ပွိုက်သေလစ်ꩻမျိုꩻ-ဆွုံꩻမꩻလိုꩻ

"ကေသိသုတ် (ပွိုက်သေလစ်ꩻမျိုꩻ-ဆွုံꩻမꩻလိုꩻလစ်ꩻစား)" ဆရာႏ'ကေသိ'တဖြာꩻ၊ ထင်းထေ့နီဗွေႏဘုရာꩻ၊ ဝုဲင်ႏဘုရꩻထွူခါ နီဗွေႏဘုရာꩻရီနုဲင်းယို- "တကာႏကေသိ- နာꩻနဝ်ꩻ ပွိုက်သေယံငါႏ ဆရာႏမဉ်ꩻတန်တဖြာꩻ၊ နာꩻပွိုက်သေဖုံႏနဝ်ꩻ နꩻမာꩻနုဲင်းမုဲင်ꩻဟောင်း" "ဩဗွေႏ ဘုရာꩻမျတ်ဗွေႏဩ- သေဖုံႏနဝ်ꩻ နေးတွမ်ႏအနယ်ꩻချော်ꩻ ပွိုက်တဲ့အဝ်ႏ၊ နေးတွမ်ႏအနယ်ꩻကျံꩻ ပွိုက်တဲ့အဝ်ႏ၊ နေးတွမ်ႏအနယ်ꩻချော်ꩻခါႏခါႏ၊ နေးတွမ်ႏအနယ်ꩻကျံꩻခါႏခါႏ၊ အကျံꩻအချော်ꩻရော်ꩻဝင်ꩻ ပွိုက်ဗာႏတဲ့ အဝ်ႏဗွေႏဩ" "တကာႏကေသိဟွေး- မွေးသွူ၊ နေးတွမ်ႏအနယ်ꩻကျံꩻ အနယ်ꩻချော်ꩻရော်ꩻဝင်ꩻ ပွိုက်သွူတဲ့ မဉ်ႏတလꩻတဝ်း၊ မဉ်ႏတငဲးတဝ်းနဝ်ꩻ နာꩻမာꩻနုဲင်းမုဲင်ꩻအီ" "ဩဗွေႏ- သေရွိုင်ꩻနဝ်ꩻနဗာႏနဝ်ꩻ မာꩻသီထိုꩻစွဉ်ႏ ဗွေႏဩ" "ကွပ်ပွိုးထမုဲင်ꩻ မမာꩻသီထိုꩻတွိုးဟောင်း" "ပေါႏတမာꩻသီထိုꩻတဝ်းတဲ့ 'ဆရာႏမဉ်ꩻကုဲင်ထိုꩻ'သနယ်ဗွေႏ၊ ခံႏတောဝ်းမဉ်ꩻကုဲင်မꩻ မာꩻသီထိုꩻဗာႏ သေရွိုင်ꩻနဝ်ꩻ ဗွေႏဩ" "ဩဗွေႏ ဘုရာꩻမျတ်ဗွေႏဩ- နီဗွေႏနဝ်ꩻ 'အနုတ္တရော ပုရိသဒမ္မသာရထိ-ဆွုံꩻမꩻသင်ꩻသား၊ ကားသတ္တဝါႏ၊ ဆွုံꩻမꩻဒါႏငါႏ'ကရိုꩻနဝ်ꩻ လိုꩻခမ်း၊ လူꩻခမ်း၊ ဗျဟ္မာႏခမ်း ကျောႏစွစ်ꩻစဲစ်ꩻလို့တဲင် နီဗွေႏဘုရာꩻ မာꩻနုဲင်းမုဲင်ꩻ ဆွုံꩻမꩻဗွေႏဩ" "တကာႏကေသိဟွေး- 'နေးတွမ်ႏနယ်ꩻချော်ꩻဆွုံꩻမꩻ၊ ဆွုံꩻမꩻနုဲင်းမုဲင်ꩻနဲတဲင် ယိုနဝ်ꩻ 'ကာယသုစရဲက်၊ ဝစီသုစရဲက်၊ မနော်ꩻသုစရဲက်၊ ပေါႏနမ်းဖြောင်းသꩻ အကျင်ꩻဟောဝ်နဝ်ꩻ လꩻအကျိုꩻချမ်ꩻသာႏ၊ လꩻလိုꩻချမ်ꩻသာႏ၊ လꩻလူꩻချမ်ꩻသာႏ'ဆွုံꩻမꩻနုဲင်းနဝ်ꩻ။ 'နေးတွမ်ႏအနယ်ꩻကျံꩻဆွုံꩻမꩻ'၊ ဆွုံꩻမꩻနုဲင်းမုဲင်ꩻနဲတဲင် ယိုနဝ်ꩻ 'ကာယဒုစရဲက်၊ ဝစီဒုစရဲက်၊ မနော်ဒုစရဲက်၊ ပေါႏနမ်းဖြောင်းသꩻ အကျင်ꩻကုဲင်ထိုꩻနဝ်ꩻ မော့ꩻးဗာႏထာꩻဒုက္ခ၊ ထဲ့ဒါႏငါးရုဲင်ꩻ၊ ထွာဒျာႏတိရစ္ဆာန်ႏ၊ ထွာဒါႏပိတ္တာႏ'ဆွုံꩻမꩻနုဲင်းနဝ်ꩻ။ 'နေးတွမ်ႏအနယ်ꩻကျံꩻအချော်ꩻ ရော်ꩻဝင်ꩻဆွုံꩻမꩻ'၊ ဆွုံꩻမꩻနုဲင်းမုဲင်ꩻနဲတဲင် 'ပေါႏမာꩻအကုဲင်ဒုစရဲက်တဲ့-ဒုက္ခ၊ ပေါႏမာꩻအဟောဝ်သုစရဲက်တဲ့-ချမ်ꩻသာႏ'ဆွုံꩻမꩻနုဲင်းနောဝ်ꩻသွူ။ "နေးတွမ်ႏ အချော်ꩻအကျံꩻ မဉ်ႏတလꩻတဝ်းနဝ်ꩻ နီဗွေႏမာꩻနုဲင်းမုဲင်ꩻအီ" "ခွေမာꩻသီထိုꩻစွဉ်ႏ" "နီဗွေႏသီးနဝ်ꩻ မာꩻသီဝင်ꩻသက်ဒါႏတဝ်း မွေးတောဝ်းနဲ့အော်" "မာꩻသီ-ကရိုꩻနဝ်ꩻ ထွားလွိုထိုꩻဝွေꩻ၊ ဆွုံꩻမꩻတဝ်းဒွုမ်ဝွေꩻ၊ အွဉ်ႏစွꩻစူထိုꩻဝွေꩻနုဲင်းနဝ်ꩻဒျာႏ" ပေါႏဗွေႏဘုရာꩻ အွဉ်ႏစွꩻစူသွူနဝ်ꩻ ပါꩻနဝ်ꩻနဝ်ꩻ သွꩻခွခြောကင်ꩻ အဝ်ႏလွင်ꩻစွဉ်ႏထာꩻ၊ တွမ်ႏပါꩻလိုꩻသီနဝ်ꩻ ဗွန်ပီစွဉ်ႏလို့ဝင်ꩻနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ စတုက္ကနိပါတ်၊ ကေသိသုတ်)