ဖရုသဝါစာဝေရမဏိ

အဝ်ႏ ဝီခီပီးဒီးယား ကို

ဗွောင်နယ်ဖရုသဝါစာ ဝေရမဏိခရာႏ[မွဉ်းဖျင် | မွဉ်းဖျင်အရွီးခိုႏ]

  • ဖရုသ - ကျံꩻထံꩻနုဲင်းရွာꩻသို
  • ဝါစာ - ငေါဝ်း
  • ဖရုသဝါစာ - ငေါဝ်းကျံꩻထံꩻနုဲင်းရွာꩻသို။

"ဖရုသဝါစာ - ငေါဝ်းကျံꩻထံꩻနုဲင်းရွာꩻသို"ကရိုꩻနဝ်ꩻ-[မွဉ်းဖျင် | မွဉ်းဖျင်အရွီးခိုႏ]

သꩻလျားဝင်ꩻတဲင် "မုတ်ဆိုꩻမျိုꩻတန်နောဝ်ꩻ၊ လိုꩻလို့အေႏသားတန်နောဝ်ꩻ၊ ထာꩻကွီအံႏသားခွိုꩻတန်နောဝ်ꩻ၊ နာꩻအံႏပါꩻအေႏနောဝ်ꩻ၊ နာꩻဒါႏကွို့ꩻ လို့ဖေႏဝင်ꩻအေႏလွုမ်ꩻ၊ လိုꩻတွတ်ꩻဟွေႏနုဲင်းနာꩻနဝ်ꩻ၊ ပါꩻကတူႏပိုမ်တန်နဝ်ꩻ၊ နာꩻယို ထာꩻသူႏသေအဲဉ်ထောဝ်း၊ ကယ်ꩻစွဉ်ႏဖိုးပနားဟနော၊ နာꩻအပဲစ်တန်မွေးစွဉ်ႏထာꩻ ကယ်ꩻစွဉ်ႏဒေႏဝဒတ်၊ ထွီႏမွူးတန်နဝ်ꩻ"စတဲင် ငေါဝ်းကျံꩻထံꩻခတ်ꩻနား၊ ငေါဝ်းလျားဆာသꩻ၊ ငေါဝ်းခွန်းကဲဉ်းဖုံႏနောဝ်ꩻ ထွာဖရုသဝါစာ (အကုသိုလ်ႏကံႏလွဉ်းလွဉ်း)နောဝ်ꩻသွူ။

"ဝေရမဏိ"- "သျောင်ႏထိုꩻ (ဒေါ့ꩻရိုꩻတဝ်း)ငေါဝ်းကျံꩻထံꩻ"ကရိုꩻနောဝ်ꩻ-[မွဉ်းဖျင် | မွဉ်းဖျင်အရွီးခိုႏ]

နမ်း(ကိုႏတဲင်ႏ)တဲ့ တခွန်းတဝ်း၊ တဒေါ့ꩻတဝ်း ငေါဝ်းကျံꩻထံꩻ၊ ဝင်ꩻတဲ့ ဝွေꩻတထွဉ်ႏခွန်းတဝ်း၊ တထွဉ်ႏဒေါ့ꩻတဝ်း ငေါဝ်းကျံꩻထံꩻ၊ မဉ်ႏသမဉ်ႏဟွိုန် ဝင်ꩻခွန်းဝင်ꩻဒေါ့ꩻ ငေါဝ်းကျံꩻထံꩻတဲ့ ဆီꩻခါꩻရဲခါꩻ၊ ဖေႏခွန်းတဝ်း၊ ဖေႏဒေါ့ꩻတဝ်း ငေါဝ်းကျံꩻထံꩻ၊ ခွန်းဝင်ꩻ၊ ဒေါ့ꩻဝင်ꩻ ငေါဝ်းကျံꩻထံꩻနုဲင်းနောဝ်ꩻနဝ်ꩻ သꩻရေꩻတဝ်း၊ သဖော်ꩻတူႏတဝ်း၊ နစ်သက်တဝ်း၊ ဟွိုန်ဟောဝ်တဝ်း၊ ကျွိုက်တဝ်း၊ ပေါႏခွန်းဝင်ꩻ၊ ပေါႏဒေါ့ꩻငေါဝ်းကျံꩻထံꩻနောဝ်ꩻ ခံႏဗာႏအပဲစ်နုဲင်းယိုနုဲင်းယို သွဉ်သင်ဆွုံꩻမꩻ ချꩻနားဖေႏဝင်ꩻ စတဲင်နုဲင်းနဝ်ꩻဖုံႏနဝ်ꩻ ထွာသျောင်ႏထိုꩻ (ထွာခွန်းတဝ်း၊ ဒေါ့ꩻတဝ်း ငေါဝ်းကျံꩻထံꩻ)နောဝ်ꩻသွူ။

ခွန်းဆာဝင်ꩻ၊ ဒေါ့ꩻရိုꩻငေါဝ်းကျံꩻထံꩻနဝ်ꩻ ဟောဝ်တဝ်း၊ ထွာဖရုသဝါစာဒုစရဲက်၊ ထွာအကျင်ꩻဟောဝ်တောဝ်း၊ ခွန်းဆာတဝ်းဝင်ꩻ၊ ဒေါ့ꩻရိုꩻတဝ်း ငေါဝ်းကျံꩻထံꩻနဝ်ꩻ ဟောဝ်၊ ထွာဖရုသဝါစာ ဝေရမဏမိသုစရဲက်၊ ထွာအကျင်ꩻဟောဝ်နောဝ်ꩻသွူ။

"ဟောဝ်တောဝ်းနုဲင်းမုဲင်ꩻ၊ ဟောဝ်နုဲင်းမုဲင်ꩻ"နဲတဲင်-[မွဉ်းဖျင် | မွဉ်းဖျင်အရွီးခိုႏ]

တွယ်ႏတွမ်ႏခွဉ်းနဝ်ꩻ ရိုꩻစွဉ်ႏဆာဆာတဲ့ တထွꩻတဝ်း ငေါဝ်းခွန်းဆာ။ ကွပ်နောဝ်ꩻမꩻ လိုꩻကခွန်းဆာဒါႏဝင်ꩻ၊ ကဒေါ့ꩻဒါႏဝင်ꩻငေါဝ်းကျံꩻထံꩻနဝ်ꩻ ဝင်ꩻလွꩻထီႏအာ၊ ဝင်ꩻစင်ꩻသားအာ၊ ရန်ႏသူႏအာ၊ သွꩻခွဆေ့ꩻ၊ ဂုဏ်ႏသိက္ခာႏအဲဉ်ထဝ်း၊ ဝင်ꩻကေႏညိုႏတောဝ်း၊ ဝင်ꩻထီႏဖွီ၊ ထွာနွောင်ꩻတဝ်းလိုꩻတန်၊ မဉ်ႏထွာနွိုင်ႏစိန်ႏစွော့ꩻ လိုꩻတန်တဲ့ သက်တဆွာꩻတဝ်း၊ ကွပ်ငေါဝ်း၊ ကွပ်ထာꩻဒေါ့ꩻတဲင် မော့ꩻအီဒါႏ ထာꩻဒုက္ခ။ အွဉ်ခွုမ် အွဉ်မာꩻစွဉ်ႏ ကိစ္စအမျိုꩻမုဲင်ꩻတရိုꩻတဝ်း ဝင်ꩻဖြွမ်းသားဆေ့ꩻ၊ ထာꩻမာꩻအောင်ႏမျင်ႏနွောင်ꩻတဝ်း၊ ဝင်ꩻလွꩻဒေါ့ꩻရီအာ၊ ကိစ္စအရေꩻတန်စွဉ်ႏတဲ့ ဝင်ꩻတတွိုင်ႏပင်ႏကြွို့ꩻတောဝ်း၊ မော့ꩻသွူအယပ်ꩻအခုဲင်ႏတဲ့ ထာꩻဒုက္ခတဲ့ ဝင်ꩻတထွားတဝ်း၊ ဝင်ꩻတသညင်ꩻတဝ်း၊ ကထွာဒါႏ အမွိုးအဖါ၊ အပိုအလီꩻ၊ အသွꩻအခွဖုံႏနောဝ်ꩻတဲ့ ခိုးလျားလွဉ်ꩻအီဒါႏ၊ မဲ့ငါပေႏအီဒါႏ၊ တွိုႏဘဝငါသူꩻတဲ့ လင်ꩻထဲ့ဗာႏငါးရုဲင်ꩻ၊ မော့ꩻဗာႏ(ခံႏဗာႏ)စတဲင်နုဲင်းနောဝ်ꩻသွူ။ ကွပ်နောဝ်ꩻမꩻ ခွန်းဆာဝင်ꩻ၊ ဒေါ့ꩻရိုꩻ ငေါဝ်းကျံꩻထံꩻနောဝ်ꩻ ဟောဝ်တောဝ်းနောဝ်ꩻသွူ။

မဉ်ႏခွန်းဆာတဝ်းဝင်ꩻ၊ မဉ်ႏဒေါ့ꩻရိုꩻတဝ်း ငေါဝ်းကျံꩻထံꩻနောဝ်ꩻ ဝင်ꩻလွꩻထီႏတဝ်း၊ ဝင်ꩻဟွိုန်ဟောဝ်သား၊ ဝင်ꩻရက်သားအာ၊ ရန်ႏသူႏအဲဉ်ထဝ်း၊ သွꩻခွအာ၊ ဂုဏ်ႏသိက္ခာႏအောဝ်ႏ၊ ဝင်ꩻကေႏညိုႏ၊ ဝင်ꩻထီႏဖွီတောဝ်း၊ ထွာနွောင်ꩻလိုꩻတန်၊ ကွပ်ငေါဝ်း၊ ကွပ်ထာꩻဒေါ့ꩻတဲင် မော့ꩻအီဗာႏတဝ်း ထာꩻဒုက္ခ။ အွဉ်ခွုမ် အွဉ်မာꩻစွဉ်ႏ ကိစ္စအမျိုꩻမုဲင်ꩻတရိုꩻတောဝ်း ဝင်ꩻဖြွမ်းသားအာ၊ ထာꩻမာꩻအောင်ႏမျင်ႏနွောင်ꩻ၊ ဝင်ꩻမဉ်ဒေါ့ꩻရီအာ၊ ကိစ္စအရေꩻတန်အမျိုꩻမုဲင်ꩻတဲ့ ဝင်ꩻတွိုင်ႏပင်ႏ၊ မဉ်ႏမော့ꩻ အယပ်ꩻအခုဲင်ႏ ထာꩻဒုက္ခတဲ့ ဝင်ꩻထွားဝင်ꩻစွဲကို၊ ဝင်ꩻသညင်ꩻ၊ ကထွာဒါႏ အမွိုးအဖါ၊ အပိုအလီꩻ အသွꩻအခွဖုံႏနောဝ်ꩻတဲ့ ခိုးလျားလွဉ်ꩻအီဗာႏတဝ်း၊ မဲ့ငါပေႏလွဉ်ꩻအီဗာႏတဝ်း၊ တွိုႏဘဝငါသူꩻတဲ့ လင်ꩻထဲ့ဗာႏတဝ်းငါးရုဲင်ꩻ၊ မော့ꩻဗာႏတဝ်း (ခံႏဗာႏတောဝ်း) စတဲင်နုဲင်းနောဝ်ꩻသွူ။

နောဝ်ꩻလွုမ်ꩻတကာႏတဝ်း ကွပ်ခွန်းဆာတဝ်းဝင်ꩻ၊ ဒေါ့ꩻရိုꩻတဝ်း ငေါဝ်းကျံꩻထံꩻတဲင် ကခံႏစာꩻဗာႏ အကျိုꩻဖုံႏနဝ်ꩻ- ၁။ တွိုႏထင်ႏဗာႏ လူꩻအခမ်း ၂။ ယံမျတ်လဲဉ်းက လိုꩻလင် ၃။ တိန်ႏတွိုႏသဲင်ꩻယင်း လိုꩻခမ်းတဲ့ ထွာဗာႏခွန်စက်ျာႏ ၄။ ဖြေꩻဖါး ပနဲဉ်ႏဖဲ့ပေႏ ၅။ ငေါဝ်းတဲ့ အွီႏတလေ့ ၆။ ဒေါ့ꩻထာꩻတဲ့ ဝင်ꩻယွုမ်း- စတဲင်နုဲင်းနောဝ်ꩻဖုံႏသွူ။ ကွပ်နောဝ်ꩻမꩻ ခွန်းဆာတောဝ်းဝင်ꩻ၊ ဒေါ့ꩻရိုꩻတောဝ်း ငေါဝ်းကျံꩻထံꩻနောဝ်ꩻ ဟောဝ်ငါႏမရေႏမရာာႏနောဝ်ꩻသွူ။

"ဖရုသဝါစာ အင်္ဂါႏ ၃-ပါꩻ"[မွဉ်းဖျင် | မွဉ်းဖျင်အရွီးခိုႏ]

(ခွန်းဒေါ့ꩻ ငေါဝ်းကျံꩻထံꩻ အချက် ၃-ချက်)

  1. ခံႏဗာႏ ငေါဝ်းခွန်းသား (ဖေႏကအောဝ်ႏ)
  2. သꩻတဲ့လျား
  3. ခွန်းတဲ့ခွန်း

အင်္ဂါႏယို ၃-ပါꩻ မဉ်ႏပြဲ့ꩻစွုံႏလို့မꩻ (အချက်ယို ၃-ချက်မဉ်ႏမဲဉ်ႏတနꩻသော့ꩻလို့မꩻ) ထွာ ဖရုသဝါစာ အကုသိုလ်ႏကံႏနောဝ်ꩻသွူ။

ကဗျာလင်္ကာႏ[မွဉ်းဖျင် | မွဉ်းဖျင်အရွီးခိုႏ]

  • ခွန်းဒေါ့ꩻငေါဝ်းကျံꩻ - တရံꩻလွဉ်ꩻမာႏ
  • နုဲင်းနောဝ်ꩻမာꩻမွိုန်း - မဉ်ႏယွိုန်းနောဝ်ꩻရာꩻ
  • အကျင်ꩻဟဝ်မျတ် - စွုမ်ႏဇာတ်ချမ်ꩻသာာႏ
  • လိုꩻတဗွီႏ - မဉ်ꩻအွီႏ ယံငါငါ။

ကဗျာယို မဉ်ႏပြန်ႏငေါဝ်းရိုꩻရိုꩻနောဝ်ꩻ- ခွန်းဝင်ꩻ၊ ဒေါ့ꩻဝင်ꩻ တွမ်ႏငေါဝ်းကျံꩻထံꩻ၊ ရိုꩻတရံꩻတရိမ်ꩻဝင်ꩻ၊ ဖြောင်းလွဉ်ꩻမာႏနုဲင်းနဝ်ꩻနဝ်ꩻ တွမ်ႏမာꩻမွိုန်း၊ မဉ်ႏယွိုန်းထိုꩻနောဝ်ꩻ ထွာအကျင်ꩻဟဝ်၊ ထွာအကျင်ꩻမျတ် (ကွပ်အကျင်ꩻဟဝ်၊ အကျင်ꩻမျတ်တဲင်) ချမ်ꩻသာႏဗာႏ စွုမ်ႏဇာတ်ဇာတ်၊ စွုမ်ႏပန်ပန်၊ ထွာလိုꩻယေန်ႏကေႏ၊ ထွာလိုꩻတဗွီႏပေႏတဲင် မဉ်ꩻအွီႏလွီးဟွမ်တွော့ꩻ ယံလွေꩻတငါငါစွဉ်ႏနောဝ်ꩻသွူ။[၁]

ဗွောင်နယ်သမ်းထဲင်း[မွဉ်းဖျင် | မွဉ်းဖျင်အရွီးခိုႏ]

လိုꩻနီသွဉ်းသီးဒုံနဝ်ꩻ ပါꩻကမဉ်ꩻ မောင်ႏလွင်ꩻတွမ်ႏမောင်ႏသွင်ႏနဝ်ꩻ တဖူးဝေးလို့ဝင်ꩻ၊ (မောင်ႏလွင်ꩻနဝ်ꩻ ခိန်ႏထင်ႏကျောင်ꩻတဲ့ လယ်ႏလွင်ꩻမွိုင်းဒျာႏထာꩻ၊ မွိုးငေါဝ်းအွဉ်ႏချာ-ဖါငဝ်းအွဉ်ႏပြာႏ၊ ဆရာႏငေါဝ်းဝန်ႏထိုꩻ၊ ရိုꩻဗာႏလိုꩻမွိုက်တန်၊ ထီႏမွိုးတဲ့ ခွန်းဆာ၊ ထီႏဖါတဲ့ ခွန်းဒျာႏ၊ ထီႏဆရာႏတဲ့ ခွန်းကဲန်း၊ သွꩻပေႏထဲင်းက ဒေါ့ꩻခရာႏအဲန်ထဝ်းဒွုမ်၊ မဲန်ရိုꩻဝင်ꩻနုဲင်းမုဲင်ꩻတဲ့ ရိုꩻဒျာႏ၊ မဲန်ခွန်းဝင်ꩻနုဲင်းမုဲင်ꩻတဲ့ခွန်းဒျာႏ၊ ခွန်းဆွစ်ꩻဒါႏဝင်ꩻ၊ ကွပ်နဝ်ꩻမꩻ မောင်ႏလွင်ꩻနဝ်ꩻ သွꩻပေႏဆေ့ꩻခြေားတန်၊ ဝင်ꩻလွꩻထီႏမွေးစွဉ်ႏဝွေꩻ။) (အဖူးမောင်ႏသွင်ႏနဝ်ꩻတဲ့ လိန်ႏမာႏနာႏ၊ လယ်ႏလွင်ꩻဒါႏတဝ်းထာꩻ၊ ခိန်ႏထင်ႏကျောင်ꩻ၊ ခိန်ႏသွဉ်လိတ်တဲ့ ပါသေႏသေႏဒျာႏ၊ မွိုးဖါငေါဝ်းတဲ့နာႏ၊ ဆရာႏငေါဝ်းတဲ့နေး၊ ထီႏမွိုးဖါတဲ့ အံႏသွင်ꩻရိုႏသေႏဒျာႏ၊ ထီႏသွꩻပေႏ ခွပေႏတဲ့ရက်၊ ခွဲမုဲင်ꩻကိုတဲ့ စွော့ꩻတက်သေႏသေႏ၊ ရိုꩻတငီႏတငါဒါႏတဝ်းဝင်ꩻ၊ ခွန်းတငီႏတငါဒါႏတဝ်းဝင်ꩻ၊ လိုꩻသွင်ႏတန်၊ လိုꩻပရီႏပရာႏတန်၊ ပေႏတန်ဖြားဆား ကားကအဝ်ႏ ရက်မွေးစွဉ်ႏဝွေꩻ။)

ဟန်ႏသနီꩻယို နီလွေꩻမာꩻသိုႏကျောင်ꩻ၊ လောတဆွိုင်ꩻနဝ်ꩻ မောင်ႏလွင်ꩻတွမ်ႏ မောင်ႏသွင်ႏနဝ်ꩻ ထိုမ်းညီꩻလို့ဝင်ꩻ လောတဆွိုင်ꩻချင်ႏ၊ မောင်ႏလွင်ꩻနဝ်ꩻ ဝါးကျွားမွေးစွည်ႏလေား၊ ဖိုးအဝ်ႏလောႏသွူတဲ့ အဝ်ႏတွယ်ႏတိက်ꩻတိက်ꩻဖိုး၊ အဖူးမောင်ႏသွင်ႏရိုꩻ "ဝါးယွယွငါ"တဲ့ တနာႏတဝ်း၊ ခွန်းထဲင်းအဖူး။ လောႏလင်ꩻကောင် ဖိုးအဝ်ႏလောႏသွူတဲ့ တွယ်ႏတိက်ꩻတိက်ꩻဖိုးတဲင် ဖိုးတဲ့ မာꩻစွဉ်ႏအသꩻ၊ တခိုတ်တငီႏတငါတောစွဉ်ႏထာꩻတွော့ꩻ လောမောက်တောစွဉ်ႏဒျာႏ၊ ဝွေꩻသီးတဖူးဝေးတဲ့ ထဲ့စွဉ်ႏလော၊ ကားကားနဲ့ꩻ လေားအဝ်ႏလွေꩻတွင်ꩻ၊ လောခြေင်လွုမ်ꩻတွော့ꩻ မောင်ႏလွင်ꩻနဝ်ꩻ လောတေင်ဗာႏအကီႏတဲ့ အဆွတ်ꩻထို့တဝ်း၊ ကွဲႏတွော့ꩻ အဆာတန်ပသာႏတန်၊ အဖြောင်းလင်ꩻတမောက်ꩻဟံႏတဲင် အတငါ အော့ꩻထိုꩻစွဉ်ႏနီဗီႏ၊ မောင်ႏသွင်ႏနဝ်ꩻတဲး စူလောင်ꩻခင်ႏလောင်ꩻ ကဲင်ပသာႏနေးလွုမ်ꩻ။

နီလိုꩻစွိုꩻ ကတိန်ႏလွေꩻထီႏ မောင်ႏသွင်ႏသီး ထဲ့လောတဲင် ခွေလောႏနာꩻလောႏ ပငါပရာꩻ၊ ကွဲႏတွော့ꩻ လောႏလွေꩻထေ့ဒျာႏ မောင်ႏသွင်ႏလွုမ်ꩻ၊ မောင်ႏလွင်ꩻထျꩻနဝ်ꩻ ပါꩻမုဲင်ꩻတဲ့ တလောႏထေ့တဝ်း၊ မောင်ႏသွင်ႏသီးလောနဝ်ꩻ နီဖျင်ဟဝ်ထွူတွော့ꩻ ထွန်းဖေတွမ်ႏမောင်ႏသေစ် ဝါးသဲင်ꩻချာ၊ ဒင်ႏသဲင်ꩻပါ မောင်ႏသွင်ႏ၊ ကထင်ႏထီႏ ဝင်ꩻဒင်ႏသဲင်ꩻ မောင်ႏသွင်ႏတဲင် မောင်ႏလွင်ꩻရိုꩻ "ဒင်ႏသဲင်ꩻပါခွေနယ်ႏ၊ ဒင်ႏသဲင်ꩻပါခွေယို"ရိုꩻသွူနုဲင်းနဝ်ꩻတဲ့ ဝွေꩻသီးတဒင်ႏတဝ်း၊ အမဲ့ငါပေႏမွေးစွဉ်ႏထာꩻ၊ တွိုႏသဲင်ꩻလမ်းတွော့ꩻ သဲင်ꩻဒေါ့ꩻနယ်အဖါ၊ မဉ်ႏကွပ်အဖါနဝ်ꩻ တလွေꩻဒင်ႏတဝ်း၊ အမွိုးနဝ်ꩻ ငွိုးငါးနေးစွဉ်ႏထာꩻ၊ ထွဉ်ႏအဝါꩻ လွေꩻဒင်ႏနဝ်ꩻမꩻ မောင်ႏလွင်ꩻ ဗꩻသဲင်ꩻယင်းလမ်း၊ တွိုႏသဲင်ꩻလမ်းတဲ့ ပါꩻတလွဉ်လယ်ႏတောဝ်း၊ တွိုႏမောင်ႏသွင်ႏနဝ်ꩻ ပါꩻလွဉ်လယ်ႏ တစွိုꩻထွူတစွိုꩻ၊ တဖြာꩻထွူတဖြာꩻစွဉ်ႏဒျာႏ၊ အီလွဉ်ပါထာꩻအံႏဖုံႏတဲင် မောင်ႏသွင်ႏအံႏလဲင်ꩻ တလို့ဒွုမ်၊ တွိုႏမောင်ႏလွင်ꩻနဝ်ꩻ မဲန်အံႏတဲ့ တအံႏဗာႏတဝ်းနုဲင်းဝင်ꩻ။

မောင်ႏလွင်ꩻနဝ်ꩻ ခံႏစာꩻဒျာႏ အထာꩻဆာတဖဲ့ꩻ၊ ဝင်ꩻသမ်းလွဉ်လယ်ႏတဝ်းတဖဲ့ꩻ၊ ထီႏဒျာႏဝင်ꩻလွဉ်လယ်ႏအဖူး၊ ထီႏဒျာႏဝင်ꩻလွဉ်ဖေႏ အဖူးထာꩻအံႏတဖဲ့ꩻ၊ ယူႏလꩻချာဒျာႏ ဝင်ꩻအွဉ်ႏပြာႏသေꩻ ဝွေꩻတခြာကိုတဲ့ꩻတဲင် အသꩻပေႏငါႏ မရေႏမရာႏတွော့ꩻ အဒွုတ်ꩻတေ့ꩻဗာႏစွဉ်ႏ အမဲ့ထီ။ (ပေါႏလိုꩻခွန်းဆာဒါႏဝင်ꩻ၊ ပေါႏလိုꩻရိုꩻဆွစ်ꩻဒါႏဝင်ꩻ၊ ပေါႏလိုꩻရိုꩻတငီႏတငါဒါႏဝင်ꩻ၊ ပေါႏလိုꩻဒေါ့ꩻ ငေါဝ်းကျံꩻထံꩻနဝ်ꩻတဲ ဝင်ꩻလွꩻထီႏရောင်၊ ဝင်ꩻလွꩻထွားရောင်၊ ဝင်ꩻတထွားတဝ်း၊ ဝင်ꩻတမာꩻသွꩻတောဝ်း၊ သွꩻခွခြေား မဲ့ငါပေႏ၊ ခိုးလျား ယပ်ꩻသေႏသေႏဗာႏ) ကရိုꩻနောဝ်ꩻ ယိုတလဲင်ႏတဲတဲ့ မောင်ႏလွင်ꩻတဖြာꩻအတွက်တာႏ တသာႏရနွုမ်ႏနာႏလဲဉ်း၊ လိန်ꩻဟမ်းပေါင်းဆိုမ်နေးထဲင်းမတဝ်း။

မောင်ႏလွင်ꩻ မောင်ႏသွင်ꩻသီးတဲ့ ဟဝ်လဲန်း၊ ဟန်ႏနီꩻယို ဆရာႏွဗောင်ချာသွူကျောင်ꩻ၊ ဟော- ဟန်ႏနီꩻယို မောင်ႏလွင်ꩻ ဖျော်ရီးရီးဝင်ꩻ။ "နာꩻကီႏနဝ်ꩻ ဟဝ်လဲန်းနဲ့ မောင်ႏလွင်ꩻ" "ဟဝ်လဲန်းသွူ ဆရာႏ၊ ဟဝ်လဲန်းသွူအော်" ဟော- ဟန်ႏနီꩻယို မောင်ႏလွင်ꩻ သေ"အော်"တခါႏခါႏဒါႏသွူ ဆရာႏ၊ နီဆရာႏတဲ့ ကထင်ႏထီႏ မောင်ႏလွင်ꩻ အခေႏနေႏပြောင်ꩻလုဲင်ႏထိုꩻ၊ ကထင်ႏဟွုန် မောင်ႏလွင်ꩻငဝ်းပနဲန်ႏထိုꩻနုဲင်းယိုတဲင် ငပယွုမ်းစွဉ်ႏဒျာႏထာꩻ။ "တပဲ့ꩻသီးဖုံႏဟွေး- ဆရာႏကအီႏသွဉ်ဖေႏ ဟန်ႏနီꩻယိုနဝ်ꩻ ဒုစရဲက်အမုဲင်သူ "ဖရုသဝါစာ-ခွန်းဒေါ့ꩻ ငေါဝ်းကျံꩻထံꩻ"ခရာႏ။

  • ဖရုသ- ကရိုꩻနဝ်ꩻ ကျံꩻထံꩻနုဲင်းရွာꩻသို၊ ကျံꩻထံꩻခတ်ꩻနား။
  • ဝါစာ- ကရိုꩻနောဝ်ꩻ ငေါဝ်း။
  • ဖရုသဝါစာ- ကရိုꩻနဝ်ꩻ ဒေါ့ꩻငေါဝ်းကျံꩻထံꩻနုဲင်းရွာꩻသို၊ ခွန်းငေါဝ်းကျံꩻထံꩻ နုဲင်းရွာꩻသို၊ ဒေါ့ꩻငေါဝ်းခတ်ꩻနားဝင်ꩻ၊ ခွန်းလျားဝင်ꩻ၊ ရိုꩻဆွစ်ꩻဝင်ꩻ အဓိပ္ပါယ်ႏရိုꩻနုဲင်းနဝ်ꩻသွူ။

ငေါဝ်းကျံꩻထံꩻနဝ်ꩻ လိုꩻတွမ်ႏရိုꩻမွုန်း တိရစ္ဆာန်ႏ' ဖိုးပနား' သေ' ဆင်' ထွီႏ'ညောႏ မဉ်ႏတဲ့ တကျွိုက်တဝ်း။ ကွပ်နဝ်ꩻမꩻ စာႏနာႏချာသွော့ နီနမ်းနုဲင်းယို- (ဝင်ꩻမဉ်ႏခွန်းကဲန်းနီတဲ့ ဆော့ꩻနီနား၊ ဝင်ꩻမဉ်ႏဒေါ့ꩻလျားနီတဲ့ ဆာနီသꩻ၊ နုဲင်းနဝ်ꩻနေနေ နီမဉ်ႏခွန်းကဲန်းဝင်ꩻတဲ့ ဆော့ꩻဝင်ꩻနား၊ နီမဉ်ႏဒေါ့ꩻလျားဝင်ꩻတဲ့ ဆာဝင်ꩻသꩻ၊ ကွပ်နဝ်ꩻမꩻ ခွန်းဆာမွုန်းဝင်ꩻ၊ ဒေါ့ꩻလျားမွုန်းဝင်ꩻ၊ ရိုꩻကဲန်းမွုန်းဝင်ꩻ၊ လိုꩻကခွန်းဆာဒါႏဝင်ꩻ၊ လိုꩻကဒေါ့ꩻလျားဒါႏဝင်ꩻ၊ လိုꩻကရိုꩻကဲန်းဒါႏဝင်ꩻနဝ်ꩻ ဘဝယိုခါတဲ့ ကွပ်စွဉ်ႏ မာꩻသျုက်ဝင်ꩻနား၊ မာꩻလျားဝင်ꩻသꩻတဲင် ဝင်ꩻတရက်တဝ်း၊ ဝင်ꩻတကူႏညီႏ စွဲးကိုတဝ်း။) (ခန္ဓာႏကုဲင်လီ မဉ်ႏသီသူꩻတဲ့ လင်ꩻထဲ့ဗာႏငါးရုဲင်ꩻ၊ ယဟန်ႏတဲ့ လွေꩻထွာဗာႏ ပိတ္တာႏ၊ မဉ်ႏလွေꩻထွာ ပိတ္တာႏသူꩻတဲ့ ကွပ်စွဉ်ႏငေါဝ်းကျမ်ꩻထံꩻပေႏအတွက်တဲင် လွေꩻအံႏဗာႏ အဝွေႏအဝက်၊ ခွဉ်ႏတန်ခွဉ်ႏပေႏ၊ သွီႏဝွေႏနုက်ခက်ꩻ-စတဲင်နုဲင်းနဝ်ꩻဖုံႏသွူ၊ ခွမ်ꩻလာꩻကွဉ်ကꩻဗာႏတဝ်း၊ ဒဲန်တဲ့ အံႏဗာႏတဝ်း၊ ထီတဲ့ အွꩻဗာႏတောဝ်း၊ ဒုက္ခမွေးစွဉ်ႏထာꩻ။) (တွိုႏတနီꩻခါ မဉ်ႏသဲင်ꩻထွာလိုꩻတဲ့ ဝင်ꩻတရက်တဝ်း၊ ငေါဝ်းတလေ့တဝ်း၊ သွꩻပေႏအဲန်ထဝ်း၊ ဒေါ့ꩻထာꩻတဲ့ တနွို့တဝ်းဝင်ꩻနား၊ အုံထာꩻခိုးလျားဗာႏသေႏသႏ၊ တန်ပေႏဖြားဆား လွꩻထွားလွꩻထီႏ ထွာဗာႏနုဲင်းနဝ်ꩻ။) ကွပ်နဝ်ꩻမꩻ "ဖရုသဝါစာ- ငေါဝ်းကျံꩻထံꩻ နုဲင်းရွာꩻသိုယို မူႏခိုပေႏတန် ယံဖေႏကတွမ်ႏဒေါ့ꩻမွုန်း၊ ယံဖေႏကတွမ်ႏခွန်းမွုန်း"တဲင် ဗွေႏစင်ꩻတဲမ်းဖေႏနီ ကဗျာနုဲင်းယို- + ခွန်းဒေါ့ꩻကျံꩻထံꩻ - တရံꩻလွဉ်ꩻမာႏ ငါးရုဲင်ꩻထဲ့ဗာႏ - ချမ်ꩻသာႏကင်ꩻညာꩻ သဲင်ꩻကွုတ်လိုꩻပို - ဝွေꩻယိုကျံꩻငါႏ ဒေါ့ꩻကျံꩻမွုန်း - မဉ်ႏယွုန်း ကျင်ꩻဟဝ်ထွာ။

ကဗျာယိုတပွုတ် မဉ်ႏပြန်ႏငေါဝ်းရိုꩻရိုꩻနောဝ်ꩻ-[မွဉ်းဖျင် | မွဉ်းဖျင်အရွီးခိုႏ]

(မဉ်ႏခွန်းဝင်ꩻ၊ မဉ်ႏဒေါ့ꩻဝင်ꩻ တွမ်ႏငေါဝ်းကျံꩻထံꩻ၊ ရိုꩻတရံꩻတရိမ်ꩻ၊ ရိုꩻတငီႏတငါဝင်ꩻ၊ ဖြောင်းမဉ်ႏလွဉ်ꩻ၊ မဉ်ႏခွန်းမဉ်ႏဒေါ့ꩻ၊ မဉ်ႏရိုꩻမာႏဝင်ꩻနုဲင်းနဝ်ꩻနဝ်ꩻ လင်ꩻထဲ့ဗာႏငါးရုဲင်ꩻ၊ မဉ်ႏလင်ꩻထဲ့ငါးရုဲင်ꩻ၊ မဉ်ႏလင်ꩻခံႏငါးရုဲင်ꩻသူꩻနဝ်ꩻ ထာꩻချမ်ꩻသာႏ အဲန်ထဝ်းတစိꩻစိꩻ၊ မဉ်ႏသဲင်ꩻကွုတ်ယင်း လိုꩻပိုတဲ့ ဝွေꩻယိုနဝ်ꩻ ငေါဝ်းကျံꩻထံꩻငါႏ (ထွာလိုꩻကျံꩻထံꩻတန်)၊ ကွပ်နဝ်ꩻမꩻ ခွန်းမွုန်းဒေါ့ꩻမွုန်း ငဝ်းကျံꩻထံꩻ၊ မဉ်ႏယွုန်းထိုꩻနဝ်ꩻ ထွာလိုꩻအကျင်ꩻဟဝ်) ပြန်ႏဗာႏနုဲင်းနဝ်ꩻ။ "တပဲ့ꩻသီးဖုံႏ ဖေႏကထွာ လိုꩻအကျင်ꩻဟဝ် ပငါပရာꩻ၊ ဖေႏနေးကထွာလိုꩻယံ ပငါပရာꩻနဝ်ꩻ ခွန်းဆားမွုန်းဝင်ꩻ၊ ဒေါ့ꩻလျားမွုန်းဝင်ꩻ၊ ရိုꩻကဲန်းမွုန်းဝင်ꩻနော" "မွေးဒျာႏ ဗွေႏအော်" "ယိုတလဲင်ႏတဲ့ အခိန်ႏလꩻလဲန်းတဲင် အုံပဆားဒွိုန်းက၊ မင်္ဂလာႏဒျာႏ တပဲ့ꩻဖုံႏ" "မင်္ဂလာႏဒျာႏ ဆရာႏဗွေႏအော်" တောင်ꩻသေꩻ-' မွိုးဖါသီး ကခွန်းပို၊ ဆရာႏသီးယို ကခွန်းဒါႏ တပဲ့ꩻဖုံႏနောဝ်ꩻ နေးတွမ်ႏမေတ္တာႏ စေႏတနာႏတဲင် သွဉ်သင်ဆွုံꩻမꩻဒျာႏ၊ ငေါဝ်းကျံꩻကီလဲ့ သꩻစေႏတနာႏ ကျံꩻတဝ်းတဲင် 'ဖရုသဝါစာ'ထွာတဝ်း။

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. သုစရဲက်ပါꩻဆီလိတ်စောင်ႏ၊ ပအိုဝ်ႏလိတ်လုဲင်ꩻစွစ်ꩻလီတာႏအစွိုꩻ