ပအိုဝ်ႏအခွင်ꩻရေꩻ
"ပအိုဝ်ႏအခွင်ꩻရေꩻ ထိုꩻမားဗာႏမွုန်းတာႏ အီႏဖျင်ဆင်ဗာႏနုဲင်းမုဲင်ꩻ" ယိုခါကျာꩻ မန်းတခမ်းလွုမ်းကို ကအဝ်ႏဒါႏ ခမ်းရင်ꩻသားလိုꩻမျိုꩻ နဲင်ႏငံႏရေꩻပါတီစွိုꩻဖုံႏတွမ်ႏ မန်းနဲင်ႏငံႏရေꩻပါတီစွိုꩻဖုံႏယို ကွပ်စွဉ်ႏ ၂၀၀၅-လွိုက်ရွေꩻမဲပွယ်ꩻယို အီႏတွိုႏတဲင် ယံကနွို့ခေးနွောင်ꩻတောမ်ႏ အသေႏချာႏသွတ်ꩻနဝ်ꩻ ဖျင်ဆင်မုအနေႏ ပါတီစွိုꩻညီႏလာႏခံႏတရိုꩻတဝ်း၊ လိုꩻမျိုꩻအမျိုꩻသာꩻရေꩻ ညီႏလာႏခံႏတရိုꩻတဝ်း၊ ဒေါ့ꩻဆွေꩻနွေꩻအုံကွံဒျာႏ လိုꩻမျိုꩻအမျိုꩻသာꩻရေꩻငဝ်းဝဲင်ꩻတရိုꩻတဝ်း လိုꩻမျိုꩻတမျိုꩻကို အမျိုꩻသာꩻနဲင်ႏငံႏရေꩻထာꩻထီႏတောမ်ႏ အမျိုꩻသာꩻရေꩻသꩻဓာတ်ဖုံႏယို မျိုꩻသွုပ်တသာအလောင်း ဖလုဲင်ႏဖေႏသွုပ်ယောင်းပွယ်ꩻဖုံႏ တရိုꩻတဝ်း-စတဲင်ပါတီစွိုꩻဖုံႏ၊ ခမ်းရင်ꩻသားလိုꩻမျိုꩻလင်နဝ်ꩻ ခါးလားကနွို့ပြဲင်ႏပွယ်ꩻကို အထန်ႏယို ဝင်ꩻအဝ်ႏဖျင်ဆင်သေꩻလဲဉ်းသွူ။ ထွိုင်ႏတွိုႏဒျာႏ ပအိုဝ်ႏနဝ်ꩻ အဝ်ႏမာꩻကတမုဲင်ꩻတန်ဟောင်း၊ အဝ်ႏထွာကတမုဲင်ꩻတန်ဟောင်း၊ အီႏဒေါ့ꩻရီလို့ဝင်ꩻအရန်းငါလဲ့ သꩻတဗော့ꩻစံꩻတဝ်းဟောင်း၊ အခိန်ႏအဝ်ႏစဝ်းဒွိုန်းကဒျာႏ ယူႏနုဲင်းနဝ်ꩻဟောင်း၊ အခိန်ႏအဝ်ႏစဝ်းဒွိုန်းက-မဉ်ႏယူႏနုဲင်းနဝ်ꩻလဲ့ ဖျင်ဆင်ခါꩻမု အဝ်ႏလဲဉ်းတမုဲင်ꩻ၊ ပအိုဝ်ႏကို တစွိုꩻတွမ်ႏတစွိုꩻ ဗော့ꩻလဲဉ်းလို့ဝင်ꩻ ခွုင်းမုဲင်ꩻလဲင်ႏဟောင်း၊ ဒေါ့ꩻရီဗာႏလဲဉ်းလို့ဝင်ꩻ ခွုင်းမုဲင်ꩻလဲင်ႏဟောင်း၊ အွိုးကမဉ်ဒေါ့ꩻရီသားနဝ်ꩻ အဝ်ႏမဉ်ဒေါ့ꩻရီဒျာႏလဲ့ အွိုးတမဉ်ဒေါ့ꩻရီတဝ်းသားနဝ်ꩻ ငမ်းခင်ႏလမ်းလထိုꩻမားနုဲင်းနဝ်ꩻဟောင်း၊ အီႏဒေါ့ꩻရီဗာႏဝင်ꩻနဝ်ꩻ အဝ်ႏဟွိုန်ငမ်းနေဒွုန်းထာꩻဟောင်း။ ပအိုဝ်ႏစွိုးခွိုꩻကိုယို အစွိုꩻပေါင်ꩻနဝ်ꩻ အဝ်ႏအာဒျာႏသွူ၊ အဝ်ႏအာဒျာႏလဲ့ ကအုံထွိုင်ႏလွေꩻဒါႏ တွမ်ႏနဲင်ႏငံႏရေꩻပါတီစွိုꩻအနေႏနဝ်ꩻ ပေါႏလွိုသွူ ပအိုဝ်ႏအမျိုꩻသာꩻအစွိုꩻချုက်(ပီအဲန်အို)တွမ်ႏ ခမ်းပေါင်ꩻဗူႏပအိုဝ်ႏအမျိုꩻသာꩻ အစွိုꩻချုက်(ပအမဖ)ယိုနီစွိုꩻ အဝ်ႏကုဲင်အလင်စွိုꩻနဝ်ꩻ အုံထွိုင်ႏလွေꩻ ပါတီရေꩻမွေးတဝ်း၊ စွိုးခွိုꩻလိုꩻမျိုꩻရေꩻအနေႏလဲ့အဝ်ႏ၊ အုံလွေꩻဒျာႏ မာꩻရပ်ရာႏလွိုင်ႏကွုန်ꩻရေꩻသားစွိုꩻလဲ့အဝ်ႏ၊ အခေႏခံႏလွေꩻဒျာႏ သွင်ꩻဖေႏထဲမ်ဗွေလိုꩻယွဲးထာꩻသေအစွိုꩻလဲ့အဝ်ႏ၊ ထိန်ꩻသိမ်ꩻလွေꩻပအိုဝ်ႏလိတ်လုဲင်ꩻတောမ်ႏ ယေန်ႏငဲးရေꩻစွိုꩻလဲ့အဝ်ႏ၊ တောမ်ႏယင်းလိုꩻရွယ်ႏစွုမ်ႏ ပအိုဝ်ႏခမ်းသားမွိုးဖါသီး ယံသေနာႏ ဥပဒေႏထွူ ယံအုံအဝ်ႏဒေါ့ꩻဖြဝ်ႏရုဲင်းဟန်ရေꩻတာႏယို အွဉ်အထျꩻ မာꩻလွေꩻဒျာႏအစွိုꩻသားလဲ့ အဝ်ႏ-စတဲင်အစွိုꩻအဒဝ်ႏဒဝ်ႏယို ပအိုဝ်ႏကို အဝ်ႏဒျာႏနဝ်ꩻ သေထွꩻဗာႏသွူ။ ပီအဲန်အိုတောမ်ႏ ပအမဖ ပါတီယိုနီစွိုꩻ ကအုံထွိုင်ႏလွဉ်ဒါႏ တောမ်ႏပါတီနဲင်ႏငံႏရေꩻအနေႏနဝ်ꩻ အီႏခွုမ်မာꩻလွေꩻ ပအိုဝ်ႏလိုꩻမျိုꩻနဲင်ႏငံႏရေꩻနုဲင်းနဝ်ꩻတဲင် အီႏခွုမ်မာꩻလွေꩻပါတီ နဲင်ႏငံႏရေꩻနဝ်ꩻ အီႏအာႏကွိုအုံနောင်လွေꩻယင်းဒျာႏ ပအိုဝ်ႏခမ်းသားအမျာꩻ ထောက်ခံႏအာႏ၊ မဲအာႏခြေင်ခြေင်နဝ်ꩻသွူ။ ပါတီယီုနီစွိုꩻလွုမ်း မဲနွောင်ꩻရေꩻတာႏ အီႏထူႏလွေꩻချာဒျာႏ ပအိုဝ်ႏခမ်းသားမဲအာႏတဲင် မဲအာႏမဉ်ႏပြုဲင်လီနဝ်ꩻ မဲအာႏပေႏထိုꩻဒါႏ၊ မဲအာႏမဉ်ႏပေႏထိုꩻနဝ်ꩻ ပအိုဝ်ႏလိုꩻမျိုꩻတာႏ အခွင်ꩻရေꩻနဝ်ꩻ သေႏချာႏမုꩻ ထိုꩻမားဒါႏနဝ်ꩻသွူ၊ ကွပ်ပါတီယိုနီဗာႏ ယားချာပအိုဝ်ႏခမ်းသား လွောင်ႏဗူႏမုꩻ မဲအာႏတဲင် ပအိုဝ်ႏလိုꩻမျိုꩻတာႏ အခွင်ꩻရေꩻ မဉ်ႏထိုꩻမားနဝ်ꩻ တရာꩻခံႏပါꩻမုဲင်ꩻဟောင်း။ ကအဝ်ႏလွောင်ႏဗူႏထွူလဲဉ်းဒါႏ ပအိုဝ်ႏခမ်းသားအာႏရဲင်ꩻယို ကွပ်စွဉ်ႏလိုꩻတစွိုꩻနီစွို တရိမ်အုပ်ချုက်လꩻဝင်ꩻတွော့ꩻတရိုꩻတဝ်း၊ တစွိုꩻတွမ်ႏတစွိုꩻ အဝ်ႏလိုႏစပ်ဆွိုင်ꩻ ဆွန်ꩻစူအခိန်ႏတွိုႏလဲဉ်းကျောင်ꩻ မဉ်ႏယူႏထီႏတဝ်းတရိုꩻတဝ်း၊ ခမ်းသားအာႏရဲင်ꩻအဝ်ႏဟဝ်ငါႏ မဉ်ႏအဝ်ႏသွုံꩻအီဒျာႏ အစွိုꩻတာႏတရိုꩻတဝ်း၊ ပအိုဝ်ႏခမ်းသား အခွင်ꩻရေꩻတွမ်ႏခမ်းထီ မဉ်ႏထိုꩻမားနဝ်ꩻ သမဲင်ꩻယို ပါꩻမုဲင်ꩻအီႏထူႏတာႏဝွန်ႏဟောင်း။ မဉ်ႏတွိုႏနေင်ႏငါယို ကွပ်ပအိုဝ်ႏခမ်းသား အာႏရဲင်ꩻတွော့ꩻ ကလꩻထွူလဲဉ်းဒါႏ ပအိုဝ်ႏနမ်းပဲင်ႏအိုပ်ချုက်ခွင်ꩻ သွံဝေင်ꩻနယ်ႏကိုယို ပီအဲန်အိုပါတီတွမ်ႏ ပအမဖ ပါတီယိုနီစွိုꩻအနေႏ အီႏနွို့ခေးပြဲင်ႏလွေꩻနုဲင်းမုဲင်ꩻဟောင်း၊ အခိန်ႏနုဲင်းယိုခါ သေလွုမ်ꩻနွို့ခေးနဲ့၊ ခမ်းသားမဲ့နား အီႏကွင်နဲ့၊ ကွင်တဝ်းနဲ့နဝ်ꩻ လိုႏယူႏဖေႏပါငါႏသွူ။ ပအိုဝ်ႏခမ်းသား အခွင်ꩻရေꩻ ဖေႏကသွုမ်ꩻဗာႏမွိုန်းနဝ်ꩻ ယိုနီစွိုꩻအနေႏ ပီအဲန်အိုပါတီမꩻ၊ ပအမဖ ပါတီမꩻ-စစွဉ်ႏအစွိုꩻသꩻနဝ်ꩻ အွဉ်ႏဖုဲင်းထွူမဲ့ ကထီႏဒါႏအစွိုꩻအရောင်ႏ၊ သꩻကဗော့ꩻဒါႏ အစွိုꩻယို မဉ်ႏထူႏထိုꩻတွော့ꩻ အဆေ့ꩻသွတ်ꩻ အုံကွံဆွေꩻနွေꩻလွေꩻ မော့ꩻခွဲးပွယ်ꩻဒျာႏမꩻသွူ။ နဝ်ꩻမဉ်ႏထွူ ယိုနီစွိုꩻနဝ်ꩻ ထောင်လွေꩻညီꩻနွောင်ꩻခင်ႏကာဗွိုန် အဝ်ႏနုဲင်းမုဲင်ꩻ၊ ဟိုပုံꩻ၊ သီႏသဲင်ႏ၊ ပင်လောင်ꩻ ယိုသွံဝေင်ꩻနယ်ႏအကို မဉ်ႏပြဲင်ႏလွေꩻနုဲင်းနုဲင်း နီစွိုꩻလွုမ်းနဝ်ꩻ တထွာငဝ်းနွောင်ꩻတဝ်း ရျာꩻခေါင်ꩻဖဲ့ꩻသမ်းအာ၊ နဝ်ꩻက တစွိုꩻနဝ်ꩻ ပြဲင်ႏဗာႏ၊ တစွိုꩻပြဲင်ႏဗာႏတဝ်း မာꩻနုဲင်းနဝ်ꩻဟောင်း(တဝ်းလဲ့) ပအိုဝ်ႏလိုꩻမျိုꩻကအုံအဝ်ႏအာဒါႏ ဝေင်ꩻနယ်ႏဖုံႏအကို တစွိုꩻနဝ်ꩻ ခေးခွုင်းမုဲင်ꩻဝေင်ꩻ(တဝ်းလဲ့)အီႏထောင်ငါ အီႏကာလွေꩻတာႏ အီႏဖျင်ဆင်လွေꩻနုဲင်းမုဲင်ꩻဟောင်း။ အခိန်ႏနုဲင်းယိုခါနဝ်ꩻ ပအိုဝ်ႏလိုꩻမျိုꩻကို အဝ်ႏလဲဉ်းပါတီနီဗာႏ နီစွိုꩻနဝ်ꩻ ထံꩻသာꩻကယ်ႏ အဝ်ႏတစွိုꩻသွူ၊ အဝ်ႏလွဉ်နီစွိုꩻနဝ်ꩻ အမာႏတအဝ်ႏတဝ်းလဲ့ တစွိုꩻတွမ်ႏတစွိုꩻယို နဲင်ႏငံႏရေꩻပြောင်ꩻလုဲင်ႏတပန်ႏဝေ့ꩻအတွိုင်ꩻ အခိန်ႏခါႏအလꩻ လိုꩻမျိုꩻအစွိုꩻချင်ꩻချင်ꩻအလောင်းယို လိုႏခွုမ်ပွုံႏသီတဝ်း မူတဗာႏချင်ႏ၊ နဲင်ႏငံႏရေꩻအထင်ႏအလင်ꩻ ကောင်ႏကဲင်ႏအတွိုင်ꩻ မဉ်ႏသေနာႏလွေꩻ အချင်ꩻချင်ꩻနဝ်ꩻ အခေႏနေႏအလꩻ မဉ်ႏလိုႏပယ်ႏတဲ့နဝ်ꩻ ခွါႏတဲ့နဝ်ꩻ ဖန်ဆင်ꩻထူႏသွုံꩻလꩻနဝ်ꩻသွူ။[၁][၂]