ပအိုဝ်ႏလိုꩻယွဲး

"ပအိုဝ်ႏလိုꩻယွဲးသီးတဲ့ပါ ပအိုဝ်ႏခမ်းသားသီးယင်ကယ်ႏ ဖျင်ဆင်ခါꩻထွူလဲဉ်းဟောင်း" တညတဝ်းအခိန်ႏ ၂၀၁၈-ဗာႏကိုယို မြန်မာခမ်းထီယိုနဝ်ꩻ အီႏကျင်ꩻသုင်ꩻလွေꩻသွူ စီꩻပွါꩻရေꩻဆေꩻကွက်ꩻစနစ် တောမ်ႏအာဆီယံခမ်းထီဖိုင်ႏယို အီႏဗွောင်လွေꩻဒင်ႏပသာကွန်ႏ တဖူꩻနဝ်ꩻသွူ၊ အာဆီယံခလမ်းထီဖိုင်ႏယို တောမ်ႏမြန်မာခမ်းထီဒျာႏတဲ့နဝ်ꩻ၊ တခမ်းတောမ်ႏတခမ်းတဲ့နဝ်ꩻ အခွဉ်ႏလွစ် ဒင်ႏပသာချာငါကွန်ႏခွင်ꩻ အီႏလꩻလွဉ်နဝ်ꩻသွူ။ ခုဲင်ႏတွိုႏဒွုန်း ၂၀၁၅-ဗာႏကိုနဝ်ꩻ အာဆီယံခမ်းထီဖိုင်ႏ တောမ်ႏမြန်မာခမ်းထီယို လွစ်တခြင်ဒါႏ ဒင်ႏပသာကွန်ႏနဝ်ꩻ ရေႏဗွောင်လွေꩻဒျာႏ ၂၀၁၅-ဗာႏကိုကာႏနဝ်ꩻသွူ၊ ကွဲႏတွော့ꩻ နဝ်ꩻကိုခိန်ႏနဝ်ꩻ မြန်မာခမ်းထီယို အီႏဗွောင်စီꩻပွါꩻရေꩻဆေꩻကွက်ꩻစနစ်တာႏ စစရာႏရာႏတမုဲင်ꩻမုဲင်ꩻတဲ့ ကောပ်တအဝ်ႏတဝ်းဒွုန်းအထွူတဲင် မြန်မာခမ်းထီအနေႏ ဖျင်ဆင်ခိန်ႏတာႏ ထူႏလွေꩻထဲင်းယင်း အခိန်ႏသိုမ်နေင်ႏရိုꩻနဝ်ꩻတွော့ꩻ မြန်မာခမ်းထီအစိုႏရနဝ်ꩻ သဘောꩻတူႏလက်ခံႏ ဗွောင်လွေꩻစတေားလုဲင်ႏ ၂၀၁၈-ဗာႏယိုနဝ်ꩻသွူ။ နဝ်ꩻမꩻ ယိုနဝ်ꩻ ၂၀၁၈-ဗာႏအီႏနွို့ မြန်မာခမ်းထီတောမ်ႏ အာဆီယံခမ်းထီဖိုင်ႏ အီႏဗွောင်စီꩻပွါꩻရေꩻဆေꩻကွက်ꩻ၊ အီႏဗွောင်လွစ်တခြင် ဒင်ႏပသာကွန်ႏဖိုင်ႏစတဲင် ခမ်းထီအတာႏတဲ့နဝ်ꩻ၊ ခမ်းသားသီးအတာႏတဲ့နဝ်ꩻ ထာꩻမာꩻအခွင်ꩻအရေꩻဖိုင်ႏ အီႏအဝ်ႏအာလွဉ်နဝ်ꩻသွူ။ ကဒါႏပညာႏသားဖိုင်ႏလဲ့ ခမ်းလင်ခမ်းထန်ႏ ထာꩻမာꩻကုမ္ပဏီႏဖိုင်ႏအီႏနွို့လွဉ်၊ အီႏလွဉ်အွဉ်ႏပလို့ꩻ အနီꩻအရင်ꩻဖိုင်ႏတဲင် ထာꩻမာꩻဖိုင်ႏအီႏလွိုင်ႏလွဉ်နဝ်ꩻ အမန်ႏသွူ၊ ကထွာဒါႏနုဲင်းမွိုးဖါထုင်ꩻစဲဉ်ႏ ဆို့ꩻရုဲင်ရေꩻ အဒီႏအရာႏအလာႏ အစော့ꩻကထွာဒါႏ နွေႏ၊ ဖက်ꩻခေါ်၊ ဗေ၊ ဗေခြောင်၊ ခေါက်ခယ်ႏ၊ မေ့၊ အေင်၊ ခဲဉ်ႏစတဲင်ဖိုင်ႏယို ထေစာမြန်မာခမ်းထီကိုတဲ့နဝ်ꩻ ဒင်ႏထန်ႏခမ်းလင်တဲ့နဝ်ꩻ အခွင်ꩻအရေꩻဖိုင်ႏ အီႏအွဉ်လွဉ်နဝ်ꩻသွူ။ နဝ်ꩻတဲင် ၂၀၁၈-ဗာႏလဲ့တွိုႏသွူ မြန်မာခမ်းထီတောမ်ႏ အာဆီယံခမ်းထီဖိုင်ႏ အီႏဗွောင်လွေꩻသွူ စီꩻပွါꩻရေꩻဆေꩻကွက်ꩻနဝ်ꩻ မြန်မာခမ်းထီအတာႏ စစရာႏရာႏအဝ်ႏလဲဉ်းသွူအထွူနဲ့၊ မြန်မာခမ်းသားသီးအတာႏ အဝ်ႏလဲဉ်းအထွူဟောင်း၊ ပအိုဝ်ႏခမ်းသားသီးတောမ်ႏ ပအိုဝ်ႏလိုꩻယွဲးသီးယင်ကယ်ႏ ဖျင်ဆင်ခါꩻထွူလဲဉ်းဟောင်း။ ယိုခါ မြန်မာခမ်းထီအစိုႏရနဝ်ꩻ ဝွေꩻသီးကလက်ခံႏခါꩻဒါႏ နေင်ႏမွူးနီꩻအတွိုင်ꩻယို ဖေႏကမာꩻနွောင်ꩻနဝ်ꩻ ဝွေꩻသီးဖျင်ဆင်ခါꩻထွူလဲဉ်းနဝ်ꩻသွူ၊ ကွဲးတွော့ꩻ ခမ်းသားတောမ်ႏလိုꩻယွဲးသီးဖိုင်ႏနဝ်ꩻ သွဉ်ပညာႏခွင်ꩻ၊ အခွင်ꩻအရေꩻကအဝ်ႏဒါႏလိုꩻဖိုင်ႏတောမ်ႏ ကခုမ်မာꩻဖို ထာꩻမာꩻကုမ္ပဏီႏကို လိုꩻယဟန်ႏဖိုင်ႏနဝ်ꩻ ပညာႏအခွဲးအကျုံႏတောမ်ႏ ထာꩻမာꩻအခွဲးအကျုံႏဖိုင်ႏယိုတဲ့ အီႏအဝ်ႏနေနေနဝ်ꩻသွူ။ အွိုးခမ်းရင်ꩻသားလိုꩻမျိုꩻဖိုင်ႏ၊ ပအိုဝ်ႏလိုꩻမျိုꩻ လိုꩻယွဲးသီးဖိုင်ႏနဝ်ꩻက မြန်မာခမ်းထီ ကအီႏလွေꩻငါထဲင်းဒါႏ စီꩻပွါꩻရေꩻအခွင်ꩻအရေꩻ၊ ထာꩻမာꩻအခွင်ꩻအရေꩻယိုအကိုနဝ်ꩻ အီႏကာလွဉ်ꩻ၊ အီႏပြောင်ꩻလုဲင်ႏပါလွဉ်ꩻနွောင်ꩻတာႏ ထာꩻမာꩻအခွဲးအကျုံႏတောမ်ႏ ပညာႏအခွဲးအကျုံႏဖိုင်ႏ သွဉ်ထူႏခုမ်မာꩻဗာႏဖို အဝ်ႏလဲဉ်းနဲ့ဟောင်း။ မြန်မာခမ်းထီသားတဲ့ ဒင်ႏလွေꩻကွန်ႏဝင်ꩻခမ်းလင် လွေꩻဝင်ꩻခမ်းလင်ကို၊ ဝင်ꩻခမ်းလင်သားတဲ့ ဒင်ႏလွဉ်ကွန်ႏမြန်မာခမ်းထီကို လွဉ်ဗွောင်ကုမ္ပဏီႏ မြန်မာခမ်းထီကိုတဲင် မြန်မာခမ်း အာဆီယံခမ်းထီဖိုင်ႏနဝ်ꩻ မာꩻခွင်ꩻဗွိုန် ခံႏစာꩻခွင်ꩻလာတာႏဖိုင်ႏ အီႏဗွိုန်ပီလွေꩻလွဝင်ꩻနဝ်ꩻသွူ၊ လွဉ်မာꩻဗွောင်လဲဉ်း မြန်မာခမ်းထီကို ထာꩻမာꩻအာႏခꩻလာတာႏ သမ်းဖေႏဗာႏဗွိုန်ဗွိုန်ဒျာႏ တောမ်ႏခမ်းလင်တဲင် ကထွာမြန်မာခမ်းထီသားထာꩻဒါႏဖိုင်ႏ၊ ပညာႏအခွဲးအကျုံႏဖိုင်ႏ၊ ထာꩻမာꩻအခွဲးအကျုံႏဖိုင်ႏ မိဉ်ႏတအဝ်ႏတဝ်း၊ မိဉ်ႏတထွꩻတဝ်း ဝင်ꩻခမ်းလင်သားကရိုꩻလဲ့ ထာꩻမာꩻအခွင်ꩻအရေꩻနဝ်ꩻဖိုင်ႏ၊ ထာꩻမာꩻခင်ႏလမ်းနဝ်ꩻဖိုင်ႏနဝ်ꩻ ဝင်ꩻဟဲ့ꩻလွဉ်သော့ꩻပါလို့ထိုꩻဒါႏ လိုꩻခမ်းလင်သားနဝ်ꩻသွူ။ တွိုႏနဝ်ꩻတဲင် ယိုခါ ကတွိုႏအဝ်ႏထွာနေလဲဉ်း ထာꩻမာꩻဆေ့ꩻခြော ထာꩻမာꩻတအဲဉ်ထဝ်းခမ်းထီနဝ်ꩻ ထာꩻမာꩻအခွင်ꩻအရေꩻဖိုင်ႏ ဖျော်လွဉ်ပြုံႏပြုံႏပြင်ႏပြင်ႏသော့ꩻလဲ့ ကောပ်စွဉ်ႏတဖျင်ဆင်ခါꩻဗာႏတဝ်း၊ ကောပ်စွဉ်ႏတထဲမ်ဗွေခါꩻဗာႏတဝ်း အထီအသွီႏဖိုင်ႏတဲင် အခွင်ꩻအရေꩻဖိုင်ႏယို လွစ်ထိုꩻချာဒါႏနဝ်ꩻသွူ။ ထာꩻမာꩻဟဝ်၊ လာတာႏဟဝ်၊ ခင်ႏလမ်းဟဝ်၊ အခွင်ꩻအရေꩻဟဝ်ဖိုင်ႏယို ထွာထိုꩻယင်းဗာႏဒျာႏ ဝင်ꩻခမ်းလင်သားတာႏနဝ်ꩻသွူ။ ထာꩻမာꩻကတွိုး တအဲဉ်ထဝ်း၊ မြန်မာခမ်းထီ ခမ်းသားတောမ်ႏခမ်းရင်ꩻသားဖိုင်ႏယို မဲ့ꩻထာꩻမာꩻအဝ်ႏကင်ꩻစူꩻစွူစွူဗာႏဒွုန်းက ဖေႏကထွာဗာႏမွုန်းနဝ်ꩻ၊ တွူႏခြေင်ႏဆုမ်ႏတောမ်ႏ ကုမ္ပဏီႏဖိုင်ႏ၊ ထာꩻမာꩻအခွင်ꩻအရေꩻဖိုင်ႏ ဖေႏကဟဝ်လꩻလꩻနဝ်ꩻ ကထွာဒါႏနုဲင်းခုမ်စံႏအင်တာနဲစ်ဖဲ့ꩻဆဲင်ႏရာꩻနယ်ꩻပညာႏဖိုင်ႏ၊ ကွန်ပျူတာဖဲ့ꩻဆဲင်ႏရာꩻနယ်ꩻပညာႏဖိုင်ႏ တောမ်ႏကမ္ဘာႏသုင်ꩻဘာႏသာႏငေါဝ်းငွါ အိင်္ဂလိပ်ဘာႏသာႏငေါဝ်းငွါဖိုင်ႏယို အခေႏနေႏဖေႏကအဝ်ႏအထွူနဝ်ꩻ အီႏအဝ်ႏလိုႏ၊ အီႏထွာအထျꩻပေႏနေနေနဝ်ꩻသွူ။ ပအိုဝ်ႏလိုꩻမျိုꩻသီးကဲဉ်းအာအာနဝ်ꩻ ထာꩻမာꩻအထျꩻယို အီႏထွာမွိုးဖါထုင်ꩻစဲဉ်ႏဆို့ꩻရုဲင်ရေꩻတဲင် ပအိုဝ်ႏသီးဆို့ꩻရုဲင်တွော့ꩻ ကထန်ႏဒါႏ အဒီႏ၊ အရာႏ၊ အလာႏ၊ အစော့ꩻဖိုင်ႏယို ဒင်ႏပသာလွေꩻ စာခမ်းလင်တဲင် အီႏခြေင်ႏဗာႏတောမ်ႏဝင်ꩻကွန်ႏနဝ်ꩻမꩻ စီꩻပွါꩻရေꩻဆေꩻကွက်ꩻကို ပအိုဝ်ႏသီးကွန်ႏဆေꩻကွက်ꩻဖေႏကသာႏနဝ်ꩻ ပအိုဝ်ႏသီးဆို့ꩻရုဲင်ရေꩻယို အဝ်ႏလိုႏဖျင်ဆင်ခါꩻလဲဉ်းဟဝ်ဟဝ်အကျောင်ꩻ ခမ်းသားငေါဝ်း အယ်ဒီတာစွိုꩻ တဲမ်းဖေႏသေ တမာလွေꩻဗာႏနဝ်ꩻသွူ။<ref>ခမ်းသားငဝ်း အမုဲင်(၅)၊ အစဲဉ်ႏ(၄၈)/ref>