ရ
၁။ ရဟန်ꩻတရာꩻ ကံကျင်ꩻဒါႏ၊ ကံႏဗွာစွဉ်ႏလဲ့ သꩻဖြေင်းယား။(ထာꩻအံႏယား) ၂။ ရာႏခိန်ႏတွိုႏ ရာႏ၊ ကောဝ်ႏခိန်ႏတွိုႏ ကောဝ်ႏ။(ခိန်ႏတောႏလမ်းတောႏပါႏ နေးပိုအုဲင်ႏမာ၊ ခိန်ႏနင်းကျောင်ꩻပွေါးကန်ႏ သွဉ်သင်တပဲ့ꩻတပန်ꩻတွိုႏလွဉ်လဲဉ်း။) ၃။ ရူးချင်ꩻချင်ꩻ ထီႏလွဝင်ꩻခင်ႏ။(လိုꩻအချင်ꩻချင်ꩻ သေလွဝင်ꩻကယ်ꩻ၊ သေလွဝင်ꩻထတ် အကုဲနုဲင်းနုဲင်း။) ၄။ ရူးဖူꩻ ဒေႏ၊ လိုꩻပေႏဖူꩻ နဲဉ်း။ ၅။ ရူးမျောႏဒေႏ၊ ဒေႏ မျောႏယဲ့၊ ယဲ့မျောႏ ဟံႏ၊ ဟံႏမျောႏ လိုꩻ။ ၆။ ရေ့ဆေးမꩻ ထွာသဌေꩻ၊ စေꩻမꩻ ထွာသူႏကျွဲႏ။ ၇။ ရေႏတွိုင်ꩻအောင်ႏ၊ ဆောင်ႏတွိုင်ꩻလꩻ၊ တꩻတွိုင်ꩻထွာ၊ ငါတွိုင်ꩻအောင်ႏမျင်ႏ။ ၈။ ရေႏမာꩻတမျိုꩻ ထွာထိုꩻတစား။ ၉။ ရေႏလူႏဒျာႏ ထူႏဗာႏတေား။ ၁၀။ ရေႏအလွိုက်၊ ထွာအထွာ။ ၁၁။ ရဲးရီး လွစ်အမန်၊ ကန်ရီး လွစ်လွံꩻလာꩻ။ ၁၂။ ရုဲင်လားကြား ထွာဖိုးဆာႏ၊ အုဲင်ႏလားမာ ထွာပိုသွဉ်း။ ၁၃။ ရုဲင်းမꩻ အံႏဗာႏဒဲဉ်၊ ကတဲဉ်မꩻ အံႏဗာႏဟန်ႏ။ ၁၄။ ရုဲင်းဟန်သွော့ထာꩻ နုဲင်းချင်ႏသေ့ꩻ။ ၁၅။ ရိုႏသေႏဖူဖီ အသက်ဆွာꩻ၊ ရိုႏသေႏမွိုးဖါ အသက်ထို။ ၁၆။ ရက်ငါႏတဲ့ ထွာကူႏလီႏ၊ လွꩻထီႏငါႏလဲ့ ထွာထာꩻနန်း၊ ငမ်းငါႏလဲ့ ထွာထာꩻသꩻဝꩻ။ ၁၇။ ရက်တွိုင်ꩻ ထွိုက်တောဝ်း၊ ကျွိုက်တွိုင်ꩻ လꩻတောဝ်း။ ၁၈။ ရက်လိုꩻခမ်း၊ နမ်းငါစင်ꩻ။(ဘဝပန်ယို သီလငတ်ꩻပါꩻ တစောင်ꩻထိန်ꩻတဝ်း၊ နေးတွမ်ႏအကုသိုလ်ႏ ဒုစရဲက် ရက်ပဲင်ꩻလွူးမွီႏ ဒို့ꩻခွမ်ꩻနမ်းကြိုခန္ဓာႏတဲင် ဘဝပန်ငါနောဝ်ꩻ မော့ꩻကျုံႏထာꩻယူႏပက် ယက်ဖြန်ဆင်ꩻရယ်ꩻသွူ။) ၁၉။ ရက်လွဝင်ꩻလဲ့ တွိုႏယင်းဒါႏထာꩻဖ၊ ငငီꩻသွူဝင်ꩻလဲ့ တွိုႏယင်းဒါႏ ထာꩻတလွိုး။ ၂၀။ ရက်ဟံႏ ထွာယဲ့၊ ရက်မဲ့ ထွာသွဉ်း။ ၂၁။ ရတနာႏလုံးဟောဝ် မွိုးပိုဒျာႏ၊ ကျမ္မာႏဖြုံႏခဝ်လဲ့ ဖါပိုဒျာႏ။ ၂၂။ ရန်ႏကွို့ꩻ၊ မေႏကွို့ꩻ တွမ်ႏနီးကွို့ꩻ ထွို့ꩻခန်းလꩻလꩻ အရွီးခိုႏ။(ယိုသွံမျိုꩻနောဝ်ꩻ အဖြဲးပွါꩻမွိုင်ငါႏ တလီးလလျားတဲင် ငမ်းဗာႏနန်းဗာႏသွူ။) ၂၃။ ရပ်ခံႏပအိုဝ်ႏပေႏ မာꩻအာအေႏ။(လိုꩻမျိုꩻလင်သီးငေါဝ်း။)(နီပအိုဝ်ႏပေႏဖုံႏ လွေꩻသွဉ်လိတ်လုဲင်ꩻဉာဏ်ႏပညာႏ ဝင်ꩻရပ်ဝင်ꩻခမ်း၊ ဝင်ꩻထီ၊ ဝင်ꩻကျောင်ꩻ၊ ဝင်ꩻလိတ်သွဉ်တွိုက်ကို ကွပ်ပွိုးစွဉ်ႏထာꩻလွꩻတန် စွယ်ꩻဝီရိယ လုံ့လကျိုꩻစာꩻမုꩻ အဲဉ်ထဝ်းနဝ်ꩻမꩻ ခံႏဗာႏဝင်ꩻဒေါ့ꩻသွူ။) ၂၄။ ရွယ်ႏဆွမ်ꩻထဝေါဝ်ꩻ၊ လꩻတေား ထလီႏ။(ရေႏရွယ်ႏ အဟောဝ်အယံလဲ့ လꩻတေားအညမ်းအဖျင်ꩻ အတကုဲင်၊ ရွယ်ႏဆွမ်ꩻ လိုꩻကုဲအတန်စားလဲ့ ဆွမ်ꩻလꩻတေားလိုꩻကုဲင်အပေႏစား။) ၂၅။ ရွယ်ႏတဟိုႏ၊ ကြိုႏေတာတထွောင်း။ ၂၆။ ရွယ်ႏဖဲင်နောဝ်၊ ဖျော်ဖဲင်ထင်ꩻ။(ကီယိုနီပွုက်နဝ်ꩻ ရွယ်ႏဒေါ့ꩻဖြဝ်ႏ ရွယ်ႏခွုမ်မာꩻတမျိုꩻလဲ့ ထွာတောဒျာႏ အလင်တမျိုꩻ၊ ထွာတေားဒျာႏ အလင်တစား။) ၂၇။ ရွို့ꩻဖင်ႏခိုႏ ဟောဝ်ဖင်ႏဒွမ်၊ ရွို့ꩻဖင်ႏနောဝ် ဟောဝ်ဖင်ႏထင်ꩻ။(လိုꩻတလမ်းချင်ႏ ထေင်ညင်ꩻရွို့ꩻရန်ႏလွဝင်ꩻ တဆင်ႏလွုမ်ꩻ ဟဝ်ချာယင်းတဲ့ꩻချာယင်း၊ ထီꩻသင်ꩻချာယင်း။) ၂၈။ (က) ရွဉ်ခံꩻထိုꩻမား ထွုမ်ႏဆုဲင်ꩻယိုꩻ၊ လိုꩻမျိုꩻထိုꩻမား ထွုမ်ႏဆုဲင်ꩻယပ်ꩻ။ (ခ) ရွဉ်ခံꩻမီႏလို့ ထွုမ်းဆုဲꩻယိုꩻ၊ လိုꩻမျိုꩻမီႏလို့ ထွုမ်ႏဆုဲင်ꩻယပ်ꩻ။ ၂၉။ ရွဉ်ခံꩻမီႏအာ၊ တငါဟူႏယောဝ်း၊ ဝင်ꩻဗွိုႏတောဝ်း။ ၃၀။ ရွဉ်ခံꩻဥစ္စာႏ၊ ပညာႏအဲဉ်ထောဝ်း၊ လိုꩻတဖြောဝ်း။ ၃၁။ ရွဉ်တကွံꩻဟွဲး၊ ရွဉ်တစွဲးဆဲင်။(ရင်းခြွိုင်းကွဉ်ကꩻ ကျွားဝေါဝ်ꩻဆဲမ်ꩻလဲမ်ꩻ ခြွိုင်းခြိုꩻခွမ်ꩻလာꩻ။) ၃၂။ ရွဉ်တလီꩻကျမ်ꩻ မီႏစေ သꩻတချာႏ၊ ရွဉ်တလီꩻကျမ်ꩻ မီႏထွာႏ သꩻဖေါက်ပြန်ႏ။ ၃၃။ ရွဉ်ထွုမ်ႏယိုꩻ၊ လိုꩻထွုမ်ႏယပ်ꩻ။ ၃၄။ ရွဉ်ထွိုင်ႏအွဉ်ႏတံꩻ၊ ရွဉ်ထွိုင်ႏအွဉ်ႏပျꩻ၊ ကုဲင်ဝꩻသစ္စာႏ၊ သို့ပြာႏကတိ။ ၃၅။ ရွဉ်ပေႏ ရဲးရွဉ်တန်။ (ရွဉ်အပေႏစားး ပဲက်ပျာꩻမူႏပဲꩻမတ်သျိုး ကျပ်ဗီႏငါလဲ့ တလိုႏမတ်ဖွီ သွင်ꩻပေါ်ꩻတဝ်း၊ ဆိမ်ꩻဆယ်ꩻရွမ်ဗူႏထွူတဲင် မဉ်ႏအာတနီꩻခါ ရဲးနွောင်ꩻအီဒါႏ ရွဉ်အတန်အစား၊ ရွဲးခန်စွဲးကွံꩻ ရေင်မွိုန်ႏကစနောဝ်ꩻသွူ။ ရွဉ်တန်ကခွို့ရီႏဒါႏ ခင်ႏလမ်းမျိုꩻနောဝ်ꩻလဲ့ ကအီႏစုတ်ꩻစုဲင်ႏလွေꩻ ရွဉ်ပေႏယို တလောက်ꩻကာႏဗာႏတောဝ်း စုတ်ꩻစုဲင်ႏသွံုꩻစွယ်ꩻဗာႏဒျာႏသွူ။) ၃၆။ ရွဉ်ပေႏအီႏဗွေတဗီႏ အဝ်ႏလိုႏဒွိုန်းက သွစ်ꩻမူꩻ၊ ဖိုးဒင်ႏအီႏဗွေလစ်ꩻပူꩻ အဝ်ႏလိုႏဒွိုန်းက သွစ်ꩻဗာႏ၊ ကအီႏလꩻသဌေꩻအရာႏနောဝ်ꩻ အဝ်ႏလိုႏဒွိုန်းက တမို့ꩻသဉ်။ ၃၇။ ရွဉ်ဗုဒ္ဓံ ခံꩻဗုေဒ္ဓါ၊ ရွဉ်ဗုဒ္ဓံ တဆင်ႏပေႏလွုမ်ꩻခြေား၊ ခံꩻဗုဒ္ဓေါ တဆင်ႏပေႏလွုမ်ꩻဝုဲင်ꩻ။ ၃၈။ ရွဉ်မီႏနွွို့ယားလဲ့ ကုဲင်ပြင်ꩻ၊ ခံꩻမီႏနွို့ယားလဲ့ ထဲ့ဟူႏ။ ၃၉။ ရွဉ်မဉ်ႏအောဝ်ႏမꩻ ဖူးဝေးအာ၊ ထာမဉ်ႏအောဝ်ႏမꩻ ဖူးဝေးလွိုင်ႏ။ ၄၀။ ရွဉ်မူꩻရွဉ်ပဲꩻ ထဲ့လလင်ꩻထုံပဲင်းကင်၊ လိုꩻမဟုံမဟင် ထဲ့လလင်ꩻငါးရုဲင်ꩻ။ ၄၁။ ရွဉ်မတ်ရွဉ်မူꩻ သော့ꩻကလင်ႏ၊ မဉ်ႏတွိုႏဟို့ꩻကိုကပင်ႏ တန်ႏပဉ်ရက်ꩻ။(အနေးအထူႏနောဝ်ꩻ အာ၊ အဖေႏအယောင်းချာနောဝ်ꩻ ဆေ့ꩻ။) ၄၂။ ရွဉ် ရွဉ် မွဉ်ဘုရာꩻ ဘုရာꩻလဲင်ꩻကွိုင်ꩻ။(မာꩻထာꩻမာꩻမျိုꩻမုဲင်ꩻတရိုꩻတဝ်း ရွဉ်ထွာအထျꩻတဲင် ဒီဟဝ်ကျိုꩻစာꩻ ထုမ်ႏကျံႏဝီရိယ စုတ်ꩻစုဲင်ႏဒါႏဒါႏလွငါႏသွူ။) ၄၃။ ရွဉ်လဲ့ ဝင်ꩻကွီ၊ တခွေလဲ့ ဝင်ꩻဒွꩻ၊ တခွါလဲ့ ဝင်ꩻဒေါင်၊ ဖွတ်ꩻလဲ့ ဝင်ꩻတံꩻ။ ၄၄။ ရွဉ်အောဝ်ႏတွင်ꩻ ဝင်ꩻပယွုမ်း၊ ယွုမ်းထွိုင်ႏလို့ ဝင်ꩻကွုမ်း။ ၄၅။ (က) ရွမ်သွော့တေ့ꩻတေ့ꩻ၊ စုဲင်ႏဆေ့ꩻဆေ့ꩻ၊ ယံဖေ့ရွဉ်ကအာ။ (ခ) လိုꩻတကြောက်ကြဲက်၊ စုဲႏစောက်စဲက်၊ သောက်သဲက်ခြွေမုဲꩻခါ။ ၄၆။ ရွိုင်ꩻနုဲင်းကေကျောင်ႏ၊ သျောင်ႏနုဲင်းကေကုဲင်။[၁][၂][၃]