ပအိုဝ်ႏလွတ်တောႏ

"ပအိုဝ်ႏလွတ်တောႏအမတ်သီး အဝ်ႏလိုႏထွားမာꩻဖေႏမဲဉ်ႏမဲဉ်ႏငါႏ ပအိုဝ်ႏခမ်းသားသီး ကခံႏဗာႏသိမ်ꩻဟံႏယာႏပျဿနာႏ" မြန်မာခမ်းထီကို ပွိုင်းဝွို့တောမ်ႏ သိမ်ꩻဟံႏယာႏပျဿနာႏယို ဗꩻတွိုႏဟန်ႏသနီꩻ တဖြေႏသျင်ꩻထွူသွတ်ꩻနွောင်ꩻတဝ်းဒွုန်းနဝ်ꩻသွူ၊ ကသိမ်ꩻထူႏသားတဲ့သိမ်ꩻထူႏ၊ ကသိမ်ꩻထူႏခံႏဗာႏသားတဲ့ ခံႏဗာႏထွူ သုံꩻတောမ်ႏဥပဒေႏပုဒ်မအမျိုꩻမျိုꩻတဲင် တွိုႏထွာလွဉ်ဗာႏနေးစွဉ်ႏ ထာꩻထွို့ꩻစွယ်ꩻတရာꩻလွဝင်ꩻ၊ တွိုႏထွာဗာႏနေးစွဉ်ႏ လွေꩻဖြေႏသျင်ꩻဗာႏတရာꩻရုမ်ꩻအရန်းဖုံႏနဝ်ꩻသွူ။ နဝ်ꩻမꩻတဲင် ပွိုင်းဝွို့တောမ်ႏဥပဒေႏကင်ꩻကင်ꩻ သိမ်ꩻထူႏသွူဝင်ꩻဟံႏတွော့ꩻ ထွို့ꩻစွယ်ꩻတရာꩻပါယင်း သွို့ꩻခြံသားနဝ်ꩻ ထွို့ꩻစွယ်ꩻတရာꩻအမု တွိုႏဝင်ႏနေဟောင်း၊ ထာꩻတရာꩻမဲဉ်ႏတရျား အဝ်ႏနေဟောင်းနဝ်ꩻ။ ပွိုင်းဝွို့တောမ်ႏကိစ္စယိုတဲင် ဩဂုတ်လာ ၂၃-နီꩻနဝ်ꩻ ခမ်းသားလွတ်တောႏဥက္ကဋ္ဌ ဦးဝင်းမြင့် ဒေါ့ꩻလွေꩻမြန်မာခမ်းထီကို ကသိမ်ꩻဒါႏဟံႏယာႏပျဿနာႏ ယိုခါ ကအဝ်ႏထွာနေဒါႏ ခုမ်မာꩻဖြေႏသျင်ꩻချာ အခေႏနေႏအလောင်း လွတ်တောႏကိုနဝ်ꩻသွူ။ အသိမ်ꩻတဲ့ ခံႏဗာႏဒျာႏ၊ ထွို့ꩻတရာꩻအမုတဲ့ ခံႏဗာႏဒျာႏ မိဉ်ႏထွူယိုနဝ်ꩻ ထွဉ်ႏဖြေႏသျင်ꩻနေးတရာꩻရုမ်ꩻကို။ တရာꩻဥပဒေႏကရိုꩻနဝ်ꩻ တမုဲင်ꩻဟောင်း၊ တရာꩻကရိုꩻနဝ်ꩻ မဲဉ်ႏရာႏတရျားတွာ၊ ဥပဒေႏကရိုꩻနဝ်ꩻ စီꩻကန်ꩻတဖွေါင်ꩻ၊ နဝ်ꩻတဲင် တရာꩻဥပဒေႏယို ထွာမဲဉ်ႏရာႏတရျားတွာ စီꩻကန်ꩻတဖွေါင်ꩻနဝ်ꩻသွူ၊ ထွာဒျာႏ မဲဉ်ႏရာႏတရျားတွာ စီꩻကန်ꩻတဖွေါင်ꩻတဲင် သမ်းသိမ်ꩻခံႏဗာႏဒျာႏ တောမ်ႏဥပဒေႏကင်ꩻ၊ မိဉ်ꩻဒျာႏအသိမ်ꩻလုမ်ꩻ၊ ယိုခါအဝ်ႏလိုပ်ꩻအဝ်ႏမာꩻဒျာႏတွိုင်ꩻတွိုင်ꩻ၊ မိဉ်းဒေါ့ꩻဗာႏယိုနဝ်ꩻ ကထွာဗာႏပဲင်ႏဆဲင်ႏမွေးနဝ်ꩻ ထွာဗာႏပါꩻမုဲင်ꩻ၊ ယိုနဝ်ꩻ သမ်းအဝ်ႏထွို့ꩻစွယ်ꩻတရာꩻကဝင်ꩻအမုနဝ်ꩻ ကဲက်ညီႏနေဟောင်း တောမ်ႏထွို့ꩻစွယ်ꩻတရာꩻဝင်ꩻပုဒ်မွူးကိုဟောင်းနဝ်ꩻ ကထွာတရာꩻရုမ်ꩻယို အဝ်ႏလိုႏအွဉ်ႏသတိထွူႏထွူႏတွုမ်တွုမ် ယူႏချာငါႏနဝ်ꩻသွူ။ မိဉ်ႏကဲက်ညီႏဒျာႏမွေး တောမ်ႏပုဒ်မွူးအင်္ဂါႏနဝ်ꩻ မွေးဒျာႏ၊ မိဉ်ႏတကဲက်ညီႏတဝ်း တောမ်ႏထွို့ꩻစွယ်ꩻတရာꩻပုဒ်မွူးအင်္ဂါႏကိစ္စဖုံႏတွော့ꩻ တရာꩻရုမ်ꩻယို မိဉ်ႏအဝ်ႏဖေႏဒျာႏ ထွို့ꩻစွယ်ꩻတရာꩻခွင်ꩻနဝ်ꩻ အသိမ်ꩻဟံႏတဲ့ခံႏဗာႏဒျာႏ၊ အသိမ်ꩻခံႏဗာႏသားနဝ်ꩻ အံႏအွꩻခရာႏတအဝ်ႏတဝ်း၊ တွိုႏကသိမ်ꩻထူႏသားနဝ်ꩻ အွဉ်ႏခရာႏအဝ်ႏတဝ်းလိုမ်းတဝ်း၊ မိဉ်ႏဖက်ထွးယင်းယိုနီစားနဝ်ꩻ ဖြေႏသျင်ꩻဗာႏတရာꩻရုမ်ꩻကရိုꩻယို တရာꩻဥပဒေႏရေးရွယ်ႏချက်ကထွာ မဲဉ်ႏရာႏတရျားတွာဒါႏ စီꩻကန်ꩻတဖွေါင်ꩻယို ထိုꩻမားလဲဉ်းနဝ်ꩻသွူ၊ နဝ်ꩻမိဉ်းထွူ တရာꩻရုမ်ꩻနဝ်ꩻ အံႏအွꩻခရာႏတအဝ်ႏတဝ်းသား တောမ်ႏအွဉ်ႏခရာႏ တအဝ်ႏတဝ်းသားနီဗာႏ အီႏပါလွဉ်ꩻအဗာႏမုဲင်ꩻဆꩻချာဟောင်း။ နီဖုံႏယို အဝ်ႏလိုႏဟဝ်အွဉ်ႏငါႏ စာႏနာႏချာနမ်း ထာꩻတရာꩻသွူ၊ နီကမာꩻဝင်ꩻနုဲင်းယိုတွော့ꩻ ဝင်ꩻမိဉ်ႏမာꩻချာနီနုဲင်းယိုနဝ်ꩻ နီခံႏနွောင်ꩻနေဟောင်း၊ ယိုနဝ်ꩻ ဟဲ့ꩻစာႏနာႏချာ နီနမ်းထာꩻတရာꩻနဝ်ꩻသွူ၊ တွိုႏဝင်ꩻနဝ်ꩻ နီမိဉ်မာꩻနုဲင်းမုဲင်ꩻတဲ့မာꩻဒျာႏ ပါꩻယံကခံႏဗာႏသွော့၊ တွိုႏမိဉ်ႏမာꩻချာနီနဝ်ꩻ ဆေ့ꩻဆေ့ꩻပေႏငါလဲ့ တခံႏနွောင်ꩻတဝ်းရင်ꩻ၊ နဝ်ꩻစားနဝ်ꩻ စာႏနာႏချာနမ်း တရာꩻတအဝ်ႏတဝ်းနဝ်ꩻသွူ၊ နဝ်ꩻမꩻ ယိုစားဖုံႏနဝ်ꩻ မိဉ်အွဉ်ႏခုမ်မာꩻလွေꩻဒျာႏ တောမ်ႏဥပဒေႏအတွိုင်ꩻကိုနဝ်ꩻသွူ။ ခမ်းခြွဉ်းဗူႏတရာꩻလွတ်တောႏတဲ့ သမ်းရိုꩻဒျာႏ ဗဟိုႏစဲစ်ဆေꩻဟံႏယာႏ ကောႏမတီႏ မိဉ်းဒေါ့ꩻလွဉ်မꩻ မာꩻဖေႏနွောင်ꩻတဲ့၊ ဗဟိုႏစဲစ်ဆေꩻဟံႏယာႏ ကောႏမတီႏနဝ်ꩻလဲ့ ထွိုင်ႏဖြေႏနဝ်ꩻ လွေꩻဖြေႏသျင်ꩻလွဒျာႏသွော့ တရာꩻရုမ်ꩻဟုဲင်းတဲ့၊ ပျဿနာႏယိုနဝ်ꩻ ထာꩻဖြေꩻစာမာႏအမုတဲ့ တမွေးတဝ်း၊ အမွီႏခံႏသွုပ်အမုတဲ့ တမွေးတဝ်း၊ ယိုနဝ်ꩻ ဖေႏချာငါလွဝင်ꩻမေတ္တာႏတဲ့ တမွေးတဝ်း၊ မိဉ်ႏနုဲင်းဖြေꩻစာမာႏတွော့ꩻ ဖေႏစွန်ꩻတွော့ꩻ အမွီႏမုတွော့ꩻ ဖြေႏသျင်ꩻဗာႏတရာꩻရုမ်ꩻနဝ်ꩻတဲ့ မွေးဒျာႏ။ တောမ်ႏဥပဒေႏကင်ꩻတဲ့ ခံႏဗာႏဒျာႏအသိမ်ꩻ၊ အသိမ်ꩻတဲ့ ခံႏဗာႏဒွုန်းက၊ ကသိမ်ꩻထူႏသားနဝ်ꩻ ထာꩻမာꩻဗွေႏသား ရွဉ်အဝ်ႏသားဖုံႏ၊ တောမ်ႏလိုꩻနဝ်ꩻစားတွော့ꩻ အီႏလွေꩻခြေႏဗာႏတရာꩻရုမ်ꩻနဝ်ꩻ နီအဖြေႏယို အဝ်ႏလိုႏယူႏချာသင်ꩻငါႏလဲဉ်းသွူ၊ ကောပ်နဝ်ꩻမꩻ ပွိုင်းဝွို့တောမ်ႏကိစ္စယို ခွေမိဉ်ဒေါ့ꩻဖြောင်ဖြောင်ဒေါင်ဒေါင်ငါႏ ခမ်းခြွဉ်းဗူႏတရာꩻလွတ်တောႏချုပ်တဲ့နဝ်ꩻ၊ စဲစ်ဆေꩻထောင်ထွားဟံႏယာႏ ဗဟိုႏႏကောႏမတီႏတဲ့နဝ်ꩻ မိဉ်အွဉ်ႏသုံꩻသပ်မာꩻချာမဲဉ်ႏမဲဉ်ႏ သေႏသေႏချာႏချာႏငါႏသွူ။ ယင်းတဗာႏနဝ်ꩻ လွတ်တောႏနမ်းခြောင်ꩻတင်သီး ခွေအဝ်ႏဒေါ့ꩻဖေႏတသေႏသေႏဒျာႏ မဲဆန္ဒဗွေႏခမ်းသားမွိုးဖါသီးနဝ်ꩻ ဖေႏဖေႏလဲဉ်းမဲနဝ်ꩻသွူ၊ အုံထွိုင်ႏမဲဉ်ႏမဲဉ်ႏဖေႏသွော့၊ မာꩻဖေႏမွေးမွေးလွသွော့၊ ကထီႏကမော့ꩻဒါႏဖုံႏယိုလဲ့ ဒင်ႏနယ်ဖေႏသွဗာ့၊ စဲစ်ဆေꩻထောင်ထွားဟံႏယာႏ ဗဟိုႏကောႏမတီႏသားလဲ့ ဒင်ႏနယ်ဖေႏသွော့၊ ဆဲင်ႏရာꩻဝေင်ꩻနယ်ႏကို၊ ခရဲင်ႏကို၊ ခမ်းနယ်ႏကို ပွိုင်းဝွို့တောမ်ႏ သိမ်ꩻဟံႏပျဿနာႏယို မာꩻသုံꩻသပ်ဖေႏမဲဉ်ႏမဲဉ်ႏ၊ အုံထွိုင်ႏဖေႏတရျားရျား၊ လွောက်ꩻမွုန်းတဝ်းပဉ်ဖဲ့ꩻ၊ မာꩻဖေႏသွော့တောမ်ႏအဂတိကင်ꩻကင်ꩻ၊ မာꩻဖေႏသွော့တောမ်ႏဥပဒေႏအလွောက်ꩻနဝ်ꩻ။ တောမ်ႏဥပဒေႏတဲ့ မိဉ်းတလွောက်ꩻကဲက်ညီႏတဝ်း၊ မိဉ်းမာꩻလွောက်ꩻဒျာႏပဉ်ဖဲ့ꩻ၊ မိဉ်းနွန်ႏထွာႏဆွာႏခံႏဗာႏဒျာႏ ထာꩻဆုံꩻဖျတ်ဥပဒေႏအလွောက်ꩻ တမွေးတဝ်းနဝ်ꩻ တောမ်ႏတဲမ်းထွို့ꩻမွုန်းတဝ်းစူမုဲင်၊ ယိုခါနဝ်ꩻ လွတ်တောႏတဲ့ အီႏအုံပဆားချာသွူ၊ လွတ်တောႏမိဉ်ႏအုံပဆားနဝ်ꩻ နီမဲဆန္ဒဟံႏနယ်ႏကို နီထာꩻမာꩻယိုဖုံႏနဝ်ꩻ သဲင်ꩻမာꩻမဲဉ်ႏမဲဉ်ႏသွော့၊ ဒင်ႏလွဉ်နယ်သွော့၊ တရာꩻရုမ်ꩻအွိုးမုဲင်ꩻကိုနဝ်ꩻ အမုꩻမုဲင်ꩻဖုံႏနဝ်ꩻ မာꩻနုဲင်းမုဲင်ꩻ ဆုံꩻဖျတ်နုဲင်းမုဲင်ꩻ။ ဝေင်ꩻနယ်ႏမုဲင်ꩻ ထွေအုပ်ဖုံႏ၊ မြေစာရင်းဖုံႏ၊ ခမ်းနယ်ႏမုဲင်ꩻ၊ တွိုင်ႏမုဲင်ꩻ အစိုႏရဖုံႏနဝ်ꩻ အမာꩻနုဲင်းမုဲင်ꩻ၊ အဆုံꩻဖျတ်နုဲင်းမုဲင်ꩻ၊ ဝွန်ႏတန်အပါꩻမုဲင်ꩻဖုံႏနဝ်ꩻ အလွောက်ꩻပဉ်ဖဲ့ꩻနုဲင်းမုဲင်ꩻ ကရိုꩻဒါႏဖုံႏယို အီလွဉ်ဒင်ႏနယ်သွော့၊ လွဉ်ဒင်ႏသွော့ ဒေါ့ꩻလွေꩻနုဲင်းနဝ်ꩻသွူ။ နဝ်ꩻမꩻ ကထွာဒါႏ တရာꩻရုမ်ꩻသီးလဲ့ အမုတဗာႏယို အမုတွိုႏဝင်ႏတောမ်ႏပုဒ်မွူးနဲ့၊ တွိုႏဝင်ႏတဝ်းနဲ့နဝ်ꩻ အဝ်ႏလိုႏယူႏချာငါႏ၊ လွတ်တောႏနမ်းခြောင်ꩻတင်သီးလဲ့ ဝွေꩻသီးထာꩻမာꩻနဝ်ꩻ ဝွေꩻသီးအဝ်ႏလိုႏမာꩻမဲဉ်ႏမဲဉ်ႏငါႏသွူ၊ ပအိုဝ်ႏလွတ်တောႏအမတ်သီးလဲ့ အဝ်ႏလိုႏမာꩻမွေးမွေး၊ မာꩻမဲဉ်ႏမဲဉ်ႏငါႏ နုဲင်းလွတ်တောႏဥက္ကဋ္ဌ ဦးဝင်းမြင့်ကဒေါ့ꩻနဝ်ꩻသွူ။