ရဟန်ꩻငတ်ꩻရျာꩻဝတ္ထု
"ရဟန်ꩻငတ်ꩻရျာꩻ"ဝတ္ထု
၈၃။ တရာꩻဂါႏထာႏပြန်ႏပအိုဝ်ႏခြေင်ခြေင်- သူႏတောႏကောင်ꩻသီးဖုံႏနဝ်ꩻ စွဉ်ꩻထိုꩻလို့မွေးမွေးဒျာႏ ခွိုင်းကားလောဘတဏှာႏဖုံႏနဝ်ꩻသွူ၊ သူႏတောႏကောင်ꩻသီးဖုံႏနဝ်ꩻ တဒေါ့ꩻလွတောဝ်း ဟောဝ်မဉ်လꩻငါႏ ကာႏမဂွုဏ်ႏခရာႏဖုံႏနောဝ်ꩻသွူ၊ ပညာႏသားဖုံႏနဝ်ꩻ ခွေါင်းမော့ꩻလွဒျာႏ တွမ်ႏထာꩻချမ်ꩻသာႏဖုံႏတဲ့နဝ်ꩻ၊ ခွေါင်းတလူႏလွ တွမ်ႏထာꩻဒုက္ခတဲ့နဝ်ꩻ တအွဉ်ႏနယ်လွတောဝ်း သꩻရေꩻသꩻလျား နဝ်ꩻနီစားနောဝ်ꩻသွူ။
"လꩻဗဟုသုတ၊ လꩻအီသတိꩻနုဲင်းယို" ဟော်ꩻထွားသွဉ်ဗာႏ ရဟန်ꩻငတ်ꩻရျာꩻဝတ္ထုယိုတဲင်-
၁။ အံႏမထာꩻတဲ့ သꩻတလိုႏကုဲင်တဝ်း၊ အဝ်ႏနုဲင်းမုဲင်ꩻတဲ့အွꩻ၊ လꩻနုဲင်းမုဲင်ꩻတဲ့အံႏ၊ သယ်ꩻခံႏဗာႏ၊ လွောက်ꩻမွိုန်းလောဘတဏှာႏအကျောင်ꩻ၊
၂။ လိုꩻအရန်းဖွိုႏသားနဝ်ꩻ တဗွီႏတဝ်း၊ ယေန်ႏငဲတဝ်း၊ ရောင်ထာꩻ၊ လိုꩻအရန်းထိုသားနဝ်ꩻ တဗွီႏယေန်ႏငဲ ရောင်တဝ်းထာꩻအကျောင်ꩻ၊
၃။ သူႏတောႏကောင်ꩻ ပညာႏသားနဝ်ꩻ တလွောက်ꩻလွဉ်ꩻတဝ်း လောဘတဏှာႏ ချမ်ꩻသာႏနဝ်ꩻင၊ ဒုက္ခနဝ်ꩻ သꩻလျား၊ နုဲင်းနောဝ်ꩻစားမွေးတောဝ်းအကျောင်ꩻ-စတဲင်နုဲင်းနဝ်ꩻ သေထွꩻလꩻအီသတိꩻအာတန်သွူ။
"ဓမ္မိကမထေရ်ႏ" ၈၄။ တရာꩻဂါႏထာႏ ပြန်ႏပအိုဝ်ႏခြေင်ခြေင် ပညာႏသားကရိုꩻနဝ်ꩻ ကွပ်နီနမ်းတဲင် မာꩻတဝ်းအကုသိုလ်ႏ၊ ကွပ်ဝင်ꩻတဲင် မာꩻတဝ်းအကုသိုလ်ႏ၊ နေးတွမ်ႏဒုစရဲက်ထာꩻမာꩻတဲင် ပိုယို မဉ်ဖေႏမာꩻတဝ်းအကုသိုလ်ႏ၊ မဉ်ဖေႏထုမ်ႏတဝ်း တခြိုꩻဥစ္စာႏ၊ မဉ်ဖေႏအုပ်တဝ်းခမ်းထီ၊ နေးတွမ်ႏ ထာꩻတရာꩻတဝ်းတဲင် မာꩻခြွေခြာႏအနမ်းနဝ်ꩻ မဉ်ဖေႏမာꩻတဝ်း၊ လိုꩻစားနဝ်ꩻနဝ်ꩻ လိုꩻသီႏလသား၊ လိုꩻပညာႏအဝ်ႏ၊ ထွာလိုꩻ တရာꩻသားတန်သွူ။
"လꩻဗဟုသုတ၊ လꩻအီသတိꩻနုဲင်းယို" ဟော်ꩻထွားသွဉ်ဗာႏ ဓမ္မိကမထေရ်ႏဝတ္ထုယိုတဲင်-
၁။ လိုꩻပါႏရမီႏသားနဝ်ꩻ မဉ်ဗုဲင်ဒျာႏစင်ꩻ၊ မဉ်အားထွုတ်ဒျာႏတရာꩻ၊ မဉ်မာꩻဒျာႏကုသိုလ်ႏအကျောင်ꩻ၊
၂။ ပေါႏဝင်ꩻအားထွုတ်တရာꩻ၊ ပေါႏဝင်ꩻမာꩻကုသိုလ်ႏနဝ်ꩻ ဟဝ်ထွားနုဲင်း ဟဝ်မာꩻနုဲင်းငါႏအကျောင်ꩻ၊
၃။ နေးတွမ်ႏဒုစရဲက်တဲင် ဟဝ်လွူးအီတဝ်းနမ်း၊ ဟဝ်အုပ်အီတဝ်းခမ်းအကျောင်ꩻ-စတဲင်နုဲင်းနဝ်ꩻ သေထွꩻလꩻအီသတိꩻအာတန်သွူ။
"နာႏတရာꩻသား" ၈၆။ ဂါႏထာႏပြန်ႏပအိုဝ်ႏခြေင်ခြေင်- ပါꩻမုဲင်ꩻရိုꩻတောဝ်း ကံကျင်ꩻလွဉ်ꩻမွေးမွေးဒျာႏ နီဗွေႏဘုရာꩻကဟော်ꩻခါꩻ တရာꩻမျတ်နဝ်ꩻအတွိုင်ꩻ၊ လိုꩻကကံကျင်ꩻလွဉ်ꩻမွေးနုဲင်းနဝ်ဖုံႏနဝ်ꩻ ယပ်ꩻယပ်ꩻခုဲင်ႏခုဲင်ႏ ကအီႏကာႏလꩻဗာႏ ခွန်သီခင်ႏလမ်း ဘွုံႏသွံခမ်းယို ကာႏလꩻစွဉ်ႏတွော့ꩻ အီႏတွိုႏငါလွေꩻဗာႏအမန်ႏ နိဗ္ဗာန်ႏကဟဲ့ꩻ ခြောင်တဖဲ့ꩻသူꩻသွူ။
"လꩻဗဟုသုတ၊ လꩻအီသတိꩻနုဲင်းယို" ဟော်ꩻထွားသွဉ်ဗာႏ နာႏတရာꩻသားဝတ္ထုယိုတဲင်-
၁။ လူႏတန်ꩻထာꩻတဲ ကုဲင်းဒျာႏ၊ နာႏတရာꩻနောဝ်ꩻ လွꩻငါႏအကျောင်ꩻ၊
၂။ လꩻနိဗ္ဗာန်ႏသားနဝ်ꩻ ဆေ့ꩻ၊ လꩻတဝ်းနိဗ္ဗာန်ႏသားနဝ်ꩻ အာငါႏအကျောင်ꩻ၊
၃။ မဉ်ႏလွောက်ꩻနာႏ ကံကျင်ꩻလွဉ်ꩻမွေး နီဗွေႏဘုရာꩻ ကဟော်ꩻခါꩻအတွိုင်ꩻနောဝ်ꩻ လꩻနွောင်ꩻနိဗ္ဗာန်ႏချမ်ꩻသာႏအကျောင်ꩻ-စတဲင်နုဲင်းနဝ်ꩻ သေထွꩻ လꩻအီသတိꩻအာတန်သွူ။[၁][၂][၃]