ဖြေꩻနꩻမွူးအသိုထင်
"ကောကာလိကသုတ် (ဖြေꩻနꩻမွူးနဝ်ꩻ အသိုထင်ငါႏ၊ ဒေါ့ꩻပဲစ်မာႏမွုန်းတဝ်းဝင်ꩻ)"
တွိုႏခꩻတလဲင်ႏ ရဟန်ꩻကောကာလိက လောဝ်းဗွေႏဘု၇ာꩻနုဲင်းယို- "ဩဗွေႏ- သာရိပုတ္တရာႏ-မောဂ္ဂလာန်ႏသီးဖုံႏနဝ်ꩻ 'ပါပိစ္ဆာ-ပါပဣစ္ဆာ-ထာꩻလိုႏယွုတ်တန် ဗွေႏဩ'၊ ထွေလွဉ်ꩻဒျာႏ ထာꩻလိုႏမွိုက်၊ ကျွိုက်လွဉ်ꩻဒျာႏ ထာꩻလိုႏယွုတ်တန် ဗွေႏဩ" "ကောကာလိက- ဒေါ့ꩻမွုန်းနုဲင်းနဝ်ꩻလုဲင်း၊ ကောကာလိက- ရိုꩻမွုန်းနုဲင်းနဝ်ꩻဟုဲင်း၊ သာရိပုတ္တရာႏ မောဂ္ဂလာန်ႏသီးနဝ်ꩻ လိုꩻသီႏလသားဒျာႏ၊ လုဲင်ႏဗွုန်ႏတွမ်ႏသက် လိုꩻရက်သီႏလဖုံႏဒျာႏ၊ နာꩻပဲစ်မာႏမွုန်း၊ နာꩻဟွုန်ဟောဝ်ဒျာႏသွော့ ဝွေꩻဗွေႏသီးနဝ်ꩻနော" ကောကာလိက လောဝ်းစွဉ်ႏသွံလဲင်ႏ၊ ဗွေႏဘုရာꩻတဲ့ ရဲးခါꩻသွံလဲင်ႏ၊ ကောကာလိကနာႏတောဝ်း ဗွေႏဘုရာꩻငေါဝ်း၊ ထွိုင်ႏလင်ꩻထိုꩻစွဉ်ႏ၊ လင်ꩻထိုꩻတပေါႏညငါႏတဝ်း၊ ကောကာလိကနဝ်ꩻ ခံႏဗာႏထွူစွဉ်ႏ။ အနမ်းတဗာႏလိုမ်း ပသꩻထံထိမ်လို့စွဉ်ႏ၊ ပွစ်ꩻပတ်ꩻနေးစွဉ်ႏ၊ စစနဝ်ꩻ ပွစ်ꩻပေႏနုဲင်းထေင်ခူꩻ၊ ကွဲညညနုဲင်းဗာႏခူꩻ၊ ကွဲညည နုဲင်းစွဉ်ႏတလာꩻရာႏ၊ တနျာႏတဲက်ꩻ အိုမ်အမဉ်။ စစနဝ်ꩻ ပသꩻ၊ ကွဲညညနဝ်ꩻပꩻ၊ အထီအဝ်ႏရွဲ အဝ်ႏရုဲင်း၊ ဆာမွေးမုဲင်းစွဉ်ႏထာꩻ၊ အီႏလွေꩻထေ့ဘုရာꩻ၊ အီႏလွေꩻကန်းတော့ꩻချာ သာရိပုတ္တရာႏ မောဂ္ဂလာန်ႏသီးငါတဲ့ လွေꩻဒါႏဒွုမ်၊ ခံႏဒါႏဒွုမ်၊ ဒါႏယာႏဒွုမ်၊ "ကွပ်ငငေါဝ်းပေႏတငွါ-ထွာစွဉ်ႏနုဲင်းယို"တွော့ꩻ ကော့ꩻမာႏအနမ်းတွင်ꩻ မဲ့ထီအဝ်ႏလင်ꩻဗဲက်ဗဲက် အငွဉ်ꩻငဲက်ထိုꩻစွဉ်ႏ (သီထိုꩻစွဉ်ႏ)နောဝ်ꩻသွူ။ ကောကာလိက သီထိုꩻလဲဉ်းအကျောင်ꩻ လူꩻသီးဗျဟ္မာႏသီး လင်ꩻလောဝ်းဗွေႏဘုရာꩻ၊ ရဟန်ꩻတပါꩻ ရီဗွေႏဘုရာꩻနုဲင်းယို- "ဩဗွေႏ ဘုရာꩻမျတ်ဗွေႏဩ- ကောကာလိကနဝ်ꩻ တွိုႏလွေꩻဘွုံႏဘဝမုဲင်ꩻ ဗွေႏဩ" "ရဟန်ꩻသီးဖုံႏဟွေး- ကောကာလိကနဝ်ꩻ လင်ꩻထဲ့ 'ပဒုမငါးရုဲင်ꩻ'သူꩻသွူ"။ "ဩဗွေႏ- လင်ꩻထဲ့ ပဒုမငါးရုဲင်ꩻနဝ်ꩻဟ အီႏညကားမုဲင်ꩻနေင်ႏဟောင်း ဗွေႏဩ" "ရဟန်ꩻသီးဖုံႏဟွေး- အီႏညနေင်ႏပေါင်ꩻ ကားယိုကားနဝ်ꩻနဝ်ꩻတဲး ဒေါ့ꩻဒျက်တငွါလွုမ်ꩻနဝ်ꩻ (တိတိကျကျန၀်ꩻ) တထွာနွောင်ꩻတဝ်း၊ အဗော့ꩻသွတ်ꩻ ဥပမာႏငါမꩻလꩻ" "ဩဗွေႏ- ဒေါ့ꩻနယ်မွိုင် အဗော့ꩻသွတ်ꩻ ဥပမာႏနဝ်ꩻမွိုင် ဗွေႏဩ" "ရဟန်ꩻသီးဖုံႏဟွေး- ဥပမာႏ- ထင်ခူꩻအလောပေါင်ꩻ -ငတ်ꩻသောင်ꩻငါ၊ ပေါႏတနေင်ႏဗွေတဲ့ ဝေါင်းထိုꩻထေင်ခူꩻ-တခူꩻ၊ ထေင်ခူꩻအလောပေါင်ꩻ-ငတ်ꩻသောင်ꩻလို့သွူတဲ့ ပဒုမငါးရုဲင်ꩻ အသက်တန်ꩻလို့တောဝ်းဒွိုန်း၊ ရဟန်ꩻသီးဖုံႏဟွေး- 'ဖြေꩻနꩻမွူးနဝ်ꩻ အသိုထင်ငါႏ-ဒေါ့ꩻပဲစ်မာႏမွုန်းတဝ်းဝင်ꩻနော'ဗုဒ္ဓေါဗွေႏဘုရာꩻ မိန်းခါꩻနုဲင်းနဝ်ꩻသွူ။ (သုတ္တန်ႏပိဋကတ်၊ သဂါထာဝဂ္ဂသံယုတ်ပါဠိ၊ ကောကာလိကသုတ်)[၁][၂]