ဗွေႏမဟာႏမောဂ္ဂလာန်ႏ

"ဗွေႏမဟာႏမောဂ္ဂလာန်ႏဝတ္ထု" ၁၃၇။ ဂါႏထာႏပြန်ႏပအိုဝ်ႏခြေင်ခြေင်- ပါꩻမုဲင်ꩻရိုꩻတဝ်း လိုꩻအပဲစ်အဲက်ထဝ်းအလောင်း လိုꩻပဲစ်မာႏဒါႏတဝ်း ဝင်ꩻအလောင်းနဝ်ꩻ တွမ်ႏနမ်းတဲ့နဝ်ꩻ၊ တွမ်ႏငေါဝ်းလဲ့သင် ပဲစ်မာႏဗာႏ၊ ကပဲစ်မာႏဗာႏပါꩻနဝ်ꩻနဝ်ꩻ အပဲစ်အီႏခံႏ-တံႏအမျိုꩻတဆီအကို တံႏတဗာႏဗာႏယို မွိုင်ကြွိုင်ယိုခါ အီႏခံႏဗာႏချာစွဉ်ႏနဝ်ꩻသွူ။

၁၃၈။ ကတူႏဆာငါႏ ဝွေႏဒနာႏအတဝ်စား တရိုꩻတဝ်း၊ ကလꩻထွူတခြိုꩻ သွုမ်ꩻခြေင်ထိုꩻတရိုꩻတဝ်း၊ စူခင်ႏထို့ဒါႏ အင်္ဂါႏကုဲင်ထိုꩻတရိုꩻတဝ်း၊ ရောႏဂါႏတန်ဗွို့ꩻ သီတကွို့ꩻသီတခေါဝ်ထာꩻဆာတောဝ်တရိုꩻတောဝ်း၊ ရူꩻရာꩻလော်လယ် ကွင်ကွယ်ဗားဗီး တရိုꩻတဝ်း တွိုႏဗာႏစွဉ်ႏ ဘဝနုဲင်းနဝ်ꩻဖုံႏသွူ။

၁၃၉။ မော့ꩻဗာႏခွန်တံႏ၊ ခံႏဗာႏသွုမ်ꩻခြေင်ထိုꩻ တရိုꩻတဝ်း၊ ခံႏဗာႏတဲးဝါး ဝင်ꩻယားတရေႏ တရိုꩻတဝ်း၊ ပိုလီꩻတင်ꩻလုဲင် ပြင်ꩻကုဲင်ပꩻလီ သီထိုꩻတရိုꩻတဝ်း ရွဉ်ခံꩻတခြိုꩻ သွုမ်ꩻထိုꩻကုဲင်အာ တရိုꩻတဝ်း တွိုႏဗာႏစွဉ်ႏ ဘဝနုဲင်းနဝ်ꩻဖုံႏသွူ။

၁၄၀။ တရာꩻဂါႏထာႏ ပြန်ႏပအိုဝ်ႏခြေင်ခြေင်- နောဝ်ꩻလွုမ်ꩻတကာႏတဝ်း ကပဲစ်မာႏဒါႏဝင်ꩻသား အလမ်းအပါႏဖုံႏနဝ်ꩻ တျာႏဆေႏ-မေႏခိုးထိုꩻဒါႏ၊ အလျားတစွိုးစွိုး အဝ်ႏလွိုႏလွိုႏ ခိုးထိုꩻဒါႏ၊ အဲဉ်ထဝ်းပညာႏ ကပဲစ်မာႏဒါႏဝင်ꩻ ပါꩻနဝ်ꩻနဝ်ꩻ ခန္ဓာႏကုဲင်လီ မဉ်ႏသီထွူနဝ်ꩻ အီႏတွိုႏဆုဲင်ꩻထွာ ငါးရုဲင်ꩻခြာသူꩻသွူ။

ဟော်ꩻထွားသွဉ်ဗာႏ "ဗွေႏမဟာႏမောဂ္ဂလာန်ႏ"ဝတ္ထုယိုတဲင် "လꩻဗဟုသုတ၊ လꩻသတိꩻနုဲင်းယို"

၁။ ပေါႏမာꩻကုသိုလ်ႏနောဝ်ꩻ တွိုႏထင်ႏဗာႏလူꩻခမ်း၊ ပေါႏမာꩻအကုသိုလ်ႏနဝ်ꩻ လင်ꩻထဲ့ဗာႏငါးရုဲင်ꩻ-

၂။ ဝင်ꩻကကေႏညိုႏ ပုဂ္ဂိုလ်ႏနဝ်ꩻနဝ်ꩻ ပူႏဇောႏသက္ကာရ၊ လာဘ်လာဘလွိုင်ႏအာ-

၃။ ပေါႏတနာႏလိုႏတဝ်းဝင်ꩻနဝ်ꩻ တွိုႏဒါႏထာꩻကျံႏသီဝင်ꩻ-

၄။ ပေါႏမာꩻသီသွူဝင်ꩻနဝ်ꩻ ကမာꩻသီသားတဲ့ သီဗာႏ၊ မော့ꩻဗာႏထာꩻဒုက္ခ၊ နေင်ႏပေါင်ꩻညတန်-

၅။ လိုꩻမူႏရက်မွိုးဖါ-ရက်ဖူဖီနောဝ်ꩻ လိုꩻမူႏလိန်ႏမာႏ၊ ပေါႏရက်တဝ်းမွိုးဖါ ပေါႏလွꩻထီႏဖီနဝ်ꩻ လိုꩻမူႏကုဲင်၊ လိုꩻမူႏဗော့ꩻဗဲ့၊ လိုꩻမူစောက်ခဲ့က်၊ လိုꩻမူႏသောက်သဲ့က် ကဲဉ်းအာအာ-

၆။ လိုႏရက်စွူစွူဒျာႏ မွိုးဖါ၊ မွိုးဖါနဝ်ꩻ ထုမ်ႏတသာသာထဲင်းတလꩻတဝ်း-

၇။ လိုႏယွုမ်းတငါတငီတဝ်း မာငေါဝ်း၊ မာနဝ်ꩻ ထုမ်ႏတသာသာဖျင်လꩻဒျာႏ-

၈။ မောဂ္ဂလန်ႏအလောင်ꩻ သူႏတောႏကောင်ꩻတဖြာꩻ ယွုမ်းမာႏမာငေါဝ်း လွစ်တဝ်းငါးရုဲင်ꩻ၊ ဝွဋ်ဆုဲင်ꩻကံႏစော့ꩻ မော့ꩻဗာႏနေကဒုက္ခ သံႏဝွေႏဂ လꩻခရာႏတန်-

၉။ "ဝွဋ်"ကရိုꩻနဝ်ꩻ ပြွတ်တလꩻတဝ်း၊ ဗွေႏစောဝ်းဗုဒ္ဓ သာဝကရဟန္တာႏ၊ ခံႏဗာႏဒျာႏနေနေ-စတဲင်နုဲင်းနဝ်ꩻ သေထွꩻလꩻအီသတိꩻအာတန်သွူ။