ယူႏထာꩻသီယူႏပါကုသိုလ်ႏ

"ဒုတိယ မရဏဿတိသုတ် (ယူႏထာꩻသီ၊ ယူႏပါကုသိုလ်ႏ အကုသိုလ်ႏ)" ရဟန်ꩻသီးဖုံႏဟွေး- မဉ်ႏယူႏလꩻသေႏသေႏ အီႏသီဗာႏထာꩻနဝ်ꩻ အကျိုꩻတန်ငါႏ၊ အကျိုꩻထွာငါငါ၊ တနꩻနဲ့ꩻလွေꩻစွဉ်ႏနိဗ္ဗာန်ႏ၊ အလွေꩻသွတ်ꩻစွဉ်ႏနိဗ္ဗာန်ႏသူꩻ၊ အလွေꩻသွတ်ꩻနုဲင်းမုဲင်ꩻနဲးတဲင်- သာႏသနာႏကိုယို ရဟန်ꩻ(တပါꩻ)နဝ်ꩻ လဲဉ်းလꩻမွူးယာ တွိုႏမွူးဟာခိုႏတွော့ꩻ ဝွေꩻယူႏ(ဆင်ႏချင်ႏ)နုဲင်းယို- ခွေသီထာꩻတာႏ အကျောင်ꩻအခရာႏ အဝ်ႏအာတန်၊ ရူးအဲင်ႏသီ၊ တဗင်အဲင်ႏသီ၊ လင်ꩻထဲ့သီ၊ အံႏရော့ꩻတဝ်းသီ၊ တလီꩻဆန်သီ၊ ဟို့ꩻထိုꩻသီ၊ လုံးဖြော့ꩻသီ၊ ကွပ်ရောႏဂါႏတမျိုꩻမျိုꩻသီ၊ ထာꩻသီအန္တရာယ်ႏ အဝ်ႏအာတန်။ ထာꩻခေ့ꩻဟန်ႏနာꩻယို ခွေမဉ်ႏသီစိန်ႏစွော့ꩻနဝ်ꩻ 'ခွေအကုသိုလ်ႏ အဝ်ႏဟောင်း၊ အဲဉ်ထဝ်းဟောင်းနဲး'ယူႏ(ဆင်ႏချင်ႏ)ဗာႏနုဲင်းနဝ်ꩻ၊ ပေါႏအကုသိုလ်ႏ (ကိလေႏသာႏ)အဝ်ႏနေကနဝ်ꩻ လောႏနဲစ်မာꩻဖေ့ဗာႏမွိုင်မွိုင်။ ဥပမာႏ- ပါꩻတဖြာꩻနဝ်ꩻ မေႏခိုးအခွမ်ꩻလာꩻ၊ မေႏခိုးအကတူႏ၊ သဲစ်မေႏကခိုႏ အခွမ်ꩻလာꩻ အကတူႏတဲ့ အဗွေႏနဝ်ꩻ သꩻဝꩻမွေးမုဲင်း၊ နဲစ်လောႏမာꩻဖေ့မွိုင်မွိုင်ဗာႏ မေႏနဝ်ꩻ။ အနုဲင်းနဝ်ꩻနေနေ၊ အကုသိုလ်ႏမေႏ ကိလေႏပါပ ပေါႏအဝ်ႏနေကနဝ်ꩻ လောႏမာꩻဖေ့ဗာႏမွိုင်မွိုင်၊ နဲစ်အားထွုတ်မွိုင်မွိုင်ဗာႏတရာꩻ၊ အကုသိုလ်ႏ မဉ်ႏအဲဉ်ထဝ်းတဲ့ သꩻရောင်းသꩻရေꩻ မာꩻထဲင်းထဲင်းဗာႏ ကုသိုလ်ႏနောဝ်ꩻသွူ။ ရဟန်ꩻသီးဖုံႏဟွေး- သာႏသနာႏကိုယို ရဟန်ꩻ(တပါꩻ)နဝ်ꩻ ထာꩻခေ့ꩻခိုႏ သီထိုꩻတဝ်း၊ လဲဉ်းလꩻတနာꩻ၊ မွူးရောဝ်ꩻမဲ့သေ၊ ထာꩻလေအာႏရွုံႏထန်ႏ၊ နေးတွမ်ႏဉာဏ်ႏ ဝွေꩻယူႏ (ဆင်ႏချင်ႏ)နုဲင်းယို- ခွေသီထာꩻတာႏ အကျောင်ꩻအခရာႏ အဝ်ႏအာတန်၊ ရူးအဲင်ႏသီ၊ တဗင်အဲင်ႏသီ၊ လင်ꩻထဲ့သီ၊ အံႏရော့ꩻတဝ်းသီ၊ တလီꩻဆန်သီ၊ ဟို့ꩻထိုꩻသီ၊ လုံးဖြော့ꩻသီ၊ ကွပ်ရောႏဂါႏတမျိုꩻမျိုꩻသီ စတဲင်နုဲင်းနဝ်ꩻ ထာꩻသီအန္တရာယ်ႏ အဝ်ႏအာတန်။ ထာꩻလေမွူးယာယို ခွေမဉ်ႏသီစိန်ႏစွော့ꩻနဝ်ꩻ 'ခွေအကုသိုလ်ႏအဝ်ႏဟောင်း၊ အဲဉ်ထောဝ်းဟောင်းနဲး' ယူႏ(ဆင်ႏချင်ႏ)ဗာႏနုဲင်းနဝ်ꩻ၊ ပေါႏအကုသိုလ်ႏ (ကိလေႏသာႏ)အဝ်ႏနေကနဝ်ꩻ လောႏနဲစ်မာꩻဖေ့ဗာႏမွိုင်မွိုင်။ ဥပမာႏ- ပါꩻတဖြာꩻနဝ်ꩻ မေႏခိုးအခွမ်ꩻလာꩻ၊ မေႏခိုးအကတူႏ၊ သဲစ်မေႏကခိုး အခွမ်ꩻလာꩻ အကတူႏတဲ့ အဗွေႏနဝ်ꩻ သꩻဝꩻမွေးမုဲင်း၊ နဲစ်လောႏမာꩻဖေ့မွိုင်မွိုင်ဗာႏမေႏနဝ်ꩻ။ အနုဲင်းနဝ်ꩻနေနေ၊ အကုသိုလ်ႏမေႏ၊ ကိလေႏပါပ ပေါႏအဝ်ႏနေကနဝ်ꩻ လောႏမာꩻဖေ့ဗာႏမွိုင်မွိုင်၊ နဲစ်အားထွုတ်ဗာႏတရာꩻ၊ အကုသိုလ်ႏမဉ်ႏအဲဉ်ထဝ်းတဲ့ သꩻရောင်းသꩻရေꩻ၊ မာꩻထဲင်းထဲင်းဗာႏ ကုသိုလ်ႏနောဝ်ꩻသွူ။ ရဟန်ꩻသီးဖုံႏဟွေး- စွုမ်ႏနီꩻစွုမ်ႏဟာ မဉ်ႏယူႏသေႏသေႏ အီႏသီဗာႏထာꩻနဝ်ꩻ အကျိုꩻတန်ငါႏ၊ အကျိုꩻထွာငါငါ၊ တနꩻနဲ့ꩻလွေꩻစွဉ်ႏနိဗ္ဗာန်ႏ၊ အလွေꩻသွတ်ꩻစွဉ်ႏ နိဗ္ဗာန်ႏသူꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဆက္ကနိပါတ်၊ ဒုတိယ မရဏဿတိသုတ်)