ဘုရာꩻကျွိုက်တဝ်း
"စာတုမသုတ် (ရဟန်ꩻရောင်ထာꩻ ဘုရာꩻကျွိုက်တဝ်း)" အွိုးခꩻတလဲင်ႏ- ဗွေႏဘုရာꩻအဝ်ႏအုံ ဒုံ'စာတုမ'ထျꩻ၊ တလာꩻမွူးခြာ (တခြာကို)အတွင်ꩻ ဗွေႏသာရိပုတ္တရာႏ၊ ဗွေႏမောဂ္ဂလာန်ႏသီးအွဉ်ငါ ရဟန်ꩻအပါꩻငတ်ꩻရျာꩻ အီႏလွဉ်ဝုဲင်ႏဗွေႏဘုရာꩻ၊ ဖျော်လွဉ်လွ 'ကျောင်ꩻစာတုမ'ကိုနောဝ်ꩻသွူ။ ရဟန်ꩻထဉ်ႏတွမ်ႏ ရဟန်ꩻကျောင်ꩻကို ခွဲဖိုဒွုမ်လို့ဝင်ꩻည-ဒေါ့ꩻငဒေါ့ꩻင၊ သꩻရောင်းသꩻရေꩻ သင်ႏစွဉ်ႏအောႏအောႏအာႏအာႏ ဟွူန်တွိုႏစွဉ်ႏဒျာႏ နီဗွေႏဘုရာꩻနား။ ကွပ်နဝ်ꩻမꩻ ဗွေႏဘုရာꩻရိုꩻ- "အာႏနန္တာႏ- နုဲင်းစွဉ်ႏ ပါꩻစာထပေႏသား၊ ဟောဟားအောႏအာႏ မရောင်ငါႏထာꩻသူꩻ၊ ပါꩻမုဲင်ꩻဖုံႏဟောင်း" "ဩဗွေႏ ဘုရာꩻမျတ်ဗွေႏဩ- ဗွေႏသာရိပုတ္တရာႏ ဗွေႏမောဂ္ဂလာန်ႏသီးအွဉ်ငါ ရဟန်ꩻအပါꩻငတ်ꩻရျာꩻ အီႏလွဉ်ဝုဲင်ႏနီဗွေႏဘုရာꩻ၊ ရဟန်ꩻကျောင်ꩻကိုတွမ်ႏ ရဟန်ꩻထဉ်ႏ(ထီႏန်)ဖုံႏ မော့ꩻခွဲလို့ဝင်ꩻ၊ အွဉ်ႏလင်ꩻသပိတ်၊ ခေါက်ဟောဝ်သင်္ကန်ꩻ၊ ဒါခင်ႏလမ်းကိန်ꩻ၊ ခင်ႏလမ်းအုံဖုံႏဒျာႏ (ရဟန်ꩻပေႏ၊ ရဟန်ꩻဆား ပျောႏတဲဝါး)ရောင်အောႏအာႏ'နုဲင်းနဝ်ꩻဒျာႏ ဗွေႏဩ" "ပေါႏနဝ်ꩻတဲ့- လွေꩻဟုဲင်း 'ဗွေႏဘုရာꩻဟဲ့ꩻ နီဗွေႏသီး'ရိုꩻနုဲင်းနဝ်ꩻလုဲင်း၊ ဟဲ့ꩻလွဉ်ယိုကိုဟုဲင်း"နီဗွေႏဘုရာꩻမိန်းနုဲင်းနဝ်ꩻတဲင် ဗွေႏအာႏနန္တာႏ လွေꩻပင်ꩻလွဉ်၊ တွိုႏဗွေႏဘုရာꩻထျꩻနဝ်ꩻ ဝုဲင်ႏဗွေႏဘုရာꩻထွူ အုံယေန်ယစ် ပငါပရာꩻ စွုမ်ႏပါꩻပါꩻ။ နီဗွေႏဘုရာꩻရိုꩻ- "ရဟန်ꩻသီးဖုံႏဟွေး- သီဖုံႏနဝ်ꩻ နုဲင်းစွဉ်ႏစာထပေႏသား၊ သီမေရာင်ငါႏထာꩻနဝ်ꩻ မာꩻထမုဲင်ꩻဟောင်း" "ဩဗွေႏ ဘုရာꩻမျတ်ဗွေႏဩ- ရဟန်ꩻကျောင်ꩻကိုတွမ်ႏ နီသွဉ်းသီး မေ့ာꩻလို့ဝင်ꩻ၊ အွဉ်ႏလင်ꩻသပိတ်၊ ခေါက်ဟဝ်သင်္ကန်ꩻ၊ ဒါခင်ႏလမ်း သမ်းပျောႏငါႏနဝ်ꩻမꩻ ရောင်ႏဗာႏအောႏအောႏအာႏအာႏ နုဲင်းနဝ်ꩻဒျာႏ'ဗွေႏဩ" "ရဟန်ꩻသီးဖုံႏဟွေး- (နုဲင်းမုဲင်ꩻမုဲင်ꩻတဲ့ယဝ်း) သီရောင်ထာꩻနဝ်ꩻ ခွေကျွိုက်တဝ်း၊ လွေꩻထိုꩻလို့လို့ဟုဲင်း-ခွေဝါးထိုꩻသီ၊ သီဖုံႏနဝ်ꩻ အုံမွုန်းခွေထျꩻယို"နီဗွေႏဘုရာꩻ မိန်း(မီးန်)ခြေင်းခြဲ့စွဉ်ႏဒျာႏ နုဲင်းနောဝ်ꩻတဲင်- ဗွေႏသာရိပုတ္တရာႏ ဗွေႏမောဂ္ဂလာန်ႏသီးအွဉ်ငါ ရဟန်ꩻအပါꩻငတ်ꩻရျာꩻဖုံႏနဝ်ꩻ လွေꩻထူႏသပိတ်၊ သင်္ကန်ꩻတလဲင်ႏချင်ꩻ ထန်ႏထိုꩻဗာႏစွဉ်ႏဒျာႏနောဝ်ꩻသွူ။ အတွင်ꩻနဝ်ꩻနဝ်ꩻ ဒုံစာတုမကို ကအဝ်ႏအုံဒါႏ တကာႏသီးဖုံႏနဝ်ꩻ အဝ်ႏမာꩻပွယ်ꩻအုံကွံ၊ အဝ်ႏဒေါ့ꩻရီ တွိုင်ႏပင်ႏလို့ဝင်ꩻတွင်ꩻ၊ ကထွိုင်ႏထီႏ ဗွေႏရဟန်ꩻသီး ကျွꩻလွေꩻတဲင် နဲ့စ်လောႏလွေꩻထေ့တွော့ꩻ ရီနုဲင်းယို- "ဩဗွေႏ- နီဗွေႏသီး အီႏကျွꩻလွေꩻတောမုဲင်ꩻကို" "တကာႏသီးဖုံႏဟွေး- ရဟန်ꩻသီးဖုံႏ ရောင်တေက်ꩻနားငါႏထာꩻတဲင် နီဗွေႏဘုရာꩻ ဝါးထိုꩻရဟန်ꩻပေါင်ꩻဖုံႏယိုသွူ" "ပေါႏနဝ်ꩻတဲ့- သယ်ꩻခံႏအုံဆောင်းကယိုကို တဆင်ႏငါဗွေႏ၊ နီသွဉ်းသီး လွေꩻတောင်ꩻပြန်ႏက ဗွေႏဘုရာꩻ အလွိုးရလꩻဒျာႏသနယ်အော်" "ပေါႏနဝ်ꩻတဲ့- လွေꩻတောင်ꩻပြန်ႏဟုဲင်း တကာႏ၊ နီအုံပွေါဒျာႏယိုကို" တကာႏဖုံႏ လွေꩻလောဝ်း ဗွေႏဘုရာꩻနုဲင်းယို- "ဩဗွေႏ ဘုရာꩻမျတ်ဗွေႏဩ- - ကေႏနပ်စွꩻခွင်ꩻ သညင်ꩻသွော့ ရဟန်ꩻဖုံႏနဝ်ꩻ ဗွေႏဩ၊ - တပဲ့ꩻဖုံႏဒျာႏ ဖေႏအာႏယင်းသွော့၊ ဆွုံꩻမꩻသွော့ နုဲင်းကရီးခါနဝ်ꩻ ဗွေႏဩ၊ ဥပမာႏ-သေင်ႏမွူးပေႏဖုံႏနဝ်ꩻ ပေါႏတဆူဖေႏတဝ်းထီတဲ့ သီချာထိုꩻစွဉ်ႏ ဗွေႏဩ၊ အနုဲင်းနဝ်ꩻနေနေ၊ စင်ꩻပေႏကဗုဲင်စဖုံႏနဝ်ꩻ ပေါႏနီဗွေႏတဆူဖေႏတဝ်း မေတ္တာႏထီနဝ်ꩻ ယပ်ꩻသꩻယူႏပက် မဲ့ꩻအထွက်ချာလို့သနယ် ဗွေႏဩ။ ဥပမာႏခꩻတမျိုꩻနဝ်ꩻ-ဖိုးပေႏအဝ်ႏနဲဉ်း(နဲးန်)နေကထာꩻနဝ်ꩻ ပေါႏတထီႏတဝ်း အမွိုးနဝ်ꩻ ယပ်ꩻသꩻတလွိုး၊ ထိုႏမ်အမွိုး အငွိုးထာꩻ (တဗဲဗဲ)နဝ်ꩻသနယ် ဗွေႏဩ၊ အနုဲင်းနဝ်ꩻနေနေ လꩻသူႏသေဒွိုန်းထာꩻ စင်ꩻပေႏကဗုဲင်စဖုံႏနဝ်ꩻ ပေါႏတထီႏတဝ်း နီဗွေႏနဝ်ꩻ မဲ့ꩻထုမ်ႏနီဗွေႏ၊ ယပ်ꩻသꩻယူႏပက် မဲ့ꩻအထွက်ထိုꩻလို့သနယ် ဗွေႏဩ၊ ကွပ်နဝ်ꩻမꩻ- -အွဉ်ႏစွꩻခွင်ꩻယိုခါ ဖေႏသဲင်ꩻချာသွော့ဗွေႏဩ၊ ဖေႏကမဲႏန်သꩻ ဆွုံꩻမꩻယွယွသွော့ ဗွေႏဩ၊ တကာႏဖုံႏလောဝ်းနုဲင်းနဝ်ꩻ (သဟမ္ပတိဗျဟ္မာႏတဲ့ လင်ꩻလောဝ်းကိုနုဲင်းနဝ်ꩻ)သွူ။ နီဗွေႏဘုရာꩻရိုꩻ- "အွို- ပေါႏနဝ်ꩻတဲ့ လွေꩻလောဝ်းသီဗွေႏစင်ꩻဖုံႏသူꩻလုဲင်း၊ ရောင်မွူးန်ဒူမ်ထာꩻ ဘုရာꩻဖေႏသဲင်ꩻချာဒျာႏ"ရိုꩻနုဲင်းနဝ်ꩻဟုဲင်း။ တကာႏဖုံႏတဲ့ သꩻရောင်းသꩻရေꩻ လွေꩻလောဝ်းသံဃာႏ၊ ဝွေꩻသီးကလောဝ်းခရာႏ၊ ဝွေꩻသီးကဥပမာႏ သေင်ႏမွူးပေႏ၊ ဖိုးပေႏ-စတဲင်နုဲင်းနဝ်ꩻတွော့ꩻ ဗွေႏမောဂ္ဂလာန်ႏ လောဝ်းထင်ႏသံဃာႏနုဲင်းယို- "ဩဗွေႏ သံဃာႏသီးဖုံႏဗွေႏဩ- တကာႏလွေꩻလောဝ်း ဗွေႏစောဝ်းဆရာႏ ဥပမာႏသေင်ႏမွူးပေႏ ဖိုးပေႏတဲင် ဗွေႏဘုရာꩻကေႏနပ် ငေါဝ်းမျတ်မိန်းပါ သဲင်ꩻချာယိုခါ လꩻဒျာႏတဲ့ ဗွေႏဩ" ကထင်ႏဟွူန်ငေါဝ်းနဝ်ꩻတဲင် ထူႏသပိတ်၊ ပွိုက်ꩻသင်္ကန်ꩻ ကျွꩻရဲဉ်ႏသဲင်ꩻယင်းလို့ဝင်ꩻနောဝ်ꩻသွူ။ ဗွေႏသာရိပုတ္တရာႏ ဗွေႏမောဂ္ဂလာန်ႏသီးအွဉ်ငါ ရဟန်ꩻအပါꩻငတ်ꩻရျာꩻ သဲင်ꩻကန်းတော့ꩻရိုႏသေႏယင်း ဗွေႏဘုရာꩻ၊ နီဗွေႏဘုရာꩻရီ ဗွေႏသာရိပုတ္တရာႏနုဲင်းယို- "သာရိပုတ္တရာႏ- ခွေကဝါးထိုꩻသီခါနဝ်ꩻ နာꩻသꩻကို ထွာနုဲင်းမုဲင်ꩻ၊ နာꩻယူႏနုဲင်းမုဲင်ꩻ" "ရောင်ထာꩻနဝ်ꩻ ဗွေႏဘုရာꩻတေက်ꩻနား၊ ကွပ်နဝ်ꩻမꩻ ဝါးထန်ႏထိုꩻနီ၊ နီတဲ့ အီႏအုံခွꩻခွꩻသꩻဗာႏသွူထာꩻ"ယူႏနုဲင်းနဝ်ꩻဗွေႏဩ။ "သာရိပုတ္တရာႏ- နာꩻအီႏအုံခွꩻခွꩻထာꩻနဝ်ꩻ ယွယွကဟုဲင်း၊ မောဂ္ဂလာန်ႏဟာ နာꩻသꩻထွာနုဲင်းမုဲင်ꩻ" "ရောင်ထာꩻနဝ်ꩻ တေက်ꩻနား၊ နဝ်ꩻမꩻ ဗွေႏဘုရာꩻဝါးထန်ႏထိုꩻနီ၊ ယိုခါ ခွေသွဉ်းတဲ့နဝ်ꩻ၊ ဗွေႏသာရိပုတ္တရာႏတဲ့နဝ်ꩻ အီႏထီꩻန်ထွားဗာႏ သံဃာႏယို'သꩻကို ထွာနုဲင်းနဝ်ꩻဗွေႏဩ" "သာဓု သာဓု မောဂ္ဂလာန- ခွေတဲ့နဝ်ꩻ သာရိပုတ္တရာႏတဲ့နဝ်ꩻ မောဂ္ဂလာန်ႏတဲ့နဝ်ꩻ ထီꩻန်ညီꩻညီꩻလို့ဝင်ꩻသံဃာႏယို၊ နာꩻသꩻကို နာꩻထာꩻယူႏနဝ်ꩻ ယံမွေး၊ ကျမွေး မောဂ္ဂလာန်ႏဟွေး"နီဗွေႏဘုရာꩻ အံႏဖြာႏစွဉ်ႏဒျာႏနုဲင်းနောဝ်ꩻသွူ။ ရဟန်ꩻသီးဖုံႏဟွေး- ပေါႏနွို့ထီတန်တန်ကို ထီယော့ယော့ကိုနဝ်ꩻ မော့ꩻဗာႏ ဘေꩻဖုံႏယိုလစ်ꩻမျိုꩻ၊ ဘေꩻလစ်ꩻမျိုꩻကရိုꩻနဝ်ꩻ- - ဦမိ ဘယံ - ထီလဲင်ꩻဘေꩻ - ကုမ္ဘီလ ဘယံ - ယမ်းဘေꩻ - အာဝဋ္ဋ ဘယံ - ထီဝယ်ꩻဘေꩻ - သုသုကာ ဘယံ - ထကုဲင် (ငါးမာရ်း)ဘေꩻဖုံႏနောဝ်ꩻသွူ။ အနုဲင်းနဝ်ꩻနေနေ- အဝ်ႏလိုꩻလမ်းဘဝတွော့ꩻ ကနွို့သော့ꩻသာႏသနာႏ ရဟန်ꩻယင်ဟန်ႏဖုံႏနဝ်ꩻ 'မော့ꩻဗာႏဘေꩻဖုံႏနဝ်ꩻလစ်ꩻမျိုꩻ'နေနေသွူ။ 'မော့ꩻထီလဲင်ꩻဘေꩻ'ကရိုꩻနဝ်ꩻ နုဲင်းမုဲင်ꩻနဲတဲင်- တကာႏလိုꩻလမ်း ယင်ဟန်ႏနဝ်ꩻ ယူႏနုဲင်းယို- "နီဖုံႏယိုနဝ်ꩻ အဝ်ႏဗိမ်(ဗီမ်)သော့ꩻဒျာႏ ကွုတ်ဒုက္ခကို၊ ဖြားဒုက္ခကို၊ သီဒုက္ခကို၊ ခိုးလျားဒုက္ခကို၊ ငွိုးဒုက္ခကို၊ နမ်းယပ်ꩻဒုက္ခကို၊ သꩻယပ်ꩻဒုက္ခကို၊ ရွိုးလွားယပ်ꩻခုဲင်ႏဒုက္ခကို-နုဲင်းယိုတန်ဟွေး၊ အွဉ်ႏကုဲင်ပိုမာ ဖထိုꩻလမ်းပါႏ ဗုဲင်ဒျာႏရဟန်ꩻ မဉ်ႏ(မီႏန်)အားထွုတ်ကမ္မဋ္ဌာန်ꩻနဝ်ꩻ ရမွော့လွစ်(လွော့တ်)နွောင်ꩻ ဒုက္ခတူႏ ဒုက္ခခြုံးဖုံႏယိုနဲး" ယွုမ်းတဲယူးမ်ဝါးနုဲင်းနဝ်ꩻတဲင် နေးတွမ်ႏသဒ္ဓါႏတရာꩻ အစဲ့စ်အမဲဉ်ႏတွော့ꩻ ထင်ႏဗုဲင်ရဟန်ꩻဖုံႏသွူ။ ထင်ႏထွာရဟန်ꩻထွူခါ- "နီဗွေႏမဉ်ႏလွေꩻငါနဝ်ꩻ လွေꩻဗာႏနုဲင်းယို၊ မီႏန်ဆွတ်ꩻချာနဝ်ꩻ ဆွတ်ꩻဗာႏနုဲင်းယို၊ မဉ်ႏထွားစွို့ꩻစွို့ꩻ(ထွားတောက်ꩻတောက်ꩻ)နဝ်ꩻ ထွားဗာႏနုဲင်းယို၊ မီႏန်ထွားတဖဲ့စ်နဝ်ꩻ ထွားဗာႏနုဲင်းယို၊ မဉ်ႏအွဉ်ႏတုပ်ꩻစူနဝ်ꩻ အွဉ်ႏတိုႏပ်ဗာႏနုဲင်းယို၊ မဉ်ႏအွဉ်ႏစွဉ်ႏစူနဝ်ꩻ အွဉ်ႏစွောႏန်ဗာႏနုဲင်းယို၊ သင်္ကန်ꩻကုဋ်(ကို့က်)နဝ်ꩻ ပွိုက်ꩻ(ပွိုႏက်)ဒင်ႏဗာႏ ပြေင်လောင်းနုဲင်းယို၊ သပိတ်နဝ်ꩻ ဆဲင်ဗာႏနုဲင်းယို"ကအုံညီꩻသွꩻဖုံႏနဝ်ꩻ သွဉ်သင်ဆွုံꩻမꩻနုဲင်းနဝ်ꩻသွူ။ ကွဲႏတွော့ꩻ- ဗုဲင်စင်ခိန်ႏလား ရဟန်ꩻဖြား ယပါꩻပါꩻဖုံႏနဝ်ꩻရိုꩻ- "နီကအဝ်ႏနေလမ်းခါနဝ်ꩻ နီဆွုံꩻမꩻ နီပိုနီလီꩻ၊ တွိုႏယိုခါနဝ်ꩻ စင်ꩻပေႏအရွယ်ႏ တတွာကွို့ꩻ နီပိုနီလီꩻလွုမ်ꩻနဝ်ꩻ အဝ်ႏဆွုံꩻမꩻကျွားတောနီ၊ 'နီယိုလိုꩻဖြား သူႏသေသူႏနာႏတဝ်းထာꩻ လိုဆွုံꩻမꩻခါꩻ'ထင်းနုဲင်းနောဝ်ꩻဟောင်း" ယူႏမာႏတောဒျာႏနုဲင်းနောဝ်ꩻသွူ။ စင်ꩻဖြားဖုံႏယင်ဟန်ႏနဝ်ꩻ မဉ်ခံႏတဝ်းဝင်ꩻဆွုံꩻမꩻ၊ မီန်လꩻတဝ်း ငေါဝ်းသွဉ်သင်၊ မဉ်အုံတခြင်ခြင်ဒျာႏထာꩻနဝ်ꩻ သꩻလျားတေ့ꩻ ကောဆွုံꩻမꩻသား၊ စင်ꩻဖြားနဝ်ꩻစားဖုံႏနဝ်ꩻ ချꩻသိက္ခာႏ၊ ထွက်သဲင်ꩻချာယင်းဒျာႏ။ သဒ္ဓါႏထီဖင်ႏ-နွန်ႏထင်ႏသွူတဲ့ ဒေါသထီဖင်ႏ ငင်ႏထဲ့ချာယင်းဒျာႏ၊ သဒ္ဓါႏနူႏန်ထင်ႏ ဒေါသငင်ႏလင်ꩻတဲင် ဒေါသ (သဒ္ဓါႏ)နဝ်ꩻ နီဗွေႏဘုရာꩻ တဲ့က်တွိုင်ꩻဥပမာႏ နုဲင်းထီဖင်ႏနောဝ်ꩻသွူ။ "ယမ်းဘေꩻ"ကရိုꩻနဝ်ꩻ နုဲင်းမုဲင်ꩻနဲတဲင်- ဖေႏကလွစ်လꩻ ခန္ဓာႏဒုက္ခတူႏ ခန္ဓာႏဒုက္ခခြုံးတဲင် နေးတွမ်ႏသဒ္ဓါႏတရာꩻ အစဲ့စ်အမဲဉ်ႏတွော့ꩻ ထင်ႏဗုဲင်ရဟန်ꩻဖုံႏသွူ။ ထင်ႏထွာရဟန်ꩻထွူခါ- "နီဗွေႏနဝ်ꩻ အွꩻအံႏဗာႏ ထာꩻအံႏယိုလွုမ်ꩻ၊ ထာꩻအံႏယိုနဝ်ꩻ အံႏအွꩻလꩻတဝ်း၊ သွုံꩻလꩻမွူးနွောင်းမာꩻကွဉ်ႏလွုမ်ꩻ၊ မွူးနွောင်းမာꩻတွို့ꩻနဝ်ꩻ သွုံꩻလꩻတဝ်း၊ အွꩻလꩻမွူးနွောင်းမာꩻကွဉ်ႏလူမ်ꩻ၊ မွူးနွောင်းမာꩻတွို့ꩻနဝ်ꩻ အွꩻလꩻတဝ်း"-ဆွုံꩻမꩻစတဲင်နုဲင်းနောဝ်ꩻသွူ။ စင်ꩻကဗုဲင်တသာသားနဝ်ꩻ ယူႏနုဲင်းယို- "နီကအဝ်ႏနေ လမ်းခါနဝ်ꩻ မဉ်အံႏအမျိုꩻမုဲင်ꩻ အံႏလꩻဒျာႏ၊ တွိုႏယိုခါနဝ်ꩻ အံႏလꩻအမျိုꩻယိုလွုမ်ꩻ၊ အမျိုꩻယိုနဝ်ꩻ အံႏလꩻတဝ်း-တဲ့၊ အွꩻလꩻအမျိုꩻယိုလွုမ်ꩻ၊ အမျိုꩻယိုနဝ်ꩻ အွꩻလꩻတဝ်း-တဲ့၊ အံႏစုဲင်လꩻ အမျိုꩻယိုလွုမ်ꩻ၊ အမျိုꩻယိုနောဝ်ꩻ အံႏစုဲင်လꩻတဝ်း-တဲ့၊ အံႏအွꩻလ၊ မွူးနွောင်းမာꩻကွဉ်ႏလွုမ်ꩻ၊ မွူးနွောင်းမာꩻတွို့ꩻနဝ်ꩻ သုံꩻအွꩻလꩻတဝ်း-တဲ့၊ မွူးနွောင်းမာꩻတွို့ꩻ သဒ္ဓါႏတရာꩻသားဖုံႏ ကထင်ႏလူꩻနီ အအွီႏ အနွိုးဖုံႏနဝ်ꩻ အဝ်ႏပြုံႏထာꩻ၊ ပေါႏရိုꩻအံႏအွꩻလꩻတဝ်းဟ ပေ့ꩻခါꩻနီဖြောင်းဟောင်း၊ မဉ်အံႏအွꩻခိန်ႏမုဲင်ꩻတဲ့ အံႏအွꩻလꩻဒျာႏမတောဝ်၊ အံႏအွꩻလꩻတဝ်းတွိုး၊ ပွိုးထမုဲင်ꩻဟောင်း"-ဒေါ့ꩻလွစတဲင်နုဲင်းနဝ်ꩻဖုံႏ၊ ကွပ်ပွိုးထာꩻအံႏတဲင် အုံနွောင်ꩻတဝ်း ချꩻသိက္ခာႏ ထွက်ထိုꩻစွဉ်ႏဒျာႏသွူ။ ယမ်းကရိုꩻနဝ်ꩻ အဲင်ႏဒါႏလိုꩻ၊ အံႏဒါႏလိုꩻ၊ ကွပ်ပွိုးထာꩻအံႏ၊ တခံႏနွောင်ꩻတဝ်း၊ ကထွက်ထိုꩻဒါႏ ရဟန်ꩻဖုံႏနဝ်ꩻ "ထာꩻအံႏအဲင်ႏသီထိုꩻ ဝွေꩻသီးရဟန်ꩻသိက္ခာႏ"တဲင်တွော့ꩻ ဗွေႏဘုရာꩻဖေႏဗာႏ ဥပမာႏနုဲင်းယမ်း၊ ယမ်းကရိုꩻနဝ်ꩻ ထာꩻအံႏနောဝ်ꩻသွူ။ "ထီဝယ်ꩻဘေꩻ"ကရိုꩻနဝ်ꩻ နုဲင်းမုဲင်ꩻနဲတဲင်- ဖေႏကလွစ်လꩻ ခန္ဓာႏဒုက္ခတူႏ ခန္ဓာႏဒုက္ခခြုံးတဲင် နေးတွမ်ႏသဒ္ဓါႏတရာꩻ အစဲစ်အမဲန်ႏတွော့ꩻ ထင်ႏဗုဲင်ရဟန်ꩻဖုံႏသွူ။ ထင်ႏထွာထွူရဟန်ꩻခါ- မွူးရောဝ်ꩻခိုႏ ရွုံႏသင်္ကန်ꩻ၊ ဖေါ့သပိတ် လွေꩻတွုံꩻသွမ်ꩻ၊ လွေꩻထီႏခန်း လိုꩻမူႏယောင်ꩻရေꩻဖုံႏ၊ ထီႏပါꩻတမာဝါꩻ ထွေလို့ဝင်ꩻဖုံႏတဲင် ထိန်ꩻတဝ်းနမ်း၊ ထိင်ꩻတဝ်းဖြောင်း၊ ထီꩻင်တဝ်းသꩻတွော့ꩻ ယူႏလꩻချာဝွေꩻသီး ကအဝ်ႏထွာလိုꩻလမ်းခါ (ယူႏလꩻချာအမာ) သꩻမဉ်ခံႏစာꩻ ကာႏမဂွုဏ်ႏအာႏရွုံႏငတ်ꩻပါꩻ ပေါႏလွဉ်။ သꩻကထင်ႏရူꩻရာꩻနုဲင်းနဝ်ꩻတဲင် "နီကအဝ်ႏလမ်းခါနဝ်ꩻ အဝ်ႏတွမ်ႏမာနုဲင်းဝွေꩻသူꩻ ခံႏစာꩻဗာႏကာႏမဂွုဏ်ႏ၊ အွိုးလမ်းသူꩻနဝ်ꩻ ရွဉ်ခံꩻအဝ်ႏဒျာႏ၊ ကုသိုလ်ႏနဝ်ꩻ အုံအွိုးလမ်းမာꩻတဲ့ လꩻဒျာႏ"ရိုꩻနုဲင်းနဝ်ꩻတွော့ꩻ ချꩻသိက္ခာႏ ထွက်သဲင်ꩻခန်းဒျာႏ၊ ထီဝယ်ꩻနဝ်ꩻ စုပ်ꩻ(စိုႏပ်)ဗီမ်လꩻလိုꩻ၊ ယိုတဲ့ ကာႏမဂွုဏ်ႏ စုပ်ꩻဗီမ်လꩻထိုꩻဝွေꩻသီး၊ ကွပ်နဝ်ꩻမꩻ နီဗွေႏဒေါ့ꩻဗာႏ ဥပမာႏ ဝယ်ꩻစိုႏပ်နောဝ်ꩻသွူ။ "ထကုဲင်အဲင်ႏ"ကရိုꩻနဝ်ꩻ နုဲင်းမုဲင်ꩻနဲတဲင်- လွေꩻတွုံꩻသွမ်ꩻ ထီႏလိုꩻမူႏ၊ ယူႏချာလိုꩻလမ်းဘဝ၊ ထိန်ꩻသꩻလꩻတဝ်း၊ ထွက်စောဝ်းသဲင်ꩻချာ၊ နဝ်ꩻနဝ်ꩻ လိုꩻမူႏအဲင်ႏကုဲင်ထိုꩻ အသိက္ခာႏ၊ လိုꩻမူႏနဝ်ꩻ ဘုရာꩻဥပမာႏ ထကုဲင်နောဝ်ꩻသွူ။(သုတ္တန်ႏပိဋကတ်၊ မဇ္ဈိမပဏ္ဏာသပါဠိတောႏ၊ စာတုမသုတ်)[၁][၂]