မာꩻသီဝင်ꩻသက်တိုꩻတက်တဝ်း

"မစ္ဆဗန္ဓသုတ် (မာꩻသီဝင်ꩻသက်၊ တတိုꩻတက်တောဝ်း)" အွိုးခꩻတလဲင်ႏ- နီဗွေႏဘုရာꩻတွမ်ႏ ရဟန်ꩻသံဃာႏ ကျွꩻလွေꩻတဖူꩻ ကောသလခမ်းကို၊ တွိုႏလွေꩻ စာထပေႏသားထျꩻ၊ (မဉ်ဆွုံꩻမꩻ ရဟန်ꩻသီးဖုံႏတဲင်) ကျွꩻထန်ႏတဖူꩻသောင် လွေꩻအုံသေင်ႏမွူးတမွူးဆလ၊ ရီရဟန်ꩻသီးဖုံႏနုဲင်းယို- "ရဟန်ꩻသီးဖုံႏဟွေး- ပါꩻသူꩻနဝ်ꩻ မာꩻသီထပေႏ တဗာႏထွူတဗာႏ စာဖေႏဝင်ꩻ၊ ပါꩻထသားသူꩻနဝ်ꩻ သီအဝ်ႏထီႏဒျာႏကရို" "အဝ်ႏထီႏဒျာႏ ဗွေႏဩ" "ရဟန်ꩻသီးဖုံႏဟွေး- လိုꩻတခွေထ၊ မာꩻသီထ၊ စာထတဲင် ခြွေခြာႏချမ်ꩻသာႏတွော့ꩻ ထုမ်းဗာႏစွဉ်ႏဆင်၊ ထုမ်းဗာႏစွဉ်ႏသေ၊ ထုမ်းဗာႏစွဉ်ႏရထာꩻ၊ ထိုမ်းဗာႏစွဉ်ႏယာဉ်(ကာꩻ)၊ ထွာသဌေꩻတန်တဖြာꩻ-နုဲင်းနဝ်ꩻ သီဟွူန်ဖိုနေဟောင်း" "ဟွူန်ဖိုတောဝ်း ဗွေႏဩ" "ရဟန်ꩻသီးဖုံႏဟွေး- ခွေတဲ့ တဟွူန်ဖိုတဝ်းနေနေ၊ အတခြွေနွောင်ꩻတဝ်း၊ ကွပ်ပွိုးထမုဲင်ꩻနဲတဲင် ထီႏသွူထပေႏ အီႏသီဗာႏထာꩻဖုံႏနဝ်ꩻနဝ်ꩻ တွေꩻသညင်ꩻတောဝ်း၊ နေးတွမ်ႏသꩻယွုတ်ညမ်း ထွားထပေႏ၊ နေးတွမ်ႏသꩻရွိုင်ꩻ မာꩻသီထပေႏ၊ အကုသိုလ်ႏသꩻတဗော့ꩻလဲ့ꩻ အဝ်ႏဟွံခါꩻ၊ အဝ်ႏပဒွံခါꩻအသꩻတွော့ꩻ အီႏမော့ꩻထာꩻဒုက္ခ၊ အီႏအဝ်ႏခံည ငါးရုဲင်ꩻနဝ်ꩻသွူ။ ရဟန်ꩻသီးဖုံႏဟွေး- လိုꩻမာꩻသီဖိုး၊ မာꩻသီဖေႏဝင်ꩻဖိုး၊ ဖို့ꩻဖိုးသားနဝ်ꩻတဲ့ ထီႏသွူဖိုး သညင်ꩻတဝ်းဖိုး၊ ရက်တဝ်းဖိုး၊ နေးတွမ်ႏသꩻယွုတ်ညမ်းထွားဖိုး၊ နေးတွမ်ႏသꩻမွိုက် မာꩻသီဖိုး၊ ဖိုးငွဉ်ꩻသွီႏ မာꩻတဗော့ꩻလဲ့ꩻ ဝွေꩻစူ၊ အကုသိုလ်ႏ မာꩻတဗော့ꩻလဲ့ꩻဝွေꩻသꩻ၊ ကွပ်နဝ်ꩻမꩻ ဝွေꩻနဝ်ꩻ အီႏမော့ꩻဗာႏ ထာꩻဒုက္ခ၊ အီႏအဝ်ႏခံည ငါးရုဲင်ꩻနောဝ်ꩻသွူ။ ရဟန်ꩻသီးဖုံႏဟွေး- လိုꩻမာꩻသီဗဲး၊ မာꩻသီဖေႏဝင်ꩻဗဲး၊ ပါꩻနဝ်ꩻတဲ့ ထီႏသွူဗဲး သညင်ꩻတဝ်းဗဲး၊ ရက်တဝ်းဗဲး၊ နေးတွမ်ႏသꩻယွုတ်ညမ်း ထွားဗဲး၊ နေးတွမ်ႏသꩻမွိုက် မာꩻသီဗဲး၊ ဗဲးငွဉ်ꩻသွီႏ မာꩻတဗော့ꩻလဲ့ꩻဝွေꩻစူ၊ အကုသိုလ်ႏ မာꩻတဗော့ꩻလဲ့ꩻ ဝွေꩻသꩻ၊ ကွပ်နဝ်ꩻမꩻ ဝွေꩻနဝ်ꩻ အီႏမော့ꩻထာꩻဒုက္ခ၊ အီႏအဝ်ႏခံည ငါးရုဲင်ꩻနောဝ်ꩻသွူ။ ရဟန်ꩻသီးဖုံႏဟွေး- လိုꩻမာꩻသီထော့ꩻ၊ လိုꩻမာꩻသီဆျာ၊ လိုꩻမာꩻသီဝါး၊ လိုꩻမာꩻသိထာꩻသားဖုံႏနဝ်ꩻတဲ့ ထာꩻသညင်ꩻအဲဉ်ထဝ်း၊ ထာꩻရက်အဲဉ်ထဝ်း၊ နေးတွမ်ႏသꩻယွုတ်ညမ်းထွား၊ နေးတွမ်ႏသꩻရွိုင်ꩻမာꩻသီ၊ အစူနဝ်ꩻ သွီႏတဗော့ꩻလဲ့ꩻ၊ အသꩻနဝ်ꩻ အကုသိုလ်ႏတဗော့ꩻလဲ့ꩻ၊ ကွပ်နဝ်ꩻမꩻ ဝွေꩻသီးနဝ်ꩻ အီႏမော့ꩻထာꩻဒုက္ခ၊ အီႏအဝ်ႏခံည ငါးရုဲင်ꩻနဝ်ꩻသွူ။ ရဟန်ꩻသီးဖုံႏဟွေး- ယင်ဟန်ႏသားနဝ်ꩻ မာꩻသီလိုꩻ၊ နေးတွမ်ႏသꩻယွုတ်ညမ်း ထွားလိုꩻ၊ နေးတွမ်ႏသꩻရွိုင်ꩻ နိစ္စက်လိုꩻ၊ မာꩻသီလိုꩻ၊ လိုꩻနုဲင်းနုဲင်းဝင်ꩻ ထာꩻသညင်ꩻအဲဉ်ထဝ်း၊ စာႏနာႏတဝ်းနမ်း၊ ငမ်းတဝ်းထာꩻဒုက္ခ၊ မာꩻသီလိုꩻထွူခါ ဘဝယို မော့ꩻထာꩻဒုက္ခ၊ ဘဝငါထဲင်းဟ တိတ်ချထဲ့ဗာႏ ငါးရုဲင်ꩻနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဆက္ကနိပါတ်၊ မစ္ဆဗန္ဓသုတ်)