ပေါင်ꩻကွိုက်ꩻပညာႏအဝ်ႏ

ပေါင်ꩻကွိုက်ꩻပညာႏအဝ်ႏသားတဲင် လꩻချံꩻသာႏ

နီဗွေႏဘုရာꩻ ကဟော်ꩻခါꩻဒါႏ တရာꩻမင်္ဂလာႏနဝ်ꩻ ပါဠိဂါႏထာႏပေါင်ꩻ အဝ်ႏ(၁၀)ဂါႏထာႏသွူ။ တဂါႏထာႏနဝ်ꩻ မင်္ဂလာႏတရာꩻ ပါ(၃)ပါꩻ၊ (၄)ပါꩻ၊ (၅)ပါꩻဖုံႏသွူ။ မင်္ဂလာႏတရာꩻဂါႏထာႏတဆီအကို ပထမဂါႏထာႏနဝ်ꩻ နုဲင်းလယိုအတွိုင်ꩻသွူ။ - အသေဝနာ စ ဗာလာနံ၊ ပဏ္ဍိတာနဉ္စ သေဝနာ။ ပူဇာ စ ပူဇနေယျာနံ၊ ဧတံ မင်္ဂလ မုတ္တမံ။

ပထမဂါႏထာႏ မင်္ဂလာႏတရာꩻ (၃)ပါꩻ

၁။ လိုꩻမွိုက်သီးယို မာꩻသွꩻပေါက်ꩻကွိုက်ꩻဗာႏတဝ်း။ ၂။ ပညာႏအဝ်ႏ သူႏတောႏကောင်ꩻသီးယို မာꩻသွꩻပေါင်ꩻကွိုက်ꩻဗာႏ။ ၃။ ပူႏဇောႏထွိုက်ဒါႏ ပုဂ္ဂိုလ်ႏသီးယို ပူႏဇောႏဗာႏ။ မင်္ဂလာႏတရာꩻ ယို(၃)ပါꩻအကို အမုဲင်(၂) မင်္ဂလာႏတရာꩻနဝ်ꩻ "ပညာႏအဝ်ႏ သူႏတောႏကောင်ꩻသီးယို မာꩻသွꩻပေါင်ꩻကွိုက်ꩻဗာႏ"ရိုꩻနဝ်ꩻတဲင် မာꩻသွꩻပေါက်ꩻကွိုက်ꩻ သူႏတောႏကောင်ꩻနဝ်ꩻ ထွာမင်္ဂလာႏ၊ မာꩻသွꩻပေါက်ꩻကွိုက်ꩻတဝ်း သူႏတောႏကောင်ꩻတွော့ꩻ မီႏမာꩻသွꩻ ပေါင်ꩻကွိုက်ꩻဒျာႏ လိုꩻမွိုက်နဝ်ꩻ "ပဏ္ဍိတာနဉ္စ သေဝနာ-မင်္ဂလာႏ"ကုဲင်သွူ။ ကွပ်မာꩻသွꩻ ပေါင်ꩻကွိုက်ꩻသူႏတောႏကောင်ꩻတဲင် မင်္ဂလာႏအဝ်ႏ၊ လꩻဗာႏချံꩻသာႏအကျောင်ꩻယို ဖေႏကသေဖေႏကစဲင်းနဝ်ꩻ အီႏတဲမ်းနယ်လွေꩻ ဝွတ္ထုသက်သေႏ "ဟိတောပဒေသ ရတနာဒီပဇာတ်"နုဲင်းငါယိုအတွိုင်ꩻသွူ။ ပွိုင်းလဲင်ႏစခါ နေင်ႏပေါင်ꩻအာအကို သက္ကတုံးကိုကအဝ်ႏအုံဒါႏ ကွန်ႏစာသားနီဖြာꩻနဝ်ꩻ တွိုင်ႏပင်ႏလွဝင်ꩻတွော့ꩻ လယ်ႏထိုမ်ႏစာခန်း ကွန်ႏတခြိုꩻ ဝင်ꩻခမ်းဝင်ꩻထီကိုသွူ။ ဝွေꩻသီးနဝ်ꩻ တွမ်ႏအသွꩻသင်္ဘောꩻသားငတ်ꩻရျာꩻတဲင် ကာႏဖျတ်လွေꩻ သမုဒ္ဒရာႏထီတန်တွော့ꩻ အီႏလွေꩻစာကွန်ႏ ခေါမတုံးကိုသွူ။ သင်္ဘောꩻသားငတ်ꩻရျာꩻအကို ပညာႏဉာဏ်ႏကအဝ်ႏဒါႏ "ကုနာလ"နဝ်ꩻ ထွာဝင်ꩻအတန်သွူ။ "ဝါရဏ"နဝ်ꩻ ထွာစူထောက်တဲင် အိုပ်ချုက်ထိန်ꩻထွားလွေꩻဗာႏ သင်္ဘောꩻသားဖုံႏသွူ။ တွမ်ႏကွန်ႏသင်္ဘောꩻ ဝွေꩻသီးနွို့ကာႏလွေꩻ သမုဒ္ဒရာႏထီတန် ထွိုင်ႏလꩻ (၇)နီꩻနဝ်ꩻ တလီꩻသန်ခမ်းတန်တွော့ꩻ ထီလဲင်ꩻဖုံႏလဲ့ ထွိုင်ႏတလာလွဉ်သွူ။ သင်္ဘောꩻသားဖုံႏနဝ်ꩻ ထိန်ꩻနွောင်ꩻဒွုမ်သင်္ဘောꩻတဲင် ပါလွေꩻခန်းဒျာႏ ထီလဲင်ꩻကို၊ ခေ့ꩻလေနီꩻနာꩻ တခြွဉ်ႏလွေꩻခန်းဒျာႏ သမုဒ္ဒရာႏထီတန်သွူ။

သျော့ꩻမွော့ဝီရိယနေား

သင်္ဘောꩻတခြွဉ်ႏ ထီသမုဒ္ဒရာႏ မွူးနီꩻကထွိုင်ႏအာပသာႏနဝ်ꩻ ဝွေꩻသီးကပါလွဉ်ဒါႏ အံႏအွꩻတရိပ်ရိက္ခာႏဖုံႏနဝ်ꩻ လို့ထိုꩻတဲင် အံႏမလွ အာဟာႏရတွော့ꩻ အာႏတအဝ်ႏဒွုမ်တဖြာꩻဖြာꩻ၊ အွန်းဖူးပနဲန်ႏလို့စွဉ်ႏ ပငါပရာꩻသွူ။ နဝ်ꩻတွော့ꩻ ကထွာဒါႏ အတန်ကုနာလနဝ်ꩻ တသျော့ꩻတဝ်း ဝီရိယတွော့ꩻ သင်္ဘောꩻ ဖေႏကဗိမ်ပုဲင်ႏထီ၊ ဖေႏကကပ်ꩻလꩻဖင်ႏတဖဲ့ꩻဖဲ့ꩻနဝ်ꩻ ကျံႏထိန်ꩻကျံႏထွား၊ ကျံႏဝါးကျံႏနွန်ႏစွဉ်ႏဒျာႏ သင်္ဘောꩻတိတ်ꩻတိတ်ꩻသွူ။ တွိုႏနဝ်ꩻတဲင်ခါ ကထွာဒါႏ စူထောက်ဝါရဏနဝ်ꩻ သꩻလျားထာꩻတွော့ꩻ ခွန်းထောမ်စွဉ်ႏ ကုနာလ ကားကထွာ၊ ကားကထန်ႏ၊ ထိန်ꩻလဲ့ တထိန်ꩻကိုတဝ်း သျော့ꩻဝီရိယတွော့ꩻ ဗေင်ႏဗော့ꩻထာꩻသွူ။ လိုꩻလင်ဖုံႏလဲ့ ဖေႏကထွားကိုပုဲင်ႏ ကုနာလနဝ်ꩻ ဒေါ့ꩻသွဉ်လွေꩻ သွေꩻကုဲင်ပါစွဉ်ႏဒျာႏသွူ။ ကုနာလနဝ်ꩻ "သွꩻဖုံႏဟွေး- နီယိုခါနဝ်ꩻ အာႏကွိုꩻခရာႏ အဝ်ႏကျိုꩻစာꩻမု ဝီရိယလွုမ်ꩻ၊ သျော့ꩻမွော့ဝီရိယဟုဲင်း၊ ခါးလား ကသျော့ꩻဝီရိယနဝ်ꩻ ဉာဏ်ႏအဝ်ႏသမျ ထဲမ်ပိုႏထဲင်းဝီရိယတွော့ꩻ နီမီႏကျိုꩻစာꩻနဝ်ꩻ သီစွဉ်ႏထာꩻလဲ့ အဝ်ႏမျတ်ဒျာႏသွူ"ဒေါ့ꩻရိုꩻဖေႏခန်း သင်္ဘောꩻသားအလင် ငဝ်းနုဲင်းနဝ်ꩻသွူ။

ဘီပလူꩻကျံႏသွေꩻကုဲင် သင်္ဘောꩻသားဖုံႏ

နုဲင်းယိုအတွင်ꩻ သမုဒ္ဒရာႏကိုကအဝ်ႏဒါႏ ဒကရက္ခိတဘီပလူꩻနဝ်ꩻ ပျꩻအနမ်းသင်္ဘောꩻထျꩻ ထာꩻခြေင်ကိုတဲင်- "သွꩻဖုံႏဟွေး- ထီသမုဒ္ဒရာႏ ကလုဲင်းဒျာႏထာꩻနုဲင်းယိုနဝ်ꩻ သီမဲန်ထိန်ꩻသီသင်္ဘောꩻနုဲင်းမုဲင်ꩻထိန်ꩻ အမျိုꩻနွောင်ꩻတမွေးတဝ်း၊ သီနွို့ယားစွဉ်ႏထီလဲ့ သီအမျိုꩻမော့ꩻဖင်ႏ တမွေးတဝ်း၊ တလွစ်တဝ်း ထာꩻသီတူႏတူႏ သီအုံသာႏသာႏ၊ သီသီဗော့ꩻဗွီႏဗွီႏနဝ်ꩻ ဟဝ်ထဲင်း၊ ခွေသညင်ꩻသီတွော့ꩻ ခွေဒေါ့ꩻဖေႏဒျာႏသီ၊ ခွေနဝ်ꩻ ဘီပလူꩻ အဝ်ႏအုံပွေါးထိန်ꩻ ထီသမုဒ္ဒရာႏယိုသွူ။ သီဖေႏကလွစ်ထာꩻသီ၊ ဖေႏကမော့ꩻ ခြောင်ဖင်ႏနဝ်ꩻ မဲ့ꩻခွေကျိုꩻစာꩻကူႏညီႏဒျာႏ"ဒေါ့ꩻရိုꩻသွေꩻကုဲင်ခန်း သင်္ဘောꩻသားနုဲင်းနဝ်ꩻသွူ။ တွိုႏနဝ်ꩻခါ ကထွာဒါႏအတန် ကုနာလနဝ်ꩻ "အွိုးဘီပလူꩻမွိုက်ဟွေး- နာꩻကျံႏချာက်သွေꩻကုဲင်မွော့ သင်္ဘောꩻသားဟုဲင်း၊ နာꩻနဝ်ꩻ ကလဲန်းခိုႏချာ အကုသိုလ်ႏအာႏတလာတွော့ꩻ ဘဝယိုခါ နာꩻထွာဗာႏဘီပလူꩻ မွေးတဝ်းနဲ့၊ နာꩻငဝ်းနဝ်ꩻ နီတနာႏတဝ်း၊ သီခန်းတယဝ်း နီတသျော့ꩻတဝ်း နီဝီရိယသွူ။ ဘီပလူꩻနုဲင်းနဝ်ꩻ ထိုꩻညာꩻညာꩻဟုဲင်း"ဒေါ့ꩻဖေႏခန်း ဘီပလူꩻနုဲင်းနဝ်ꩻတွော့ꩻ ဘီပလူꩻလဲ့ မဲ့ငါလျားလျား ထိုꩻလဲ့ꩻတရွို့ꩻဗာႏခန်းဒျာႏနဝ်ꩻသွူ။ သင်္ဘောꩻတခြွဉ်ႏထီ (၇)နီꩻထွိုင်ႏဗွေထွူ (၈)နီꩻကိုနဝ်ꩻ ဝွေꩻသီးအဝ်ႏထီႏညာꩻလွေꩻခန်း ကြွန်ပေႏတဖြုံႏတဲင် ကုနာလနဝ်ꩻ ယီးနယ်သွူကြွန်ပေႏနဝ်ꩻတွော့ꩻ- "သွꩻဖုံႏဟွေး- နီဝီရိယတရာꩻ ကျိုꩻစာꩻမု တအကျိုꩻအီႏဖေႏသွူ။ အွိုးငါသူꩻ အဝ်ႏထီႏလွေꩻလဲန်း ကြွန်ပေႏတဖြုံႏ၊ ကျိုꩻစာꩻထဲင်းထဲင်းသွော့လုဲင်းနေား"ဒေါ့ꩻနယ်လွေꩻခန်းအသွꩻ သင်္ဘောꩻသားနုဲင်းနဝ်ꩻသွူ။ ထွိုင်ႏဟွုန်ကုနာလငဝ်းနဝ်ꩻ ကအဝ်ႏဗေင်ႏဒါႏထာꩻ သင်္ဘောꩻသားအလင်ဖုံႏလဲ့ နဲစ်ထွိုင်ႏထွားဝင်ꩻတွော့ꩻ သꩻရောင်းသꩻရေꩻ အံႏဖြာႏရောင် အဆရာႏတန်ကုနာလသွူ။ ခွေထွိုင်ႏနာꩻထွိုင်ႏ ကျံႏနွန်ႏကျံႏဝါး၊ ကျံႏထိန်ꩻကျံႏထွား အသင်္ဘောꩻတွော့ꩻ တညတဝ်းအခိန်ႏ ဆွိုက်လွေꩻလꩻခန်းဒျာႏ ကြွန်ပေႏနဝ်ꩻသွူ။ သင်္ဘောꩻနဝ်ꩻ လွေꩻတလူႏသန်ဗာႏ ကောင်စောင်ꩻလုံးယာႏတဲင် ပꩻလီကုဲင်ပဲစ်ꩻထိုꩻခန်းဒျာႏနဝ်ꩻသွူ။

လွေꩻမော့ꩻခန်းဒျာႏ ရတနာႏကြွန်

သင်္ဘောꩻထွိုင်ႏပꩻနဝ်ꩻ ခွေခွေနာꩻနာꩻ ကျိုꩻစာꩻယားထီ ထင်ႏကီကြွန်နောင်းတွော့ꩻ တညတဝ်းအခိန်ႏ လွစ်လꩻလို့ခန်းဒျာႏ အသက်အန္တရာယ်ႏသွူ။ ထွိုင်ႏတွိုႏကြွန်လောင်းနဝ်ꩻ ခွေခွေနာꩻနာꩻ မာꩻလွခန်းသိုမ်းသေင်ႏလာႏဖုံႏတဲင် ရွိုးရွိုးလွားလွား အုံပဆားလွခန်းသွူ။ အရွိုးထွိုင်ႏပြေႏနဝ်ꩻ ထိုမ်ႏလွသေင်ႏဒီႏသေင်ႏရာႏ သေင်ႏလာႏသေင်ႏစော့ꩻဖုံႏတဲင် အံႏအွꩻလွေꩻခန်းနဝ်ꩻသွူ။ ဝါရဏနဝ်ꩻ ထိုမ်ႏနုဲင်းတဝ်းဝင်ꩻတွော့ꩻ အံႏညီꩻအံႏရိုမ်းဗော့ꩻဝင်ꩻထွူ- "ကုနာလနဝ်ꩻ အွဉ်လွေꩻအုံတငီႏတငါနီ၊ ခြောင်ဖင်ႏတဖဲ့ꩻဖဲ့ꩻလဲ့ တထီႏတဝ်း၊ နီယိုခါနဝ်ꩻ ဖမွိုးဖဖါအွဉ်ႏကုဲင်ပိုမာတွော့ꩻ အီႏသီလွင်ꩻဗာႏထာꩻ ကြွန်လောင်းယိုသွူ"ဒေါ့ꩻသံးထဲင်းဒွိုန်း ငဝ်းရွို့ꩻမာႏသွူ။ ဝွေꩻသီးကတွိုႏလွေꩻဒါႏ ကြွန်လောင်းနဝ်ꩻ ရွဉ်ခံꩻဥစ္စာႏ ရတနာႏသဲင်ဟဝ်ဖုံႏ အဝ်ႏဗွေအဝ်ႏပြုံႏထံထာꩻတဲင် သင်္ဘောꩻသားဖုံႏနဝ်ꩻ လွိုက်ထူႏလွဝင်ꩻ ဟဝ်ရာꩻကျွိုက်ရာꩻဖုံႏသွူ။ ဝါရဏနဝ်ꩻ "အီႏသီဗာႏထာꩻတူႏတူႏ ထူႏသေꩻခါꩻစွဉ်ႏလဲ့ ထူႏထာꩻမုဲင်ꩻဟောင်း"ရိုꩻနုဲင်းနဝ်ꩻတွော့ꩻ တထူႏနုဲင်းတဝ်းဝင်ꩻ ထာꩻမုဲင်ꩻမုဲင်ꩻသွူ။ ကုနာလနဝ်ꩻ ပညာႏအဝ်ႏ ထာꩻယူႏလိုမ်းတဲင် "ကြွန်ယိုနဝ်ꩻ အလွိုးလူꩻသီးကြွန်ဒျာႏ"ယူႏနုဲင်းနဝ်ꩻတွော့ꩻ "သွꩻဖုံႏဟွေး- ကြွန်ယိုနဝ်ꩻ ကြောင်းလဲ့ကြောင်းဒျာႏ၊ ရတနာႏလဲ့ လွိုင်ႏအာ၊ သေင်ႏတခြာလဲ့ လွိုင်ႏကွုန်ꩻ၊ အလွိုးလူꩻသီးကြွန်ဒျာႏကွေး၊ အုံကြောင်းကြောင်း အဝ်ႏကြောင်းကြောင်းလွဝင်ꩻဟုဲင်း၊ မီႏစွဉ်ꩻခွဉ်ႏပေႏခွဉ်ႏတန်လဲ့ တဗစ်ꩻခါꩻထွူတွမ်ႏသုဲင်ꩻဟုဲင်း၊ အုံဝွေႏထာꩻမဲ့ꩻ လူꩻသီးသꩻလျားဒါႏထာꩻ၊ လူꩻသီး သꩻမီႏလျားထာꩻနဝ်ꩻ မဲ့ꩻနီမော့ꩻဒါႏ ထာꩻဒုက္ခကွေးနေား"ဖေႏသတိလွေꩻခန်း အသွꩻသင်္ဘောꩻသားဖုံႏနုဲင်းနဝ်ꩻသွူ။

လူꩻပွေါးကြွန် သꩻလျားမွေးစွဉ်ႏထာꩻ

ထွိုင်ႏဟွုန်ကုနာလ ဖေႏသတိꩻ သင်္ဘောꩻသားဖုံႏနဝ်ꩻ ဝါရဏနဝ်ꩻ တမဲန်ခံႏတဝ်း သꩻလျားထာꩻတဲင် ယိန်းစွော်စွော်မာꩻစွဉ်ႏဒျာႏသွူ။ "လိုꩻဗား၊ တလိုႏခိုးလျားတဝ်း လွေꩻခိုးလျား၊ ကမ်းသꩻအုံ ကမ်းသꩻအဝ်ႏပါꩻစားယို" ဒေါ့ꩻထွူနုဲင်းနဝ်ꩻတွော့ꩻ ဝွေꩻနမ်းလဲ့ အုံဝွေႏအုံဝုဲင်ႏ၊ အေႏကြွို့ꩻဆီႏကြွို့ꩻဒျာႏထာꩻသွူ။ လိုꩻကနာႏဝွေꩻငဝ်းလဲ့နာႏ၊ အေႏကြွို့ꩻဆီႏလွင်ꩻထာꩻ၊ မာꩻတအီႏ မာꩻဝွေႏထာꩻတဲင် မွူးနီꩻထွိုင်ႏညပသာႏနဝ်ꩻ ကြွန်လောင်းနဝ်ꩻ ဝွေႏဝက်နွုမ်ꩻသေင် နွုမ်ဟဲင်အေႏဆီႏဖုံႏတွော့ꩻ လူꩻပွေါးကြွန်လဲ့ သꩻလျားမွေးစွဉ်ႏထာꩻသွူ။ လူꩻသီးနဝ်ꩻ တွိုင်ႏပင်ႏလွဝင်ꩻတွော့ꩻ ထဲင်း(၇)နီꩻနဝ်ꩻ ပသေခန်းနီကြွန်ယိုနဝ်ꩻမꩻ သဘော်ꩻတူႏခန်းလွဝင်ꩻ နုဲင်းနဝ်ꩻသွူ။ တွိုႏနဝ်ꩻခါ လူꩻတဖြာꩻနဝ်ꩻ လွေꩻထေ့သင်္ဘောꩻသားတဲင်- "သွꩻဖုံႏဟွေး- သီမာꩻဝွေႏငါႏကြွန်တဲင် လူꩻပွေါးကြွန်အတန်နဝ်ꩻ သꩻလျားလဲန်းထာꩻ၊ ထဲင်း(၇)နီꩻနဝ်ꩻ အီႏပသေသွူကြွန်တဲ့"ဖေႏသတိသွူနုဲင်းနဝ်ꩻတွော့ꩻ ထိုꩻမားခန်းဒျာႏသွူ။ နဝ်ꩻတွော့ꩻ ကပွေါးဒါႏထီသမုဒ္ဒရာႏ ဒကရက္ခိတဘီပလူꩻနဝ်ꩻ "သွꩻဖုံႏဟွေး- လူꩻငဝ်းဖေႏသတိꩻနဝ်ꩻ သီတွမ်ႏယွုမ်းပုဲင်ႏ၊ အမဲန်ဖေႏအုံတဝ်းသီတွော့ꩻ အဒေါ့ꩻဒျာႏ၊ သီအုံပျောႏပျောႏ အဝ်ႏပျောႏပျောႏ၊ အုံကမ်းသꩻ အဝ်ႏလꩻဒျာႏ"ဒေါ့ꩻထွူနုဲင်းနဝ်ꩻတဲင် ထိုꩻမားထိုꩻခန်းဒျာႏနဝ်ꩻသွူ။

လိုꩻမွိုက်တွမ်ႏပညာႏသျိ ပွိုင်းကွာႏလွဝင်ꩻပုံႏ

သင်္ဘောꩻသားအတန် ကုနာလနဝ်ꩻ "သွꩻဖုံႏဟွေး- နီနဝ်ꩻ တလိုႏအုံစွူစွူတဝ်းဒွုမ်ယိုကို၊ ဖေꩻတကင်ꩻတဝ်း၊ နီမာꩻဖျင်သင်္ဘောꩻတသာတဲင် ပြောင်ꩻထိုꩻခန်းနဝ်ꩻမꩻ၊ မီႏမဲန်ႏပထမလူꩻငဝ်းတဲ့ နေးတွမ်ႏနီသင်္ဘောꩻတဲင် နီထန်ႏထိုꩻလ၊၊ မီႏမဲန်ႏဒုတိယလူꩻငဝ်းလဲ့ နီလိုႏသုံꩻဆုဲင်ꩻနုဲင်းမုဲင်ꩻသုံꩻလꩻ"ရိုꩻဖေႏထွူ သင်္ဘောꩻသားနုဲင်းနဝ်ꩻတွော့ꩻ စီႏရင်ႏမာꩻသေꩻခါꩻခန်း သင်္ဘောꩻ၊ ဒင်ႏသေꩻခါꩻခန်း ရွဉ်ခံꩻဥစ္စာႏ သဲင်ပတ္တမျာꩻ ရတနာႏဖုံႏသွူ။ ဝါရဏနဝ်ꩻ တယွုမ်းတဝ်းလူꩻငတ်းတဲင် "ပါꩻမုဲင်ꩻယွုမ်းတဝ်းတဲ့ ပါခွေဖဲ့ꩻဟုဲင်း" ဒေါ့ꩻဖေႏသင်္ဘောꩻသားနုဲင်းနဝ်ꩻတွော့ꩻ အုံကမ်းသꩻလွေꩻဒျာႏထာꩻနဝ်ꩻသွူ။ ကွယ်ႏတွော့ꩻ သင်္ဘောꩻသားဖုံႏနဝ်ꩻ တပါအာတဝ်းဝွေꩻဖဲ့ꩻ၊ ပါဒျာႏကုနာလဖဲ့ꩻကဲန်းအာအာသွူ။ ထွိုင်ႏလꩻ (၇)နီꩻနဝ်ꩻ လူꩻပွေါးကြွန် ပသေထိုꩻမွေးခန်းဒျာႏ ကြွန်တွော့ꩻ ကုနာလတွမ်ႏ သင်္ဘောꩻသားဖုံႏနဝ်ꩻ ကျံႏနွန်ႏကျံႏဝါး သင်္ဘော်ꩻ ထန်ႏထိုꩻခန်းဒျာႏတဲင် လွစ်လꩻထာꩻသီဖုံႏသွူ။ ဝါရဏနဝ်ꩻ အဝ်ႏကုဲင်တဖြာꩻဖြာꩻလွုမ်ꩻ၊ ထီအီထိုꩻ အီခြွဉ်ႏတွော့ꩻ ထွာထိုꩻခန်းဒျာႏ ထပေႏဆာႏနဝ်ꩻသွူ။ သင်္ဘောꩻသားဖုံႏနဝ်ꩻ ပေါင်ꩻကွိုက်ꩻပညာႏသျိတဲင် ထာꩻသီလဲ့လွစ်ဒျာႏ၊ ခြွေခြာႏချံꩻသာႏတငါခန်းဒျာႏနဝ်ꩻသွူ။