မာꩻဗာႏတဝ်းတွော့ꩻ တောမ်ႏထင်းမွုန်းနမ်းသက်သာႏဗာႏ

ပုဂ္ဂိုလ်ႏလိုꩻတန်သီးတထွဉ်ႏမာꩻတဝ်း ထာꩻမာꩻတဲင် သꩻကရေꩻ၊ ကပျောႏတေ့ꩻဒါႏထာꩻသားဖုံႏ(ထာꩻမာꩻလောကကို)နဝ်ꩻ အဝ်ႏအာတန်သွူ။ “ဝင်ꩻထွဉ်ႏမာꩻတဝ်း ထာꩻမာꩻတဲင် ခွေသက်သာႏဗာႏမွေးစွဉ်ႏထာꩻ” လိုꩻကယူႏ ကထင်းဒါႏနုဲင်းနဝ်ꩻစားသားဖုံႏတဲ့ အဝ်ႏအာတန်။ ဝင်ꩻမိဉ်ႏထွဉ်ႏမꩻ မာꩻ၊ ဝင်ꩻမိဉ်ႏတထွဉ်ႏတဝ်းနဝ်ꩻ မာꩻတဝ်း၊ “နမ်းတာႏ သက်သာႏဗာႏငါ မွေးလဲဉ်း” လိုꩻကယူႏ ကထင်းဒါႏနဝ်ꩻစားသားလဲ့ (ထာꩻမာꩻလောကကိုနဝ်ꩻ) အဝ်ႏဗွေဗောႏထာꩻသွူ။ ထာꩻမာꩻတဗာႏ မိဉ်ႏပေါႏ (မိဉ်ႏအဝ်ႏ)လွဉ်သွူနဝ်ꩻ “လွဉ်ထွဉ်ႏတဝ်းနီ၊ ထွဉ်ႏထိုꩻတေားဗော့ꩻပါꩻလင်နဝ်ꩻ ယံထဲင်း၊ နဝ်ꩻမꩻ နီနမ်းငက်သာႏဗာႏ” လိုꩻကအုံဒါႏတွမ်ႏထာꩻယူႏနဝ်ꩻစားဖုံႏတဲ့ အဝ်ႏအာတန်နေနေ။ ကွဲႏတွော့ꩻ အနမ်းသူမ်ꩻတေင်ထိုꩻဗာႏ အာတန်ကရိုꩻယို အနမ်းတွမ်ႏအနမ်း တသေချာတဝ်းသွူ။ ကခံႏဗာႏပုဂ္ဂိုလ်ႏလိုꩻတန်သီး ကထွဉ်ႏမာꩻလိုꩻထာꩻမာꩻနဝ်ꩻ ထွာဒျာႏ ဝင်ꩻသွဉ်ဖေႏလိုꩻ နမ်းမော့ꩻထာꩻဒါႏ၊ ထာꩻသေတစွိုးတဒဝ်ႏ နုဲင်းနဝ်ꩻဒျာႏသွူ။ ဝင်ꩻသွဉ်ဖေႏလိုꩻ နမ်းမော့ꩻဖြေႏ/စေသျင်ꩻ ပျဿနာႏအနယ်ꩻဒျာႏသွူ။ ပျဿနာႏယိုတဗာႏနဝ်ꩻ ဖြေႏ/စေသျင်ꩻဗာႏမုဲင်းမုဲင်ꩻ..?ကရိုꩻယိုလဲ့ သေယူႏဒါႏ၊ ချင်းခေႏစိဉ်ꩻစာꩻဒါႏလွဉ်အီနေနေသွူ။ ဖြေႏ/စေသျင်ꩻပျဿနာႏဖုံႏ အလဲင်ႏပေါင်ꩻမိဉ်ႏအာလွဉ်နဝ်ꩻ ပေါႏမိဉ်ႏမာꩻထာꩻမာꩻတဗာႏယို ဖေႏကထွူသွတ်ꩻယိုꩻယိုꩻ ဖေႏကအောင်ႏမျင်ႏမွိုင်မွိုင်ကြွိုင်ကြွိုင်ဗာႏ တလဲင်ႏ/တခြွိုက်ချင်ꩻ-ကရိုꩻဒါႏအကျင်ꩻနဝ်ꩻစားလဲ့ အဝ်ႏလွဉ် ထွာလွဉ်အီသွူ။ ဒေါ့ꩻတွမ်ႏဖြောင်းနဝ်ꩻ ယိုꩻ...၊ ထာꩻမာꩻတဗာႏယို နမ်းမော့ꩻမိဉ်ႏထွိုင်ႏမာꩻစမ်ꩻဗာႏမꩻ သေထွꩻဗာႏအယပ်ꩻအခုဲင်ႏဖုံႏ(အဝ်ႏနုဲင်းမုဲင်ꩻ)နဝ်ꩻသွူ။ မာꩻတဝ်း ဒါႏတဝ်း၊ မာꩻမꩻ ဒါႏသွူ။ ပေါႏမိဉ်ႏထွာဒျာႏ လိုꩻလဲ့ꩻယိုသျောင်ႏနဝ်ꩻ ကြဲစ်ချာကြဲစ်ငါဒါႏထာꩻနဝ်ꩻစားနဝ်ꩻ ဝင်ꩻသေထွꩻလွဉ်ꩻဒါႏလိုꩻ။ “ပါꩻနဝ်ꩻနဝ်ꩻ ဝင်ꩻထွဉ်ႏမꩻ မာꩻ၊ ထွဉ်ႏတဝ်း မာꩻတဝ်း၊ လိုꩻသꩻတအဝ်ႏတဝ်းထာꩻမာꩻအလောင်း” ဝင်ꩻသေထွꩻလွဉ်လိုꩻနုဲင်းနဝ်ꩻသွူ။ နဝ်ꩻထွူတကာႏတဝ်း ဝင်ꩻထွိုင်ႏသေထွꩻလွဉ်လိုꩻနဝ်ꩻ ဝင်ꩻမိဉ်ႏထွဉ်ႏသွူထာꩻမာꩻကိစ္စတစွိုးစွိုးယို ဝင်ꩻယူႏဖေႏတဝ်းဒူမ်လိုꩻတာႏသွူ။ ပေါႏဝင်ꩻမိဉ်ႏထွဉ်ႏတဝ်းဒူမ်ထာꩻမာꩻနဝ်ꩻ မိဉ်ႏထွားအွိုးဝွေꩻဖဲ့ꩻနဝ်ꩻတဲးတဲ့ သက်သာႏဗာႏလွိုႏလွိုႏသနယ်နော်ႏ...။ ကွဲႏတွော့ꩻ… အမဲဉ်ႏတဗာႏနဝ်ꩻ ဝွေꩻသူမ်ꩻတေင်ထိုꩻဗာႏ အာတန်သွူ။ ပေါႏတလꩻဗာႏတဝ်းဒူမ် ပုဂ္ဂိုလ်ႏလိုꩻတန်တဖြာꩻထာꩻယူမ်းအံႏနဝ်ꩻ ထာꩻမာꩻသား(ဝိုန်ႏထမ်ꩻ)တဖြာꩻတာႏ ထွာထိုꩻဗာႏစွဉ်ႏ အသူမ်ꩻသွတ်ꩻ၊ အနိစ်နာႏသွတ်ꩻ လိုꩻတဖြာꩻ ဒေါ့ꩻဗာႏနုဲင်းနဝ်ꩻသွူ။ နဝ်ꩻမꩻ ပုဂ္ဂိုလ်ႏလိုꩻတန်သီးနဝ်ꩻ ထွဉ်ႏအာ၊ အာႏကွိုꩻအာဒျာႏ လိုꩻကမဲဉ်မာꩻ ကကုဲင်းမာꩻထာꩻအာꩻသားဖုံႏတဲင် “ဝင်ꩻမိဉ်ႏလွဉ်ထွဉ်ႏမꩻ မာꩻ၊ ထွဉ်ႏတဝ်း မာꩻတဝ်း” လိုꩻနဝ်ꩻစားစားနဝ်ꩻ အဝ်ႏလွိုႏလွိုႏကာႏကာႏ တွိုႏထိုꩻဗာႏဒါႏ အသောင်အမော့ꩻ ပိဉ်စိꩻစိꩻသွူ။ မွေး… ပုဂ္ဂိုလ်ႏလိုꩻတန်သီးကရိုꩻနဝ်ꩻ အမဲဉ်ထွဉ်ႏအာ၊ အာႏကွိုꩻအာဒျာႏ လိုꩻကမဲဉ်မာꩻ ကကုဲင်းမာꩻဒါႏ ထာꩻမာꩻသားလူမ်ꩻသွူ။ “လွဉ်ထွဉ်ႏမꩻ မာꩻဖေႏ၊ ထွဉ်ႏတဝ်း မာꩻဖေႏတဝ်း၊ မိဉ်ႏထွဉ်ႏတဝ်းခွေနဝ်ꩻ ခွေသက်သာႏဗာႏ” ယူႏဒျာႏနုဲင်းနဝ်ꩻ၊ အီႏမာꩻဖေႏထာꩻမာꩻတာႏ တအဝ်ႏတမ်ꩻဖေႏတဝ်းအထွူ ထာꩻမာꩻသား(ဝိုန်ႏထမ်ꩻ)နုဲင်းယိုစားနဝ်ꩻ တကျွိုက်တဝ်း၊ ဝင်ꩻတမဲဉ်ဖေႏမာꩻထဲင်းတဝ်းဒူမ် ထာꩻမာꩻလဲ့ ကောပ်စွဉ်ႏလက်ခံႏ အွဉ်ႏထွော့ခါꩻဖေႏလဲဉ်း ဝွေꩻထာꩻမာꩻနဝ်ꩻမꩻ တစင်းမာꩻတဝ်း၊ ဝင်ꩻသꩻညင်ꩻဖေႏ၊ သꩻစာႏမာႏဖေႏဝွေꩻထွူ ဝင်ꩻအဝ်ႏလက်ခံႏ အွဉ်ႏထွော့ꩻခါꩻစွူစွူဗာႏဒျာႏဝွေꩻနုဲင်းနဝ်ꩻသွူ။ “ပါꩻနဝ်ꩻနဝ်ꩻ ဝင်ꩻအာႏကွိုꩻတလꩻတဝ်းလိုꩻတဖြာꩻတန်ဒျာႏ” ဝင်ꩻထင်းဝင်ꩻယူႏဒါႏလ်ုꩻနုဲင်းနဝ်ꩻသွူ။ မိဉ်ႏခံႏဗာႏ ဝင်ꩻထင်းဝင်ꩻယူႏလိုꩻနုဲင်းယိုစားနဝ်ꩻ ထာꩻမာꩻသား(ဝိုန်ႏထမ်ꩻ)တဖြာꩻအနေႏ သူမ်ꩻတေင်ထိုꩻဗာႏ အာတန်သွူ။ ဘဝဆငါရေꩻတာႏ အာႏမခံႏချက်လဲ့ ဆေ့ꩻထိုꩻအီဗာႏနေနေသွူ။ တွိုႏလွေꩻခန်းအရပ်မုဲင်ꩻတယဝ်း ပေါႏအဝ်ႏထွာဗော့ꩻဒျာႏ “ဝင်ꩻထွဉ်ႏမꩻ မာꩻ၊ ထွဉ်ႏတဝ်း မာꩻတဝ်း”နုဲင်းယိုနဝ်ꩻ တာႏဆွာꩻတာႏသူꩻ နမ်းအဆင်ႏအီႏရော့ꩻဗာႏနဝ်ꩻ တယိုꩻတဝ်းသွူ။ လိုꩻယူႏဒျာႏဗော့ꩻ နမ်းတာႏအကျိုꩻ၊ နမ်းသက်သာႏဗာႏငါမွေးလဲဉ်း၊ မာꩻဖေႏ ထာꩻအာꩻတာႏ သꩻအဝ်ႏထွူႏနေက နုဲင်းယိုနဝ်ꩻ (အဝ်ႏ)ထာꩻမာꩻကသွဉ်ဖေႏဒါႏ နီထာꩻဒါႏ၊ ထာꩻသေ အာစွိုးအာဒဝ်ႏဖုံႏယို နီဒါႏလွဉ်ꩻ၊ သေလွဉ်ꩻဗာႏတဝ်းဒူမ် တစိꩻစိꩻသွူ။ ပုဂ္ဂိုလ်ႏလိုꩻတန်ကရိုꩻနဝ်ꩻ အအဝ်ႏထွားတေ့ꩻ၊ ရိက်ခေႏတေ့ꩻ တသေႏသေႏဒါႏလ်ိုꩻ။ “သꩻသောင်ႏသာ ကျိုꩻစာꩻမုꩻတအဲဉ်ထဝ်းလိုꩻ၊ သꩻမဲဉ်စွဲးကမ်းကူႏငီႏဒါႏဝင်ꩻ တအဲဉ်ထဝ်းလိုꩻ၊ မာꩻဗာႏတဝ်းတွော့ꩻ သက်သာႏဗာမွေးစွဉ်ႏထာꩻ၊ လိုꩻသꩻကယူႏ ကထင်းဒါႏနုဲင်းနဝ်ꩻစားဖုံႏ၊ လိုꩻထွားဒျာႏဗော့ꩻနမ်းအကျိုꩻလူမ်ꩻ လိုꩻနဝ်ꩻစားဖုံႏနဝ်ꩻ ပုဂ္ဂိုလ်ႏလိုꩻတန်မုဲင်ꩻမုဲင်ꩻခန်းတယဝ်း တအာႏကွိုꩻတဝ်း၊ တမဲဉ်အာႏကွိုꩻတဝ်းသွူ။ ကအဝ်ႏကျင်ႏ၊ ကအဝ်ႏတလျူ၊ ကအဝ်ႏပေႏအဝ်ႏဆားထွူ အာႏရဲင်ꩻကအဝ်ႏတလာ၊ ကအဝ်ႏမာꩻနွောင်ꩻခိင်ႏတွင်ꩻ ခိုႏဒါႏတဝ်းထာꩻ၊ ကြဲစ်ဒါႏတဝ်းထာꩻ၊ (လွꩻတဝ်း)၊ မာꩻမွိုင်မွိုင်ကြွိုင်ကြွိုင် သွောင်သွောင်ဖွီဖွီ တလျူလျူတဲင် နေးတောမ်ႏထာꩻသူႏသေ၊ ထာꩻလိင်ႏမာႏတန်တန်အာအာ မိဉ်ႏစွဲးကမ်းကူႏငီႏကိုဒါႏ ပုဂ္ဂိုလ်ႏလိုꩻတန်သီးနဝ်ꩻ လောကကိုယို ထွာဒျာႏ “နီလိုꩻသီး ယေန်းငဲးမုꩻတစွိုးတဒဝ်ႏ”နေနေနဝ်ꩻသွူ။