ပူႏဇောႏထွိုက်သင်ꩻ

"ပူႏဇောႏထွိုက်သင်ꩻ ပူႏဇောႏလင်ꩻနောဝ်ꩻ" နီဗွေႏဘုရာꩻ ကဟော်ꩻခါꩻဒါႏ တရာꩻမင်္ဂလာႏနောဝ်ꩻ ပါဠိဂါႏထာႏပေါင်ꩻ အောဝ်ႏ(၁၀)ဂါႏထာႏသွူ။ တဂါႏထာႏနောဝ်ꩻ မင်္ဂလာႏတရာꩻ ပါသော့ꩻ(၃)ပါꩻ၊(၄)ပါꩻ(၅)ပါꩻလဲ့ ကဲဉ်းအာအာနောဝ်ꩻ ပါသော့ꩻ (၃)ပါꩻလွုမ်ꩻသွူ။ မင်္ဂလာႏတရာꩻ ဂါႏထာႏတဆီအကို ပထမဂါႏထာႏနောဝ်ꩻ နုဲင်းလယိုအတွိုင်ꩻသွူ။ - အသေဝနာ စ ဗာလာနံ၊ ပဏ္ဍိတာနဉ္စ သေဝနာ။ ပူဇာ စ ပူဇနေယျာနံ၊ ဧတံ မင်္ဂလ မုတ္တမံ။

ပထမဂါႏထာႏ မင်္ဂလာႏတရာꩻ (၃)ပါꩻ

၁။ လိုꩻမွိုက်သီးယို မာꩻသွꩻပေါင်ꩻကွိုက်ꩻဗာႏတောဝ်း။ ၂။ မာꩻသွꩻပေါင်ꩻကွိုက်ꩻဗာႏဒျာႏ ပညာႏအောဝ်ႏ သူႏတောႏကောင်ꩻသီး။ ၃။ ပူႏဇောႏထွိုက်ဒါႏ ပုဂ္ဂိုလ်ႏသီးယို ပူႏဇောႏဗာႏ။ မင်္ဂလာႏတရာꩻ ယို(၃)ပါꩻအကို အမုဲင်(၃)မင်္ဂလာႏတရာꩻယိုနောဝ်ꩻ "ပူႏဇောႏထွိုက်ဒါႏ ပုဂ္ဂိုလ်ႏသီးယို ပူႏဇောႏဗာႏ"ရိုꩻနောဝ်ꩻတဲင် ပူႏဇောႏထွိုက်ဒါႏ ပုဂ္ဂိုလ်ႏသီးယို ကွပ်ပူႏဇောႏတွော့ꩻ လꩻလွေꩻအကျိုꩻချံꩻသာႏအကျောင်ꩻ ဝတ္ထုသက်သေႏအနေႏ တဲမ်းနယ်လွေꩻဗာႏ "ဓမ္မပဒ-သုမနမာလာကာရဝတ္ထု"နုဲင်းငါယိုအတွိုင်ꩻသွူ။

သုမနမာလာကာရဝတ္ထု

ဗွေႏဘုရာꩻစိုးလက်ထက် ရာႏဇဂျိုဟ်ႏခမ်းခွန်ဟော်ခံꩻ ဗိမ္ဗိသာရနောဝ်ꩻ ကေႏညိုႏမွေးဗွေႏဘုရာꩻတဲင် ဆို့ꩻလူႏလွေꩻစွဉ်ႏ ဝေဠုဝွန်ႏကျောင်ꩻတွိုက်တန်သွူ။ ရာႏဇဂျိုဟ်ႏခမ်းကိုယို သုမနကမဉ်ꩻဒါႏ ကောဝ်ႏစာသားနောဝ်ꩻ အောဝ်ႏတဖြာꩻတဲင် ဝွေꩻနောဝ်ꩻနောဝ်ꩻ ထင်ႏပသာဗာႏကောဝ်ႏမူꩻလေꩻ အွိုးခွန်ဟော်ခံꩻ ဗိမ္ဗိသာရထျꩻ စွုမ်ႏနီꩻနီꩻသွူ။ တွိုႏတရောဝ်ꩻနောဝ်ꩻ ဗွေႏဘုရာꩻတွမ်ႏတပဲ့ꩻရဟန်ꩻသံႏဃာႏဖုံႏ ကျွꩻတုံꩻခန်းသွမ်ꩻ ရာႏဇဂျိုလ်ႏဝေင်ꩻကိုသွူ။ ဗွေႏဘုရာꩻတုံꩻသွမ်ꩻခိန်ႏနောဝ်ꩻ မောင်ႏသုမန ကောဝ်ႏသားနောဝ်ꩻတဲ့ ထူႏတွမ်ႏကောဝ်ႏခြောင်း ထင်ႏထေ့ခန်း ဗိမ္ဗိသာရခွန်ဟော်ခံꩻသွူ။ သုမနကောဝ်ႏသား အောဝ်ႏတဖူꩻလောင်းနောဝ်ꩻ ဟွိုန်ခန်း ဗွေႏဘုရာꩻတွမ်ႏ တပဲ့ꩻရဟန်ꩻသီး အောဝ်ႏကျွꩻတုံꩻသွမ်ꩻနောဝ်ꩻတဲင် ကောဝ်ႏသားနောဝ်ꩻ စဉ်ꩻစာꩻခန်းထာꩻနုဲင်းယိုသွူ။ "ခွေအီႏခွဲဗာႏ ခွန်ဟော်ခံꩻနောဝ်ꩻ ယိုꩻလွုမ်ꩻ၊ အီႏခွဲကျုံႏဗာႏ ဗွေႏဘုရာꩻနောဝ်ꩻ တယိုꩻတောဝ်း၊ ကွပ်ပွိုးနောဝ်ꩻမꩻ အုံပွေါးဝုဲင်ႏကန်းတော့ꩻဆွုမ်ႏဒွိုန်း ဗွေႏဘုရာꩻထွူမꩻ ကွဲထင်ႏထေ့ငါ ခွန်ဟော်ခံꩻ"ဆုံꩻဖျတ်ထွူနုဲင်းနောဝ်ꩻတဲင် အုံပွေါးဝုဲင်ႏဆွုမ်ႏခန်း ဗွေႏဘုရာꩻသွူ။ အောဝ်ႏတဆင်ႏ ဗွေႏဘုရာꩻထွိုင်ႏဖျော်လွဉ်နောဝ်ꩻ ဗွေႏဘုရာꩻနောဝ်ꩻ သပ္ပါယ်ႏငါႏတဲင် သုမနကောဝ်ႏသား ထွိုင်ႏထီႏနောဝ်ꩻ နေစ်သက်သꩻရေꩻမွေးစွဉ်ႏထာꩻတွော့ꩻ စူလဲ့အောဝ်ႏဝုဲင်ႏစွူဖြွိုးစွဉ်ႏဒျာႏ ဗွေႏဘုရာꩻသွူ။ သုမနကောဝ်ႏသားနောဝ်ꩻ စူလဲ့အောဝ်ႏဝုဲင်ႏဒျာႏ၊ သꩻလဲ့ အောဝ်ႏယူႏစဉ်ꩻစာꩻပါဒျာႏ နုဲင်းငါယိုအတွိုင်ꩻသွူ။ "ခွေနောဝ်ꩻ ထင်ႏဆက်ဗာႏခွန်ဟော်ခံꩻကောဝ်ႏ စွုမ်ႏနီꩻနီꩻ၊ တနီꩻနီꩻ ခွန်ဟော်ခံꩻကဖေႏဒါႏ ကောဝ်ႏငိုꩻယို လုမ်းဗော့ꩻဒျာႏ အံႏတာႏ နီꩻလွော်နီနန်းလွုမ်ꩻ၊ အလွိုအပိုႏတဲ့ တအောဝ်ႏဖိုတောဝ်း၊ ခွေကောဝ်ႏယို ခွေမဉ်ႏကပ်လူႏဒျာႏ ဗွေႏဘုရာꩻနောဝ်ꩻ ဘဝယိုခါ ဘဝငါ အကျိုꩻအာအစွိုးစွိုး အမျိုꩻမျိုꩻဖုံႏယို ခွေအီႏလꩻဗာႏ၊ ကွပ်ပွိုးနောဝ်ꩻမꩻ ခွေကောဝ်ႏယို ခွေကပ်လူႏခန်း ဗွေႏဘုရာꩻမꩻ၊ ဟန်ႏနီꩻအတာႏ တထင်ႏဆက်ဗာႏတောဝ်းကောဝ်ႏနောဝ်ꩻ ခွန်ဟော်ခံꩻမဉ်ႏမာꩻသီလဲ့ မာꩻသီတယောဝ်း၊ မဉ်ႏဝါးထန်ႏခမ်းထီကိုလဲ့ ဝါးထန်ႏတယောဝ်း၊ ခွေကောဝ်ႏယိုနောဝ်ꩻ သံႏသရာႏအကျိုꩻတာႏ လူႏဗော့ꩻဒျာႏ ဗွေႏဘုရာꩻယို"ကောဝ်ႏသားနောဝ်ꩻ ယူႏစဉ်ꩻစာꩻခန်းနုဲင်းနောဝ်ꩻသွူ။ ကောဝ်ႏသား သုမနနောဝ်ꩻ ယူႏထွူနုဲင်းနောဝ်ꩻတွော့ꩻ ဝွေꩻကအီႏထင်ႏဆက်ဒါႏ ခွန်ဟော်ခံꩻ ကောဝ်ႏမူꩻလေꩻယို ချင်းမာꩻသွူသွစ်ꩻဆုတ်ꩻတွော့ꩻ နီဆုတ်ꩻနောဝ်ꩻ ဝွေꩻဖြေ့ꩻလူႏစွဉ်ႏ ဗွေႏဘုရာꩻနမ်းတောႏ ဖဲ့ꩻကီဖဲ့ꩻလသွူ။ ဝွေꩻကဖြေ့ꩻလူႏဒါႏ ကောဝ်ႏနီဆုတ်ꩻနောဝ်ꩻ တထဲ့လင်ꩻတောဝ်း ဟံႏလောင်းတွော့ꩻ ထွာစွဉ်ႏကောဝ်ႏဗိတာန်ꩻ၊ ကောဝ်ႏမျက်နှာကြက်တွော့ꩻ အောဝ်ႏသꩻစူꩻစွဉ်ႏဒျာႏ ဗွေႏဘုရာꩻနမ်းတောႏ ဆꩻကီဖဲ့ꩻသွူ။ ကောဝ်ႏနီဆုတ်ꩻနောဝ်ꩻ ဖြေ့ꩻလူႏလွေꩻ ဗွေႏဘုရာꩻနမ်းတောႏ အထွေဖဲ့ꩻ၊ နီဆုတ်ꩻနောဝ်ꩻ ဖြေ့ꩻလူႏလွေꩻ ဗွေႏဘုရာꩻဆꩻချာဖဲ့ꩻ၊ နီဆုတ်ꩻနောဝ်ꩻ ဖြေ့ꩻလူႏလွေꩻ ဗွေႏဘုရာꩻနမ်းတောႏ အစေႏဖဲ့ꩻသွူ။ ကောဝ်ႏကားကအောဝ်ႏနောဝ်ꩻ တထဲ့လင်ꩻတောဝ်း ဟံႏလောင်းတဲင် အောဝ်ႏဆင်ႏ အောဝ်ႏသꩻစူꩻတငါစွဉ်ႏ ဗွေႏဘုရာꩻနမ်းတောႏနောဝ်ꩻတွော့ꩻ ဗွေႏဘုရာꩻကျွꩻငါငါလဲ့ ကောဝ်ႏနောဝ်ꩻ ပါလွဉ်ꩻစူꩻစွဉ်ႏဒျာႏ ဗွေႏဘုရာꩻနမ်းတောႏနောဝ်ꩻသွူ။

တဝေင်ꩻလွုမ်း ထန်ႏထွားလွဝင်ꩻဖုံႏ

ကောဝ်ႏထွိုင်ႏအောဝ်ႏပါလွဉ်ꩻစူꩻ ဗွေႏဘုရာꩻနုဲင်းယိုနောဝ်ꩻ လိုꩻရာႏဇဂျိုဟ်ႏခမ်းနောဝ်ꩻ တထီႏဖိုတောဝ်းတဲင် ဟွိုန်ထူꩻဆန်ꩻ၊ ဟွိုန်နေစ်သက်လွမွေးဝင်ꩻဖုံႏတွော့ꩻ ရာႏဇဂျိုဟ်ႏတဝေင်ꩻလွုမ်ႏ ထန်ႏထွားလွဝင်ꩻဖုံႏ၊ ထောင်လွဉ်ꩻဗွေႏဘုရာꩻဆꩻချာတဲင် ရောင်လွဝင်ꩻဖုံႏ၊ တဗꩻစူဖုံႏ၊ ယွိုင်ႏလွစူဖုံႏ၊ နုဲင်ႏဗေက်ꩻရောင် ဖဝါႏတူႏပေါက်ဖုံႏ၊ တပꩻဖုံႏတွော့ꩻ ခီႏယော်ꩻအံႏဖြာႏရောင် ဗွေႏဘုရာꩻတံႏခိုꩻဖုံႏ၊ အံႏဖြာႏရောင် သုမနကောဝ်ႏသား စေႏတနာႏဖုံႏတဲင် ထောင်လွဉ်ꩻထွားလွဉ်ꩻ ဗွေႏဘုရာꩻဖုံႏသွူ။ သုမနကောဝ်ႏသားနောဝ်ꩻတဲ့ ထွိုင်ႏထီႏနုဲင်းယိုနောဝ်ꩻ စေႏတနာႏယိန်းစွုမ်းစွုမ်း၊ ယိန်းနေစ်သက်သက်စွဉ်ႏနောဝ်ꩻသွူ။

အမာဒေါ့ꩻဆွုမ်ႏ နယ်ꩻဆွုမ်ႏခန်းဝွေꩻအမျိုꩻမျိုꩻ

သုမနကောဝ်ႏသား ကေႏညိုႏနေစ်သက်မွေး ဗွေႏဘုရာꩻ၊ ထွိုင်ႏကွို့ꩻသꩻကေႏနပ်ထွူနောဝ်ꩻ တွမ်ႏအကောဝ်ႏခြောင်းခြေင်နောဝ်ꩻ သဲင်ꩻချာခန်းဒျာႏလမ်းသွူ။ တွိုႏသဲင်ꩻလမ်းနောဝ်ꩻ သဲင်ꩻခြုဲင်းနယ်ခန်းအမာ- "ကောဝ်ႏနောဝ်ꩻ တထင်ႏဆက်ဗာႏတောဝ်း ခွန်ဟော်ခံꩻအကျောင်ꩻ၊ လူႏထိုꩻဒျာႏ ဗွေႏဘုရာꩻအကျောင်ꩻ၊ ကောဝ်ႏနောဝ်ꩻ ပါလွဉ်ꩻဗွေႏဘုရာꩻအကျောင်ꩻ၊ နေစ်သက်ရောင်ဝင်ꩻအကျောင်ꩻ၊ ခွေကုသိုလ်ႏယိုနောဝ်ꩻ ဝွေႏဖေႏဒျာႏနာꩻအမျတဲင် နေးထူႏသာႏဓုညီꩻသွော့ ခွေကုသိုလ်ႏအကျောင်ꩻ"ဖုံႏယို ခြုဲင်းနယ်ဖေႏခန်း အမာသွူ။ ကွယ်ႏတွော့ꩻ အမာနောဝ်ꩻ တနေစ်သက်တောဝ်း၊ တနေးထူႏတောဝ်း ဝွေꩻကုသိုလ်ႏတွော့ꩻ နေးတွမ်ႏဒေါသ၊ နေးတွမ်ႏမောဟတရာꩻတဲင် ရိုꩻဆွုမ်ႏ ဒေါ့ꩻဆွုမ်ႏ၊ နယ်ꩻဆွုမ်ႏထဲင်းဝွေꩻ အမျိုꩻမျိုꩻသွူ။ "နာꩻထာꩻမာꩻယိုနောဝ်ꩻ မာႏလဲဉ်း၊ ခွန်သီးမျိုꩻ ပေါႏသꩻလျားထာꩻနောဝ်ꩻ သေနာႏတောဝ်းထာꩻမုဲင်ꩻမုဲင်ꩻ၊ နာꩻအသက်အန္တရာယ်ႏလဲ့နောဝ်ꩻ၊ ခွေအသက်အန္တရာယ်ႏလဲ့နောဝ်ꩻ ထွာနွောင်ꩻဒါႏ၊ နာꩻထာꩻမာꩻနောဝ်ꩻ တွမ်ႏခွေတဆဲင်ႏတောဝ်း၊ နာꩻထာꩻမာꩻလဲ့ နာꩻထာꩻမာꩻဒျာႏကွေး၊ ခွေထင်ႏလောဝ်းဖြောင်သွူ ခွန်ဟော်ခံꩻ ယိုခါခါကွေး"သုမနကောဝ်ႏသားမာနောဝ်ꩻ ရိုꩻဖေႏသမ်းသွူဝွေꩻနုဲင်းနောဝ်ꩻတွော့ꩻ ယွော့တွမ်ႏအပို ထင်ႏထေ့ခန်းဒျာႏ ဗိမ္ဗိသာရခွန်ဟော်ခံꩻသွူ။ သုမနကောဝ်ႏသားအမာနောဝ်ꩻ ဝွေꩻဝါꩻထာꩻမာꩻအကျောင်ꩻအခရာႏယို ထင်ႏခြုဲင်းနယ်သွူ ခွန်ဟော်ခံꩻတွော့ꩻ "ဗွေႏခွန်ဟော်ခံꩻဩ- သုမနထာꩻမာꩻနောဝ်ꩻ ဟောဝ်လဲ့နောဝ်ꩻ၊ ကုဲင်လဲ့နောဝ်ꩻ တွမ်ႏခွေသွဉ်း တဆဲင်ႏတောဝ်း၊ ဝွေꩻထာꩻမာꩻအကျိုꩻယို ဝွေꩻခံႏဗာႏဒျာႏဩ၊ ခွိုင်းယိုမာꩻငါနောဝ်ꩻ ဝွေꩻယိုလဲ့ ခွေသွဉ်းတအုံညီꩻနွောင်ꩻတောဝ်းဒွုမ်၊ ခွေသွဉ်းအွဉ်ႏကုဲင်လဲဉ်းဝွေꩻအကျောင်ꩻယိုလဲ့ လောဝ်းနယ်ပါထွူ ဗွေႏခွန်ဟော်ခံꩻသနယ်ဩ"လောဝ်းနယ်ပါလွေꩻထဲင်း ငေါဝ်းနုဲင်းနောဝ်ꩻဖုံႏသွူ။ ခွန်ဟော်ခံꩻ ဗိမ္ဗိသာရနောဝ်ꩻ "ပါꩻမူႏယို သူႏသေတောဝ်းထာꩻဟွေး၊ ထာꩻကေႏညိုႏမုꩻ သဒ္ဓါႏတရာꩻလဲ့ အဲဉ်ထောဝ်း၊ ထာꩻဟောဝ်ယို ဝွေꩻယူႏဒျာႏ ထာꩻတဟောဝ်တောဝ်း၊ မွိုက်ငါႏထာꩻဟွေး"ယူႏထွူနုဲင်းနောဝ်ꩻတွော့ꩻ "မွေး ပိုမူႏဟွေး- နာꩻဝါꩻသုမထာꩻမာꩻယိုနောဝ်ꩻ မွေးလဲ့နောဝ်ꩻ၊ မွေးတောဝ်းလဲ့နောဝ်ꩻ မဲ့ꩻခွေချင်းဒေါ့ꩻရီဒျာႏ၊ နာꩻသဲင်ꩻခန်းဟုဲင်း"ရိုꩻထွူနုဲင်းနောဝ်ꩻတွော့ꩻ အွဉ်ႏစွꩻသဲင်ꩻခန်းဒျာႏနောဝ်ꩻသွူ။

ခွန်ဟော်ခံꩻ လွေꩻကေႏညိုႏ ဗွေႏဘုရာꩻဝေင်ꩻကို

ဗိမ္ဗိသာရခွန်ဟော်ခံꩻနောဝ်ꩻ ပေါႏလꩻတဲင်သတင်ꩻထူꩻဆန်ꩻနုဲင်းယိုတဲ့ ထန်ႏလွေꩻဝေင်ꩻကိုတွော့ꩻ ထောင်လွဉ်ꩻဗွေႏဘုရာꩻဆꩻချာ စူနီပင်ဝုဲင်ႏ ကေႏညိုႏလွဉ်ꩻခန်း ဗွေႏဘုရာꩻသွူ။ ဗွေႏဘုရာꩻလဲ့ ထွိုင်ႏသေခွန်ဟော်ခံꩻ လွဉ်ကေႏညိုႏနောဝ်ꩻ တောႏတောႏတကျွꩻသဲင်ꩻတောဝ်းတွော့ꩻ အောဝ်ႏကျွꩻလွေꩻငါငါစွဉ်ႏ ဝေင်ꩻတဖူꩻတန်ကိုသွူ။ ခွန်ဟော်ခံꩻနောဝ်ꩻ၊ လိုꩻဝေင်ꩻဖုံႏလဲ့နောဝ်ꩻ ကေႏညိုႏနေစ်သက်နောဝ်ꩻ အလွိုးကေႏနပ်သွူမꩻ ဝွေꩻဗွေႏသပိတ်နောဝ်ꩻ ကွဲဖေႏငါခွန်ဟော်ခံꩻသွူ။ ခွန်ဟော်ခံꩻနောဝ်ꩻ ပေါႏလꩻသွူ ဗွေႏဘုရာꩻသပိတ်လဲ့ ပင်ꩻသဲင်ဟော်ကိုတွော့ꩻ သဲင်ꩻကပ်လူႏခန်းဒျာႏ ဗွေႏဘုရာꩻဒဲဉ်သွမ်ꩻ နေစ်နေစ်သက်သက်နောဝ်ꩻသွူ။ ဗွေႏဘုရာꩻနောဝ်ꩻ ပေါႏသုံꩻသွူသွမ်ꩻလဲ့ ဟော်ꩻဖေႏထွူအနုမောဒနာႏ ဒဲဉ်သွမ်ꩻကျိုꩻတွော့ꩻ ကျွꩻထင်ႏခန်းဒျာႏ ဝေဠုဝွန်ႏကျောင်ꩻကိုသွူ။ ခွန်ဟော်ခံꩻ ဗိမ္ဗိသာရနောဝ်ꩻလဲ့ ဖင်ꩻဖေႏဗွေႏဘုရာꩻသပိတ်တဲင် ထင်ႏပသာတွိုႏတွိုႏဒျာႏ ဗွေႏဘုရာꩻ အွိုးဝေဠုဝွန်ႏကျောင်ꩻကိုသွူ။

ဟောဝ်စေႏတနာႏ လꩻဗာႏအကျိုꩻယိုခါ

သုမနကောဝ်ႏစာသားနောဝ်ꩻ ကောဝ်ႏကအီႏဆက်ဒါႏ ခွန်ဟော်ခံꩻယို ကွပ်လူႏထိုꩻတော ဗွေႏဘုရာꩻတဲင် မာလဲ့အွဉ်ႏကုဲင်ထိုꩻ၊ တွမ်ႏပိုလဲ့ ဖြတ်ꩻဖြယ်ဗာႏစွဉ်ႏလွဝင်ꩻတွော့ꩻ အောဝ်ႏကုဲင်ဒျာႏ တဖြာꩻဖြာꩻဒျာႏသွူ။ ကွယ်ႏတွော့ꩻ ဝွေꩻသꩻတပေႏတောဝ်း၊ ယူႏယူႏဒျာႏ ဝွေꩻကုသိုလ်ႏအရောဝ်ꩻယိုနောဝ်ꩻ နေစ်သက်စွုမ်းသꩻမွေးစွဉ်ႏထာꩻတဲင် အုံအောဝ်ႏတွမ်ႏထာꩻနေစ်သက်တွော့ꩻ သꩻအောဝ်ႏချံꩻသာႏဒျာႏသွူ။ ဗိမ္ဗိသာရခွန်ဟော်ခံꩻနောဝ်ꩻ ပေါႏပသာသဲင်ꩻသွူ ဗွေႏဘုရာꩻကျောင်ꩻကိုလဲ့ သဲင်ꩻချာဟော်ကိုတွော့ꩻ အွဉ်ႏအလိုꩻသဲင်ꩻဟဲ့ꩻထင်ႏလွဉ်ခန်း သုမနကောဝ်ႏသားသွူ။ သုမနထွိုင်ႏဖျော်ထင်ႏလွဉ်နောဝ်ꩻ ခီႏယော်ꩻအံႏဖြာႏသွူ သုမနသꩻစေႏတနာႏတွော့ꩻ ခီႏမျောက်ဆုလင်ꩻဖေႏစွဉ်ႏ ဆင်-သွစ်ꩻထိုမ်း၊ သေထုမ်း သွစ်ꩻထုမ်း၊ သွဉ်းခိုသွစ်ꩻဖြာꩻ၊ သွဉ်းမူႏသွစ်ꩻဖြာꩻ၊ တွမ်ႏခြွိုင်းခြိုꩻကွဉ်ကꩻ စုံႏစုံႏလင်ႏလင်ႏ မူႏနံꩻသွစ်ꩻဖြာꩻ၊ တလာတလာအကို အခွဉ်ႏကလꩻဒါႏ တသိန်ႏစီႏ၊ ဒုံတန်သွစ်ꩻဒုံတွမ်ႏ သုမနအတာႏ ကလိုႏအပ်ဒါႏ လမ်းခြိုꩻပါႏခြိုꩻ ခွမ်ꩻလာꩻကွဉ်ကꩻ စုံႏစုံႏလင်ႏလင်ႏဖုံႏသွူ။

ဥပဒေသ

နောဝ်ꩻတွော့ꩻ သုမနကောဝ်ႏသားနောဝ်ꩻ "ပူဇာ စ ပူဇနေယျာနံ၊ ဧတံ မင်္ဂလမုတ္တမံ"-ကရိုꩻဒါႏ မင်္ဂလာႏတရာꩻတောႏအလꩻ ပူႏဇောႏထွိုက် ပူႏဇောႏသင်ꩻဒါႏ ပုဂ္ဂိုလ်ႏသီးအကို အမျတ်သွတ်ꩻကထွာဒါႏ ဗွေႏဘုရာꩻယို နေးတွမ်ႏကောဝ်ႏမူꩻလေꩻ သွစ်ꩻဆုတ်ꩻတဲင် ကပ်လူႏပူႏဇောႏဗာႏတဲင်တွော့ꩻ ဒိဋ္ဌဓမ္မိက-ပစ္စုပ္ပန်ႏဘဝယိုခါနောဝ်ꩻ ပိုမာစွဉ်ꩻခွါႏထိုꩻတဲ့ ဗိမ္ဗိသာရခွန်ဟော်ခံꩻ မီႏမျောက်ဆုဖေႏ စုံႏစုံႏလင်ႏလင်ႏတဲင်တွော့ꩻ ခြွေခြာႏချံꩻသာႏလဲဉ်းဒျာႏအလီꩻ ခွိုင်းမုဲင်ꩻမုဲင်ꩻသွူ။ သက်ထွိုင်ႏလို့တနီꩻခါ ဘဝထွိုင်ႏပြောင်ꩻငါတဲ့ ထင်ႏခံႏစာꩻဗာႏခန်းဒျာႏ လူꩻသီးစေꩻစိန်ႏ ဗꩻတွိုႏဟန်ႏသနီꩻ ယိုခါသွူ။