ဖိုးတီးသားဥပမာႏ

ဖိုးဖုံႏတရျာꩻ-လိုꩻတဖြာꩻ၊ လိုꩻဝါးလွေꩻမှဲꩻလဲ့ ဖိုးလွေꩻဗာႏ၊ အက်ခရာႏယံယူႏသေ၊ သꩻယံလေယံယူႏလꩻ၊ ပွိုးကဖိုးသီးနောဝ်ꩻ ငထောဝ်းဉာဏ်ႏပညာႏ၊ ထာꩻဒါႏဆေ့ꩻဆဲဉ်ခြော၊ တနှဲးတောဝ်းနောနီလိုꩻ၊ အာႏကွိုꩻနမ်းလဲ့ နွောင်ꩻတောဝ်းလိုꩻ၊ အာႏကွိုꩻခင်ႏလဲ့ နွောင်ꩻတောဝ်းလိုꩻ၊ အာႏကွိုꩻအာႏလဲ့ နွောင်ꩻတောဝ်းလိုꩻ၊ အာႏကွိုꩻစွဉ်ႏအမျိုꩻမှဲꩻလဲ့ နွောင်ꩻတောဝ်းလိုꩻခြေင်င်၊ ပွိုးနောဝ်ꩻမꩻ ဖိုးတီသားဝါးလွေꩻမှဲꩻလဲ့ လွေꩻဗာႏတေ့ꩻတေ့ꩻ၊ မဲဉ်လွေꩻတောဝ်းလဲ့ တလꩻတောဝ်း၊ ပွိုးငထောဝ်းပိညာႏရေꩻ၊ စိဉ်ꩻစာꩻတွေတွမ်ႏနီလိုꩻ၊ နီလဲ့ခိုႏ ဝင်ꩻလဲ့ခိုႏ၊ ဝင်ꩻထွဉ်ႏလွေꩻမှဲꩻလဲ့လွေꩻဗာႏ၊ ပွိုးဝင်ꩻနောဝ်ꩻ ပိညာႏအောဝ်ႏ၊ နီနောဝ်ꩻပိညာႏအဲဉ်ထောဝ်း၊ တွမ်ႏဖိုးနောဝ်ꩻဗိုန်ဝင်ꩻ၊ ပိညာႏသားတဖြာꩻ ကခံႏဗာႏဝင်ꩻအံႏထွဉ်ႏခွုင်းမှဲꩻရျာꩻ၊ နီနာꩻပအိုဝ်ႏပို၊ ပညာႏယိုဆေ့ꩻဆဲဉ်ခြော၊ တဲက်တွန်ꩻနောပိုတွမ်ႏလီꩻ၊ ယံကပီနောပိညာႏသျင်ႏ၊ နီကခံႏဗာႏဝင်ꩻနုဿရယ်ꩻ၊ ထိုနယ်ꩻယံထွꩻသွုန်၊ နားထွိုင်ႏဒွုန်သꩻပီကျံႏ၊ အဝင်ꩻဒေါ့ꩻလဲ့ မသေနာႏ၊ မွိုးဖါတာႏတယောဝ်းခန်း၊ တဲက်တွန်ꩻသမ်းပိုလီꩻဖုံႏ၊ ယံအောဝ်ႏပြုံႏဆခိုႏရန်း၊ ထပ်သမ်းသွဉ်ပိညာႏမျိုꩻ၊ အကျိုꩻဖေႏလောကကို၊ ထင်ႏသျာꩻယိုခီႏယော်ꩻထွိုက်၊ အဝင်ꩻကျွိုက်တင်လှဲလိုႏ၊ ခွꩻမီႏခိုႏထီႏတောႏထွာ၊ လိုꩻပေါင်ꩻအာနိစ်သက်ရောဝ်း၊ ထွာဝင်ꩻစောဝ်းထွာဝင်ꩻဗွေႏ၊ ဥပမေႏပါꩻတီဖိုး၊ သဲင်ꩻလိုꩻစိုးကွိုင်ႏတန်ႏငါႏ၊ ပိညာႏလꩻနီပိုလီꩻ၊ လိုႏထိန်ꩻတီလိုႏအုပ်ချုက်၊ ယံအာထုက်တဲက်တွန်ꩻဗဲင်း၊ ယူႏစဲင်းင်းလိုꩻယဟန်ႏ၊ တဲက်တွန်ꩻဉာဏ်ႏဒေါ့ꩻကနွောင်ꩻ၊ နားမသွောင်သုတဆေ့ꩻ၊ လွေꩻတေ့ꩻတေ့ꩻဗာႏနှဲးဖိုး၊ ပွိုးကားမသေပိညာႏရေꩻ၊ ပွိုးကားမတွေꩻပိညာႏဖဲ့ꩻ၊ ကဲ့ꩻရဲ့ꩻထဲင်းကောဟော်ꩻသား၊ လိုꩻနားဒွုန်ဟင်နူထွိုင်ꩻ၊ သွုန်ႏသꩻရွိုင်ꩻတောႏတုက်တွုမ်၊ တယွုမ်းတောဝ်းပိညာႏရေꩻ၊ ထာꩻယူႏတွေꩻတဖုံးဖဲ့၊ သꩻပသဲ့ꩻနားဖူꩻဆုံး၊ လိုꩻလုံးတူႏလိုꩻလုံးသူ၊ အံႏမူဒဲဉ်တလꩻတောဝ်း၊ ဝင်ꩻသွဉ်ဆောဝ်ဝင်ꩻဆုမ္မꩻတလꩻတောဝ်း၊ နွုမ်ꩻတွမ်ထောဝ်းမလွိုက်ရိုꩻ၊ ပအိုဝ်ႏမျိုꩻနီစွိုꩻဟွေး။