ပိုလီꩻအုံတာႏခုဲင်ႏငါႏ

"ပိုလီꩻအုံတာႏ ခုဲင်ႏငါႏလမ်းခင်" နီပအိုဝ်ႏမွိုးဖါထွုံꩻစံႏ ပွိုင်းလဲင်ႏစခါနောဝ်ꩻ ပိုလီꩻမဉ်ႏအုံခေါ်၊ မဉ်ႏမဲဉ်ဆို့ꩻလမ်းလဲ့ လမ်းခင်အုံတာႏ ဒုံဧရိယာႏကို ကွီးဆို့ꩻသော့ꩻ ပါꩻမုဲင်ꩻခြံကိုယောဝ်း ဒုံတန်ဒါႏငါ၊ လိုꩻဖြာꩻပေါင်ꩻအာဒါႏငါ မာꩻသော့ꩻခွင်ꩻလꩻလို့ဒျာႏ၊ မွိုးပေႏဖါပေႏသားတာႏ ဗွိုန်ဟုန်ႏနေး လက်သမာꩻဖုံႏလဲ့ အောဝ်ႏလꩻဒျာႏ၊ ကွပ်ဒျာႏအုံအောဝ်ႏတာႏ ခင်ႏလမ်းပေႏနောဝ်ꩻ သꩻတခုဲင်ႏဗာႏတောဝ်းနောဝ်ꩻသွူ။ ထွုံꩻစံႏဟောဝ်နုဲင်းယိုနောဝ်ꩻ အောဝ်ႏလိုႏထိန်ꩻအွဉ်ႏဟောဝ်ဟောဝ်ခါꩻငါႏ မရေႏမရာႏလဲ့ ကွပ်စွဉ်ႏထာꩻယူႏမာႏ ဝိသမလောဘသား ဟောဝ်ငါႏနမ်းတာႏ၊ ထီႏတောဝ်းစွိုးခွိုꩻ လိုꩻမျိုꩻပိုလီꩻအကျိုꩻတရာꩻတဲင် အွဉ်စာအံႏရောင်တောဒျာႏဝင်ꩻဖုံႏ၊ ယားကုဲင်လို့ဒျာႏ ထွုံꩻစံႏဖုံႏ၊ မွိုးဖါဖုံႏလဲ့ ရက်တောဝ်းပိုလီꩻ၊ ထီႏတောဝ်းပအိုဝ်ႏအနာႏဂတ်အကျိုꩻတဲင် မဉ်ကျွားမဉ်မောႏ၊ မဉ်အွဉ်ႏဖြိုဒျာႏအနမ်းဖုံႏတွော့ꩻ အွဉ်ဝင်ꩻစာအံႏလို့တောဒျာႏဟံႏယာႏ၊ ဖြေꩻထုမ်းမောႏအီတောဒျာႏ ပါꩻကာꩻကောႏနောဝ်ꩻသွူ။ ရက်ခွိုꩻပအိုဝ်ႏပိုတဖြာꩻ ကွပ်ပွိုးစွဉ်ႏ ထီႏငါႏလိုꩻမျိုꩻထင်ႏထိုတသွောင်းရေꩻတွော့ꩻ ပေႏပေႏခါကာႏ မွိုးဖါထွဉ်ႏသွဉ်ပညာႏမန်းခမ်းကို၊ ထွိုင်ႏလꩻဘွဲ့ ဒိုငါငါဝင်ꩻခမ်းထီတန်၊ လိုꩻစွန်ꩻထင် ဂျပန်အမေႏရိကန်ႏခြာ၊ ထန်ႏလွေꩻသွဉ်ကျပ်မွေးပညာႏ၊ ထွိုင်ႏဒါႏ သဲင်ꩻလါဉ်ချာ မွိုးဖါရပ်ရာႏ၊ မဉ်သဲင်ꩻဗွောင်ဖေႏငါႏ ပအိုဝ်ႏမဲ့နားလဲ့ အီႏသွဉ်သော့ꩻဖေႏ လိုꩻပေႏတာႏ ခင်ႏလမ်းဟံႏယာႏနောဝ်ꩻ ဝင်ꩻသမ်းကွီဒျာႏအငိုꩻ သိန်ႏအဆီအရျာꩻတန်ꩻတဲင် အီႏသွဉ်သော့ꩻဖေႏလိုꩻပေႏတာႏ ခင်ႏလမ်းတွမ်ႏရိုꩻမွိုန်းအုံတာႏ လမ်းခင်ငါလဲ့ မော့ꩻဗာႏမွေးစွဉ်ႏ အယပ်ꩻအခုဲင်ႏနောဝ်ꩻသွူ။ "ထတန်နောဝ်ꩻ မဉ်ႏမော့ꩻဒျာႏထီတန်မꩻ ကမ်းသꩻတခြင်ခွင်ꩻအောဝ်ႏ"ငေါဝ်းနောဝ်ꩻအတွိုင်ꩻ အောဝ်ႏခမ်းတန်သဲင်ꩻ ထာꩻသေဉာဏ်ႏကတန်ဒါႏ ရက်ခွိုꩻပအိုဝ်ႏပိုတဖြာꩻ မဉ်သဲင်ꩻအုံဒျာႏ ပအိုဝ်ႏရပ်ရာႏတန်ကိုလဲ့ ဝေင်ꩻတောင်ႏကီꩻ တွမ်ႏရိုꩻမွိုန်း ကွီဖြေꩻသော့ꩻရုမ်း တောင်ႏကီꩻအသောင်အရင်ꩻကိုပေႏငါတဲ့ ဟံႏကွင်ꩻထွာလို့ဒျာႏ ခယ်ႏကလာꩻထာꩻတွော့ꩻ တစင်းကော့ꩻဖြေꩻသော့ꩻနွောင်ꩻတောဝ်းဒွုမ်နောဝ်ꩻသွူ။ ရေႏကွီဖြေꩻအုံလုဲင်ႏ ပအိုဝ်ႏနမ်းပဲင်ႏခွင်ꩻလꩻ ပင်လောင်ꩻ၊ ဟိုပုံꩻ၊ သီႏသဲင်ႏအရန်းပေႏငါလဲ့ ဝင်ꩻရီစဲစ်အံႏဆျာႏနေကလိုꩻအရန်းရန်း၊ အီႏအုံမာꩻသော့ꩻလမ်းတဗာႏဗာႏနောဝ်ꩻ ကယ်ꩻထဲင်းမန်းဆိုရှယ်လစ်ပွိုင်းလဲင်ႏ၊ ဒေါ့ꩻရီရုမ်ꩻသား ဖြောင်းလဲင်ꩻပတဲင်ႏနေးလဲဉ်းလဲ့ အဆင်ႏတပြေႏတောဝ်းဒွိုန်းနောဝ်ꩻ အူး-လူး-လူး မွော့လဲင်ꩻထွာဗာႏငါႏထာꩻနုဲင်းယို။ သွꩻပေႏဟောဝ်တဖြာꩻ ဒါႏခါꩻပညာႏစွုမ်ႏစီႏ၊ ကွပ်ထီႏငါႏ စွိုးခွိုꩻအကျိုꩻတရာꩻတဲင် ရေႏလွဉ်ကွီခတ်ꩻအုံသော့ꩻငါလမ်း ပအိုဝ်ႏဒုံယံနယ်ကို တထွောင်းနောဝ်ꩻ ဝင်ꩻသမ်းကွီဒျာႏ ဝွေꩻနွို့အုံခꩻ (ဝင်ကြေး)လွုမ်ꩻကာႏတောဝ်း၊ လမ်းခတ်ꩻခꩻ တလꩻတောဝ်းထီတွမ်ႏမေႏအရန်း၊ ဝင်ꩻဗင်းအွဉ်ႏထွော့စွဉ်ႏနုဲင်းဝေင်ꩻကို၊ ကွီထိုမွေးစွဉ်ႏအငိုꩻ၊ ပအိုဝ်ႏပို အီႏထိုꩻလွေꩻအုံဗာႏလုဲင်ႏမုဲင်ꩻကိုဟောင်း ကူးရောင်းရောင်း ပအိုဝ်ႏထွုံꩻစံႏ။ ဝေင်ꩻတောင်ႏကီꩻအရန်းတွမ်ႏရိုꩻမွိုန်းဒွုမ်၊ ထွားဗော့ꩻနောင်တရား၊ သုဲင်ꩻခေါဝ် ပအိုဝ်ႏဒုံတန်အရန်းပေႏလွုမ်ꩻမွေးတဲ့ ခင်ႏလမ်းဟောဝ်၊ ဆိတ်ကရော့ꩻကိုနောဝ်ꩻ ဝင်ꩻသိမ်ꩻပျင်ႏ စာအံႏ/ ခတ်ꩻအံႏဖေႏတောလိုꩻမျိုꩻလင်၊ ပအိုဝ်ႏလိုꩻယံ ခင်ႏလမ်းအုံတာႏနောဝ်ꩻ ပေါႏတဖူꩻပေႏတယာႏထျꩻ ခင်ႏလမ်းအုံတလꩻသော့ꩻတောဝ်းလာꩻလာꩻ မာꩻတမုဲင်ꩻခရာႏနုဲင်းယိုဖုံႏနောဝ်ꩻ။ နီစွိုးခွိုꩻ ဘာႏသာႏချင်ꩻချင်ꩻ အီႏပင်ႏတသွောင်းထိုကီဝင်ꩻ ညာꩻညာꩻ၊ ထာꩻမာꩻပေါက်ပေါက်ပဲက်ပဲက်ပေႏငါလဲ့ ခံႏဗာႏလဲဉ်းဆျာႏဆျာႏခါႏခါႏ၊ ပအိုဝ်ႏလိုပိုလိုꩻဒါႏခင်ႏလမ်းအုံခြော၊ ရွဉ်အာသား အာႏဏာႏဗားစွိုꩻ မာꩻတအာႏထိုꩻလို့လဲဉ်း ပအိုဝ်ႏပိုပညာႏအောဝ်ႏသားကရိုꩻနောဝ်ꩻ ပအိုဝ်ႏလမ်းခင် ထွာအီလဲဉ်းသက်သေႏ။ ပအိုဝ်ႏဒုံတဒုံအကို မွိုးဖါအီႏဖေႏနွောင်ꩻ ပိုလီꩻခင်ႏလမ်းအုံတာႏ၊ ခင်ႏလမ်းပေ(၇၅)ပတ်မွန်ႏနောဝ်ꩻ တဒုံတဖြာꩻအောဝ်ႏညာꩻထိုꩻလဲဉ်း၊ တဒုံတဖြာꩻနောဝ်ꩻမွေးတဲ့ ပိုလီꩻဖြေꩻဗာႏချာနေးကတွမ်ႏအငိုꩻ၊ အီႏဖေႏရိုꩻရိုꩻ အဲဉ်ထောဝ်းဒွုမ်၊ ဟံႏယာႏနောဝ်ꩻ စာအံႏတာႏလဲ့အောဝ်ႏ၊ ဖေႏပိုလဠီꩻလမ်းခင်တာႏတဲ့ အဲဉ်ထောဝ်း၊ နောဝ်ꩻမွေးတဲ့ နီစိုးလုမ်ꩻထဲင်းခြာ၊ နီလီꩻလင်ꩻစိုးထဲင်းက အီႏဖင်းလွေꩻအုံဗာႏမုဲင်ꩻကိုဟောင်း။ သွꩻပေႏပညာႏဒါႏသားတဖြာꩻ အောဝ်ႏနဲင်ႏငံႏချာꩻသဲင်ꩻလွဉ်၊ မဲဉ်သဲင်ꩻအွဉ်၊ ဗွောင်၊ သွဉ်ဖေႏငါႏ ပအိုဝ်ႏမဲ့နား၊ ထွဉ်ႏခွေသွဉ်းတဲမ်းလိတ်သား ထုမ်ႏဖေႏဝွေꩻခင်ႏလမ်းတဲ့ တဲမ်းလိတ်သား ဖော့ဖင်ꩻတွမ်ႏစေႏတနာႏ ထုမ်ႏဖေႏဝင်ꩻလမ်းပါႏ လဲင်ꩻစွစ်ꩻစဲစ်ꩻထံ ဒုံလိုꩻတန် သမ်းကွီဒျာႏ ဝွေꩻလိတ်ထောက်ခံႏ၊ ဝွေꩻသီးမွိုးဖါ မော့ꩻစဲ့ꩻဖေꩻတံႏ ပါꩻသမ်းလဲ့ꩻအံႏဒျာႏဝင်ꩻလမ်း ပွိုင်းလဲင်ႏခါ၊ စာႏရင်ꩻဆေ့ꩻအာ သမ်းပါလွေꩻထိုꩻလို့လဲဉ်းတွော့ꩻ ချာငါထွိုင်ႏတသေစဲင်းတောဝ်းနောဝ်ꩻ တွမ်ႏသꩻကဲဉ်းကဲဉ်း ထန်ႏထိုꩻဗာႏဒျာႏခြေင်ခြေင်နောဝ်ꩻသွူ။ သမ်းရိုꩻ ပအိုဝ်ႏနမ်းပဲင်ႏအုပ်ချွုတ်ပဲင်ႏခွင်ꩻလꩻဒေႏသတဲ့ ပအိုဝ်ႏမာꩻပဲင်ႏခွင်ꩻ တအဲဉ်ထောဝ်းနုဲင်းယိုနောဝ်ꩻ ပွိုးတမုဲင်ꩻဟောင်း၊ အင်ဖြောင်းမဉ်ရီငါႏလဲ့ ငမ်းပျဿနာႏထွာခြေင်တွော့ꩻ အုံယဉ်အွဉ်ႏကုတ်ꩻကတူႏ ဖေႏအသွုမ်ꩻ၊ ထုမ်ꩻခြေင်းစူတုပ်ꩻ အဲင်ႏတဒွေါက်ꩻကာႏ ထန်ႏသဲင်ꩻထိုꩻဗာႏယင်းဒျာႏ၊ အုံသော့ꩻတာႏ လမ်းပါႏတမော့ꩻတောဝ်းစွူစွူ၊ အော- ခွေရက်ခွိုꩻလဲ့ ခွိုꩻရက်တောဝ်းခွေဟွေး၊ အုံတငွူဗာႏယင်းဒျာႏတွိုင်ꩻတွိုင်ꩻနောဝ်ꩻသွူ။ နီပအိုဝ်ႏထွုံꩻစံႏဟောဝ်ပွိုင်းလဲင်ႏခါနောဝ်ꩻ နီမွိုးဖါယိုခါ တဗွာရော်ꩻလဲဉ်းတွမ်ႏအစွူႏထီ၊ အောဝ်ႏကုဲင်နီပိုလီꩻဆꩻလထဲင်းယို အီႏလွေꩻတယ်ႏခေါ်ဗာႏယင်း ပအိုဝ်ႏခမ်းအွိုးမုဲင်ꩻဟောင်းနောႏ၊ နီပအိုဝ်ႏလိုꩻမျိုꩻ အောဝ်ႏခယ်ႏခမ်း ဖင်းဗာႏလဲဉ်းဝင်ꩻ၊ တွိုႏလင်ꩻသထွုံႏ ဖင်းဗာႏချာပါꩻ၊ တွိုႏထင်ႏဝေင်ꩻတောင်ႏကီꩻလဲ့ အောဝ်ႏဖင်းဗာႏချာသွူ၊ အလဲင်ႏယို တွိုႏလဲဉ်းဝေင်ꩻသောင် အီႏဖင်းလွေꩻထဲင်းယင်း မုဲင်ꩻကိုဟောင်းနောႏ။ နီပအိုဝ်ႏဖြားလိုꩻယံ လိုꩻစွန်ꩻထင်ပွိုင်းလဲင်ႏနောဝ်ꩻ တွူႏတရန်လွဉ် ဘဝကံႏကျမ္မာႏတွမ်ႏနꩻလျော်ꩻဆွာꩻလွုမ်ꩻ၊ ပအိုဝ်ႏလိုꩻယံယိုခါမွော့ စွန်ꩻထင်ဗော့ꩻဒျာႏ အံႏဆျာႏချာခွိုꩻ-စာအံႏထိုꩻဟံႏယာႏလမ်းခင်နောဝ်ꩻ အကွာႏဝင်ꩻနုဲင်းမုဲင်ꩻဟောင်းနောႏ။ ယိုခါ ပအိုဝ်ႏဒုံတန်ကို ပိုလီꩻဆꩻလ ကအီႏလꩻသော့ꩻဗာႏ လမ်းခင်တဗာႏဗာႏနောဝ်ꩻ လုဲင်ႏဗာႏကတွမ်ႏတသိုꩻထီ နေင်ႏပေါင်ꩻပဉ်ဆီဆီမꩻ အီႏလꩻနွောင်ꩻလမ်းခင်တဗာႏ၊ ပိုလီꩻအုံတာႏနောဝ်ꩻ မွိုးဖါစေႏတနာႏ တလွူးသော့ꩻပါဒွုမ်၊ ပအိုဝ်ႏဟံႏယာႏနောဝ်ꩻ အီႏထွာအီဒျာႏ ဝင်ꩻလိုꩻမျိုꩻဘာႏသာႏ ပွာꩻသော့ꩻလိုꩻဖြာꩻပေါင်ꩻ နုဲင်းပါꩻလွူးထော့ꩻ၊ နီပိုလီꩻအီႏမော့ꩻသော့ꩻအီ ထာꩻယပ်ꩻခုဲင်ႏတာႏ ခင်ႏလမ်းတန်နောဝ်ꩻသွူ။ နောဝ်ꩻမꩻ ခွိုꩻစုပ်တသာ ပိုလီꩻလိုꩻယွဲသီးဖုံႏဟွေး- ယူႏဆွာꩻဆွာꩻ စဥ္စာꩻထိုထို ယိုမာꩻငါ နီကွုတ်ထွာသော့ꩻ ပအိုဝ်ႏပိုနောဝ်ꩻ မွိုးဖါစာအံႏ နီဟံႏယာႏ လမ်းခင် သွို့ꩻခြံ၊ ခမ်းထီဖုံႏယို နီအီႏတွိုက်ꩻယားကုဲင်ဗာႏတွမ်ႏ အနယ်ꩻမုဲင်ꩻ၊ ခွုမ်စူခြွိုင်းသား အစွိုꩻအဗူႏယဟန်ႏ သိမ်ꩻသွူနီဟံႏ စာအံႏတောဝင်ꩻလိုꩻမျိုꩻဘာႏသာႏနောဝ်ꩻ နီအီႏယူႏခံႏ တွိုက်ꩻထန်ႏဗာႏတွမ်ႏအနယ်ꩻမုဲင်ꩻ၊ တဲမ်းဖြုဲင်ꩻ-ဟော်ꩻခြုဲင်း-နုဲင်းနုဲင်းညီꩻညီꩻ-ခန်းသွော့ဝင်ꩻ ပငါပရာꩻဖုံႏအကျောင်ꩻ-။ နမ်းသꩻနီပါꩻ ယံချံꩻသာႏ ပိုလီꩻအုံတာႏ လမ်းခင်ဟံႏယာႏဖုံႏယို တွမ်ႏအွဉ်ႏထွာဗာႏမွိုန်း ဝင်ꩻဘာႏသာႏပွာꩻသော့ꩻလိုꩻဖြောꩻပေါင်ꩻခင်ႏလမ်းကရိုꩻနောဝ်ꩻ-တွမ်ႏမေတ္တာႏတဲင်-