ပေါႏအတုꩻပေါႏနဝ်ꩻ အစဲစ်ထိုꩻမား

"သဒ္ဓမ္မပ္ပဋိရူပကသုတ် (ပေါႏအတုꩻပေါႏနဝ်ꩻ အစဲစ်ထိုꩻမား)"

နီဗွေႏဘုရာꩻအဝ်ႏအုံ သာဝတ္ထိခမ်း၊ ကျောင်ꩻဇေႏတဝွန်ႏကိုအတွင်ꩻ ဗွေႏမဟာကဿပနဝ်ꩻ ဖျော်လွဉ်နီဗွေႏဘုရာꩻထျꩻ၊ ဝုဲင်ႏကန်းတော့ꩻ နီဗွေႏဘုရာꩻထွူခါ လောဝ်းပါနီဗွေႏဘုရာꩻနုဲင်းယို- "ဩဗွေႏ- ကရီးခါနဝ်ꩻ သိက္ခာႏပုဒ်ဆေ့ꩻပေႏ၊ တွိုႏဗွေႏရဟန်ꩻသီး ထွာရဟန္တာႏနဝ်ꩻ အာတန်၊ ကွပ်အကျောင်ꩻထမုဲင်ꩻ ဗွေႏဩ၊ တွိုႏယိုခါနဝ်ꩻ သိက္ခာႏပုဒ်နဝ်ꩻ အာတန်၊ တွိုႏဗွေႏရဟန်ꩻသီး ထွာရဟန္တာႏနဝ်ꩻ ဆေ့ꩻပေႏ၊ ပွိုးအကျောင်ꩻ ထမုဲင်ꩻ ဗွေႏဩ" "ကဿပဟွေး- သတ္တဝါႏသီးဖုံႏ ပေါႏဆွုတ်ယွုတ်သွူနောဝ်ꩻ သူႏတောႏကောင်ꩻသီးတရာꩻ ကွဲထိုꩻမားမား၊ ပေါႏသူႏတောႏကောင်ꩻတရာꩻ ကွဲထိုꩻမားမားနဝ်ꩻ သိက္ခာႏပုဒ်တဲ့ ပညတ်ဗာႏအာတန်၊ တွိုႏထွာရဟန္တာႏနောဝ်ꩻ ဆေ့ꩻပေႏနောဝ်ꩻသွူ။ "ကဿပဟွေး- လောကကိုယိုနဝ်ꩻ ပေါႏတရꩻအတုꩻ တပေါႏတဝ်းဒွိုန်းနဝ်ꩻတဲး သူႏတောႏကောင်ꩻတရာꩻ တလꩻထိုꩻမားမားတဝ်း၊ ပေါႏတရာꩻအတုꩻ ပေါႏသွူနဝ်ꩻ သူႏတောႏကောင်ꩻတရာꩻတဲ့ ကွဲးထိုꩻမားမားစွဉ်ႏနောဝ်ꩻသွူ။ မဉ်ႏဥပမာႏနဝ်ꩻ လောကကိုယို ခံꩻအတုꩻ မဉ်ႏတပေါႏတဝ်းဒွိုန်းနဝ်ꩻ ခံꩻအစဲစ် တထိုꩻမားတောဝ်း၊ ပေါႏခံꩻအတုꩻ ပေါႏသွူနဝ်ꩻ ခံꩻအစဲစ်ကွဲထိုꩻမားမား၊ အဗွန်ပီနုဲင်းနောဝ်ꩻသွူ။ ကဿပဟွေး- ပထဝီ၊ အာပေါ၊ တေဇော၊ ဝါယော- ဓါတ်တန်လစ်ꩻပါꩻဖုံႏနဝ်ꩻ တမာꩻထိုꩻမားနွောင်ꩻတဝ်း၊ သူႏတောႏကောင်ꩻတရာꩻ၊ ကမာꩻထိုꩻမားနွောင်ꩻ သူတောႏကောင်ꩻတရာꩻနဝ်ꩻ လိုꩻမွိုက်ဖုံႏဒျာႏ၊ ကွပ်ပွိုးလိုꩻမွိုက်ဖုံႏ ပေါႏအာနဝ်ꩻမꩻ သူႏတောႏကောင်ꩻတရာꩻ ကွဲးထိုꩻမားမားဗာႏနောဝ်ꩻသွူ။ ကဿပဟွေး- ကမာꩻထဲ့ဖွိုႏဒါႏလိုꩻ အဝ်ႏငတ်ꩻမျိုꩻ၊ တရာꩻငတ်ꩻမျိုꩻနဝ်ꩻ မာꩻပအီမ်ထိုꩻဒါႏ သူႏတောႏကောင်ꩻတရာꩻ၊ မာꩻထိုꩻမားထိုꩻဒါႏ သူႏတောႏကောင်ꩻတရာꩻ၊ ငတ်ꩻပါꩻကရိုꩻနောဝ်ꩻ- ၁။ သတ္ထရိ အဂါရဝါ- ရိုႏသေႏလွတဝ်း ဗွေႏဘုရာꩻဖုံႏ။ ၂။ ဓမ္မေ အဂါရဝါ- ရိုႏသေႏလွတဝ်း တရာꩻဖုံႏ။ ၃။ သံဃေ အဂါရဝါ- ရိုႏသေႏလွတဝ်း သံႏဃာႏဖုံႏ။ ၄။ သိက္ခာယ အဂါရဝါ- ရိုႏသေႏလွတဝ်း အကျင်ꩻသိက္ခာႏဖုံႏ။ ၅။ သမာဓိသ္မိံ အဂါရဝါ- ရိုႏသေႏလွတဝ်း သမာႏဓိဖုံႏ။ ပေါႏရိုႏသေႏလွတဝ်း 'ဘုရာꩻ၊ တရာꩻ၊ သံဃာႏ၊ အကျင်ꩻသိက္ခာႏ၊ သမာႏဓိ'ယိုငတ်ꩻပါꩻနဝ်ꩻ အဆင်းအရန်းထဲ့လ၊ ကွဲညည သူႏတောႏကောင်ꩻတရာꩻ ထိုꩻမားလို့စွဉ်ႏနောဝ်ꩻသွူ။ ကဿပဟွေး- ၁။ သတ္ထရိ သဂါရဝါ- ရိုႏသေႏလွ ဗွေႏဘုရာꩻဖုံႏ။ ၂။ ဓမ္မေ သဂါရဝါ- ရိုႏသေႏလွ တရာꩻဖုံႏ။ ၃။ သံဃေ သဂါရဝါ- ရိုႏသေႏလွ သံႏဃာႏဖုံႏ။ ၄။ သိက္ခာယ သဂါရဝါ- ရိုႏသေႏလွ အကျင်ꩻသိက္ခာႏဖုံႏ။ ၅။ သမာဓိသ္မိံ သဂါရဝါ- ရိုႏသေႏလွ သမာႏဓိဖုံႏ။ ကရိုႏသေႏလွ 'ဘုရာꩻ၊ တရာꩻ၊ သံဃာႏ၊ အကျင်ꩻသိက္ခာႏ၊ သမာႏဓိ'ယိုငတ်ꩻပါꩻနဝ်ꩻ သူႏတောႏကောင်ꩻတရာꩻ တဉ်ႏခွေါင်အီတာႏဒျာႏ၊ လေလင်းအီတာႏဒျာႏ၊ ဖေႏကတွမ်ႏထိုꩻမားမွုန်းတာႏဒျာႏနောဝ်ꩻသွူ။ (သုတ္တန်ႏပိဋကတ်၊ နိဒါနဝဂ္ဂသံယုတ်ပါဠိ၊ သဒ္ဓမ္မပ္ပဋိပရူပကသုတ်)