ဖေႏမဲထွာဗာႏ

"ဖေႏမဲထွာဗာႏ စွိုးခွိုꩻတာႏ" နေင်ႏ ၂၀၁၅-ဗာႏ၊ လာအောက်တိုဘာ လာလို့(နောဝ်ꩻတောဝ်းလဲ့) လာနိုဝင်ဘာ လာဆန်ꩻရပ်ယို နဲင်ႏငံႏတောႏအစိုႏရ အီႏမာꩻလွေꩻ ပါတီစွုမ်ႏ ပွယ်ꩻလွိုက်လိုꩻတန် အမတ်လောင်ꩻတဲင် ဖေႏမဲခိန်ႏမဉ်ႏတွိုႏနောဝ်ꩻ နီလိုꩻမျိုꩻကလꩻထွိုက် ကလꩻသင်ꩻဒါႏ အခွင်ꩻအရေꩻ ဖေႏကသွုမ်ꩻတိန်ဗာႏမွိုန်းနောဝ်ꩻ ရက်ခွိုꩻပအိုဝ်ႏလိုꩻတွိုင်ꩻစွုမ်ႏဖြာꩻ အရေꩻတန်ငါႏ ရက်ခွိုꩻသꩻဓာတ်တွမ်ႏ ထာꩻသေတရာꩻအောဝ်ႏနောဝ်ꩻသွူ။ ၅-နေင်ႏမꩻတလဲင်ႏ ဖေႏမဲခွင်ꩻလꩻတဲင် နီသွိုန်ႏဖူꩻသꩻကို ကဖေႏဒါႏမဲယို နီလိုꩻမျိုꩻမဲဗုံꩻ မွေးနဲ့/မွေးတောဝ်းနဲ့၊ နီကအီႏဖေႏဒါႏမဲယို နီလိုꩻမျိုꩻအကျိုꩻတရာꩻ အောဝ်ႏအီနဲ့/အောဝ်ႏအီတောဝ်းနဲ့ကရိုꩻနောဝ်ꩻ လိုꩻတွိုင်ꩻစွုမ်ႏဖြာꩻ စဉ်ꩻစာꩻစဲင်းစဲင်း၊ ယူႏစဲင်းစဲင်းထွူမꩻ မဉ်ႏဖေႏမဲနောဝ်ꩻ ကွင်ဒါႏတောဝ်း၊ မာႏဒါႏတောဝ်း၊ ဖေႏမဲမဉ်ႏဒါႏတောဝ်း၊ ဖေႏမဲမဉ်ႏမာႏထိုꩻနောဝ်ꩻ နီလိုꩻမျိုꩻအခွင်ꩻအရေꩻ သွုမ်ꩻထိုꩻဒါႏသွူ။ ကွပ်နောဝ်ꩻမꩻ ဖေႏမဲခိန်ႏမဉ်ႏတွိုႏနောဝ်ꩻ နိလိုꩻမျိုꩻ လိုꩻတန်အမတ်လောင်ꩻဖုံႏ ကအီႏနွို့ခေးပြဲင်ႏဒါႏ မဲဆန္ဒနယ်ႏ၊ ဟံႏနယ်ႏနောဝ်ꩻအကို ကအောဝ်ႏအုံဒါႏ နီလိုꩻမျိုꩻဖေႏမဲခွင်ꩻကလꩻဒါႏ လိုꩻသက် ၁၈-နေင်ႏမာꩻကီနောဝ်ꩻ အွဉ်ဝင်ꩻထောက်ခံႏ ဖေႏအာႏသော့ꩻဖေႏသွော့ မဲပငါပရာꩻ၊ နောဝ်ꩻသွူတကာႏတောဝ်း ရက်ခွိုꩻပအိုဝ်ႏလိုꩻမျိုꩻ ကလွေꩻအောဝ်ႏဒါႏ ခမ်းထန်ႏ(နဲင်ႏငံႏချာꩻ)သားဖုံႏလဲ့ ဖေႏမဲခိန်ႏ မဉ်ႏတွိုႏနောဝ်ꩻ အွဉ်ႏသꩻတန်တန်၊ အွဉ်ႏသꩻဆွာꩻဆွာꩻ ခံႏလွတ်ထာꩻမာꩻတွော့ꩻ ယံသဲင်ꩻထောက်ခံႏဖေႏအာႏသော့ꩻဖေႏသွော့ နီစွိုးခွိုꩻလိုꩻတန် အမတ်လောင်ꩻမဲနောဝ်ꩻသွူ။ နေင်ႏ ၂၀၁၀-ဗာႏ နဲင်ႏငံႏတောႏ ကမာꩻလွေꩻဖေႏလဲဉ်း ပါတီစွုမ်ႏ ပွယ်ꩻလွိုက်လိုꩻတန် အမတ်လောင်ꩻခိန်ႏနောဝ်ꩻ ကွပ်စွဉ်ႏရက်ခွိုꩻပအိုဝ်ႏဖုံႏ အွဉ်ဝင်ꩻထောက်ခံႏ ဖေႏအာႏသော့ꩻဖေႏမဲ အကျိုꩻတရာꩻတဲင် ပအိုဝ်ႏလိုꩻတန် အမတ်လောင်ꩻ ကနွို့ခေးပြဲင်ႏဒါႏ ဝေင်ꩻနယ်ႏဟိုပုံꩻ၊ ဝေင်ꩻနယ်ႏသီႏသဲင်ႏ၊ ဝေင်ꩻနယ်ႏပင်လောင်ꩻ (၃)ဝေင်ꩻနယ်ႏကိုနောဝ်ꩻ ပအိုဝ်ႏအမတ်လောင်ꩻလိုꩻတန် နွေင်ꩻလꩻလွေꩻတွော့ꩻ ပအိုဝ်ႏလိုꩻမျိုꩻအမတ် ပေါႏထန်ႏလွဉ် ပုဂ္ဂိုလ်ႏ (၁၀)ဖြာꩻနောဝ်ꩻသွူ။ တယ်ႏ ၂၀၁၀-ဗာႏ ဗꩻတွိုႏလွေꩻ ၂၀၁၅-ဗာႏကို ဖူးဝေးမွိုးဖါ ကလွိုက်ကဒင်ႏသေꩻခါꩻ ပအိုဝ်ႏအမတ်ပုဂ္ဂိုလ်ႏ(၁၀)ဖြာꩻ ကျိုꩻစာꩻလွေꩻဖေႏ လွတ်တောႏကိုတဲင် ယိုခါ ပအိုဝ်ႏဟံႏနယ်ႏကို ပညာႏရေꩻ၊ ခြွိုင်ႏသန်ꩻရေꩻ၊ စီꩻပွာꩻရေꩻ၊ ဘာႏသာႏရေꩻ၊ ဆို့ꩻရုဲင်ရေꩻ၊ လွူးမွီႏရေꩻ၊ ထီမေႏကုံꩻ၊ မေႏသိုလာပျား၊ မေႏလျပ်စစ်၊ တဖူꩻတထာ လွေꩻသဲင်ꩻရေꩻဖုံႏကစ အဖဲ့ꩻဖဲ့ꩻအခေါဝ်ခေါဝ် တိုꩻတက်ထင်ႏထို သာႏယာႏလွဉ်အာငါႏနောဝ်ꩻသွူ။ နီဟံႏနယ်ႏ ကတိုꩻတက်ထင်ႏထို လွိုင်ႏကွိုန်ꩻလွဉ်ဗာႏနုဲင်းယိုနောဝ်ꩻ ကွပ်စွဉ်ႏလွတ်တောႏကို နီလိုꩻမျိုꩻ အမတ်လိုꩻတန် အောဝ်ႏသော့ꩻနောဝ်ꩻသွူ။ နီလိုꩻမျိုꩻကလꩻထွိုက် ကလꩻသင်ꩻဒါႏ အခွင်ꩻအရေꩻယို အုံနေးအထန်ႏ ကွီတလꩻတောဝ်း၊ အုံဗာႏနေးဒျာႏ လွတ်တောႏကို ကွီမꩻလꩻကရိုꩻနောဝ်ꩻ ခွိုꩻရက်ပအိုဝ်ႏဖုံႏ အောဝ်ႏလိုႏဖြောင်သꩻနောဝ်ꩻသွူ။ လွတ်တောႏကို နီအမတ်လိုꩻတန် မဉ်ႏအောဝ်ႏသော့ꩻအာနောဝ်ꩻ နီအခွင်ꩻအရေꩻလဲ့ အီႏလꩻအာ၊ မဉ်ႏအောဝ်ႏသော့ꩻဆေ့ꩻလဲ့ နီအခွင်ꩻအရေꩻ အီႏလꩻဆေ့ꩻ၊ မဉ်ႏအဲဉ်ထောဝ်းသော့ꩻ တဖြာꩻဖြာꩻလဲ့ ကအီႏလꩻဗာႏ အခွင်ꩻအရေꩻယို လꩻနွောင်ꩻတောဝ်းနောဝ်ꩻသွူ။ နောဝ်ꩻမꩻ နေင်ႏ ၂၀၁၅-ဗာႏ ပွယ်ꩻလွိုက်လိုꩻတန် အမတ်လောင်ꩻ ဖေႏကပေါႏထန်ႏအာအာနောဝ်ꩻ ရက်ခွိုꩻပအိုဝ်ႏ ဖေႏမဲခွင်ꩻကလꩻဒါႏ လိုꩻသက်(၁၈)နေင်ႏမာꩻကီယို အွဉ်ဝင်ꩻထောက်ခံႏ ဖေႏအာႏသော့ꩻဖေႏသွော့မဲ၊ လွတ်တောကို နီပအိုဝ်ႏအမတ်လိုꩻတန် မဉ်ႏအောဝ်ႏအာမꩻ အီႏမာꩻဖေႏနွောင်ꩻအာအာ နီစွိုးခွိုꩻတိုꩻတက်သာႏယာႏရေꩻထာꩻမာꩻ၊ မဉ်ႏမာꩻဖေႏနွောင်ꩻအာအာ နီစွိုးခွိုꩻတိုꩻတက်သာႏယာႏရေꩻ ထာꩻမာꩻမꩻ နီပအိုဝ်ႏလိုꩻမျိုꩻ လိုꩻအုံအောဝ်ႏမုꩻ ဘဝအဆင်ႏအရန်း အီႏထင်ႏထိုကရိုꩻနောဝ်ꩻ တဗꩻစွဉ်ႏဟံႏလဲ့ သစ်တောဝ်းအကျောင်ꩻ နိုꩻဆောႏတမာ ဒင်ႏပျꩻလွေꩻဖေႏဗာႏ တွမ်ႏရွမ်ဖြုဲင်ꩻယိုနောဝ်ꩻသွူ။