ပါဝေယျကရဟန်ꩻသွံဆီ
"ပါဝေယျကရဟန်ꩻသွံဆီဝတ္ထု"
၆၅။ ဂါႏထာႏပြန်ႏပအိုဝ်ႏခြေင်ခြေင်- ဖြေꩻနဝ်ꩻ သေနွောင်ꩻဒျာႏ ဟန်ႏအိုအရသာႏယို၊ ဗွန်ပီနဝ်ꩻနေနေ လိန်ႏမာႏသေလျင်ႏ ပညာႏသျင်ႏတဲ့ မဉ်ဆယ်ꩻကပ်ဗာႏ ပညာႏသျိယို တဆင်ႏပေႏငါတဲ့ယဝ်း မွိုင်မွိုင်ကြွိုင်ကြွိုင်သနွောင်ꩻဒျာႏ လောကုတ္တရာႏယိုသွူ။
"လꩻဗဟုသုတ၊ လꩻအီသတိꩻနုဲင်းယို" ဟော်ꩻထွားသွဉ်ဗာႏ ပါဝေယျကရဟန်ꩻသွံဆီဝတ္ထုယိုတဲင်-
၁။ ထုမ်ႏတရာꩻနဝ်ꩻ မျတ်လဲဉ်းက ထိုမ်ႏလိုꩻမူႏအကျောင်ꩻ၊
၂။ ကုသိုလ်ႏပန်ချာ ပေါႏအဝ်ႏအာနဝ်ꩻ ထွာယိုꩻရဟန်ꩻ၊ လꩻယိုꩻတရာꩻအကျောင်ꩻ၊
၃။ ဖြေꩻလောင်းနဝ်ꩻ အွဉ်ႏဒင်ႏငါ ဟန်ႏအိုတဗဲက်ꩻငါတဲ့ သေစွဉ်ႏအရသာႏ၊ လိုꩻလိန်ႏမာႏတဲ့ အုံထေ့ပညာႏသျိထျꩻတဆင်ႏငါတဲ့ သေစွဉ်ႏတရာꩻအကျောင်ꩻ-စတဲင်နုဲင်းနဝ်ꩻ သေထွꩻလꩻအီသတိꩻ အာတန်။
"သုပ္ပဗုဒ္ဓလိုꩻတွတ်ꩻ"
၆၆။ ဂါႏထာႏပြန်ႏပအိုဝ်ႏခြေင်ခြေင်- ကံႏမုဲင်ꩻတရိုꩻတဝ်း ထွာအီခါႏကရစ်ꩻမျိုꩻ ဒုက္ခအကျိုꩻသွူ၊ ယွုတ်ညမ်းကထဲ့ဖွိုႏဒါႏ ကံႏယို ကအဝ်ႏမာꩻလွဒါႏ ပညာႏတအဲဉ်ထဝ်း လိုꩻမွိုက်ဖုံႏနဝ်ꩻ ရန်ႏသူႏလွဉ်နက် ဝင်ꩻနိစ္စက်မွေးတဝ်း၊ အနမ်းတွမ်ႏအနမ်း (အထာꩻမာꩻတွမ်ႏအထာꩻမာꩻ)နိစ္စက်ချာဒျာႏတဲင် သောင်ခြင်ꩻတဝျာႏ အဝ်ႏခံႏလွေꩻဗာႏနုဲင်းနဝ်ꩻသွူ။
"လꩻဗဟုသုတ၊ လꩻသတိꩻနုဲင်းယို" ဟော်ꩻထွားသွဉ်ဗာႏ သုပ္ပဗုဒ္ဓလိုꩻတွတ်ꩻဝတ္ထုယိုတဲင်-
၁။ နမ်းနဝ်ꩻ မော့ꩻရောႏဂါႏတဲ့ယဝ်း (သꩻမဉ်အဝ်ႏစဲဒျာႏ တရာꩻလောင်းနဝ်ꩻ) သꩻချမ်ꩻသာႏဒျာႏအကျောင်ꩻ၊
၂။ တခြိုꩻဥစ္စာႏ တချမ်ꩻသာႏတဝ်းစွဥဉ်တဲ့ သဒ္ဓါႏ-သီႏလစတဲင် အရိယာႏတခြိုꩻ ကအဝ်ႏလိုꩻနဝ်ꩻ 'လိုꩻဒုက္ခ'တရိုꩻထွိုက်တဝ်း၊ ရိုꩻထွိုက်ဒျာႏ 'လိုꩻခြွေတရာꩻ'နုဲင်းနဝ်ꩻအကျောင်ꩻ၊
၃။ ပေါႏလꩻသွူတရာꩻ (ပေါႏထွာအရိယာႏ)နဝ်ꩻ ခံႏပယ်ႏနွောင်ꩻတောဝ်း ရတနာႏသွံပါꩻအကျောင်ꩻ၊
၄။ ပေါႏမာꩻကုသိုလ်ႏအဟောဝ် မော့ꩻဒျာႏသုချမ်ꩻသာႏ၊ ပေါႏမာꩻ အကုသိုလ်ႏတဲ့ ခံႏဗာႏငါးရုဲင်ꩻ၊ ဒုက္ခဆုဲင်ꩻအကျောင်ꩻ၊
၅။ ဝဋ်-ကရိုꩻနောဝ်ꩻ ထိုꩻလဲ့ꩻတလွစ်တောဝ်း၊ ခံႏချာဗာႏဒျာႏအကျောင်ꩻ-စတဲင်နုဲင်းနဝ်ꩻ သေထွꩻꩻ လꩻအီသတိꩻအာတန်သွူ။[၁][၂][၃]