ဗွေႏဗွန်

"ဗွေႏဗွန်"

ဇာတ်ကိုကပါသော့ꩻဒါႏလိုꩻဖုံႏ

၁။ ဗွေႏဗွန် (သက်တောႏလစ်ꩻဆီရပ်) ၂။ တကျောႏ (ဒဲဉ်သွမ်ꩻပသာသား) ၃။ ဗွေႏသျင်ႏနီပါꩻ ၄။ စင်ꩻဖါသော်ꩻ (ဖြားဒုံ၊ သက်လစ်ꩻဆီရပ်) ၅။ တမွစ် (လိုꩻပေႏသက်သွံနေင်ႏရပ်) ၆။ တပျာꩻ (ယာသား၊ သက်သုမ်ဆီရပ်)

ဇာတ်ခြေင်ႏပွုံႏ

ဇာတ်ခြေင်ႏနဝ်ꩻ ဗွိုန်ဗာႏဗွေႏဗွန်ကျောင်ꩻတကျောင်ꩻ၊ ဗွေႏဗွန်ခင်ႏလံးအုံတပန်ꩻလောင်း၊ ဗွေႏဗွန်ခင်ႏလံးထျꩻနဝ်ꩻ မွဉ်သုမ်စဲင်ႏ၊ ပြူးအဲပ်ꩻ၊ ယာထူတွိုက်၊ ဆွေႏအင်ႏဖုံႏအဝ်ႏဗာႏ။

အခန်ꩻ(၁)

မွူးရဝ်ꩻခိုႏ ခိန်ႏပသာဒဲဉ်သွမ်ꩻ- သဲစ်ကထွို့ꩻကီဖုဲင်ကင်းလဲ့ ဗွေႏဗွန်နဝ်ꩻ အဝ်ႏအုံသော့ꩻဗာႏ ခင်ႏလံးအုံ တပန်ꩻလောင်း၊ ယိုအတွင်ꩻ တကျောႏ အဝ်ႏဇာတ်ခြေင်ႏဖဲ့ꩻစေႏ နွို့လွဉ်၊ လွဉ်အုံလင်ꩻဝုဲင်ႏဗာႏ ဗွေႏဗွန်သွံလဲင်ႏ။ ဗွေႏဗွန်။ ။ လိုႏထာꩻမုဲင်ꩻတကာႏ ။ တကျောႏ။ ။ ပသာဒျာႏဒဲဉ်သွမ်ꩻဩ ။ ဗွန်။ ။ အော်-- ဟန်ႏရဝ်ꩻ သီဒဲဉ်သွမ်ꩻလဲ့ꩻ မွေးဟနော်ꩻ၊ မာꩻထင်ႏဟန်ႏအိုမုဲင်ꩻဟွောန်ႏ ။ ကျောႏ။ ။ အုမ်းထင်ႏဟန်ႏလွူးဩ ။ ဗွန်။ ။ နံးမန်ꩻနွုမ်ꩻတဝ်းယင် ။ ကျောႏ။ ။ (ပယွုမ်းပါ ဒေါ့ꩻပါ) နွုမ်ꩻတူႏတူႏတန်ႏတန်ႏသနယ် ဗွေႏ၊ နံးမန်ꩻကကားက၊ တပလဲင်ꩻ ကွတ်ꩻစွဲးနဝ်ꩻဩ ။ (ထေလိတ်ဆဲင်ꩻထုံꩻကိုတဲင် ကပ်ဗွေႏဗွန်) ဗွန်။ ။ (ထူႏလိတ် ဗွောင်ဟော်ꩻထွား၊ ဟော်ꩻထင်ႏထွူနဝ်ꩻ ငေါက်ꩻခန်းမုနိ သုမ်လဲင်ႏ) ကျောႏ။ ။ လိတ်ထာꩻမုဲင်ꩻဗွေႏ၊ ပါꩻမုဲင်ꩻဖေႏ ။ ဗွန်။ ။ ဗွေႏသျင်ႏ အဝ်ႏတောင်ႏကီꩻ ကွီသဲင်ꩻ ဝတ္ထုတဲ့ယို ။ ကျောႏ။ ။ မွော့ကွီသဲင်ꩻတဝ်း အတကာႏထျꩻ၊ ကွီတောဒျာႏ နီဗွေႏအီး ။ ဗွန်။ ။ န၀်ꩻတန်သနယ်၊ အောဝ်ႏဖေႏကျင်ꩻတွော့ꩻ ကွီသဲင်ꩻခွေခါႏခါႏ၊ ကွီသဲင်ꩻ အတကာႏခါႏခါႏ ။ ကျောႏ။ ။ ပါꩻမုဲင်ꩻပိုဩ ။ ဗွန်။ ။ တမူꩻဒုံခိုႏပို သျင်ႏလှထွန်းနဝ်၊ ဗွေႏသျင်ႏယို အဉာဏ်ႏသမ်းဟောဝ်မွော့၊ လိတ်တဲ့ တနေင်ႏတတန်ꩻယို အဝ်ႏအောင်ႏဒျာႏ ။ ကျောႏ။ ။ အော်--အော်--- ဗွေႏသျင်ႏနဝ်ꩻနဝ်ꩻ အလွိုးသမ်းလိန်ႏမာႏ၊ တွိုႏအဖါနောဝ်ꩻ ထွာဒျာႏ ယာအေႏ၊ သညင်ꩻတေားစွဉ်ႏ အတကာႏမ ။ ဗွန်။ ။ အွူတန်နဝ်၊ ယူႏဒျာႏအဖါနဝ်ꩻ လိုႏဖေႏတောဝ်း၊ ယူႏဒျာႏလိုꩻပေႏနာႏငဝ်းလဲ့ သမ်းသညင်ꩻ ။ (ယိုအတွင်ꩻ ဗွေႏသျင်ႏတပါꩻ အဝ်ႏဇာတ်ခြေင်ႏဖဲ့ꩻထွေနွို့လွဉ်၊ အုံလင်ꩻကန်းတော့ꩻ ဗွေႏဗွန် သုမ်လဲင်ႏထွူတဲင်ရီ) သျင်ႏ။ ။ ခွေသွဉ်း သဲင်ꩻလံးဩ ။ ဗွန်။ ။ သဲင်ꩻမာꩻထာꩻမုဲင်ꩻ၊ အီႏသွုံꩻသွူသွမ်ꩻနဝ် ။ သျင်ႏ။ ။ ခွေသွဉ်းဖူးထင်ႏဟဲ့ꩻ၊ သဲင်ꩻသွုံꩻသွမ်ꩻလံးတဲ့ဩ၊ ခွေသွဉ်းတကာႏ အဝ်ႏဝင်ꩻသဲင်ꩻ ဖြေꩻသဲင်ꩻဟန်ႏအိုအွီႏတဲ့ဩ ။ ဗွန်။ ။ (ငဝ်းစွပ်ꩻအနေႏ ပယွုမ်းပါ ဒေါ့ꩻပါ) နဝ်ꩻက ခွေလဲ့ သဲင်ꩻလွဉ်ဗာႏနာꩻမတဝ် ။ သျင်ႏ။ ။ သေတဝ်းဩ ။ ဗွန်။ ။ သေတဝ်းနဲ့ရိုꩻ၊ (အုံယေန်ပသာႏ) သဲင်ꩻဟုဲင်းလꩻဒျာႏ ။ သျင်ႏ။ ။ (သꩻရေꩻငါႏတဲင် သေကန်းတော့ꩻဒွုမ် ဗွေႏဗွန်၊ ထွိုင်ႏသဲင်ꩻဗော့ꩻနုဲင်းနဝ်ꩻ။) ဗွန်။ ။ (သာတန်ထာꩻတဲင်ဒေါ့ꩻ) ဟွူ- မာꩻဝင်ꩻဗွေႏဗွန်ယို တယိုꩻတောဝ်း၊ တွိုႏအပိုနဝ်ꩻ မဲဉ်ဖေႏအံႏအွီႏတဲင် ဟဲ့ꩻသဲင်ꩻနေးလံး၊ တွိုႏအဆရာႏနဝ်ꩻ ပြူး'မောက်ꩻမူးပေႏငါလဲ့ သေဖြေꩻကပ်တဝ်း ။ ကျောႏ။ ။ အွဉ်ႏဗာႏသꩻတန်တန်၊ သꩻဆွာꩻဆွာꩻသနဲ့ဗွေႏ၊ ဗုဲင်ဘုရာꩻဖြို့ꩻ ဒို့ꩻဘုရာꩻပီ ဖြဲ့ꩻပါႏရမီႏက ။ ဗွန်။ ။ နုဲင်းနဝ်ꩻသွူ တကာႏ၊ မာꩻဒါႏကဲနုဲင်းမုဲင်ꩻ၊ တွိုႏထာꩻတသေတဝ်းက ။ ကျောႏ။ ။ ခွေသွဉ်းလဲ့ သဲင်ꩻဒွိုန်းဩ ။ (ကန်းတော့ꩻသွံလဲင်ႏထွူတဲင် ထန်ႏလွေꩻခန်း ဇာတ်ခြေင်ႏဖဲ့ꩻထွေ) (ချꩻလင်ꩻဗာႏဖါကင်းယွယွ)

အခန်ꩻ(၂)

မွူးယာခိုႏ နားရီႏ ၁၂-ခွယ်ꩻရပ် သဲစ်ကထွို့ꩻကီဖါကင်းလဲ့ ဗွေႏဗွန်အဝ်ႏကိန်ꩻယာဗာႏထာꩻ တပန်ꩻလောင်း ခင်ႏလမ်းအုံကို၊ ယိုအတွင်ꩻ ဗွေႏသျင်ႏတပါꩻ အဝ်ႏဇာတ်ခြေင်ႏဖဲ့ꩻစေႏနွို့လွဉ်၊ ငွိုးလွဉ်ဗာႏထာꩻ၊ လွဉ်အုံထွိုင်ႏတနွောင်း တပန်ꩻထျꩻ။ ဗွန်။ ။ (ဗွောင်မဲ့ငါတဲင်စွော့ꩻ) မာꩻထာꩻမုဲင်ꩻငွိုးထာꩻနောဝ်၊ ဗေင်ႏငါထာꩻငါလဲ့ ဗေင်ႏဗာႏဟဝ်တဝ်း သီယိုဟ ။ သျင်ႏ။ ။ (ငွိုးပါ ဒေါ့ꩻပါ) ဟွူး- ဟွူး- ဟွူး ဟွူး- သျင်ႏမောင်ႏမာꩻခွေသွဉ်းဩ ။ ဗွန်။ ။ အမာꩻနာꩻစွိုးမုဲင်ꩻ ။ သျင်ႏ။ ။ တျက်ꩻခွေသွဉ်းကတူႏဩ၊ ဟွူး-ဟွူး-ဟွူး ဟွူး-ဟွူး ။ ဗွန်။ ။ (သွꩻတဆွာꩻတဝ်းပွုံႏတဲင်) တေ့ꩻ- ငွိုးပုဲင်ꩻဒွုမ်၊ မွူးဟာဝုဲင်ႏဘုရာꩻထွူမဲ့ꩻ တွယ်ႏဖေႏနာꩻ ။ သျင်ႏ။ ။ (တေ့ꩻထွူတဲင် ထန်ႏလွေꩻခန်း ဇာတ်ခြေင်ႏဖဲ့ꩻစေႏ) ဗွန်။ ။ ဟွူ- ဗေင်ႏငါထာꩻလဲ့ ဗေင်ႏဗာႏဟဝ်တောဝ်းကနေား (ကုတ်မုနိ ကိန်ꩻချာယင်း) (အဝ်ႏတဆင်ႏ စင်ꩻဖါသော်ꩻ အဝ်ႏဇာတ်ခြေင်ႏဖဲ့ꩻထွေနွို့လွဉ် အုံလဲင်ꩻဝုဲင်ႏသွံလဲင်ႏထွူတဲင်) သော်ꩻ။ ။ ဗွေႏဗွန်ကိန်ꩻယာထာꩻဟောင်း ။ ဗွန်။ ။ (ဟွိုန်တဝ်း) သော်ꩻ။ ။ ကိန်ꩻယာထာꩻနဲ့ဗွေႏ ။ ဗွန်။ ။ သျီ--- (ဗွောင်မဲ့ငါတဲင်ထွား) နာꩻဒျာႏနဲ့ဟွောန်ႏ ။ သော်ꩻ။ ။ အေား- ခွေသွဉ်းဒျာႏ၊ နီဗွေႏအွဉ်ႏလူႏခံႏ ရွဉ်တောင်ႏတာႏနောဝ်ꩻ လꩻဗွေတဝ်းဩ။ ဗွန်။ ။ လꩻခွိုင်းမုဲင်ꩻအီ လိုႏအာတန်နဲ့ ။ သော်ꩻ။ ။ လꩻတသောင်ႏဒျာႏ၊ လိုႏနေနီရေင်ဩ၊ နီဗွေႏအွဉ်ႏလူႏခံႏ တသောင်ꩻနီရေင်ကရိုဩ ။ ဗွန်။ ။ အွူ (အုံယေန်ပသာႏ) ဗော့ꩻလိုႏနေနီရေင်က အီႏမာꩻစွိုးမုဲင်ꩻတန်နဝ်၊ နာꩻလူႏခံႏစွစ်ꩻတဝ်းယင် ။ သော်ꩻ။ ။ စွစ်ꩻဒျာႏဩ၊ ယလံးလံးနဝ်ꩻ ထင်ႏထဲင်းနီလဲင်ႏ၊ အလွိုးတလꩻတဝ်းဒွုမ်ဗာႏဩ ။ ဗွန်။ ။ ဗော့ꩻနဝ်ꩻ နီရေင်နဝ်ꩻ အလွိုးခွေစဲက်ဗာႏကနဝ်ꩻ၊ တယဝ်းဝွေꩻ ဝင်ꩻကမာꩻနေးကသွိုးပွယ်ꩻ ။ သော်ꩻ။ ။ တောင်ꩻပြန်ႏစံꩻ၊ မီႏလꩻလဲ့လꩻ၊ မီႏလꩻတဝ်းလဲ့ စဲက်ဖေႏယို့ꩻ၊ တွိုႏဆုဲင်ꩻ မီႏကေပ်ꩻယင်းရွဉ်အလင်မဲ့ꩻ ချင်ႏကေပ်ꩻပိုႏပါယင်းလဲ့ လꩻဒျာႏဩ ။ (ထေပဲက်ဆန်တဲင် ကပ်ဗာႏဗွေႏဗွန်) ဗွန်။ ။ (ထူႏလက်ခံႏရွဉ်ထွူတဲင်) ထာꩻဆုဲင်ꩻနဝ်ꩻ တွက်တလꩻတဝ်း တကာႏ၊ မီႏလꩻလဲ့ ဟောဝ်မို့မို့၊ မီႏတလꩻတောဝ်းလဲ့ ခွေလူႏဒျာႏ ။ သော်ꩻ။ ။ ဖေႏကလꩻနောဝ်ꩻ မဲ့ꩻခွေသွဉ်းကျိုꩻစာꩻဒျာႏဗွေႏ၊ (အုံယေန်ပသာႏ) ရွဉ်တောင်ႏတာႏ အမျိုꩻမုဲင်ꩻဗွေႏ ။ ဗွန်။ ။ သွံစွိုး တကာႏ၊ ဝေင်ꩻနယ်ႏလိတ်လုဲင်ꩻ ရွဉ်တောင်ႏတာႏ၊ ဗဟိုႏလိတ်လုဲင်ꩻ ရွဉ်တောင်ႏတာႏ၊ ပိဋကတ်ဗိမာန်ႏ ကျောက်လွုံꩻတာႏ ။ သော်ꩻ။ ။ အော် - အော် (အုံယေန်ပသာႏ) ဟန်ႏနေင်ႏနဝ်ꩻ ထာꩻကားငါႏကဗွေႏ၊ ရွဉ်ခြောလွနာႏ၊ ယလံးလံးနဝ်ꩻ နံးမန်ꩻငါလဲ့ အံႏဗာႏတဝ်းကဩ ။ ဗွန်။ ။ မွေး တကာႏ၊ အခေတ်ထွာက မာꩻဒါႏကီနုဲင်းမုဲင်ꩻ၊ မီႏရိုꩻ ခွန်တဟောဝ်တဝ်းလဲ့ သမ်းခတ်ꩻခွန်နားက၊ ရိုꩻဗော့ꩻ နမ်းဟဝ်တဝ်းနဝ်ꩻ ထွူယိုꩻ ။ သော်ꩻ။ ။ နီသွဉ်းသီး လိုꩻထံꩻယို တွမ်ႏသေင်ႏလာႏနဝ်ꩻ ဗွိုန်ဝင်ꩻကဗွေႏ၊ အဝ်ႏစွဉ်ႏထာꩻဆူႏ ကဆော့ꩻလွဉ်းလွဉ်း (အုံယေန်ပသာႏ) ခွေသွဉ်းသဲင်ꩻကဩ ။ ဗွန်။ ။ အွူ - ဟဝ်ငါႏတကာႏ၊ ကားနဲ့ꩻ တကာႏအွဉ်ႏရေꩻဖေႏ ။ သော်ꩻ။ ။ (ကန်းတော့ꩻသွံလဲင်ႏထွူ ထန်ႏလွေꩻခန်း ဇာတ်ခြေင်ႏအထွေဖဲ့ꩻ)။ (အွဉ်ႏလင်ꩻဖါကင်းယွယွ)

အခန်ꩻ(၃)

မွူးယာခိုႏ (၃)နားရီႏရပ်။ သဲစ်ကထွို့ꩻကီဖါကင်းလဲ့ ဗွေႏဗွန်အဝ်ႏအုံဗာႏ တပန်ꩻလောင်း ခင်ႏလမ်းအုံကို၊ အဝ်ႏယာဗာႏပြူး၊ ယိုအတွင်ꩻ တမွစ် အဝ်ႏဇာတ်ခြေင်ႏဖဲ့ꩻစေႏနွို့လွဉ်၊ လွဉ်အုံတနွောင်းဗာႏ ဗွေႏဗွန်ဆꩻငါ။ မွစ်။ ။ ဖေႏဗဲင်း နာꩻထထီႏမွိုင် ။ ဗွန်။ ။ (ငပယွုမ်းထာꩻတဲင်) တထီႏအဲဉ်ထဝ်း ။ မွစ်။ ။ အ၀်ႏ ။ ဗွန်။ ။ ပါꩻမုဲင်ꩻရိုꩻအဝ်ႏ ။ မွစ်။ ။ ဝင်ꩻရိုꩻ ။ ဗွန်။ ။ ဝင်ꩻနဝ်ꩻ ပါꩻမုဲင်ꩻ ။ မွစ်။ ။ ဝင်ꩻ ။ ဗွန်။ ။ နာꩻနဝ်ꩻ ပါꩻမုဲင်ꩻပို ။ မွစ်။ ။ နီမွိုးပို ။ ဗွန်။ ။ သီမွိုးနဝ်ꩻ မဉ်ꩻစွိုးမုဲင်ꩻ ။ မွစ်။ ။ မဉ်ꩻနီမွိုး ။ ဗွန်။ ။ သီဖါက မဉ်ꩻစွိုးမုဲင်ꩻ ။ မွစ်။ ။ မဉ်ꩻနာꩻ ။ ဗွန်။ ။ (စင်းရိုꩻဒွုမ်တဲင် ထူႏတခိုးထုတ် မွဉ်ထျꩻ ဖေႏခန်းတမွစ်) ယော့ꩻ - ထထီႏအဲဉ်ထဝ်းက၊ ထူႏဗော့ꩻ တခိုးယိုဟုဲင်း ။ မွစ်။ ။ (တွမ်ႏစူနီပင် ထူႏတခိုးထုတ် ဗွေႏဗွန်စူကို၊ ဗွေႏဗွန်အွဉ်ႏစွꩻတဝ်းတဲင် ငင်ႏနွိုင်ႏနေးဗာႏ၊ ဗွေႏဗွန်အွဉ်ႏစွꩻဗာႏ)။ ဗွန်။ ။ ဆုဲင်ꩻကွီပုဲင်ႏဒွုမ်နေား ။ မွစ်။ ။ အွူ-ဩ (သꩻရောင်းသꩻရေꩻတဲင် နဲစ်ဖင်းထန်ႏဗာႏ ဇာတ်ခြေင်ႏအစေႏဖဲ့ꩻ) (ယိုအတွင်ꩻ တပျာꩻအဝ်ႏဇာတ်ခြေင်ႏ အထွေဖဲ့ꩻနွို့လွဉ်၊ စူကိုနဝ်ꩻ ခွုမ်ပါဗာႏတွမ်ႏ နꩻမွူး၊ တွိုႏဗွေႏဗွန်ဆꩻငါနဝ်ꩻ အွဉ်ႏလင်ꩻနꩻမွူး၊ ဝုဲင်ႏဝတ္တရာꩻကေႏဗော့ꩻထာꩻ) ဗွန်။ ။ တွမ်ႏနꩻမွူး အီႏမာꩻမုဲင်ꩻနဝ် ။ ပျာꩻ။ ။ ကွီဗဲင်း နီဗွေႏဝါႏဩ ။ ဗွန်။ ။ ဖြေꩻနေးမွိုင်၊ ကွီဗဲင်းနေးခန်းနဝ် ။ ပျာꩻ။ ။ ရွဉ်အဲဉ်ထဝ်းကဗွေႏ ။ ဗွန်။ ။ လွꩻက၊ မော့ꩻအွိုးမုဲင်ꩻရွဉ်အဝ်ႏ၊ ဝင်ꩻကလုပ်ꩻ၊ ဝင်ꩻကမာꩻ၊ အုံဗော့ꩻလမ်း ပနီꩻနီꩻက ။ ပျာꩻ။ ။ အဝ်ႏလုပ်ꩻဒျာႏအီဗွေႏ၊ နီဗွေႏတထီႏလွဉ်ꩻတဝ်းက ။ ဗွန်။ ။ လုပ်ꩻက ရွဉ်မွော့ခြောအီ ။ ပျာꩻ။ ။ ခြောနေနေသနယ်ဗွေႏ၊ ဖေႏဒျာႏကရိုဗွေႏ နီလီးလွုမ်ꩻ ။ ဗွန်။ ။ မာꩻအီထာꩻမုဲင်ꩻ၊ ကွီဗဲင်းဝါႏထာꩻမုဲင်ꩻတွော့ꩻ နုဲင်းစွဉ်ႏစွန်က ။ ပျာꩻ။ ။ ဒါအီ ပနာအော်၊ တွာပနာဖြင်းထိုꩻအော် ။ ဗွန်။ ။ တလီးငါမွိုင် ။ ပျာꩻ။ ။ နီလီးမꩻဗွေႏ လင်ꩻဖဲ့ꩻသွူဩ ။ (ဝုဲင်ႏပရီႏပရာႏထွူတဲင် ထန်ႏလွေꩻဇာတ်ခြေင်ႏဖဲ့ꩻစေႏ) ဗွန်။ ။ (ထွားလွဉ်ꩻတပျာꩻတဲင်) ယာသားမွ၊ ယာသားကေန်ꩻ ။ (အွဉ်ႏလင်ꩻဗာႏ ဖုဲင်ကင်းယွယွ) (ထွူလဲဉ်းသွူ)