ဖေႏလွစ်တခြင်သွော့
"ဖေႏလွစ်တခြင်သွော့ မျိုꩻသွုပ်တသာ လိုꩻယွဲးသီး သွဉ်ထူႏခွင်ꩻ ခုမ်မာꩻခွင်ꩻ တယ်ႏထွင်ႏခွင်ꩻ" ဟန်ႏသနီꩻ ကမ္ဘာႏလောင်းကီ ခမ်းထီတွိုင်ꩻ ခမ်းထီတွိုင်ꩻ လိုꩻမျိုꩻတွိုင်ꩻ လိုꩻမျိုꩻတွိုင်ꩻဖုံႏနဝ်ꩻ ပညာႏရေꩻယို အွဉ်ႏအထျꩻဖေႏအာႏ သွဉ်ကျိုꩻစာꩻမွေးစွဉ်ႏဝင်ꩻနဝ်ꩻသွူ၊ နုဲင်းယိုခါနဝ်ꩻ နဲင်ႏငံႏတဖြုံႏတောမ်ႏတဖြုံႏယို ပြဲင်ႏမွေးစွဉ်ႏဝင်ꩻ ပညာႏရေꩻစနစ်နဝ်ꩻ ထီႏလွဉ်ဗာႏနဝ်ꩻသွူ၊ မျိုꩻသွုပ်တသာ လိုꩻပေႏသီးအတာႏ ဖေႏအာႏဗာႏ ပညာႏရေꩻယို ခမ်းတွိုင်ꩻလိုꩻမျိုꩻတွိုင်ꩻနဝ်ꩻ အွဉ်ႏအရေꩻတန်ကဏ္ဍလဲ့ ထွိုင်ႏတွိုႏခမ်းမုဲင်ꩻ လိုꩻဒါႏပညာႏအဝ်ႏအာ၊ လိုꩻတယ်ႏထွင်ႏသားအဝ်ႏလွိုင်ႏ၊ လိုꩻပညာႏသျင်ႏသီး အဝ်ႏပြန်ꩻပြော်ꩻနဝ်ꩻ အထျꩻအဝ်ႏယင်းဒျာႏ ခမ်းထီနဝ်ꩻတဖြုံႏ ပညာႏရေꩻစနစ်နဝ်ꩻသွူ။ ဟန်ႏသနီꩻယို ခမ်းထီတဖြုံႏတောမ်ႏတဖြုံႏ၊ နဲင်ႏငံႏတဗာႏတောမ်ႏတဗာႏယို မာꩻယံပင်ႏထိုလွဉ်ပါမွေးစွဉ်ႏ ဝွေꩻခမ်းထီပညာႏရေꩻစနစ်နဝ်ꩻသွူ၊ နုဲင်းယိုခါ ပါꩻမုဲင်ꩻခမ်းထီပညာႏရေꩻစနစ်ယံမွေး၊ ကျောႏမွေးတဲ့ ကထွာကမ္ဘာႏလောင်း ခမ်းထီလောင်ႏလင်ဖုံႏနဝ်ꩻ လွဉ်ထင်ႏလွဉ်သွဉ်ထူႏဗာႏစွဉ်ႏနဝ်ꩻသွူ၊ ဝွေꩻခမ်းထီပညာႏရေꩻစနစ်နဝ်ꩻ ကျောႏစွစ်ꩻစွဉ်ႏဒျာႏ ကမ္ဘာႏနဝ်ꩻသွူ။ ကောပ်ခမ်းထီပညာႏရေꩻစနစ်ယံတဲင် ကသွဉ်ထူႏဗာႏဒါႏ ခမ်းသားထီသား လိုꩻယွဲးမျိုꩻသွုပ်တသာသီး ထွာလွဉ်ပညာႏသျင်ႏသားတဲ့အာ၊ ထွာလွဉ်လိုꩻတယ်ႏထွင်ႏသားတဲ့လွိုင်ႏလွဉ်ဗာႏ၊ ခမ်းထီတဲ့ ထင်ႏထိုဗာႏနဝ်ꩻသွူ။ မြန်မာခမ်းထီယိုလဲ့ ကညလဲဉ်းဒါႏ နေင်ႏ ၁၉၆၀-ဗာႏမာꩻခိုႏနဝ်ꩻ ခမ်းထီပညာႏရေꩻစနစ်ယံတဲင် ကထွာခမ်းထီလောင်ႏလင်ဖုံႏနဝ်ꩻ အံႏအွိုဗာႏ၊ လွဉ်သွဉ်ထူႏဗာႏ မြန်မာခမ်းထီကိုနဝ်ꩻသွူ၊ ထွိုင်ႏတွိုႏလွဉ် ဟန်ႏသနီꩻနဝ်ꩻ မြန်မာခမ်းထီပညာႏရေꩻစနစ်ယို ထဲ့ဖွိုႏလွဉ်တဲင် ကသွဉ်ထူႏဗာႏဒါႏ ခမ်းသားထီသား လိုꩻယွဲးမျိုꩻသွုပ်တသာသီးလဲ့ သွဉ်ထူႏအတွိုင်ꩻ ထာꩻယူႏထာꩻတွေꩻဖုံႏ တပြွူႏဖြိုတဝ်း၊ လိုꩻတယ်ႏထွင်ႏသား တပေါႏထန်ႏတဝ်း၊ ထွာမာꩻဗာႏဒျာႏဝင်ꩻထာꩻ၊ ထွာဒျာႏသွဉ်းပညာႏရေꩻစနစ်နဝ်ꩻသွူ။ နဝ်ꩻမꩻ ကသွဉ်ထူႏဗာႏဒါႏ မြန်မာခမ်းထီ ပညာႏရေꩻစနစ် မြန်မာခမ်းသားအပါဝင်ႏ တောမ်ႏခမ်းရင်ꩻသားလိုꩻမျိုꩻစုမ်ႏဖုံႏယို စီꩻပွါꩻရေꩻတဖူꩻဖုံႏလဲ့ တဖြွဉ်လွဉ်တဝ်းခမ်းထန်ႏ၊ ခြွိုင်ႏသန်ꩻရေꩻခံႏစာꩻခွင်ꩻ ဗဟုသုတဖုံႏလဲ့ အာႏပေႏဗာႏ၊ အဆုဲင်ꩻသွတ်ꩻ နဲင်ႏငံႏရေꩻထာꩻထီႏဖုံႏ အဝ်ႏကုဲင်ဆုဲင်ꩻဗာႏ၊ ကောပ်နဲင်ႏငံႏရေꩻထာꩻထီႏဖုံႏ ထဲ့ဆုဲင်ꩻထိုꩻတဲင် ဟန်ႏသနီꩻ နဲင်ႏငံႏရေꩻ တန်ႏတူႏခွင်ꩻ၊ အိုပ်ချုပ်ခွင်ꩻဖုံႏယို လꩻတွောင်းတွာတဝ်း၊ အနာလွိုခမ်းကို စဲ့ꩻပွယ်ꩻတထွသွတ်ꩻနွောင်ꩻတဝ်းနဝ်ꩻသွူ။ ခမ်းကိုသားလိုꩻထံꩻသာꩻ၊ လိုꩻဆင်ꩻရဲꩻ၊ ခမ်းရင်ꩻသား ပိုလီꩻဖုံႏ ကသွဉ်ထူႏဗာႏ မြန်မာခမ်းထီကို အရန်းထဲ့ဖွိုႏ ပညာႏရေꩻစနစ်ခိန်ႏတွင်ꩻနဝ်ꩻ ကထွာဒါႏ လိုꩻအာႏဏာႏအဝ်ႏသား ပိုလီꩻလင်ꩻဖုံႏ၊ လိုꩻချမ်ꩻသာႏသားပိုလီꩻလင်ꩻဖုံႏနဝ်ꩻ လွေꩻသွဉ်ထူႏဗာႏ ကထွာခမ်းလင် စင်ကာပူ၊ ရသျား၊ ဗြိတိန်၊ အမေရိကန်ႏ-စတဲင် ခမ်းထန်ႏပညာႏရေꩻဖုံႏနဝ်ꩻသွူ၊ နဝ်ꩻမꩻ မြန်မာခမ်းထီယိုနဝ်ꩻ လိုꩻအိုပ်ချုပ်ခံႏဗာႏသား ကထွာဒါႏ လိုꩻထံꩻသာꩻ၊ လိုꩻခမ်းသား၊ လိုꩻခမ်းရင်ꩻသား ပညာႏရေꩻတောမ်ႏ လိုꩻအိုပ်ချုပ်သားကထွာဒါႏ လိုꩻအာႏဏာႏအဝ်ႏသား၊ လိုꩻဩဇာႏအဝ်ႏသား၊ လိုꩻချံꩻသာႏသားပညာႏရေꩻယို အဆင်ႏရန်းကွာႏထိုꩻဗာႏနဝ်ꩻသွူ။ ကပြွူႏဖြိုလဲဉ်းဒါႏ ခမ်းတန် နဲင်ႏငံႏတန် လိုꩻမျိုꩻတန်ဖုံႏနဝ်ꩻ ခမ်းထီတဖြုံႏအနာႏဂတ်ယို အီႏတွိုႏသော့ꩻဗာႏဒျာႏရင်ꩻ မျိုꩻသွုပ်တသာ လိုꩻယွဲးသီးစူကိုတဲင် အနာႏဂတ်ခမ်းထီ ဖေႏကယိန်းထင်ႏထိုနဝ်ꩻ ပင်ႏထို မာꩻယံဖေႏဗာႏ မျိုꩻသွုပ်တသာလိုꩻယွဲးသီး ပညာႏရေꩻနဝ်ꩻသွူ။ မျိုꩻသွုပ်တသာသီး ဖေႏကထွာလွဉ် လိုꩻပညာႏသျင်ႏ၊ လိုꩻတယ်ႏထွင်ႏဖုံႏနဝ်ꩻ ကထွာခမ်းထီအစိုႏရတဲ့နဝ်ꩻ၊ ဘာႏသာႏရေꩻအွဉ်ငါဖုံႏတဲ့နဝ်ꩻ၊ လိုꩻမျိုꩻရေꩻအွဉ်ငါဖုံႏတဲ့နဝ်ꩻ ဖေႏအာႏစွဲးကမ်းဖေႏစွဉ်ႏ အဖဲ့ꩻဖဲ့ꩻအခဝ်ခဝ်နဝ်ꩻသွူ။ လိုꩻဒါႏပညာႏသား၊ လိုꩻပညာႏသျင်ႏသား၊ လိုꩻတယ်ႏထွင်ႏသား မိဉ်းအဝ်ႏထန်ႏလွဉ်သွူတဲ့ ဝွေꩻသီးကသေကဒါႏအတွိုင်ꩻ ခုမ်မာꩻခွင်ꩻ၊ တယ်ႏထွင်ႏခွင်ꩻဖုံႏယိုနဝ်ꩻ ဖေႏခွင်ꩻထွူဒျာႏနဝ်ꩻသွူ၊ နုဲင်းဂျပန်ခမ်း၊ အမေႏရိကန်ႏခမ်းကိုဖုံႏနဝ်ꩻ ပွိုင်းဝွို့တောမ်ႏ လိုꩻယွဲးသီးသွဉ်ပညာႏတွင်ꩻ အဝ်ႏလိုႏရွဉ် အကူႏအညီႏဖုံႏ၊ တယ်ႏထွင်ႏခုမ်မာꩻတစွိုးစွိုးတာႏ အဝ်ႏလိုႏအနီꩻအရင်ꩻဖုံႏယို စွဲးကမ်းဖေႏ အဝ်ႏအထွူနဝ်ꩻသွူ။ နဝ်ꩻမꩻ ဝင်ꩻခမ်းထီလောင်ႏလင်ယို ကောပ်တမုဲင်ꩻမွော့ တိုꩻတက်ထင်ႏထိုဗာႏတွိုႏ၊ မြန်မာခမ်းထီအပါ ပအိုဝ်ႏလိုꩻမျိုꩻဖုံႏယို မွော့တတိုꩻတက် ထင်ႏထိုဗာႏတဝ်းတွိုႏယို ပွိုင်းဝွို့တောမ်ႏမျိုꩻသွုပ်တသာအလောင်း သွဉ်ထူႏခွင်ꩻ တယ်ႏထွင်ႏခွင်ꩻ ဖေႏအာႏမုယို တဗွိုန်ပီတဝ်းဝင်ꩻနဝ်ꩻ ထီႏဗာႏနဝ်ꩻသွူ။ နဝ်ꩻမꩻ မိဉ်းထွားယင်းနုဲင်းဟန်ႏသနီꩻ ပအိုဝ်ႏလိုꩻမျိုꩻသီး အခေႏနေႏနဝ်ꩻ မျိုꩻသွုပ်တသာလိုꩻယွဲးသီးယို ထွဉ်ႏသွဉ်တဝ်းပညာႏနဝ်ꩻ တမွေးတဝ်း အဝ်ႏထွဉ်ႏသွဉ်ဒျာႏ၊ အဝ်ႏဖေႏအာႏဒျာႏနဝ်ꩻသွူ၊ နဝ်ꩻတွော့ꩻ လိုꩻယွဲးသီးဖုံႏ မိဉ်းဒါႏလွဉ်သွူပညာႏ၊ မိဉ်းထွာလွဉ်သွူ ပညာႏသားနဝ်ꩻ ဝွေꩻသီးကဒါႏ ကသေအတွိုင်ꩻ မာꩻခွင်ꩻ တယ်ႏထွင်ႏခွင်ꩻ တဖေႏအာႏတဝ်းနဝ်ꩻသွူ၊ မိဉ်းအဝ်ႏလွေꩻစွူစွူဗော့ꩻနုဲင်းယိုနဝ်ꩻ ပအိုဝ်ႏလိုꩻမျိုꩻယို သွဉ်ခန်းပညာႏနုဲင်းမုဲင်ꩻသွဉ်၊ ဒါႏခန်းပညာႏနုဲင်းမုဲင်ꩻဒါႏ ဝွေꩻသီးဉာဏ်ႏတသာ၊ ထာꩻထီႏတသာ၊ ထာꩻထွင်ႏတသာ မာꩻခွင်ꩻမိဉ်းတအဲဉ်ထဝ်း၊ ပအိုဝ်ႏလိုꩻမျိုꩻယို သွဉ်ခန်းပညာႏနုဲင်းမုဲင်ꩻသွဉ်၊ ဒါႏခန်းပညာႏနုဲင်းမုဲင်ꩻဒါႏ ခုမ်မာꩻဗာႏစွူစွူဒျာႏ လိုꩻဖြားစခါအပွိုင်ပုင်ႏစံႏ၊ ပအိုဝ်ႏအပွိုင်ပုင်ႏစံႏ၊ အပွိုင်ပုင်ႏစံႏအမျိုꩻမျိုꩻဆလ စစွဉ်ႏ အရဲးအဆီꩻဖုံႏယိုနဝ်ꩻ အဝ်ႏအာနေဒွုန်းကနဝ်ꩻသွူ။ ထွားဗော့ꩻ ပအိုဝ်ႏလိုꩻမျိုꩻဟန်ႏသနီꩻ ပအိုဝ်ႏလိတ်လုဲင်ꩻအရေꩻတဲ့နဝ်ꩻ၊ ပအိုဝ်ႏလိုꩻမျိုꩻရေꩻတဲ့နဝ်ꩻ၊ ပအိုဝ်ႏပညာႏရေꩻတဲ့နဝ်ꩻ၊ ပအိုဝ်ႏနဲင်ႏငံႏရေꩻတဲ့နဝ်ꩻ အီႏခုမ်မာꩻလွေꩻဒျာႏ ဖြာꩻဖဲ့ꩻဖြာꩻခဝ်နဝ်ꩻ မွေးတဝ်း၊ လွိုလိုꩻဖြားစခါ မာꩻသေꩻအတွိုင်ꩻ မာꩻထဲင်းမွုန်းဒုမ်၊ ပါꩻမုဲင်ꩻမိဉ်းထွိုင်ႏမာꩻလဲ့ ပါꩻမုဲင်ꩻနဝ်ꩻ ထွာထိုꩻစွဉ်ႏဒျာႏ ပအိုဝ်ႏလိုꩻမျိုꩻရန်ႏသူႏလွိုႏလွိုႏ-စတဲင် ထာꩻယူႏဝါဒနုဲင်းယိုဖုံႏနဝ်ꩻ အဝ်ႏလိုႏခုမ်သဲဉ်ꩻသွုပ်တဝ်းဒုမ်သွူ၊ မိဉ်းထွားဒျာႏ နုဲင်းလိတ်ပအိုဝ်ႏလဲ့ သွဉ်ဒါႏမိဉ်းထွူ ထွူဗော့ꩻတောမ်ႏဒျာႏအဒါႏ၊ ပအိုဝ်ႏလိတ်လုဲင်ꩻ ပညာႏသျင်ႏအရန်း တဆီတဖြာꩻ ထွာထင်ႏလွေꩻ၊ ထူႏဂုဏ်ႏထင်ႏ စာႏရင်ꩻဝင်ႏ တအဲဉ်ထဝ်းသွူ၊ ပအိုဝ်ႏလိုꩻမျိုꩻ ဖေႏကယိန်းတိုꩻတက်ထင်ႏထိုနဝ်ꩻ ဖေႏအာႏစွဲးကမ်းသွော့၊ ဖေႏလွစ်တခြင်သွော့ မျိုꩻသွုပ်တသာလိုꩻယွဲးသီး သွဉ်ထူႏခွင်ꩻ ခုမ်မာꩻခွင်ꩻ တယ်ႏထွင်ႏခွင်ꩻနဝ်ꩻ ခမ်းသားငေါဝ်းအယ်ဒီတာစွိုꩻ တဲမ်းဖြုဲင်ꩻတမာလွေꩻဖေႏဗာႏနဝ်ꩻသွူ။[၁][၂]