ဘာႏသာႏငဝ်းယေန်ႏငဲးမုꩻ
ထာꩻရာꩻယေန်ႏငဲးမုꩻဆဲင်ႏရာꩻတဗာႏယို ယိန်းလဲဉ်းရီးတဲ့ အငိုꩻယိန်းထွိုက်ထွိုက်သွူ၊ ပကီႏကာꩻကရီးခါတဗီႏနဝ်ꩻ ယေန်ႏငဲးမုꩻအငိုꩻ ယိန်းအာကယ်ꩻထဲင်းက ပကီႏကာꩻအဆုဲင်ꩻယိုသွူ၊ ဘုရာꩻဆွေႏတဂုံႏစေႏတီႏနဝ်ꩻ လဲဉ်းရီးကယ်ꩻလဲဉ်း ဘုရာꩻကမ္ဘာအေးစေႏတီႏတဲင် ယေန်ႏငဲးမုꩻအငိုꩻယိန်းတန်ကယ်ꩻ (ကမ္ဘာအေးစေႏတီႏ)သွူ၊ ဗိုန်ပီနဝ်ꩻအတွိုင်ꩻ ပကံႏစိုးလိတ်လုံးတဗီႏနဝ်ꩻ ယေန်ႏငဲးမုꩻအငိုꩻထွိုက်ကယ်ꩻက လိတ်ကတွဲႏနျꩻခေတ်ယိုခါသွူ၊ ကောပ်နဝ်ꩻမꩻ လိတ်လီꩻလိတ်စခါယို နီအွဉ်ႏတန်ႏဖိုꩻ အွဉ်လို့ဝင်ꩻဖြေꩻထူႏလွဝင်ꩻဖုံႏသွူ။ ပွိုင်းဝွို့တွမ်ႏ"ထာဝယ်"ငဝ်းတဲင် ယိုကိုခြာနဝ်ꩻ မဉ်တဲမ်းနယ်တစိꩻပေႏ၊ ခွေသွဉ်းအဝ်ႏထွာ ကောလေက်ကျောင်ꩻသားဘဝ အရီးသွတ်ꩻ တွိုႏလွေꩻထာဝယ်ဝေင်ꩻတဲင် မော့ꩻခွဲးဗာႏတွမ်ႏ ထေင်းထံꩻအမုꩻသား ဝင်ꩻအိုပ်ဝေင်ꩻထောက်ဖုံႏသွူ၊ ဝွေꩻသီးဖုံႏနဝ်ꩻ အဝ်ႏပျောႏလွဒျာႏ ထာဝယ်ဝေင်ꩻရိုꩻကီလဲ့ ပိုခိုပိုမူႏဖုံႏမဉ်ႏဒေါ့ꩻငဝ်းနဝ်ꩻ အဝ်ႏငမ်းလွစွဉ်ႏ အထာဝယ်ငဝ်းဖြွောင်ႏတဝ်းဖုံႏသွူ။ ထာဝယ်ငဝ်းယို တယေန်ႏကေႏတဝ်း နုဲင်းမန်းကအဝ်ႏဒေါ့ꩻငဝ်း ဝေင်ꩻရန်ႏကုန်ႏကို ဝွေꩻသီးအဝ်ႏထင်းလွနုဲင်းနဝ်ꩻဖုံႏ၊ နေင်ႏပေါင်ꩻထွိုင်ႏည ခွေသွဉ်းထွိုင်ႏလွူꩻ လိတ်လုံးပကံႏခိင်ႏနဝ်ꩻ လိတ်လုံးပကံႏကို ငဝ်းယဟန်ႏဟန်ႏနဝ်ꩻ အလွေꩻဗိုန်ပီထာဝယ်ငဝ်းအကျောင်ꩻ ထီႏလွဉ်ဗာႏနုဲင်းနဝ်ꩻသွူ။ ဥပမာႏ- ထာဝယ်ငဝ်းကို ကျ၊ ကျား၊ ကျောက်၊ ကျောင်း၊ ကျိုး၊ ကျွတ်၊ ချချောင်း၊ ချိုး-စတဲင်ဖုံႏအကို ယ-ပယ်ငဝ်းတမွေးတဝ်းတွော့ꩻ ဟွုန်ဒျာႏ လ-ပင်ႏငဝ်းသွူ။ ပြည့်၊ ပြန်၊ ပြေး၊ ပြောင်းပြန်၊ မြစ်၊ မြေ၊ မြေး-စတဲင်ဖုံႏအကို ရ-ဗဲဉ်ငဝ်းတမွေးတဝ်းတဲင် ဟွုန်ဒျာႏ လ-ပင်ႏငဝ်း၊ ပကံႏလိတ်လုံးဖုံႏအကိုလဲ့ ငဝ်းနုဲင်းနဝ်ꩻဖုံႏနဝ်ꩻ ယ-ရခင်ႏလမ်းကိုနဝ်ꩻ အဝ်ႏဒျာႏ လ-ပင်ႏနဝ်ꩻသွူ။ နဝ်ꩻမꩻ ပကံႏခေတ် လ-ယို တဲမ်းနုဲင်းယိုခါ ယ-ရငဝ်းလဲ့ ထာဝယ်ငဝ်းကိုနဝ်ꩻ ဗꩻယိုခါ အဝ်ႏဟွုန်နေကဒွိုန်း လ-ပင်ႏငဝ်း၊ လ-ငဝ်းဖေႏကထန်ႏနဝ်ꩻ ဖြေꩻသောင်နီဖဲ့ꩻ တလီꩻမိဉ်ႏတထန်ႏတဝ်းနဝ်ꩻ ယ-ငဝ်းထန်ႏ၊ တနယ်ꩻ- အဝ်ႏအငဝ်းယပ်ꩻ လ-တဲင် ပြောင်ꩻထိုꩻအငဝ်းယိုꩻ ယ-နုဲင်းနဝ်ꩻတဲ့ လꩻဒျာႏသွူ။ ပကံႏလိတ်လုံးဖုံႏအကိုနဝ်ꩻ ကျွန်၊ ကျစွာ၊ ကျပ်-စတဲင်ဖုံႏယို ယလဲင်ႏလဲင်ႏ ယ-ပယ်၊ ယလဲင်ႏလဲင်ႏ လ-ဗဲဉ်နေးသွူ၊ မြောက်၊ မြောင်-စတဲင်ဖုံႏလဲ့ ယလဲင်ႏလဲင်ႏ ရ-ဗဲဉ်၊ ယလဲင်ႏလဲင်ႏ လ-ဗဲဉ်နေး၊ ချင်၊ ကျ၊ ကျက်၊ ကျပ်၊ ကျား၊ ကျောင်း၊ မျို၊ မျော-စတဲင်ဖုံႏအကို ယ-လဲ့ပယ်ဒျာႏ၊ လ-လဲ့ဗဲဉ်ဒျာႏနဝ်ꩻသွူ။ ထာဝယ်ငဝ်းအကိုလဲ့ ချိုး၊ သင်္ချိုင်း၊ ဖြူ၊ ပြွန်-စတဲင်ကို ယလဲင်ႏလဲင်ႏ ဟွုန်ဒျာႏ ယ-ပယ်ငဝ်း၊ ယလဲင်ႏလဲင်ႏ ဟွုန်ဒျာႏ လ-ဗဲဉ်ငဝ်းသွူ၊ အပြစ်၊ အဖြစ်၊ အမျိုး၊ အကျိုး၊ မြတ်စွာ၊ မြောက်၊ ပြာသို၊ ပြောအားဖြင့်၊ ပြု၊ ပျက်-စတဲင်ဖုံႏအကို လ-ဗဲဉ်ငဝ်းနဝ်ꩻ ဟွုန်ဗာႏတဝ်းဒွုမ်သွူ၊ မိဉ်ႏထောက်နုဲင်းယိုနဝ်ꩻ လိတ်လုံးပကီႏတဲ့သင်၊ ထာဝယ်ငဝ်းကိုတဲ့သင် လ-ဗဲဉ်ငဝ်းယို ပြောင်ꩻထိုꩻလဲဉ်း ယ-ပယ်ငဝ်းကရိုꩻနဝ်ꩻ အစဲင်းသျင်ꩻတန်ဒျာႏသွူ။ သွူတကာႏတဝ်း ကျီ၊ ကျိပ်၊ ကျိန်း၊ ချီးပင့်၊ ပန်းချီ၊ ချေး၊ ချီးမွမ်း၊ စာချီ-စတဲင်ဖုံႏတဲ့ ကတဲမ်းပကံႏလိတ်လုံးအကိုနဝ်ꩻ ယ-ပယ်ပါတဝ်း၊ ယ-ပယ်ငဝ်းယို သော့ꩻဆုဲꩻဒျာႏ၊ ထာဝယ်ငဝ်းအကို ကျွဲ၊ ကြည့်၊ ကြွယ်၊ ချိန်၊ လူကြီး-စတဲင်ဖုံႏကို ယ-ပယ်ငဝ်း ဟွုန်တဝ်းဒွုမ်၊ ကသော့ꩻဗာႏ ယ-ပယ်ငဝ်းနဝ်ꩻ အလင်မွေးတဝ်း၊ ဥပမာႏ- အငဝ်းကသင်ႏ ကီ-ကိုနဝ်ꩻ ဖြေꩻနဝ်ꩻ အဝ်ႏဗာႏအီသရငဝ်းကို၊ ခွေါင်းဗာႏတဝ်းကဒက်ꩻခကီ၊ မိဉ်ႏခွေါင်းကဒက်ꩻခကီနဝ်ꩻ ယ-ပယ်ငဝ်းပါလွဉ်တဲင် ကျီ-ထန်ႏနုဲင်းနဝ်ꩻသွူ။ ကွပ်နဝ်ꩻမꩻ ကထွိုင်ႏဟော်ꩻ ပစ်၊ ပစ္စည်း၊ တပည့်၊ ကမ္ပည်း၊ မည်၊ မေတ္တာ-စတဲင်ခိင်ႏနဝ်ꩻ သော့ꩻပါထိုꩻ ယ-ပယ်ငဝ်းနုဲင်းခေတ်ယိုခါအတွိုင်ꩻသွူ။ ပကံႏလိတ်လုံးတွမ်ႏ ထာဝယ်ငဝ်းဖုံႏကို ရှ-ခင်ႏလမ်းနဝ်ꩻ သုံꩻလုဲင်ႏဒျာႏ ဟ-ထီႏဗာႏနုဲင်းနဝ်ꩻ၊ ဥပမာႏ- ရှီးဂိုသီး(သင်္ဘောသီး)ယို ဟီးဂိုသီး၊ မရှိရ-နဝ်ꩻ မဟေ့ရ၊ မှေ့ရ-ထာဝယ်ငဝ်းကို ဟွုန်ဗာႏနုဲင်းနဝ်ꩻ၊ ပကံႏလိတ်လုံးကိုလဲ့ ရှိ-ခြောင်ꩻနဝ်ꩻ ဟေ့၊ ဟိ-အဝ်ႏနုဲင်းနဝ်ꩻ၊ ရှိန်-ခြောင်ꩻနဝ်ꩻ ဟိန်၊ ရှစ်-ခြောင်ꩻနဝ်ꩻ ဟေတ်-ထီႏဗာႏနုဲင်းနဝ်ꩻသွူ။ ထာဝယ်ငဝ်းအကို သရငဝ်းထန်ႏပုံႏနဝ်ꩻ အဝ်ႏနုဲင်းလယိုအတွိုင်ꩻသွူ။ အ-သရယို က-မိဉ်ႏသွတ်ꩻဖေႏနဝ်ꩻ ဗိုန်နုဲင်းမန်းကပြောင်ꩻထိုꩻ အဲ-သရငဝ်းနုဲင်းနဝ်ꩻမွေးတဝ်း၊ ထန်ႏချာဒျာႏ သရပကတိအတွိုင်ꩻသွူ၊ ဥပမာႏ-(မန်းဝက်)ယို ဝ-လောင်း အဲသရငဝ်းပါတွော့ꩻ ဝဲက်(တ်)ထန်ႏတဝ်းနုဲင်းနဝ်ꩻ၊ ထန်ႏဒျာႏ ပအိုဝ်ႏကထန်ႏ ဝက်(ခြောင်းဝက်/ခြောင်းပြဲႏ)နုဲင်းနဝ်ꩻသွူ၊ တက်၊ ဇီးကွက်၊ လက်ဖက်၊ နက်၊ လက်ထပ်-စတဲင်ဖုံႏလဲ့ ဗိုန်ပီနုဲင်း(ဝက်)နဝ်ꩻအတွိုင်ꩻတဲင်၊ ဗိုန်ဒျာႏပအိုဝ်ႏငဝ်းထန်ႏနဝ်ꩻသွူ၊ ကောပ်နဝ်ꩻမꩻ ပကံႏခေတ်လဲ့ က်သွတ်ꩻဆꩻငါ ကအဝ်ႏဒါႏ အ-သရယို အငဝ်းထန်ႏနုဲင်းမန်ႏကထန်ႏယိုခါမွေးတဝ်းတွော့ꩻ အလွိုးထန်ႏဒျာႏ အ-သရပကတိငဝ်း ယူႏဗာႏနုဲင်းနဝ်ꩻသွူ။ ထာဝယ်ငဝ်းအကို "ပင်"(မန်းဟော်ꩻပင်)ယို ထန်ႏဒျာႏ"ပန်"၊ မိဉ်ႏထွားနုဲင်းယိုနဝ်ꩻ င်-သွတ်ꩻဆꩻငါ ကအဝ်ႏဒါႏ အ-သရယို အထန်ႏနုဲင်းမန်းကထန်ႏယိုခါ(မန်း-ပင်-ပအိုဝ်ႏ-ပိဉ်)နုဲင်းယိုမွေးတဝ်းတဲင် ထန်ႏဗာႏဒျာႏ အ-သရပကတိအတွိုင်ꩻ သေနာႏဗာႏနုဲင်းနဝ်ꩻ၊ မင်း၊ ကင်း၊ တင်၊ တွင်း၊ သတင်း၊ ထမင်း၊ သင်းဘော၊ သမင်-စတဲင်နဝ်ꩻဖုံႏလဲ့ ဗိုန်နုဲင်း(ပင်)နဝ်ꩻအတွိုင်ꩻ၊ ကောပ်နဝ်ꩻမꩻ ပကံႏခေတ်တွင်ꩻလဲ့ င်-သွတ်ꩻဆꩻငါ ကအဝ်ႏဒါႏ အ-သရယို ထန်ႏဗာႏဒျာႏ အ-သရအတွိုင်ꩻကရိုꩻနဝ်ꩻ သေထွꩻဗာႏနုဲင်းနဝ်ꩻသွူ။ ထာဝယ်ငဝ်းအကို ကောင်၊ ကောင်း၊ ချောင်း၊ ပေါင်၊ ခေါင်း၊ နောင်၊ အောင်-စတဲင်ဖုံႏအကို သရငဝ်းနဝ်ꩻ ထန်ႏဒျာႏပကတိအော-သရငဝ်းအတွိုင်ꩻ၊ ပကံႏခေတ်တွင်ꩻလဲ့ ငဝ်းဗိုန်နုဲင်းနဝ်ꩻဖုံႏနဝ်ꩻ ထန်ႏဒျာႏ အော-သရငဝ်းအတွိုင်ꩻ ယူႏဗာႏနုဲင်းနဝ်ꩻ၊ မျစေတီလိတ်လုံးကို "လောန်လေပြီးရကား"ကိုနဝ်ꩻ တဲမ်းခါꩻ "လောန်"နုဲင်းနဝ်ꩻတဲင် ဟဝ်တောင်ꩻခါꩻငါႏသွူ။ ထာဝယ်ငဝ်းကို ဆံထောက်၊ နောက်၊ ပေါက်၊ ငါးသလောက်-စတဲင်ကို က်-သွတ်ꩻဆꩻငါ သရငဝ်းနဝ်ꩻ ထန်ႏဗာႏဒျာႏ ပကတိအော-သရအတွိုင်ꩻ၊ ပကံႏခေတ်တွင်ꩻတဲ့ ငဝ်းကဗိုန်နုဲင်းနဝ်ꩻဖုံႏနဝ်ꩻ ထန်ႏဗာႏဒျာႏ ပကတိသရ(အော)သရငဝ်းအတွိုင်ꩻ သေဗာႏနုဲင်းနဝ်ꩻသွူ။ ထာဝယ်ငဝ်းအကို စုတ်၊ နောက်ဆုတ်၊ ကန်ထုတ်၊ ခုန်၊ ကုန်-စတဲင်ဖုံႏကို တ်-န်သွတ်ꩻဆꩻငါ ကအဝ်ႏပလို့ꩻသေꩻဒါႏ အု-သရငဝ်းနဝ်ꩻ ထွာဒျာႏပကတိအုငဝ်းအတွိုင်ꩻ၊ ပကံႏခေတ်တွင်ꩻလဲ့ တ်-န်ဆꩻငါ (အု)သရနဝ်ꩻ ထန်ႏဗာႏဒျာႏ ပကတိ(အု)ငဝ်းအတွိုင်ꩻကရိုꩻနဝ်ꩻ သေထွꩻဗာႏနုဲင်းနဝ်ꩻသွူ။ ထာဝယ်ငဝ်းကို အိတ်၊ အိပ်၊ လိပ်၊ လိန့်၊ သပိတ်၊ အိမ့်၊ စိန်၊ စိုးရိမ်-စတဲင်ဖုံႏကို တ်-ပ်-န်-မ်ဆꩻငါ (အိ)သရနဝ်ꩻလဲ့ ထန်ႏဗာႏဒျာႏပကတိ(အိ)သရအတွိုင်ꩻ၊ ပကံႏခေတ်တဲ့ ထန်ႏဒျာႏနုဲင်းနဝ်ꩻအကျောင်ꩻ သေထွꩻဗာႏနဝ်ꩻသွူ။ နဝ်ꩻမꩻ ထာဝယ်ငဝ်းအကို ကဲဉ်းအာအာနဝ်ꩻ ဗီးသွတ်ꩻဆꩻငါကအဝ်ႏဒါႏ သရဖုံႏနဝ်ꩻ ကတဲမ်းအတွိုင်ꩻ အငဝ်းထန်ႏချာဗာႏ ပကတိသရငဝ်းနုဲင်းနဝ်ꩻတဲင် ပကံႏခေတ်တွင်ꩻလဲ့ ထန်ႏဗိုန်ဒျာႏနုဲင်းနဝ်ꩻအကျောင်ꩻ သေထွꩻဗာႏနဝ်ꩻသွူ။ မိဉ်ႏထောင်ထွားချာ အချက်နုဲင်းကီယိုဖုံႏနဝ်ꩻ ထာဝယ်ငဝ်းယို ဗော့ꩻလွေꩻတွမ်ႏပကံႏလိတ်လုံးအကျောင်ꩻ သေထွꩻဗာႏနုဲင်းနဝ်ꩻ၊ သက္ကရာဇ် ၆၂၇-ဗာႏတွမ်ႏ မြန်မာပြည်ကျောက်စာဝန် အစီရင်ခံစာ ၁၉၂၄၊ လိတ်မဲ့ငါ-၃၈/၄၀)ထွားစံꩻနဝ်ꩻကိုလꩻဒျာႏနဝ်ꩻသွူ။ နဝ်ꩻမꩻ ကပြဲင်ႏဒါႏတွမ်ႏ ပကံႏလိတ်လုံး ထာဝယ်ငဝ်းယို စဝ်းကယ်ꩻဒွိုန်းက ကအဝ်ႏတိုꩻတက်လွဉ်ဒါႏမန်းငဝ်းယို နေင်ႏပေါင်ꩻ ၈၀၀-ရပ် သက်သေႏခွေါင်တဗာႏအဝ်ႏနဝ်ꩻသွူ၊ နဝ်ꩻမꩻ မန်းခမ်းကိုကအဝ်ႏဒါႏ ဒေသန္တရဘာႏသာႏငဝ်းဖုံႏယို အဝ်ႏလိုႏထင်းဖွီတဝ်းတဲ့ ခွုင်းကနွောင်ꩻရာꩻ အဝ်ႏလိုႏလွူꩻထွားငါႏသွူ၊ မန်းဒေသန္တရအကို ကောဒေါ့ꩻသပိန်ငဝ်းသား ဟံသာဝတီခူဝေင်ꩻ ၁၁၆၄-ဗာႏ ထီႏဗာႏအတဲမ်းခါꩻနုဲင်းနဝ်ꩻ၊ ကွဲႏတွော့ꩻ လိုꩻမျိုꩻနုဲင်းနဝ်ꩻ ယိုခါအဲဉ်ထဝ်းဒွုမ်တဲင် ဝွေꩻသီးငဝ်းလဲ့ လွူꩻထွားခွင်ꩻ အဝ်ႏတဝ်းဒွုမ်သွူ။ နဝ်ꩻမꩻ ကအဝ်ႏကုဲင်ဒါႏ ဒေသန္တရဘာႏသားငဝ်းဖုံႏလဲ့ ယေန်ႏငဲးမုꩻအတာႏ အဝ်ႏလိုႏလွူꩻလွေꩻမွိုင်မွိုင်ငါႏလဲဉ်းသွူ၊ ကအဝ်ႏထင်းဒါႏ ယေန်ႏငဲးမုꩻအဲဉ်ထဝ်း ထာဝယ်ငဝ်းမဉ်ႏတဲ့ ယေန်ႏငဲးမုꩻအဗွေတဗာႏအဝ်ႏဒျာႏအကျောင်ꩻ သေဗာႏလဲဉ်းနဝ်ꩻအတွိုင်ꩻ ကအဝ်ႏကုဲင်ဒါႏ ဒေသန္တရဘာႏသာႏငဝ်းဖုံႏလဲ့ အီႏမော့ꩻလွေꩻအီနွောင်ꩻ ယေန်ႏငဲးမုꩻအတာႏ အချက်အခဝ်နဝ်ꩻသွူ။ ဘာႏသာႏငဝ်းငွါကရိုꩻနဝ်ꩻ ထွာဒျာႏထာꩻရာꩻအဝ်ႏပြောင်ꩻလုဲင်ႏသေႏသေႏဒါႏမျိုꩻသွူ၊ ထာဝယ်ငဝ်းအကို ချိုး၊ သင်္ချိုင်း၊ ဖြူ၊ ပြွန်-စတဲင်နဝ်ꩻ ယလဲင်ႏလဲင်ႏ ဟွုန်ဒျာႏ ယ-ပယ်ငဝ်းလဲ့ ယလဲင်ႏလဲင်ႏ ဟွုန်ဒျာႏ လ-ပင်ႏငဝ်း ပြောင်ꩻလုဲင်ႏလွဉ်နုဲင်းကရိုꩻခါꩻ အွိုးကီနဝ်ꩻအတွိုင်ꩻသွူ။ နဝ်ꩻမꩻ နေးတွမ်ႏအနယ်ꩻမဲဉ်ႏမဲဉ်ႏ တလꩻလွူꩻဗာႏတဝ်းဒွိုန်း မန်းခမ်းကိုကအဝ်ႏဒါႏ ဘာႏသာႏငဝ်းအကို ကစဲင်းလွိုဒါႏ အချက်အခဝ်ဖုံႏ ခါးလားကပြောင်ꩻလုဲင်ႏ၊ ခါးလားကထိုꩻမားနဝ်ꩻ အဝ်ႏလိုႏလွူꩻလွေꩻမွိုင်မွိုင် ဘာႏသာႏငဝ်းငွါနုဲင်းနဝ်ꩻ၊ မိဉ်ႏလွူꩻဒျာႏ ဘာႏသာႏမန်းခမ်းကိုနုဲင်းယိုမꩻ ထွာအီႏသေစဲင်းအီ မန်းနဲင်ႏငန်ႏသမဲင်ꩻခြောင်ꩻနဝ်ꩻသွူ။ ခမ်းပေါင်ꩻဗူႏမန်းခမ်းအကို ဒေါ့ꩻငဝ်းငွါဘာႏသာႏကအာထာꩻနုဲင်းယိုနဝ်ꩻ ဟွုန်ဟဝ်သꩻရေꩻခရာႏတန်၊ နေးတွမ်ႏအနယ်ꩻမဲဉ်ႏမဲဉ်ႏ ကလွူꩻထွားထွားဗာႏနဝ်ꩻ ထွာအဝ်ႏလိုႏမာꩻခရာႏတန်သွူ၊ ကအဝ်ႏတဲမ်းလိတ်ရဲဉ်ႏယိုအတွိုင်ꩻ မန်းခမ်းသမဲင်ꩻကော်မဆိဉ်အစွိုꩻတစွိုꩻနဝ်ꩻ လွေꩻလွူꩻထွား ရခဲင်ႏခမ်း သဲက်ဘာႏသာႏ၊ မရုဘာႏသာႏ၊ ခုမိဘာႏသာႏထွူတဲင် အဝ်ႏသဲင်ꩻလွဉ်သွူ၊ အစွိုꩻနဝ်ꩻသားလဲ့ လင်ꩻကွင်ꩻအလဲင်ႏလဲင်ႏ၊ ခွုင်းကလွူꩻထွူဖုံႏလဲ့ အီႏတွဲႏနျꩻထွတ်ထေလွေꩻအကျောင်ꩻ သေထွꩻဗာႏနုဲင်းနဝ်ꩻသွူ။[၁][၂]