႏ ကမ္ဘာႏ၊ ကလွေꩻတွိုႏနွောင်ꩻနေးစွဉ်ႏ ဂြိုဟ်တုအဖြုံႏလင်နဝ်ꩻ ကောပ်စွဉ်ႏဒျာႏ ဝင်ꩻခမ်းထီယို အွဉ်ႏရေꩻလွူးထန်ႏပညာႏသျင်ႏသားနဝ်ꩻသွူ၊ ကောပ်စွဉ်ႏဒျာႏ အွဉ်ႏရေꩻမျိုꩻသွုပ်တသာပညာႏရေꩻ၊ ကောပ်စွဉ်ႏဒျာႏ ပညာႏယိုထွာအထျꩻ၊ အဝ်ႏပညာႏယို ယူႏတွေꩻ၊ အဝ်ႏထာꩻယူႏတွေꩻကို ဖောႏထန်ႏလွဉ် အနမ်းအခြုံနဝ်ꩻသွူ။ ဟန်ႏသနီꩻ နုဲင်းဒျာႏဂျပန်ခမ်းထီတဲ့နဝ်ꩻ အွဉ်ႏရေꩻမွေးစွဉ်ႏပညာႏရေꩻ၊ အွဉ်ႏရေꩻမွေးလိုꩻယွဲးသီး ထာꩻဖန်ဆင်ꩻ၊ အွဉ်ႏရေꩻမွေး လိုꩻယွဲးသီး ထာꩻတယ်ႏထွင်ႏ၊ မျိုꩻသွုပ်တသာ လိုꩻယွဲးပညာႏသျင်ႏ ဖေႏကပေါႏထန်ႏအာအာနဝ်ꩻ ဂျပန်ခမ်းထီအနေႏ ပင်ႏထိုမွေးစွဉ်ႏ၊ ဗွောင်ဖေႏမွေးစွဉ်ႏတဖူꩻနဝ်ꩻသွူ၊ ကလဲဉ်းခိုႏချာ ထာꩻတအဲဉ်ထဝ်းဖုံႏတဲ့ ဟန်ႏသနီꩻနဝ်ꩻ အဝ်ႏလွဉ်၊ ဝင်ꩻလဲင်ꩻအွဉ်ႏစွꩻနွောင်ꩻနေးစွဉ်ႏ ဂြိုဟ်တုခေါပ်နေင်ႏခေါပ်လာ အွိုးမို့ꩻလောင်းကီနဝ်ꩻသွူ။ ကောပ်စွဉ်ႏ အွဉ်ႏရေꩻလိုꩻယွဲးသီးပညာႏရေꩻတဲင် ဟန်ႏသနီꩻ တကမ္ဘာႏလုမ်းဗော့ꩻဗော့ꩻ ကအဝ်ႏသုင်ꩻဒါႏ ဖေတ်ဘုတ်ဖုံႏယို၊ လိုꩻတွိုင်ꩻ ကအဝ်ႏခုမ်သုင်ꩻဒါႏ ကွန်ပျူတာဖုံႏယို၊ ပအိုဝ်ႏသီးကအဝ်ႏဝါးဒါႏကာꩻ၊ သင်ကယ်ဖုံႏယို၊ တကမ္ဘာႏလုမ်း ကအဝ်ႏသုင်ꩻဒါႏ ဆဲလ်ဖုန်း(ဖုန်းလဲင်း)တောမ်ႏဖုန်းစက်ဖုံႏယို အဝ်ႏဒျာႏအမေႏရိကန်ႏ၊ ဂျပန်စတဲင် ပညာႏခမ်းသား ထွင်ႏဒျာႏလွဉ်းလွဉ်းနဝ်ꩻသွူ။ ကထွင်ႏဒါႏယိုဖုံႏ ကဲဉ်းအာအာနဝ်ꩻ လိုꩻယွဲး သက်နီဆီတောမ်ႏ သိုမ်ဆီခါႏဖုံႏဒျာႏသွူ၊ နဝ်ꩻမꩻ ကောပ်ထွင်ႏနွောင်ꩻတဲင် ကမ္ဘာႏလောင်းတဲ့ ထွာဗာႏစွဉ်ႏဒျာႏ သက်အပေႏသွတ်ꩻ လိုꩻအခြွေသွတ်ꩻဖုံႏနဝ်ꩻသွူ၊ ကောပ်စွဉ်ႏပညာႏအစိုန်ꩻတဲင် ခမ်းထီတဲ့ဂုဏ်ႏထင်ႏ၊ ကမ္ဘာႏလောင်းကအဝ်ႏဒါႏ လိုꩻသီးအတာႏတဲ့ အကျိုꩻအဝ်ႏ၊ ဝွေꩻသီးအတာႏတဲ့ အကျိုꩻအဝ်ႏ၊ ခြွေခြာႏချံꩻသာႏနဝ်ꩻသွူ။ ထွိုင်ႏထွားသဲင်ꩻချာယင်း မြန်မာခမ်းထီတောမ်ႏ ပအိုဝ်ႏလိုꩻမျိုꩻသီးအခြာကိုယိုနဝ်ꩻ ဖေႏအာႏလွဝင်ꩻ ပညာႏရေꩻအဝ်ႏတခွုင်းမုဲင်ꩻဟောင်း၊ ပညာႏတန်ႏဖိုꩻ အကျိုꩻတရာꩻ တွက်ထူႏနေးမုဲင်ꩻဟောင်း၊ ဟန်ႏသနီꩻ ပအိုဝ်ႏဒေႏသကို ပွိုင်းဝွို့တောမ်ႏပညာႏရေꩻနဝ်ꩻ ပအိုဝ်ႏလိုꩻယွဲးသီး ဖေႏကထင်ႏထို၊ ထာꩻယူႏဖေႏကထင်၊ သွဉ်ထူႏလွူꩻထွားနွောင်ꩻ ပညာႏအစွိုးစွိုးတာႏ ပညာႏခင်ႏလမ်းဖုံႏ ဖန်ဆင်ꩻဖေႏတအဝ်ႏတဝ်းနဝ်ꩻသွူ။ ဟန်ႏသနီꩻ ပအိုဝ်ႏဒေႏသကို ပအိုဝ်ႏအွဉ်ငါသီးဖုံႏနဝ်ꩻ အဝ်ႏမာꩻတဗက်တဗွိုတေားဒျာႏ ဘောလုံးပွဲꩻနဝ်ꩻသွူ၊ ယိုတပွဲꩻ လꩻထွူဒွုန်း အွိုးနဝ်ꩻတပွဲ့ꩻ အဝ်ႏစဖျင်လဲဉ်း၊ ပွဲꩻတထွောင်းတထွောင်းကိုကရိုꩻယိုလဲ့ ဘောလုံးအစွိုꩻပေါင်ꩻ လစ်ꩻဆီငတ်ꩻဆီအဝ်ႏနဝ်ꩻသွူ၊ အဝ်ႏနဝ်ꩻတဲင် လိုꩻယွဲးဖုံႏနဝ်ꩻ အမွန်းပျောႏလွဉ်ꩻလို့ဒျာႏဘောလုံး၊ ကအီႏသွဉ်ထူႏယင်းဒါႏ ပညာႏလောင်ႏလင်ဖုံႏယို ပအိုဝ်ႏလိုꩻယွဲးသီးအတာႏ အာႏယောမ်ꩻဆေꩻသဲင်ꩻထိုꩻလို့ဗာႏနဝ်ꩻသွူ။ ပအိုဝ်ႏအွဉ်ငါသီးအနေႏ မိဉ်းမိဉ်မာꩻထင်ႏထိုမွေး လိုꩻမျိုꩻရေꩻ၊ စွိုးခွိုꩻရေꩻနဝ်ꩻ အထျꩻယို အဝ်ႏလိုႏဒျာႏ လိုꩻမျိုꩻကို ဒါႏပညာႏသား အဝ်ႏအာနဝ်ꩻသွူ၊ နဝ်ꩻမꩻတဲင် လိုꩻဒါႏပညာႏသား၊ လိုꩻဝါႏသနာႏပညာႏသား ဖေႏကပေါႏထန်ႏလွဉ်အာအာနဝ်ꩻ ပွိုင်းဝွို့တောမ်ႏပညာႏရေꩻဖဲ့ꩻ အခွင်ꩻအရေꩻတဖူꩻယို ပညာႏရေꩻစနစ်နေးတဲ့နဝ်ꩻ၊ ထောင်ထွားအီပညာႏ အဒဝ်ႏဒဝ်ႏခင်ႏလမ်း ပအိုဝ်ႏပညာႏရေꩻစင်တာတဲ့နဝ်ꩻ၊ ခေးပြဲင်ႏလွဝင်ꩻစိုန်ꩻထီပညာႏ ခေးပြဲင်ႏပွဲꩻတဲ့နဝ်ꩻ အဝ်ႏလိုႏဗွောင်ဖႏအာအာ နုဲင်းဘောလုံးပွဲꩻနဝ်ꩻသွူ။ ပအိုဝ်ႏလိုꩻယွဲးသီးဖုံႏယိုနဝ်ꩻ ထွာပအိုဝ်ႏလိုꩻမျိုꩻသီး အနာႏဂတ်နဝ်ꩻသွူ၊ ဟန်ႏသနီꩻ ပအိုဝ်ႏလိုꩻမျိုꩻသီး နဲင်ႏငံႏရေꩻတဲ့နဝ်ꩻ၊ စီꩻပွါꩻရေꩻတဲ့နဝ်ꩻ၊ ပညာႏရေꩻတဲ့နဝ်ꩻ၊ ခြွိုင်ႏသန်ꩻရေꩻတဲ့နဝ်ꩻ စစွဉ်ႏအရေꩻအဒဝ်ႏဒဝ်ႏဖုံႏယို အဝ်ႏဒျာႏတထင်ႏထိုငါႏတဝ်းဒွုန်း အခေႏနေႏကိုနဝ်ꩻသွူ၊ အနာဂတ်ကို ပအိုဝ်ႏလိုꩻမျိုꩻကဏ္ဍအဒဝ်ႏဒဝ်ႏယို မိဉ်းမိဉ်အွဉ်ႏထင်ႏထိုလွိုထဲင်းယိုနဝ်ꩻ မျိုꩻသွုပ်တသာလိုꩻယွဲးသီးပညာႏရေꩻယို ယံလွိုထဲင်းဗာႏ ဟန်ႏသနီꩻယိုနဝ်ꩻသွူ။ ပအိုဝ်ႏလိုꩻမျိုꩻကို ဒါႏပညာႏသား မိဉ်းထန်ႏလွဉ်အာဒျာႏမꩻ အွဉ်ငါယံဖုံႏ အီႏထန်ႏလွဉ်နွောင်ꩻနဝ်ꩻသွူ၊ ပညာႏအခေႏခံႏ မိဉ်းတဟဝ်တဝ်းယို လိုꩻမျိုꩻအွဉ်ငါ ထန်ႏလွဉ်တဝ်းမွေးတဝ်း အဝ်ႏထန်ႏလွဉ်ဒျာႏ၊ ကွဲးတွော့ꩻ ထန်ႏလွဉ်ဒျာႏ လိုꩻမျိုꩻအွဉ်ငါ ထွေလွဉ်ꩻပါꩻ၊ အုံပါꩻစူဆလဖုံႏ၊ ထွာဒျာႏအွဉ်ငါ အထီအသွီႏ တဗွေတဝ်းနဝ်ꩻသွူ။[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ခြွူႏမွဉ်းသားစွိုꩻ
  2. ခမ်းသားငဝ်း အမုဲင်-၆၊ အစဲဉ်ႏ-၇၃၊ အမုဲင်-၇၊ အစဲဉ်ႏ-၈၄