မီႏချီႏမျောက်ထောက်ပံ့ဗာႏ

အဝ်ႏ ဝီခီပီးဒီးယား ကို

"မီႏခီႏမျောက်ထောက်ပံ့ဗာႏ ဖူးဝေးသွꩻဟောဝ်" ဗွေႏမျတ်ဘုရာꩻ ကဟော်ꩻခါꩻဒါႏ လောကစီꩻပွါꩻချံꩻသာႏအီအကျောင်ꩻ တရာꩻကထွာဒါႏ (၃၈)ပါꩻ မင်္ဂလာႏတရာꩻနောဝ်ꩻ ပါဠိဂါႏထာႏပေါင်ꩻ အောဝ်ႏဂါႏထာႏတဆီသွူ။ ပါဠိဂါႏထာႏတဆီအကို ပဉ္စမဂါႏထာႏနောဝ်ꩻ အောဝ်ႏနုဲင်းလယိုအတွိုင်ꩻသွူ။ - ဒါနဉ္စ ဓမ္မစရိယာ စ၊ ဉာတကာနဉ္စ သင်္ဂဟော။ အနဝဇ္ဇာနိ ကမ္မာနိ၊ ဧတံ မင်္ဂလ မုတ္တမံ။

ပဉ္စမဂါႏထာႏကို ကပါသော့ꩻဒါႏ မင်္ဂလာႏတရာꩻ (၄)ပါꩻ[မွဉ်းဖျင် | မွဉ်းဖျင်အရွီးခိုႏ]

(၁) စွဉ်ꩻကြယ်ꩻစာႏဂ ဖေႏဖလူႏတန်ꩻ၊ (၂) အကျင်ꩻဟောဝ်မျတ် သုစရဲက်တရာꩻဖုံႏယို အုံအောဝ်ႏကျင်ꩻသုံꩻ၊ (၃) ခီႏမျောက်ထောက်ပမ်းဗာႏ ဖူးဝေးသွꩻဟောဝ်၊ (၄) မာꩻဒျာႏ အပဲစ်တအဲဉ်ထောဝ်း ထာꩻဟောဝ်မျိုꩻ။ မင်္ဂလာႏတရာꩻ ယိုလစ်ꩻပါꩻအကို အမုဲင်(၃)မင်္ဂလာႏနောဝ်ꩻ "ခီႏမျောက်ထောက်ပမ်းဗာႏ ဖူးဝေးသွꩻဟောဝ်"ရိုꩻနုဲင်းနောဝ်ꩻတဲင် ခီႏမျောက်ထောက်ပမ်း ဖူးဝေးသွꩻဟော်တွော့ꩻ မင်္ဂလာႏတရာꩻကထွာဒါႏ ဝတ္ထုသက်သေႏနောဝ်ꩻ တဲမ်းနယ်လွေꩻဗာႏ သတ္တကနိပါတ်-မဟာကပိဇာတ်နုဲင်းလယိုအတွိုင်ꩻသွူ။

သတ္တကနိပါတ်-မဟာကပိဇာတ်[မွဉ်းဖျင် | မွဉ်းဖျင်အရွီးခိုႏ]

ပွိုင်းလဲင်ႏစခါ ဗာႏရာႏဏသီႏခမ်းနောဝ်ꩻ ခွန်တန်ဗြဟ္မဒတ် အောဝ်ႏအုပ်စိုꩻသွူ။ ဘုရာꩻလောင်ꩻနောဝ်ꩻ အောဝ်ႏထွာမဟာကပိ ကမဉ်ꩻဒါႏ ယို့အတန်အကဲႏသွူ။ မဟာကပိယို့တန်ကဲႏနောဝ်ꩻ တွမ်ႏအချွေႏအရံႏယို့သူသောင်ꩻ အောဝ်ႏအုံကျင်ႏလယ်ႏခန်း ဟိမဝန္တာႏကောင်လောင်းသွူ။ ဂင်္ဂါႏခြောင်တန်ထျꩻ ကအောဝ်ႏဒါႏ အမ္ဗဝနတခေါ့ꩻမွူးတမွူးနောဝ်ꩻ ပေါႏတွိုႏအခိန်ႏရာႏလဲ့ ဘုရာꩻလောင်ꩻယို့သီး အောဝ်ႏလွေꩻဒဲ့ꩻအံႏစွုမ်ႏနေင်ႏနေင်ႏသွူ။ တွိုႏတနေင်ႏတွော့ꩻ ဘုရာꩻလောင်ꩻယို့သီး အောဝ်ႏလွေꩻဒဲ့အံႏတခေါ့ꩻရာႏနောဝ်ꩻကိုတွင်ꩻ တခေါ့ꩻရာႏတဖြုံႏနောဝ်ꩻ ဟူႏသော့ꩻ ဂင်္ဂါႏထီခြောင်တွော့ꩻ တခြွဉ်ႏဒွမ်လင်ꩻခန်းထီသွူ။ မတော်မကာ ဖဲ့ꩻဒွမ်ဖဲ့ꩻနောဝ်ꩻ ဗာႏရာႏဏသီႏခွန်ဟော်ခံꩻတွမ်ႏ သွဉ်းသယ်ႏဖုံႏ အောဝ်ႏလူးပျောႏရာႏထီတဲင် ခွန်သွဉ်းသယ်ႏ ထွိုင်ႏထီႏတခေါ့ꩻရာႏမဉ် တခြွဉ်ႏလင်ꩻထီနောဝ်ꩻ ထူႏတွမ်ထွူတွော့ꩻ လွေꩻဆက်ခန်း ခွန်ဟော်ခံꩻသွူ။ ခွန်ဟော်ခံꩻနောဝ်ꩻ ကျာႏသွူတခေါ့ꩻရာႏနောဝ်ꩻတွော့ꩻ ထွိုင်ႏအ့ႏထွားစံꩻနောဝ်ꩻ နွိုးအွီႏဟောဝ်ငါႏတဲင် မဲဉ်အံႏထဲင်းထဲင်းတွော့ꩻ စောႏတနာႏခန်း တခေါ့ꩻမွူးသွူ။ ကကျင်ႏလယ်ႏဒါႏတခြာ မုဆိုꩻဖုံႏနောဝ်ꩻ အွဉ်ဆꩻငါတဲင် တွမ်ႏခွန်ဟော်ခံꩻ တွမ်ႏဖြီဖေါင်ႏဆန်ခိုႏထင်ႏ ဂင်္ဂါႏထီခြောင်တဲင် ထုမ်ႏလယ်ႏထွားခန်း တခေါ့ꩻမွူးသွူ။ ထွိုင်ႏမော့ꩻထွိုင်ႏထီႏ တခေါ့ꩻမွူးနောဝ်ꩻ မွူးလဲ့ဟာလဲဉ်းတဲင်တွော့ꩻ အဟာနောဝ်ꩻနောဝ်ꩻ ခွန်ဟော်ခံꩻတွမ်ႏ သွဉ်းသယ်ႏဖုံႏနောဝ်ꩻ ချꩻဗေင်ႏခန်း တခေါ့ꩻမွူးသောင်ထျꩻဖုံႏသွူ။ ခွန်ဟော်ခံꩻ ကဖျော်လွဉ်ခိန်ႏနောဝ်ꩻ တနꩻဗွေႏဘုရာꩻလောင်ꩻယို့သီး အောဝ်ႏဒဲ့ꩻအံႏတခေါ့ꩻရာႏတွင်ꩻတွော့ꩻ ခွန်ဟော်ခံꩻထွိုင်ႏဖျော်နောဝ်ꩻ တန်ꩻဖင်းတောဝ်းတဲင် အုံတေ့ꩻရောင်ဗော့ꩻထာꩻ တခေါ့ꩻမွူးလောင်းသွူ။ ဗွေႏဘုရာꩻလောင်ꩻနောဝ်ꩻ တခေါ့ꩻမွူးလောင်း ကအောဝ်ႏဒါႏယို့ဖုံႏကားကအောဝ်ႏယို ဖေႏကလွစ်လꩻ ခွန်ဟော်ခံꩻအန္တရာယ်ႏနောဝ်ꩻ အီႏမာꩻဗာႏနုဲင်းမုဲင်ꩻနဲး အောဝ်ႏစဉ်ꩻစာꩻခန်းထာꩻနုဲင်းနောဝ်ꩻသွူ။ ဗွေႏဘုရာꩻလောင်ꩻယို့နောဝ်ꩻ ထီႏလွေꩻခန်း သွီႏဒေါ့ꩻဒင်ႏသေင်ႏမွူး အွိုးခြောင်တဖဲ့ꩻသူꩻတဲင် တဝဲဉ်ကာႏလွေꩻသွူထီတွော့ꩻ လွေꩻအဲင်ႏထဲ့ခန်းသွီႏ၊ သွီႏမော့တဖဲ့ꩻနောဝ်ꩻ စွိုင်ခါꩻသွူသေင်ႏပင်ခြောင်ဖင်ႏတဖဲ့ꩻနောဝ်ꩻတွော့ꩻ အောဝ်ႏကုဲင်သွီႏမော့ꩻတဖဲ့ꩻနောဝ်ꩻ စွိုင်ထွူဝွေꩻငင်းဒေင်တဲင် ပကျောက်ꩻကာႏခွိုꩻချာယင်း တခေါ့ꩻမွူးကအောဝ်ႏဒါႏဖဲ့ꩻနောဝ်ꩻသွူ။ သွီႏနောဝ်ꩻ ဟမ်းပေါင်းဒွေါင်ႏတစိꩻတွော့ꩻ ထွꩻဟောဝ်ငါႏတောဝ်းသွူ။ နောဝ်ꩻတွော့ꩻ ဘုရာꩻလောင်ꩻစူနီပင်နောဝ်ꩻ ဖွို့ꩻတဉ်ႏတဉ်ႏသွူ တခေါ့ꩻပင်တဲင် အွဉ်ႏအသွꩻဖုံႏ ဖင်းကာႏလွေꩻနေး ဝွေꩻငင်းလောင်းသွူ။ ယို့ဖုံႏနောဝ်ꩻ ရိုႏရိုႏသေႏသေႏဖင်းကာႏလွဝင်ꩻ ပငါပရာꩻလဲ့ အဆုဲင်ꩻသွတ်ꩻကအောဝ်ႏကုဲင်ဒါႏ ဒေႏဝဒတ်အလောင်ꩻ ယို့မွိုက်ကျမ်ꩻတဗာႏနောဝ်ꩻ ထင်ႏထိုထိုသွူတခေါ့ꩻမွူးလောင်းတွော့ꩻ နေးအာႏနေးရင်ꩻ ပကျောက်ꩻလင်ꩻလူး ဘုရာꩻလောင်ꩻယို့ငင်းဒေင်တွော့ꩻ ဘုရာꩻလောင်ꩻယို့လဲ့ ငင်းဒေင်ထို့ ထဲ့လင်ꩻခန်းဒျာႏဟံႏလောင်းသွူ။ နောဝ်ꩻတွော့ꩻ ဘုရာꩻလောင်ꩻယို့ ကမာꩻနုဲင်းယိုနောဝ်ꩻ ဗာႏရာႏဏသီႏ ခွန်ဟော်ခံꩻတွမ်ႏ အသွဉ်းသယ်ႏဖုံႏနောဝ်ꩻ အောဝ်ႏထွားအောဝ်ႏထီႏလွဝင်ꩻဖုံႏသွူ။ ဘုရာꩻလောင်ꩻယို့ ကထွိုင်ႏထဲ့လင်ꩻ ဟံႏလောင်းနောဝ်ꩻ လွေꩻထေ့သွူတွော့ꩻ ဒေါ့ꩻခန်းငေါဝ်းသꩻရေꩻနုဲင်းယိုသွူ။ "အံႏအော်ꩻ မလို့ဒါႏ၊ အံႏဖြာႏမလို့နွောင်ꩻ ယို့ဗွေႏယို့စောဝ်း ယိုအလောင်ꩻဟွေး၊ နာꩻယိုနောဝ်ꩻ ယို့ရိုꩻရိုꩻ တမွေးတောဝ်းဒျာႏရင်ꩻ၊ ကသညင်ꩻ ကကူႏညီႏဒါႏ ယို့အပေါင်ꩻနုဲင်းယိုနောဝ်ꩻ ပါꩻမုဲင်ꩻလဲ့ တထီႏဖိုတောဝ်းသွူ။ ရိုႏသေႏနပ်ခန်ꩻဒျာႏ ယို့ကဲႏဟွေး" ဗြဟ္မဒတ်ခွန်ဟော်ခံꩻနောဝ်ꩻ ဒေါ့ꩻနယ်ဖေႏသွူ ဘုရာꩻလောင်ꩻယို့နုဲင်းနောဝ်ꩻတွော့ꩻ တွမ်ႏတသီႏသူႏ တသီႏဖြွꩻ သူႏဖြွꩻဖေႏခန်း ဘုရာꩻလောင်ꩻယို့သွူ။ ဘုရာꩻလောင်ꩻယို့လဲ့ ဝွေꩻငင်းဒေင်ထို့ သꩻရာႏပꩻလဲဉ်းအကျောင်ꩻယို အောဝ်ႏသေချာဒျာႏတဲင်- "ခွန်ဟော်ခံꩻဟွေး- မာꩻနမ်းကျင်ꩻ တရာꩻဟောဝ်ဟောဝ်၊ ခီႏမျောက်ထောက်ကမ်းဖေႏသွော့ ဖူးဝေးသွꩻဟောဝ်ဖုံႏနေား" ဒေါ့ꩻဖေႏသွူ ခွန်ဟော်ခံꩻနုဲင်းနောဝ်ꩻတွော့ꩻ သီထိုꩻခန်းဒျာႏနောဝ်ꩻသွူ။ ဘုရာꩻလောင်ꩻယို့ ထွိုင်ႏသီနောဝ်ꩻ တွိုႏထင်ႏခန်းဒျာႏ လူꩻခမ်း၊ ထင်ႏထွာခန်းဒျာႏ လူꩻပိုခိုတဖြာꩻ ခံႏစာꩻခန်းဒျာႏ လူꩻစေꩻစိန်ႏနောဝ်ꩻသွူ။

ဥပဒေသ[မွဉ်းဖျင် | မွဉ်းဖျင်အရွီးခိုႏ]

ခီႏမျောက်ထောက်ကမ်း ဖူးဝေးသွꩻဟောဝ်ဖုံႏနောဝ်ꩻ မဉ်ႏသီတနီꩻခါ တွိုႏထင်ႏဗာႏလူꩻခမ်း၊ ထင်ႏစံႏစာꩻဗာႏ လူꩻစေꩻစိန်ႏသွူ။[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ခွန်ကုဝေ-မုဲင်းကောင်
  2. မောင်းမွူးခံꩻ အမုဲင်-၈၁