ယူႏငါရီးဘေꩻအန္တရာယ်ႏ

"ဒုတိယအနာဂတဘယသုတ် (ယူႏငါရီးဘေꩻအန္တရာယ်ႏငတ်ꩻပါꩻ၊ အားထွုတ်ခါꩻရီးတရာꩻ)" ရဟန်ꩻသီးဖုံႏဟွေး- ၁။ သာႏသနာႏကိုယို ရဟန်ꩻ(တပါꩻ)နဝ်ꩻ ယူႏစဉ်ꩻစာꩻနုဲင်းယို- ခွေယိုခါ အဝ်ႏဆားနေ၊ ခွေအီႏဖြားဗာႏထာꩻ၊ တွိုႏမဉ်ႏဖြားမꩻ အားထွုတ်တရာꩻနဝ်ꩻ တယိုꩻတောဝ်း၊ သꩻကမဉ်အားထွုတ်အတွိုင်ꩻ အားထွုတ်နွောင်ꩻတဝ်း၊ အခိန်ႏညည အားထွုတ်နွောင်ꩻတဝ်း၊ အဝ်ႏပေႏအဝ်ႏဆားနေယိုနဝ်ꩻ ခံႏနွောင်ꩻတဝ်း၊ အားထွုတ်ညည တရာꩻလꩻ၊ ကမ်းသꩻအားထွုတ်နွောင်ꩻ၊ ဖေႏကလꩻခန်း (ဈာန်ႏမဂ်ဖိုလ်ႏ) ခွေလိုႏအားထွုတ်တရာꩻ၊ အဝ်ႏဆားခါယို၊ ခွေမဉ်ႏလꩻခါꩻတရာꩻ အဝ်ႏဆားခါယိုနဝ်ꩻ တွိုႏမဉ်ႏဖြားသူꩻ ဖြားခန်းတဲ့ယဝ်း နန်းတဝ်းဒွုမ်ဒျာႏ၊ အုံဗာႏချမ်ꩻချမ်ꩻသာႏသာႏ၊ 'ယူႏထာꩻဖြားပဌမဘေꩻ'နဝ်ꩻတဲင် အားထွုတ်မွေးတရာꩻ၊ ကလူႏလꩻ ကအားထွုတ်နုဲင်းနဝ်ꩻနဝ်ꩻ ဟဝ်ငါႏ၊ မွေးငါႏမရေႏမရာႏနောဝ်ꩻသွူ။ ၂။ သာႏသနာႏကိုယို ရဟန်ꩻနဝ်ꩻ ယူႏစဉ်ꩻစာꩻနုဲင်းယို- ခွေယိုခါ အဝ်ႏရေꩻအဝ်ႏသန်ꩻဒျာႏ၊ ခွေယို အီႏဆာဗာႏထာꩻ၊ မဉ်ႏဆာထာꩻတွင်ꩻ အားထွုတ်တရာꩻ တထွာတဝ်း၊ အီႏလွေꩻဗာႏ တခြာကိုတဲ့ တယိုꩻတဝ်း၊ မခွိုက်ကအဝ်ႏရေꩻ အဝ်ႏသန်ꩻယို အဝ်ႏလိုႏအားထွုတ်ခန်းတရာꩻ၊ မဉ်ႏလꩻခါꩻတရာꩻနဝ်ꩻ တွိုႏမဉ်ႏဆာထာꩻသူꩻနဝ်ꩻ အုံဗာႏချမ်ꩻချမ်ꩻသာႏသႏဒျာႏ'ယူႏထာꩻဆာ ဒုတိယဘေꩻ'နဝ်ꩻတဲင် အားထွုတ်မွေးတရာꩻနောဝ်ꩻသွူ။ ၃။ သာႏသနာႏကိုယို ရဟန်ꩻနဝ်ꩻ ယူႏစဉ်ꩻစာꩻနုဲင်းယို- ယိုခါနဝ်ꩻ ဗွူဟောဝ်၊ အံႏအွꩻလွိုင်ႏအာ၊ တွုံꩻသွမ်ꩻယိုꩻ၊ တခိန်ႏခိန်ႏ တနေင်ႏနေင်ႏကိုသူꩻ ကုဲင်းအံႏမဒါႏထာꩻ၊ မဉ်ႏအံႏမထာꩻခိန်ႏနဝ်ꩻ အားထွုတ်တရာꩻ တယိုꩻတဝ်း၊ အုံတခြာကို တယိုꩻတဝ်း၊ မခွိုက် အံႏအွꩻကလွိုင်ႏတွင်ꩻယို အားထွုတ်ခန်းတရာꩻမꩻ၊ မဉ်ႏလꩻခါꩻတရာꩻနဝ်ꩻ မဉ်ႏခြေားခိင်ႏသူꩻနဝ်ꩻ တရာꩻအတွက်တာႏ နန်းခရာႏလိုႏတဝ်း၊ 'ယူႏထာꩻအံႏမ တတိယဘေꩻ'နဝ်ꩻတွော့ꩻ အားထွုတ်မွေးတရာꩻနောဝ်ꩻသွူ။ ၄။ သာႏသနာႏကိုယို ရဟန်ꩻနဝ်ꩻ ယူႏစဉ်ꩻစာꩻနုဲင်းယို- ယိုခါခါနဝ်ꩻ လိုꩻလမ်းဖုံႏ အဝ်ႏလွောင်ႏဗူႏနေလို့ဝင်ꩻ၊ ရွို့ꩻရန်ႏတဝ်းလို့ဝင်ꩻ၊ တွိုႏတနီꩻခါ တကာႏလိုꩻလမ်း မဉ်ႏတလွောင်ႏဗူႏတဝ်းလို့ဝင်ꩻ၊ မဉ်ႏထေင်ညင်ꩻလို့ဝင်ꩻ၊ မဉ်ႏရွို့ꩻရန်ႏလို့ဝင်ꩻ (မဉ်ႏတွိုက်ꩻခꩻလို့ဝင်ꩻ-ခမ်းထီမဉ်ႏကုဲင်)နဝ်ꩻ အီႏအားထွုတ်ဗာႏတရာꩻ တယိုꩻတဝ်း၊ အုံတခြာကို တယိုꩻတဝ်း၊ မခွိုက် တကာႏကလွောင်ႏဗူႏလို့ဝင်ꩻတွင်ꩻယို အားထွုတ်ခန်းတရာꩻမꩻ 'ယူႏလိုꩻလမ်း အီႏလွောင်ႏဗူႏတဝ်းလို့ဝင်ꩻ စတုတ္ထဘေꩻ'နဝ်ꩻတဲင် အားထွုတ်မွေးတရာꩻနောဝ်ꩻသွူ။ ၅။ သာႏသနာႏကိုယို ရဟန်ꩻနဝ်ꩻ ယူႏစဉ်ꩻစာꩻနုဲင်းယို- ယိုခါနဝ်ꩻ သံဃာႏချင်ꩻချင်ꩻ အဝ်ႏဟောဝ် အဝ်ႏလွောင်ႏဗူႏနေလို့ဝင်ꩻ၊ သံဃာႏတလွောင်ႏဗူႏတောဝ်းလို့ဝင်ꩻတွင်ꩻနဝ်ꩻ အားထွုတ်တရာꩻ တယိုꩻတဝ်း၊ အုံတခြာကို တယိုꩻတဝ်း။ မခွိုက်သံဃာႏကလွောင်ႏဗူႏတွင်ꩻယို အားထွုတ်ခန်းတရာꩻမꩻ 'ယူႏသံဃာႏ အီႏလွောင်ႏဗူႏတဝ်းလို့ဝင်ꩻ ပဉ္စမဘေꩻ'နောဝ်ꩻတွော့ꩻ အားထွုတ်မွေးစွဉ်ႏတရာꩻနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ပဉ္စကနိပါတ်၊ အနာဂတဘယသုတ်)