ဖေင်ꩻဖင်ꩻတွမ်ႏ

"ဖေင်ꩻဖင်ꩻတွမ်ႏ ခေတ်လိုꩻယွဲးယိုခါ" လိုꩻယွဲးကရိုꩻနောဝ်ꩻ လိုꩻနုဲင်းမုဲင်ꩻနဲးတဲင် လိုꩻသက်ရွယ်ႏမဲဉ်ႏ ၁၈-ဗꩻလွေꩻ ၃၅-အခါႏကိုနောဝ်ꩻသွူ။ နောဝ်ꩻထွူတကာႏတောဝ်း လိုꩻယွဲးလိုꩻရွယ်ႏမဲဉ်ႏယိုနောဝ်ꩻ မဉ်ႏတွက်ထွားလွေꩻတွမ်ႏ နဲင်ႏငံႏတောႏအာႏရဲင်ꩻအနေႏလဲ့ လိုꩻယွဲးအာႏရဲင်ꩻ အောဝ်ႏပါသော့ꩻ သွံပွန်းတပွန်းတဲင် ထွာဒျာႏအနာႏဂတ်အွဉ်ငါလောင်ꩻ အွဉ်ငါယံနောဝ်ꩻသွူ။ နောဝ်ꩻမꩻ လိုꩻယွဲးကရိုꩻနောဝ်ꩻ နမ်းရဲင်ꩻအာႏတဲ့ တလာဗာႏ၊ ဉာဏ်ႏစွန်ꩻအာႏဗွေဗာႏ၊ စာရိတ္တကရိုꩻဒါႏ နမ်းကျင်ꩻတရာꩻယိုတဲ့ မွန်ဗန်စွို့ꩻစွဉ်ႏဗာႏသွူ။ ကာယ၊ ဉာဏ၊ စာရိတ္တစွန်ꩻအာႏဖုံႏယို ဖေႏကဗွေလွဉ် ထာꩻသေပညာႏ၊ ထာꩻသေတရာꩻ၊ လုံ့လဝီရိယကရိုꩻဒါႏ နမ်းအထီအသွီႏဖုံႏယို ဖေႏကဗွေလွဉ်ဗာႏနောတ်ꩻ နမ်းတွမ်ႏနမ်း ထိန်ꩻသိမ်ꩻရဲပ်တဲပ်ဗာႏသွူ။ နောဝ်ꩻလွုမ်ꩻတကာႏတောဝ်း ခေတ်လိုꩻယွဲး လိုꩻရွယ်ႏမဲဉ်ႏဖုံႏ-ကရိုꩻနောဝ်ꩻ ဆုဲင်ꩻတနီꩻခါ လုဲင်ႏပြေင်အီႏထေင်းထံႏလွေꩻ စွိုးခွိုꩻတာႏဝွန်ႏ၊ ခမ်းထီထာꩻမာꩻ၊ သွီႏတသာ အာႏရဲင်ꩻတသာ တစွိုꩻတဗူႏနောဝ်ꩻသွူ။ နောဝ်ꩻမꩻ လိုꩻယွဲး၊ လိုꩻရွယ်ႏမဲဉ်ႏသီး သဘာဝနောဝ်ꩻ ထုမ်ႏသွꩻ၊ လွောက်ꩻလွူꩻဖဉ်းမွိုတ်မုꩻယိုလဲ့အာတဲင် မဉ်ႏထွားတွမ်ႏခေတ်ကာႏလယိုတဗာႏ အန္တရာယ်ႏ ကထွာအီဒါႏ ဖေင်ꩻဖင်ꩻယာလံ လိုႏသျေင်ႏလꩻလꩻ မာꩻသွꩻမွုန်း၊ ယာလံဖေင်ꩻဖင်ꩻယိုနောဝ်ꩻ ဖေႏဒျာႏနီလိုꩻသီးအကျိုꩻကုဲင်၊ ကွပ်စွဉ်ႏသွုံꩻအံႏယာလံဖေင်ꩻဖင်ꩻယိုတဲင် သꩻဓာတ်၊ အာႏရဲင်ꩻယိုလဲ့ ကွဲးဆေ့ꩻဆေ့ꩻလွဉ်၊ နမ်းဉာဏ်ႏအာႏယိုလဲ့ ကွဲးယွမ်ꩻယွမ်ꩻလွဉ်၊ လုံ့လ၊ ဝီရိယ၊ သတ္တိꩻဖုံႏ ကွဲးဖေ့ဖေ့လွဉ်အီ၊ အီႏမာꩻဗာႏ ထာꩻတဟောဝ်တောဝ်း ဒုစရဲက်ယိုလဲ့ သꩻတထွူႏဒွုမ်၊ နမ်းကျင်ꩻစာရိတ္တ ကွဲကုဲင်ကုဲင်လွဉ်နောဝ်ꩻသွူ။ ခေတ်အခီႏခီႏလုဲင်ႏလွဉ် မဉ်ႏထွားချာသမဲင်ꩻနောဝ်ꩻ ခမ်းထီတွမ်ႏလိုꩻမျိုꩻအတာႏလဲ့ ဖေႏဒျာႏအကျိုꩻကုဲင် အနိဋ္ဌာႏရွုံႏလွုမ်ꩻ၊ လိုꩻရျာꩻခေါင်ꩻအအာသွတ်ꩻ ကထွာဒါႏ ခယ်ႏခမ်းယို စီꩻပွာꩻရေꩻ၊ လွောင်ႏဗူႏရေꩻ ကကုဲင်အီနောဝ်ꩻ ကွပ်စွဉ်ႏခြဲ့ꩻနယ်ႏ အင်္ဂလိပ်သီး လွဉ်ဖြေ့ꩻလီသော့ꩻ၊ ဖꩻပꩻအီလွောင်ႏဗူႏရေꩻလက်နက် ယာလံဖေင်ꩻဖင်ꩻယိုတဲင် တနတ်တွိုက်ꩻပွယ်ꩻမွေတောဝ်းဒွုမ်၊ ယာလံဖေင်ꩻဖင်ꩻတွိုက်ꩻပွယ်ꩻကထွာဒါႏ စာရိတ္တကုဲင်ပြင်ꩻ နမ်းကျင်ꩻထဲ့ဖွိုႏ၊ လွောင်ႏဗူႏအာႏယိုလဲ့ လိုႏရာꩻတတွိုႏလꩻဒွုမ်၊ ဘဝကုဲင်ပြင်ꩻ သွုမ်ꩻတိန်ꩻဗာႏနောဝ်ꩻသွူ။ နောဝ်ꩻမꩻ နီပအိုဝ်ႏဒေႏသကို ပွိုင်းလဲင်ႏ ပဒေႏသရာဇ်စိုးနောဝ်ꩻလဲ့ အောဝ်ႏထီႏမော့ꩻဖို၊ ကျုံႏတလူႏလွဉ်ဗာႏတဲင် အာႏဇာႏနီႏအွဉ်ငါတန်သီးနောဝ်ꩻ ကွပ်စွဉ်ႏတကျွိုက်တောဝ်း ပဒေႏသရာဇ်စနစ်ကျံꩻယိုနောဝ်ꩻမꩻ တွိုက်ꩻထန်ႏထိုꩻဖေႏ၊ ရဲးကမ်းဖေႏ ပိုလီꩻအနာႏဂတ်ဆꩻငါကျမ္မာႏ၊ ငမ်းငါႏဘဝထဲ့သော့ꩻ ယာလံဖေင်ꩻဖင်ꩻအန္တရာယ်ႏကွင်ꩻကိုနောဝ်ꩻသွူ။ နောဝ်ꩻမꩻ "အုံသွော့ကင်ꩻကင်ꩻ တွမ်ႏဖေင်ꩻဖင်ꩻ၊ သျေင်ႏဝင်ꩻမူႏတွမ်ႏခို"သတိꩻအလွိုတအဲဉ်ထဝ်း ကရိုꩻဒါႏအတွိုင်ꩻ ယာလံဖေင်ꩻဖင်ꩻ ဖေႏကဒို့ꩻတခြို့လမွုန်းနီဘဝကရိုꩻနောဝ်ꩻ-