ပျောႏတဝ်းမဉ်ထွက်ထာꩻ
"အရတီသုတ် (ပျောႏတဝ်းမဉ်ထွက်ထာꩻ၊ အားထွုတ်တရာꩻ ထွာရဟန္တာႏ)"
အွိုးခꩻတလဲင်ႏ- ဗွေႏဝင်္ဂီသနဝ်ꩻ တွမ်ႏဥပဇ္ဈာယ်ႏဆရာႏ အုံညီꩻလို့ဝင်ꩻ အာဠဝီႏခမ်း "အဂ္ဂါဠဝ"ကျောင်ꩻစေႏတီႏကိုꩻ ဝွေꩻဗွေႏ ဥပဇ္ဈာယ်ႏဆရာႏနဝ်ꩻ အမဉ်ꩻတောႏဟဲ့ꩻ "နိဂြောဓကပ္ပ"၊ ဥပဇ္ဈာယ်ႏဆရာႏနဝ်ꩻ အုံခွꩻဒျာႏထာꩻ၊ တွုံꩻသွမ်ꩻ၊ သွုံꩻသွမ်ꩻထွူ သဲင်ꩻအုံကျောင်ꩻကို၊ ပေါႏမွူးဟာတန် ထန်ႏကျောင်ꩻ ထောင်တဖူꩻ၊ မွူးရောဝ်ꩻခိုႏ ထန်ႏတွုံꩻသွမ်ꩻအဝ်ႏနုဲင်းနဝ်ꩻလွုမ်ꩻသွူ။ ဗွေႏဝင်္ဂီသနဝ်ꩻ မဲ့အာႏရွုံႏလောႏ အုံထာꩻပျောႏတဝ်း၊ ရာႏဂနိစ္စက် ဝွေꩻမဉ်ထွက်ထာꩻ၊ နဝ်ꩻမꩻ ဝွေꩻယူႏစဉ်ꩻစာꩻနုဲင်းယို- "ခွေအုံထာꩻပျောႏတဝ်း အဝ်ႏမဉ်ထွက်စွဉ်ႏထာꩻတန်နဲ၊ ခွေယို 'ထွာသွူလိုꩻတဲ့ အငိုꩻတတန်ႏတောဝ်း၊ ခွေယို ထွာသွူလိုꩻတဲ့ အကျိုꩻတဗန်တဝ်း၊ ထွာရဟန်ꩻတဲ့ သင်္ကန်ꩻငိုꩻတကေႏတဝ်း၊ ထွာစင်ꩻတဲ့ အရင်ꩻသွုမ်ꩻမွိုင်းဒျာႏ၊ ခွေအီႏမာꩻဗာႏနုဲင်းမုဲင်ꩻနော"။ ဖေႏကနွောင်ꩻခွေသꩻ၊ ကအီႏဆွုံꩻမꩻနွောင်ꩻခွေနဝ်ꩻ ပါꩻမုဲင်ꩻအဝ်ႏနဲ၊ 'အဝ်ႏဗွေႏဘုရာꩻလွုမ်ꩻ၊ ဗွေႏဘုရာꩻဆွုံꩻမꩻနုဲင်းမုဲင်ꩻနဲတဲင်- - သဗ္ဗပါပဿ အကရဏံ - မာꩻမွုန်း အကုသိုလ်ႏ - ကုသလဿ ဥပသမ္ပဒါ - မာꩻဒျာႏသွော့ ကုသိုလ်ႏ - သစိတ္တပရိယောဒါပနံ - မာꩻဗွာဗွာသွော့သꩻ-တဲ့' ခွေသꩻယိုခါခါနဝ်ꩻ- ကိလေႏသာႏ တဏှာႏရာႏဂ နိစ္စက်နဝ်ꩻမꩻတဲင် ခွေမဉ်ထွက်ထာꩻ၊ ကနွောင်ꩻဒါႏ ကိလေႏသာႏရာႏဂနဝ်ꩻ အဝ်ႏတရာꩻလွုမ်ꩻ၊ 'ခွေသꩻခွေကမ်း-ခွေနမ်းခွေထိန်ꩻကမꩻ' ချꩻသꩻနုဲင်းနဝ်ꩻတဲင် ဗွေႏဝင်္ဂီသနဝ်ꩻ အားထွုတ်မွေးစွဉ်ႏတရာꩻ၊ အားထွုတ်စစနဝ်ꩻ သꩻစွူတဝ်းတစိꩻစိꩻ၊ 'အဓမ္မဝိတက္က-အမျိုꩻတယူႏတဝ်းဖုံႏနဝ်ꩻ သꩻလွေꩻကွိုက်ꩻမုဲင်ꩻခါမကောင် သေတဝ်း၊ ထင်ႏအွဉ်ႏသတိꩻနဝ်ꩻ သꩻရွိုင်ꩻတကြောက် လွေꩻအံႏသောက်လဲဉ်းထာꩻ အာႏရွုံႏခြာ။ တဲ့ယောဝ်း အွဉ်ႏသꩻခိꩻခိꩻ၊ အွဉ်ႏသတိꩻတိꩻ၊ တနီꩻတစိꩻစိꩻ သꩻယေန်ႏလွဉ်ဗာႏငါႏမတောဝ်၊ သꩻလိုꩻပေါႏဗာႏငါႏငါႏနေနေမတောဝ်၊ အွဉ်ႏဟောဝ်ဟောဝ်နမ်း၊ ကမ်းဟောဝ်ဟောဝ်သꩻ၊ ထွိုင်ႏမဉ်လꩻထာꩻဟောဝ်၊ ထွိုင်ႏကျိုꩻစာꩻမွေးနဝ်ꩻ "ထွာစွဉ်ႏဒျာႏ ရဟန္တာႏ"တပါꩻနောဝ်ꩻသွူႏ တွိုႏနဝ်ꩻမꩻ ဝွေꩻဗွေႏရိုꩻ- "ထိန်ꩻလꩻ သꩻမဉ်ထွက်ထာꩻ၊ ထိန်ꩻလꩻ အာႏရွုံႏငတ်ꩻပါꩻ၊ စူꩻတဝ်းသꩻတဏှာႏ၊ လွောက်ꩻတောဝ်း ကိလေႏသာႏအလိုႏ၊ ပုဂ္ဂိုလ်ႏနဝ်ꩻစားနဝ်ꩻ ဟဲ့ꩻ"ဘိက္ခု"။ (ဟဲ့ꩻရဟန်ꩻ)နောဝ်ꩻသွူ။ မဉ်တရေꩻနုဲင်းမုဲင်ꩻတရေꩻ၊ တရေꩻမို့ꩻလောင်းတဲ့ယဝ်း၊ တရေꩻဟံႏလောင်းတဲ့ယဝ်း၊ တရေꩻဟံႏကိုတဲ့ယဝ်း၊ တရေꩻထီကိုတဲ့ယဝ်း၊ တရေꩻမုဲင်ꩻကိုတဲ့ယဝ်း ထာꩻတရေꩻ အနာလွိုနဝ်ꩻ ထွာထာꩻတကုဲင်လွဉ်းလွဉ်း၊ ထာꩻတရေꩻ တဖူꩻသွတ်ꩻသူꩻနဝ်ꩻ အနိစ္စလွဉ်းလွဉ်း၊ အကုဲင်လွဉ်းလွဉ်း၊ အပြုဲင်လွဉ်းလွဉ်း၊ တကုဲင်နွောင်ꩻတဝ်း၊ တပြုဲင်နွောင်ꩻတဝ်းနဝ်ꩻ အဝ်ႏဒျာႏ 'နိဗ္ဗာန၊ သန္တိသုခ'နောဝ်ꩻလွုမ်ꩻသွူ။ (သုတ္တန်ႏပိဋကတ်၊ သဂါထာဝဂ္ဂသံယုတ်ပါဠိ၊ အရတီသုတ်) လိုꩻတွိုင်ꩻဖေႏနေး ကသေနာႏ တဲမ်းဗာႏနုဲင်းယိုသွူ။ [၁][၂]