ဘောလုံးပွယ်ꩻနောင်ကာꩻ

အဝ်ႏ ဝီခီပီးဒီးယား ကို

"ဘောလုံးပွယ်ꩻနောင်ကာတောမ်ႏ ဘောလုံးပွယ်ꩻသုဲင်ꩻခေါဝ်နဝ်ꩻ အကွာႏဝင်ꩻတမုဲင်ꩻ" ပအိုဝ်ႏဒေႏသကိုယို ပညာႏရေꩻတဲ့နဝ်ꩻ၊ ခြွိုင်ႏသန်ꩻရေꩻတဲ့နဝ်ꩻ၊ စီꩻပွါꩻရေꩻတဲ့နဝ်ꩻ၊ လိုꩻမုရေꩻတဲ့နဝ်ꩻ၊ ထာꩻခုမ်ပဆိုးဖဲ့ꩻတဲ့နဝ်ꩻ စစွဉ်ႏအဖဲ့ꩻဖဲ့ꩻယို အဝ်ႏလိုႏပြွူႏဖြိုထင်ႏထိုငါႏနဝ်ꩻ ခုမ်မာꩻစွိုးခွိုꩻအရေꩻသားမꩻ တမွေးတဝ်း၊ ပအိုဝ်ႏလိုꩻမျိုꩻစွုမ်ႏဖြာꩻသီးငါတဲ့ အဝ်ႏသေထီႏ အဝ်ႏယူႏထွꩻနွောင်ꩻဒျာႏဝင်ꩻနဝ်ꩻသွူ၊ ပညာႏရေꩻ၊ ခြွိုင်ႏသန်ꩻရေꩻ၊ စီꩻပွါꩻရေꩻ၊ လိုꩻမုရေꩻ၊ ထာꩻခုမ်ပဆိုးရေꩻစစွဉ်ႏ အရေꩻတဗာႏဗာႏယို ကခုမ်မာꩻဗာႏ၊ ကရုဲင်ꩻတသွိုးဗာႏနဝ်ꩻ ရေႏရွယ်ႏဒျာႏ ဖေႏကထင်ႏထိုလွောန်ထဲင်း၊ ရေႏရွယ်ႏဒျာႏ ဖေႏကပြွူႏဖြိုလွောန်ထဲင်း၊ ရေႏရွယ်ႏဒျာႏ ဖေႏကကွုန်ꩻဟွိုင်ꩻထဲင်းဒျာႏရင်ꩻနဝ်ꩻသွူ။ ကွဲးတွော့ꩻ တယ်ႏကလဲန်းခိုႏချာ ဗꩻတွိုႏလွောန်ဟန်ႏသနီꩻယို ဥပမာႏ- ပအိုဝ်ႏထာꩻခုမ်ပဆိုး(ဘောလုံး)နဝ်ꩻ အဝ်ႏအရန်းတခွုင်းမုဲင်ꩻ၊ ဖေႏကထင်ႏထိုထဲင်းယင်း တခွုင်းမုဲင်ꩻ၊ ဖေႏကဗꩻတွိုႏအရန်းမုဲင်ꩻနဝ်ꩻ အဝ်ႏလိုႏထဲင်းက တခွုင်းမုဲင်ꩻ-စတဲင် မိဉ်ႏခုမ်မာꩻထွူ ကိစ္စအရေꩻတဗာႏနဝ်ꩻ တောမ်ႏအချက်မဲဉ်ႏမဲဉ်ႏ တယ်ႏခုမ်မာစာထွူ မိဉ်ႏအောင်ႏမျင်ႏလွောန်လဲ့ အောင်ႏမျင်ႏလဲန်းတခွုင်းမုဲင်ꩻကရိုꩻနဝ်ꩻ တောမ်ႏအချက်ယံယံ တဲက်ထွားချာဖေႏကလꩻနဝ်ꩻ အဝ်ႏလိုႏမာꩻ သုတေသနတဲးဝါးထွူ အဝ်ႏလိုႏသွောန်မွောန်း လွူးဖြွောန်ဖေႏနဝ်ꩻသွူ။ မိဉ်းတမွေးတဝ်း မာꩻတနေင်ႏလဲ့ ပအိုဝ်ႏထာꩻခုမ်ပဆိုး(ဘောလုံး)ထင်ႏထိုရေꩻ၊ မာꩻအနေင်ႏတဆီလဲ့ ပအိုဝ်ႏထာꩻခုမ်ပဆိုး(ဘောလုံး)ထင်ႏထိုရေꩻ၊ ယိုလဲင်ႏခါ ဗꩻတွိုႏလွောန်လဲန်း အနေင်ႏ(၂၀)ကမာꩻလွောန်ဒါႏ ပအိုဝ်ႏထာꩻခုမ်ပဆိုး(ဘောလုံး)ထင်ႏထိုရေꩻနဝ်ꩻ အောင်ႏမျင်ႏထင်ႏထိုလွောန်လဲန်းတခွုင်းမုဲင်ꩻ၊ ပအိုဝ်ႏဘောလုံးဝါႏသနာႏဗွေႏ ထန်ႏလွောန်လဲန်း တခွုင်းမုဲင်ꩻ၊ ပအိုဝ်ႏဘောလုံးပညာႏဗွေႏဖုံႏ နွို့ထင်ႏနွောင်ꩻလဲန်း ခမ်းထီအရန်း၊ နွို့တပတ်ꩻလွေꩻလဲန်း ကမ္ဘာႏအရန်းခမုဲင်ꩻဖြာꩻ စတဲင်တဲက်ထွားခရာႏ အကျိုꩻလꩻဖုံႏ၊ ရေႏရွယ်ႏချက်ဖုံႏ အဝ်ႏလိုႏအွောန်ႏသျင်ꩻသျင်ꩻထွူ အဝ်ႏလိုႏမာꩻလွေꩻတောမ်ႏစနစ်နယ်ꩻ မဲဉ်ႏမဲဉ်ႏနဝ်ꩻသွူ။ နုဲင်းယိုခါ ပအိုဝ်ႏဒေႏသကိုနဝ်ꩻ ကောပ်အကျောင်ꩻအမျိုꩻမျိုꩻတဲင် အွောန်ႏအထျꩻမာꩻလွေꩻ ထာꩻခုမ်ပဆိုး (ဘောလုံး)ပွယ်ꩻဖုံႏယို အာလွောန်နဝ်ꩻသွူ၊ လိုꩻယွဲးသီးဖုံႏ ဝါႏသနာႏ၊ လိုꩻယွဲးသီးမွန်းပျောႏအီတာႏတဲ့နဝ်ꩻ မာꩻလွေꩻနဝ်ꩻ အဝ်ႏမွေးဒျာႏသွူ၊ ပွယ်ꩻလံꩻကွုန်ꩻဟွိုင်ꩻအီတာႏတဲ့နဝ်ꩻ မာꩻလွေꩻနဝ်ꩻ အဝ်ႏမွေးဒျာႏသွူ၊ တရပ်တောမ်ႏတရပ် ထာꩻခေးပြဲင်ႏဖုံႏ၊ ဖြွမ်းဗူႏမုဖုံႏ အာႏရဲင်ꩻထွာအီတဲ့နဝ်ꩻ မာꩻလွေꩻနဝ်ꩻ အဝ်ႏမွေးဒျာႏနေနေနဝ်ꩻသွူ၊ ယိုဖုံႏနဝ်ꩻတဲ့ ရေႏရွယ်ႏချက်အွောန်ႏစွဉ်ႏ ပအိုဝ်ႏလိုꩻမျိုꩻ၊ ပအိုဝ်ႏစွိုးခွိုꩻ ထာꩻခုမ်ပဆိုး(ဘောလုံး)ပွယ်ꩻ ထင်ႏထိုရေꩻတမွေးတဝ်းဒါႏ ဒေႏသပွယ်ꩻ၊ အွိုင်ႏပွယ်ꩻ၊ ဝေင်ꩻနယ်ႏပွယ်ꩻဖုံႏနဝ်ꩻသွူ။ ပအိုဝ်ႏဒေႏသကို နုဲင်းကထွာဒျာႏ ဝေင်ꩻနယ်ႏပွယ်ꩻတဲ့နဝ်ꩻ၊ အွိုင်ႏပွယ်ꩻတဲ့နဝ်ꩻ၊ ဒေႏသပွယ်ꩻတဲ့နဝ်ꩻ အဝ်ႏမာꩻလွေꩻစွစ်ꩻစီးစွစ်ꩻစဲစ်ꩻတန်ဒျာႏယို အဝ်ႏသေထွꩻဒျာႏဝင်ꩻနဝ်ꩻသွူ၊ ထာꩻခုမ်ပဆိုးအမျိုꩻမျိုꩻတောမ်ႏ ဘောလုံးပွယ်ꩻဖုံႏယို အဝ်ႏမာꩻလွေꩻ ပအိုဝ်ႏဒေႏသကိုလုမ်ꩻတမွေးတဝ်း နုဲင်းဒျာႏလိုꩻမျိုꩻလင်ဒေႏသကိုဖုံႏတဲ့နဝ်ꩻ၊ ဝေင်ꩻနယ်ႏအလင်ကိုဖုံႏတဲ့နဝ်ꩻ၊ ခမ်းနယ်ႏအလင်လင် တွိုင်ႏဒေႏသတန်အလင်လင်ကိုဖုံႏတဲ့နဝ်ꩻ အဝ်ႏမာꩻလွေꩻရောင်လွဝင်ꩻ အဝ်ႏထီႏထွꩻ၊ အဝ်ႏသေထွꩻဒျာႏဝင်ꩻနဝ်ꩻသွူ။ အညာꩻဖုံႏနဝ်ꩻ တဲက်ထွားတဝ်းဒုမ်၊ မိဉ်ႏတဲက်ထွားလွေꩻစံꩻဗာႏ ပအိုဝ်ႏဒေႏသကို ကအဝ်ႏမာꩻဒါႏ ထာꩻခုမ်ပဆိုးဘောလုံးပွယ်ꩻနဝ်ꩻ ဥပမာႏ- နုဲင်းသီႏသဲင်ႏဝေင်ꩻနယ်ႏ၊ သုဲင်ꩻခေါဝ်ဒေႏသကို စွုမ်ႏနေင်ႏနေင်ႏ ကအဝ်ႏလွောန်ဒါႏ ဘောလုံးပွယ်ꩻယိုတဲ့အဝ်ႏ၊ တောင်ႏကီꩻဝေင်ꩻနယ်ႏ နောင်ကာꩻဒေႏသကို ကအဝ်ႏမာꩻလွေꩻဒါႏ ဘောလုံးပွယ်ꩻတဲ့အဝ်ႏနဝ်ꩻ ထီႏဗာႏနဝ်ꩻသွူ။ ယိုကိုနဝ်ꩻ မိဉ်းတဲက်ထွားဗာႏ ပွယ်ꩻအပေႏအတန်တဲ့နဝ်ꩻ၊ ဘောလုံးခေးပွယ်ꩻကို ကနွို့တပတ်ꩻဒါႏ ဘောလုံးအစွိုꩻပေါင်ꩻ အဆေ့ꩻအအာတဲ့နဝ်ꩻ နုဲင်းခိန်ႏခါႏကာႏလယိုခါ ကအဝ်ႏမာꩻလွေꩻဒါႏ အခိန်ႏတဲ့နဝ်ꩻ သုဲင်ꩻခေါဝ်ပွယ်ꩻတောမ်ႏ နောင်ကာꩻပွယ်ꩻနဝ်ꩻ တကွာႏတဝ်းဝင်ꩻနဝ်ꩻ ထီႏဗာႏနဝ်ꩻသွူ၊ အကွာႏတဝင်ꩻနဝ်ꩻတဲ့ လိုꩻကအွောန်နောင်ကာꩻ ပွယ်ꩻကောႏမတီႏစွိုꩻသား အခေႏနေႏတောမ်ႏ ကမ်းဆꩻချာတောမ်ႏ လိုꩻကအွောန်သုဲင်ꩻခေါဝ် ပွယ်ꩻကောႏမတီႏစွိုꩻသား အခေႏနေႏတောမ်ႏ အငင်းကမ်းဆꩻချာဖုံႏယိုနဝ်ꩻ အီႏအဝ်ႏနေနေနဝ်ꩻသွူ။ ပအိုဝ်ႏဒေႏသကို ဘောလုံးပွယ်ꩻဒျာႏနုဲင်းနုဲင်းဝင်ꩻ နောင်ကာꩻပွယ်ꩻတောမ်ႏ သုဲင်ꩻခေါဝ်ပွယ်ꩻယို တွိုႏပွိုင်းဝွို့တောမ်ႏ ဘောလုံးပွယ်ꩻ နောင်ကာꩻနဝ်ꩻ ဘောလုံးပွယ်ꩻတာႏ ကေပ်ꩻကောက်ꩻဒျာႏရွောန် လဲင်ꩻစွစ်ꩻစီးစွစ်ꩻစဲစ်ꩻနေးစွောန်ႏဒျာႏ ခွိုင်းကားပအိုဝ်ႏကအဝ်ႏဒျာႏ ဒေႏသရင်း စွုမ်ႏရပ်ရပ် စွုမ်ႏဒုံဒုံနဝ်ꩻ ထီႏထွꩻဟွုန်ထွꩻဗာႏ ရပ်သားသောင်ခြင်ꩻနဝ်ꩻသွူ၊ ထွိုင်ႏတွိုႏပွိုင်းဝွို့တောမ်ႏ ဘောလုံးပွယ်ꩻသုဲင်ꩻခေါဝ်တွော့ꩻ ကေပ်ꩻကောက်ꩻဗာႏရွောန် ပအိုဝ်ႏဒေႏသကိုယို ထီႏဟွုန်ထွꩻဗာႏတအဝ်ႏတဝ်း၊ သောင်ခြင်ꩻသားတဲ့ တအဝ်ႏတဝ်းနဝ်ꩻ ပွိုးတမုဲင်ꩻ။ အကွာႏယိုဖုံႏလုမ်ꩻတကာႏတဝ်း ပွိုင်းဝွို့တောမ်ႏ မာꩻပွယ်ꩻဘောလုံးပတ်ꩻ နောင်ကာꩻယိုတဲင် ကထွာဒျာႏ နောင်ကာꩻအထျꩻသောင် ကအဝ်ႏဒါႏ ဒုံလစ်ꩻငတ်ꩻသူဖြုံႏဖုံႏယိုနဝ်ꩻလဲ့ ဖေႏအပ်လွောန်ဗာႏ လိုꩻအာႏရဲင်ꩻ ရွောန်အာႏရဲင်ꩻ အခိန်ႏအာႏရဲင်ꩻဖုံႏနဝ်ꩻသွူ။ ပွိုင်းဝွို့တောမ်ႏ ကမာꩻပွယ်ꩻနောင်ကာꩻယို ခမ်းနယ်ႏအစိုႏရထျꩻဖုံႏ၊ မြန်မာခမ်းထီ ဘောလုံးအစွိုꩻချုက်ထျꩻဖုံႏ အဝ်ႏလꩻခါꩻ ထာꩻခုမ်ပဆိုး (ဘောလုံး)ဆဲင်ႏရာꩻ ခြွိုင်းခြိုꩻအကူႏအညီႏဖုံႏ၊ ရွောန်အကူႏအညီႏဖုံႏတဲ့ အဝ်ႏနဝ်ꩻနေနေနဝ်ꩻသွူ။ ပွိုင်းဝွို့တောမ်ႏနောင်ကာꩻကွင်ꩻယိုတဲင် ၂၀၁၉-နေင်ႏအစကို အဝ်ႏလꩻခါ မွောန်းဖျင်မာꩻပြွူႏဖြိုအီဘောလုံးကွင်ꩻတာႏ အစိုႏရရွောန်ဘတ်ဂျက် အစွဲးအကမ်းဖုံႏအဝ်ႏနဝ်ꩻသွူ၊ တွိုႏယိုခါ မွောန်းချင်လွေꩻနဝ်ꩻတဲ့ တအဝ်ႏတဝ်းဒွုန်းနဝ်ꩻသွူ။ ပွိုင်းဝွို့တောမ်ႏ ဘောလုံးပွယ်ꩻနောင်ကာꩻတွော့ꩻ ပွိုးတမုဲင်ꩻ ကေပ်ꩻကောက်ꩻဗာႏရွောန်နဝ်ꩻ ကထွာပွယ်ꩻကောႏမတီႏစွိုꩻ အဝ်ႏလိုႏထူႏရေꩻခြေင်းခြေင်းနဝ်ꩻသွူ၊ ကမာꩻဘောလုံးပွယ်ꩻနဝ်ꩻ ရေႏရွယ်ႏဒျာႏ ထင်ႏထိုဖဲ့ꩻဆဲင်ႏရာꩻလဲ့ ကောပ်ပွိုး အွိုင်ႏအရန်း၊ ဝေင်ꩻနယ်ႏအရန်းဖုံႏ ကေပ်ꩻကောက်ꩻရွောန်တဲင် ပွယ်ꩻအလောင်း ခမ်းသားထီတရွို့ꩻအီဒါႏ၊ ထင်းဟဝ်အီတဝ်းဒါႏ ကောႏမတီႏစွိုꩻဖုံႏနဝ်ꩻမꩻ အဝ်ႏလိုႏထူႏရေꩻဖြေႏသျင်ꩻဖေႏအကျောင်ꩻ ခမ်းသားငေါဝ်းအယ်ဒီတာစွိုꩻ တဲမ်းဖြုဲင်ꩻဖေႏသေလွေꩻဗာႏနဝ်ꩻသွူ။[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ခြွူႏမွောန်းသားစွိုꩻ
  2. ခမ်းသားငဝ်း အမုဲင်-၇၊ အစဲဉ်ႏ-၈၆