ဗွေႏဗွန်ပဏ္ဍိတ၊ ကျောင်ꩻနောင်ကာꩻ

နမ်းခြောင်ꩻအအဲဉ်ႏ

• လွူးဖွာꩻနီꩻ- ၁၂၇၆-ဗာႏ၊ တောႏလင်ꩻဆန်ꩻ ၈-နီꩻ၊ မွူးနီꩻ-ကျာႏပသတေꩻ။
• ဇာႏတိ- တောင်ႏကီꩻဝေင်ꩻနယ်ႏ ဒုံတဲႏခုဲင်ႏ။
• မွိုးဖါတွမ်ႏဖူးဝေး - စင်ꩻမွိုးနင်ꩻမူႏ+စင်ꩻဖါအောင်ႏခံꩻ၊ ဖူးဝေးပေါင်ꩻ (၁၅)ဖြာꩻ၊ နင်ႏအောင်ႏ၊ သရမောင်ႏ (လုဲင်ꩻဆရာႏ)၊ ခွန်အိုး (အသီႏပိန္တော်ꩻဆရာႏ)၊ ခွန်ဟယ်၊ နင်တွုတ်ꩻ၊ ခွန်လိန်ႏ၊ ခွန်တုတ် (တသီႏပိန္တော်ꩻဆရာႏ)၊ နင်ႏစွဲ၊ နင်ႏလွဉ်း၊ နင်ႏဖေါင်၊ ခွန်မောင်ငယ်၊ ခွန်ကံႏ၊ နင်ႏဒွီႏ၊ ခွန်ချွန်။
• ထွာသာႏမဏေႏ- ၁၂၉၂-ဗာႏ၊ ဝါႏဆိုႏလာ၊
• ဥပဇ္ဈာယ်ႏဆရာႏ - ဗွေႏဆရာႏတောႏ ဘဒ္ဒန္တဂန္ဓမာ၊ ဒုတိယကျောင်ꩻနင်း (ဂွိုဏ်ꩻထောက်ဆရာႏတောႏ)

ဘွဲ့တောႏ- သျင်ႏပဏ္ဍိတ။

သွဉ်ထူႏပညာႏ-

ဗုဲင်သျင်ႏထွူတွော့ꩻ သွဉ်ထူႏလွေꩻ ပရိယတ္တိ အခေႏခံႏ ဝိနယ်ꩻ၊ သဒ္ဒါႏ၊ သင်္ဂြိုဟ်ႏ ဗွေႏဗွန်ဂန္ဓမာႏထျꩻ (၄)နေင်ႏ၊ ၁၂၉၃-ဗာႏ ကျွꩻလွေꩻအုံတော ဝေင်ꩻပွေးလှ ကျောက်တောကျောင်ꩻတွော့ꩻ သွဉ်သွုပ်လွေꩻယင်း ဝိနယ်ꩻ၊ သဒ္ဒါႏ၊ သင်္ဂြိုဟ်ႏ ပါတွမ်ႏအဓိပ္ပါယ်ႏ (၂)နေင်ႏ၊ ၁၂၉၄-ဗာႏ ကျွꩻလွေꩻအုံတော မန္တလေꩻဘုရာꩻတန်တွိုက် ဦးဝိုင်းထျꩻ (၃)ဝါႏ၊ အသောကာရာမတွိုက် (၄)ဝါႏ စုစုပေါင်ꩻဝါႏယို နေးတွမ်ႏမန္တလေꩻ လိတ်သွဉ်နယ်ꩻတွော့ꩻ သွဉ်သွုပ်လွေꩻယင်း တယ်ႏအခေႏခံႏကျမ်ꩻ ဗꩻတွိုႏစွဉ်ႏအရန်းထို ပါတွမ်ႏအဋ္ဌကထာႏ ဋီႏကာႏဖုံႏ တွယ်ꩻဖက်သွဉ်ထူႏလွေꩻယင်းသွူ။ ထွာရဟန်ꩻ-၁၂၉၆-ဗာႏ၊ ဒဲဉ်ကံဗွေနီꩻ မွူးနီꩻ-သောကျာႏ ဗွေႏဗွန်နောင်ကာꩻထွာဥပဇ္ဈာယ်ႏ။

• ထွာရဟန်ꩻထွူသွဉ်ထူႏယင်းပညာႏ - ၁၃၀၂-ဗာႏ၊ ကျွꩻလွေꩻအုံတော ဝေင်ꩻပခုက္ကူ မဟာဝိသုတာရာမတွိုက် ရတနာသိင်္ဃကျောင်ꩻတဲင် သွဉ်ထူႏလွေꩻယင်း ဝိနယ်ꩻ(၅)ကျမ်ꩻ ပါဠိအဋ္ဌကထာ ပါတွမ်ႏဝိသုဒ္ဓိမဂ်အဋ္ဌကထာ အွိုးဒုတိယအဓိပတိဗွေႏဆရာႏတောႏ ဘဒ္ဒန္တသုန္ဒရမဟာထေရ်ထျꩻနုဲင်းနဝ်ꩻဖုံႏသွူ။

ပျုသာႏသနာႏ-

တယ်ႏနေင်ႏ ၁၃၀၃-ဗာႏ နင်းစကျောင်ꩻဇာႏတိဒုံ၊ နေင်ႏ ၁၃၀၆-ဗာႏ ဆောင်ႏရွက်ဗွောင်လွေꩻ မူလတန်ꩻကျောင်ꩻ ဇာႏတိဒုံ၊ နေင်ႏ ၁၃၀၇-ဗာႏ ဆောင်ႏရွက်အွဉ်မာꩻလွေꩻ ပထမကျောင်ꩻတန်တွမ်ႏ ဝေင်ꩻရန်ႏကုန်ႏ၊ မန္တလေꩻ ပအိုဝ်ႏကျောင်ꩻဖုံႏ၊ သွုပ်ငါပါယင်း ကျောင်ꩻတွိုက်တန်နောင်ကာꩻတွမ်ႏ ဘုရာꩻစေႏတီႏအဆူႏဆူႏဖုံႏ၊ တယ်ႏနေင်ႏ ၁၃၀၈-ဗာႏ အွဉ်နယ်ဆုံꩻမꩻလွေꩻပါ လိုꩻမုꩻရေꩻယဟန်ႏဖုံႏ၊ နေင်ႏ ၁၃၀၉-ဗာႏ အွဉ်ဟိုဆောင်ႏရွက်လွေꩻ ပအိုဝ်ႏလိတ်လုဲင်ꩻ ဘာႏသာႏ သာႏသနာႏရေꩻဖုံႏ၊ တယ်ႏနေင်ႏ ၁၃၁၂-ဗာႏနေင်ႏ နွို့မာꩻဖြေႏသျင်ꩻဖေႏ သမ္မာဖုံႏ ငဲက်(ငှက်)ဂွိုဏ်ꩻ အခြဲမ်တရျာꩻဝါဒီတွမ်ႏ ကလွိုဆန်ဒါႏ ဗုဒ္ဓအဆုံꩻအမꩻဖုံႏ၊ နေင်ႏ ၁၃၁၃-ဗာႏ နွို့ဆောင်ႏရွက်ညီꩻ ရှမ်းရိုးမဂဏသမူဟအစွိုꩻကို ဗွေႏဗွန်ထမ်းဘုရာꩻ ကထွိုင်ႏလွဉ်ႏဆꩻချာ ထူႏတာႏဝွန်ႏပါ ဂွိုဏ်ႏထောက်တာႏဝွန်ႏဖုံႏ၊ နေင်ႏ ၁၃၂၆-ဗာႏ၊ ဒဲဉ်သံ၊ ဒဲဉ်သီႏလာ နွို့ညီꩻသော့ꩻ မော်ဘီသင်္ဃာႏညီႏလာႏခံႏကိုဖုံႏ၊ နေင်ႏ၁၃၄၀-ဗာႏ နွို့ညီꩻသော့ꩻပါ ကဖွဲ့စဒါႏ ဂွိုဏ်ꩻပေါင်ꩻစွုမ်ႏသင်္ဃာႏအစွိုꩻကို၊ နေင်ႏ ၁၃၄၅-ဗာႏ ခံႏထူႏဗွေႏဆရာႏတောႏ ပထမကျောင်ꩻတန်ဩဝါဒတဲင် ဖွဲ့ဗူႏနွို့ဆောင်ႏရွက်ဖေႏ ပအိုဝ်ႏလိတ်ဉ်တွိုက် စွီႏစူစွဲပမ်းကိုရေꩻ နိကာယစွိုꩻစတဲင်နုဲင်းနဝ်ꩻဖုံႏသွူ။

လွဉ်ႏတောႏမူႏ-

နေင်ႏ ၁၃၅၃-ဗာႏ၊ တောႏလင်ꩻဆန်ꩻ(၈)နီꩻ၊ သက်တောႏ (၇၆)ဗွေ ကျွꩻလွေꩻခန်းဒျာႏ လူꩻခမ်းရပ်ခွင်ႏနဝ်ꩻသွူ။