ဖြေꩻစာကူꩻကားလစ်ꩻစား

"ဝဏိဇ္ဇသုတ် (ဖြေꩻစာကူꩻကား အဝ်ႏလစ်ꩻစား)" ဗွေႏသာရိပုတ္တရာႏ လောဝ်းဗွေႏဘုရာꩻနုဲင်းယို- "ဩဗွေႏ ဘုရာꩻမျတ်ဗွေႏဩ- ၁။ တာဒိသာဝ ဝဏိဇ္ဇာ ပယုတ္တာ ဆေဒဂါမိနီ ဟောတိ- ဖြေꩻစာကူꩻကား-နုဲင်းနုဲင်းဝင်ꩻမွော့ ယင်ဟန်ႏသားနဝ်ꩻ မသွုမ်ꩻခြေင်လို့တွိုးအီဗွေႏ၊ ကွပ်အကျောင်ꩻနုဲင်းမုဲင်ꩻ၊ ပွိုးအခရာႏနုဲင်းမုဲင်ꩻဟောင်း ဗွေႏဩ"ဗွေႏသာရိပုတ္တရာႏ ရီနုဲင်းနဝ်ꩻ။ ဗွေႏဘုရာꩻရိုꩻ "သာရိပုတ္တရာႏ- လိုꩻယင်ဟန်ႏနောဝ်ꩻ လောဝ်းခါꩻနုဲင်းယို- 'နီဗွေႏလိုႏတခြိုꩻ အမျိုꩻမုဲင်ꩻတဲ့ ဒေါ့ꩻသွော့ ခွေသွဉ်း ဗွေႏဩ'၊ လောဝ်းခါꩻနုဲင်းနဝ်ꩻ၊ လောဝ်းခြေင်ကွို့ꩻထာꩻ၊ တလူႏမွေးတဝ်း၊ ပါꩻနဝ်ꩻနဝ်ꩻ တွိုႏဘဝငါ မဉ်ႏသဲင်ꩻထွာလိုꩻ၊ အမဉ်ႏဖြေꩻစာ ကူꩻကားထာꩻနဝ်ꩻ သွုမ်ꩻခြေင်လို့၊ ကွပ်ဝွေꩻလောဝ်းခြေင်ထာꩻ၊ ပွိုးဝွေꩻတလူႏတောဝ်းနောဝ်ꩻသွူ။

၂။ တာဒိသာဝ ဝဏိဇ္ဇာ ပယုတ္တာ န ယထာဓိပ္ပါယာ ဟောတိ- ဖြေꩻစာကူꩻကား-နုဲင်းနုဲင်းဝင်ꩻမွော့ ယင်ဟန်ႏသားနဝ်ꩻ ကရေႏခါꩻအတွိုင်ꩻ မထွာတဝ်းအီဗွေႏ။ ဗွေႏဘုရာꩻရိုꩻ သာရိပုတ္တရာႏ- လိုꩻယင်ဟန်ႏနောဝ်ꩻ လောဝ်းခါꩻနုဲင်းယို- 'နီဗွေႏလိုႏတခြိုꩻ အမျိုꩻမုဲင်ꩻတဲ့ ဒေါ့ꩻသွော့ ခွေသွဉ်းဗွေႏဩ'လောဝ်းခါꩻနုဲင်းနဝ်ꩻ၊ ကရေႏလူႏခါနဝ်ꩻ ရေႏလူႏဒျာႏ အဟောဝ်စား၊ ကထွိုင်ႏလူႏမွေးနဝ်ꩻ လူႏတောဒျာႏ အညမ်းစား၊ ပါꩻနဝ်ꩻနဝ်ꩻ တွိုႏဘဝငါ မဉ်ႏသဲင်ꩻထွာလိုꩻ အမဉ်ႏဖြေꩻစာ ကူꩻကားထာꩻနဝ်ꩻ ကရေႏခါꩻအတွိုင်ꩻ မွေးတဝ်း၊ ကရေႏခါꩻအတွိုင်ꩻ ထွာတောဝ်းနောဝ်ꩻသွူ။

၃။ တာဒိသာဝ ဝဏိဇ္ဇာ ပယုတ္တာ ယထာဓိပ္ပါယာ ဟောတိ- ဖြေꩻစာကူꩻကား-နုဲင်းနုဲင်းဝင်ꩻမွော့ ယင်ဟန်ႏသားနဝ်ꩻ လꩻကွို့ꩻ ကရေႏခါꩻအတွိုင်ꩻလွုမ်ꩻ၊ တလꩻလွိုဗဲင်းဒွုမ်၊ တမျတ်လွိုဗဲင်းဒွုမ်နဝ်ꩻ ကွပ်ပွိုးထမုဲင်ꩻအီဗွေႏ။ ဗွေႏဘုရာꩻရိုꩻ သာရိပုတ္တရာႏ- 'နီဗွေႏလိုႏတခြိုꩻ အမျိုꩻမုဲင်ꩻတဲ့ ဒေါ့ꩻသွော့ ခွေသွဉ်း ဗွေႏဩ' လောဝ်းခါꩻနုဲင်းနဝ်ꩻ၊ ကထွိုင်ႏလူႏနဝ်ꩻ လူႏဗော့ꩻ ကရေႏခါꩻအတွိုင်ꩻနဝ်ꩻလွုမ်ꩻ၊ လူႏလွိုတဝ်း၊ လူႏပိုႏတဝ်းနောဝ်ꩻသွူ။ ကွပ်ပွိုးနဝ်ꩻမꩻ လꩻလွိုတောဝ်း၊ မျတ်လွိုတောဝ်းနောဝ်ꩻသွူ။

၄။ တာဒိသာဝ ဝဏိဇ္ဇာ ပယုတ္တာ ပရာဓိပ္ပါယာ ဟောတိ- ဖြေꩻစာကူꩻကား-နုဲင်းနုဲင်းဝင်ꩻမွော့ ယင်ဟန်ႏသားနဝ်ꩻ လꩻအာလဲဉ်းက ကရေႏခါꩻအတွိုင်ꩻ၊ မျတ်ပွုမ်ႏမျတ်ပမ်ႏစွဉ်ႏထာꩻနဝ်ꩻ ကွပ်ပွိုးထမုဲင်ꩻဟောင်းဗွေႏ။ ဗွေႏဘုရာꩻရိုꩻ သာရိပုတ္တရာႏ- လိုꩻယင်ဟန်ႏနဝ်ꩻ လူႏအာလဲဉ်းက ကရေႏခါꩻ၊ ကရေႏလူႏနဝ်ꩻ ဆေ့ꩻပေႏတဲ့ ဝွေꩻကထွိုင်ႏလူႏမွေးနဝ်ꩻ လူႏပွုမ်ႏလူႏပမ်ႏ၊ လူႏအာမွေးစွဉ်ႏ၊ ကွပ်ပွိုးနဝ်ꩻမꩻ ပါꩻနဝ်ꩻနဝ်ꩻ တွိုႏဘဝငါ မဉ်ႏသဲင်ꩻထွာလိုꩻ မဉ်ႏဖြေꩻစာကူꩻကားထာꩻနဝ်ꩻ လꩻအာလဲဉ်းက ကရေႏခါꩻအတွိုင်ꩻ၊ မျတ်ပွုမ်ႏမျတ်ပမ်ႏစွဉ်ႏထာꩻနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ စတုက္ကနိပါတ်၊ ဝဏိဇ္ဇသုတ်)