ယာအခြောင်ꩻ

အဝ်ႏ ဝီခီပီးဒီးယား ကို

"ယာအခြောင်ꩻ ပြောင်ꩻလုဲင်ႏအလင် အဝ်ႏလိုႏမာꩻလွေꩻလဲဉ်းသန်သန်" စွုမ်ႏနေင်ႏ မဉ်ႏတွိုႏသွူ ဇွန်လာ ၂၆-နီꩻနဝ်ꩻ ဖြဝ်ꩻခမ်းနယ်ႏကိုယို တွိုက်ꩻဖြန်လွေꩻယာအရေꩻ အဝ်ႏလဲ့ꩻဗုံလွေꩻယာနဝ်ꩻသွူ၊ ဟန်ႏနေင်ႏယိုလဲ့ အီႏလဲ့ꩻဗုံလွေꩻယင်း အဝေရာ မေႏကျောင်ႏကွင်ꩻကိုသွူ။ ဟန်ႏနီꩻ ဖြောဝ်ꩻအစိုႏရအွဉ် ကလဲ့ꩻလွေꩻဒါႏ ကဆွမ်ꩻမော့ꩻလွဉ်ဒါႏ ဖေင်ꩻတွမ်ႏမွန်ꩻတငွို့အီဒါႏ တသီႏဖုံႏနဝ်ꩻ တန်ႏဖိုꩻအမေႏရိကန်ႏဒေါ်လာ သန်းပေါင်ꩻ ၈၂-နဝ်ꩻသွူ။ နဝ်ꩻမꩻ ဝင်ꩻကထူႏရေꩻ ကအဝ်ႏတွိုက်ꩻဖြန်လွေꩻယာယို တနီꩻတစိꩻ ကွဲးတချချသဲင်ꩻ၊ ကွဲးခြေင်းခြေင်းသဲင်ꩻလွဉ်လဲဉ်းနဝ်ꩻသွူ၊ နေင်ႏပေါင်ꩻည ကာႏလဆွာꩻတဗာႏကို စီꩻပွါꩻရေꩻအလꩻ ဆို့ꩻရုဲင်လိုပ်ꩻမာꩻနေးတရိုꩻတဝ်း၊ ဖြေꩻစာကူꩻကားနေးတရိုꩻတဝ်း ကျင်ꩻစွယ်ꩻလံꩻဒျာႏလဲ့တရိုꩻတဝ်း ပအိုဝ်ႏလိုꩻမျိုꩻဒေႏသကို တလွစ်ကင်ꩻတဝ်းနဝ်ꩻ သေႏချာႏငါႏသွူ။ နုဲင်းနေင်ႏကရီး တွမ်ႏဟန်ႏနေင်ႏဖုံႏယိုအကို တွိုက်ꩻဖြန်ယာအရေꩻယို အဝ်ႏမာꩻလွေꩻနေးစွဉ်ႏ အရန်းရန်းသွူ၊ လိုပ်ꩻမာꩻဆို့ꩻရုဲင်သား ကအဝ်ႏထီႏအတွိုင်ꩻ ဆို့ꩻရုဲင်အီႏထွꩻ ထူႏလꩻသွူခိန်ႏကိုနဝ်ꩻ လယ်ႏယားလယ်ႏဝင်ကုဲင်၊ တွိုက်ꩻဖြန်စီႏမံႏကိန်ꩻယိုလဲ့ အဝ်ႏမာꩻလွေꩻလဲဉ်း စွုမ်ႏနေင်ႏနေင်ႏသွူ၊ နဝ်ꩻအကို ကလွစ်လꩻ ကအဝ်ႏကုဲင်လꩻဖုံႏယိုလဲ့ ရောꩻ့ရာꩻလယ်ႏစဲစ်ဆေꩻတွိုႏဒုံကိုဖုံႏ၊ ထူႏလွေꩻတေားချာငါတွော့ꩻ ခံႏဗာႏအဆွမ်ꩻဖုံႏနဝ်ꩻ တဆင်ႏဆင်ႏ အဝ်ႏဟွုန်ဗာႏသွူ။ ဆို့ꩻရုဲင်ခိန်ႏလဲ့ ဝင်ꩻလယ်ႏယား၊ ထူႏချာငါခိန်ႏလဲ့ ဝင်ꩻအဝ်ႏဆွမ်ꩻ၊ ဖြေꩻစာကူꩻကားခိန်ႏတဲ့ ဝင်ꩻအဝ်ႏစဲစ်အဝ်ႏဆွမ်ꩻ၊ မဉ်ႏကျင်ꩻအံႏအွꩻလဲ့ ဝင်ꩻဆွမ်ꩻတဲင် ထွာစွဉ်ႏဒျာႏ ဥပဒေႏခွင်ႏ တဝင်ႏတဝ်းထာꩻမာꩻစဲစ်စဲစ်တန်သွူ။ ကွပ်စွဉ်ႏယာ၊ ဆို့ꩻရုဲင်၊ ဖြေꩻစာ၊ အံႏအွꩻတဲင် ပအိုဝ်ႏလိုꩻမျိုꩻဖဝ ကတွိုႏလွေꩻအီဗာႏထောင်ႏကိုနဝ်ꩻ တဆေေ့ꩻတဝ်းသွူ၊ ပအိုဝ်ႏလိုꩻမျိုꩻဖဝအခိန်ႏ ကသုမ်ꩻထိုꩻဗာႏခြေင်၊ ကလို့ထိုꩻဗာႏခြေင်နဝ်ꩻလဲ့ အတဆေ့ꩻတဝ်းသွူ။ တယ်ႏစွဉ်ႏဝင်ꩻကလယ်ႏဝင်ကုဲင်၊ လယ်ႏယားကုဲင်ယာနဝ်ꩻ ကခံႏဗာႏအာတဲ့ ပအိုဝ်ႏဒျာႏသွူ၊ မာꩻယာနဝ်ꩻ အနီꩻအရင်ꩻ ဖေႏဆပ်ပလို့ꩻဗာႏအာတန်တဲင် ဝင်ꩻကထွိုင်ႏယားကုဲင်ထိုꩻလို့နဝ်ꩻလဲ့ ပအိုဝ်ႏနဝ်ꩻ သုမ်ꩻဗာႏအာငါႏယို အဝ်ႏထီႏလွဒျာႏသွူ၊ တနေင်ႏနီနေင်ႏကို ထွိုင်ႏယားအာယာ ထာꩻမာꩻထွိုင်ႏတထွာတဝ်း ပအိုဝ်ႏသီး ထွိုင်ႏသုမ်ꩻအာနဝ်ꩻ ပအိုဝ်ႏလိုꩻမျိုꩻသီးဖဝ၊ ပအိုဝ်ႏသီးစီꩻပွါꩻရေꩻယို ကုဲင်ထဲ့ဖွိုႏလင်ꩻစွဉ်ႏတအိုအိုနဝ်ꩻသွူ။ နုဲင်းယိုစားဖုံႏနဝ်ꩻ ပအိုဝ်ႏသီးသေအွဉ်ႏသတိꩻလꩻနေဝင်ꩻဟောင်း၊ လမ်းနားဟွိုန်ꩻတဗာႏလုမ်း စီꩻပွါꩻရေꩻယို အုံထွိုင်ႏအုံနောင်လုမ်ꩻစွဉ်ႏဒျာႏ ဆို့ꩻရုဲင်လိုပ်ꩻမာꩻယာသား ယဟန်ႏနဝ်ꩻ ဝင်ꩻယားတွော့ꩻ ကုဲင်အာသုမ်ꩻအာတဖဲ့ꩻ၊ ယာထွꩻခိန်ႏ ထူႏလꩻခိန်ႏကို ထွိုင်ႏအီႏစာနဝ်ꩻ အခန်ပေါꩻ အငိုꩻအဲဉ်ထဝ်းတဲင် သုမ်ꩻအာတမွိုꩻတမာꩻဗာႏနဝ်ꩻသွူ။ ပေါႏလွိုယာနဝ်ꩻ အလင်အီႏလိုပ်ꩻမာꩻဗာႏတမုဲင်ꩻ ယူႏသူႏသေဒွုမ်၊ တွိုႏလွေꩻစွဉ်ႏ အခေႏနေႏနုဲင်းနဝ်ꩻတဲ့ အဝ်ႏထီႏဗာႏသွူ၊ ကွပ်စီꩻပွါꩻရေꩻ ယူႏသူႏသေဒွုမ်တဲင် ပိုလီꩻပညာႏရေꩻလဲ့ တဖေႏအာႏနွောင်ꩻတဝ်းဒွုမ်၊ ထန်ႏတခြီႏတခြိုထိုꩻဗာႏလို့ကျောင်ꩻသွူ။ နုဲင်းနေင်ႏဟာ ကလွစ်လꩻ ဝင်ꩻယားတွော့ꩻ ကအဝ်ႏကုဲင်သားလဲ့ ထွိုင်ႏအီႏစာခိန်ႏနဝ်ꩻ အငိုꩻအဲဉ်ထဝ်း၊ ဖြေꩻသားအဲဉ်ထဝ်း၊ တွိုႏဗာႏ ထာꩻစာစွိုးနေးအရန်းနဝ်ꩻသွူ၊ ပွိုင်းနေင်ႏအခန်အဝ်ႏ တဖြုံႏသူသိန်ႏနွတ်ꩻသိန်ႏလဲ့ တွိုႏနေင်ႏကလဲဉ်းကိုနဝ်ꩻ အဝ်ႏတဖြုံႏနီသိန်ႏကို သမ်းစာစွိုးနေးဗာႏဒွုန်းကနဝ်ꩻသွူ။ မဉ်ႏတွိုႏငါငါ ဝင်ꩻတွိုက်ဖြန်ꩻစွော့ꩻယာ၊ ဝင်ꩻမဉ်ႏလွတ်ꩻစွော့ꩻယာနဝ်ꩻ ပအိုဝ်ႏလိုꩻမျိုꩻသီးဖဝ ဖေႏကလိုပ်ꩻမာꩻခရာႏ သူႏသေချာႏနဝ်ꩻ အဝ်ႏလိုႏစဉ်ꩻစာꩻ ပြောင်ꩻလုဲင်ႏလိုပ်ꩻမာꩻလွေꩻလဲဉ်း တွမ်ႏဆို့ꩻရုဲင်ရေꩻ၊ ဖြေꩻစာကူꩻကားရေꩻ အနယ်ꩻလောင်ႏလင်သွူ။ သꩻအာႏကွိုꩻယာအလောင်းလဲ့ အဝ်ႏလိုႏအွဉ်ႏယောမ်ꩻလဲဉ်းဝင်ꩻ၊ အာႏကွိုꩻသꩻအွဉ်ႏငါႏဒွုမ်တဲင် မဉ်ႏအုံထွိုင်ႏခုမ်မာꩻလွေꩻလုဲင်ႏဒျာႏတွမ်ႏ စီꩻပွါꩻရေꩻအနယ်ꩻလင်နဝ်ꩻ အုံဗာႏတဝ်းတွမ်ႏထာꩻငမ်း၊ နန်းဗာႏတဝ်းဝင်ꩻဆွမ်ꩻ၊ စိုꩻရိန်ႏသꩻယောမ်ꩻ ခွꩻသꩻဗာႏနဝ်ꩻသွူ။ နုဲင်းယိုခါ ပအိုဝ်ႏရပ်ရာႏဒေႏသကို ကဲဉ်းအာအာနဝ်ꩻ ယာယို လꩻယိုꩻဖြေꩻယိုꩻ လွိုင်ႏအာငါႏတဲင် ပအိုဝ်ႏလိုꩻယွဲးသီး အနာႏဂတ်တာႏနဝ်ꩻ သꩻထွူႏခရာႏငါႏသွူ၊ ကိစ္စနုဲင်းယိုစားနဝ်ꩻ ပါꩻမုဲင်ꩻအိႏထွားခုမ်မာꩻဖေႏဟောင်း။ ယာအခြောင်ꩻ ပြောင်ꩻဆို့ꩻလင်လုဲင်ႏနဝ်ꩻ ဆို့ꩻယာသားတဖြာꩻစီႏ မဉ်ႏမာꩻထူႏလွေꩻချာယွယွမꩻ အီႏလꩻနွောင်ꩻသွူ၊ နီရပ်ကို စာယာသား ဖေႏကအဝ်ႏဗာႏမွုန်းယို ရပ်သားဒုံသား တဖြာꩻစီႏ မဉ်ႏထိန်ꩻချာ၊ မဉ်ႏသေချာမꩻ အီႏလꩻနွောင်ꩻသွူ။[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ခြွူႏမွဉ်းသားစွိုꩻ
  2. ခမ်းသားငဝ်း အစဲဉ်ႏ(၃)၊ အမုဲင်(၂၀)