ရဟန်ꩻလယ်ႏဟော်ကိုအပဲ့စ်ယို
ရဇန္တေပုရပ္ပဝေသနသုတ် (ရဟန်ꩻလယ်ႏဟော်ကို အပဲ့စ်ယိုတဆီမော့ꩻဒါႏ)" ရဟန်ꩻသီးဖုံႏဟွေး- ရဟန်ꩻသီး ပေါႏလယ်ႏဟော်ကိုနဝ်ꩻ အပဲ့စ်ယိုတဆီမော့ꩻဒါႏ၊ အပဲ့စ်တဆီကရိုꩻနဝ်ꩻ-
- ၁။ ခွန်တန်တွမ်ႏနင်ꩻ အဝ်ႏအုံညီꩻဝင်ꩻတွင်ꩻ ရဟန်ꩻထင်ႏဖျော်လွဉ်တဲင် ရဟန်ꩻထွားနဝ်ꩻ ပယွုမ်းထေ့ဒါႏ၊ နင်ꩻတဲ့ ထွားဗွေႏစင်ꩻ ပယွုမ်းထေ့ဒါႏ၊ စင်ꩻတွမ်ႏနင်ꩻ ပယွုမ်းထေ့လို့ဝင်ꩻနဝ်ꩻ (ရိုꩻရိုꩻသာꩻသာꩻဒျာႏတဲ့ယဝ်း) ခွန်သꩻကိုနဝ်ꩻယူႏဒါႏ 'စင်ꩻတွမ်ႏနင်ꩻယိုနဝ်ꩻ အမာႏထွူလဲဉ်းလို့ဝင်ꩻဟောင်း၊ အမဉ်ႏမာꩻဒွိုန်းခန်းတဲ့ တလဲင်ႏတဝ်းတဲ့တလဲင်ႏ အီႏမာႏလို့ဝင်ꩻဒျာႏရင်ꩻ'၊ ခွန်ယူႏမာႏဒါႏနုဲင်းနောဝ်ꩻ၊ ယိုနဝ်ꩻ ကွပ်နွို့ဟော်ကိုတဲင် ထွာဒါႏ 'ပဌမ'အပဲ့စ်တမျိုꩻသွူ။
- ၂။ ခွန်သီးအမျိုꩻနဝ်ꩻ အွဉ်ႏအာနင်ꩻဟော်ကို၊ လိုꩻမူႏဟော်ကို၊ ခွန်တဲ့ ထာꩻမာꩻသမ်းအာ (ယလဲင်ႏလဲင်ႏမွန်ꩻဒေါဝ်)၊ အမာႏဒါႏတွမ်ႏလိုꩻမူႏဟော်ကို တဖြာꩻဖြာꩻ၊ (မွန်ꩻဒေါဝ်တွင်ꩻတဲင်) ခွန်တောင်ꩻချာတောဝ်း၊ ပါꩻမူႏနဝ်ꩻ အဝ်ႏနမ်းလောင်းလွဉ် (ခွေမာႏလို့ဝင်ꩻတွမ်ႏခွန်-နုဲင်းနဝ်ꩻတဲ့ ဝွေꩻဒေါ့ꩻဗွူႏန်တဝ်း)၊ ကွပ်နောဝ်ꩻမꩻ ခွန်ယူႏ'ပါꩻမူႏယို တွမ်ႏစင်ꩻနဝ်ꩻ ပဲ့စ်မာႏလို့ဝင်ꩻကွေး'၊ လိုꩻနွို့ဟော်ꩻကိုနဝ်ꩻ အဝ်ႏရဟန်ꩻလူꩻမ်ဟ၊ ခွန်သံသယ ထွာဒါႏနုဲင်းနဝ်ꩻ၊ ယိုနဝ်ꩻ ကွပ်နွို့ဟော်ကိုတဲင် ထွာဒါႏ 'ဒုတိယ'အပဲ့စ်တမျိုꩻနောဝ်ꩻသွူ။
- ၃။ ရတနာႏဟော်ꩻကို မဉ်ႏထိုꩻမား တမျိုꩻမျိုꩻတဲ့ 'ရဟန်ꩻနဝ်ꩻထူႏ'ဝင်ꩻယူႏဒါႏနုဲင်းနဝ်ꩻ၊ ယိုနဝ်ꩻ 'တတိယ'အပဲ့စ်တမျိုꩻသွူ။
- ၄။ အရေꩻတန် ကိစ္စတဗာႏ တွိုင်ႏပင်ႏတေ့ꩻဒျာႏလို့ဝင်ꩻဟော်ကို၊ သတင်ꩻယို လိုꩻအထန်ႏသမ်းဟွူန်လꩻ၊ 'အလွိုးရဟန်ꩻနဝ်ꩻ ဒေါ့ꩻနယ်ကွေး'၊ ဝင်ꩻထင်းမာႏဒါႏနုဲင်းနဝ်ꩻ၊ ယိုနဝ်ꩻ 'စတုတ္ထ'အပဲ့စ်တမျိုꩻသွူ။
- ၅။ ဟော်ကိုနဝ်ꩻ အဖါမာꩻသီ အပိုတဲ့ အဝ်ႏ၊ အပိုမာꩻသီ အဖါတဲ့အဝ်ႏ၊ ပေါႏသေတဝ်း ကောမာꩻသီးသားနဝ်ꩻ ဝင်ꩻထင်းဒါႏ စင်ꩻနဝ်ꩻမာꩻသီ၊ ယိုနဝ်ꩻ 'ပဉ္စမ'အပဲ့စ်တမျိုꩻသွူ။
- ၆။ အမတ်တဖြာꩻဖြာꩻနဝ်ꩻ အရာႏ(ရာထူး)ဖွိုႏပေႏ၊ ခွန်ဒင်ႏထိုဖေႏအရာႏ 'အလွိုး စင်ꩻဒေါ့ꩻဖေႏအနယ်'လိုꩻကတကေးသားနဝ်ꩻ ဒေါ့ꩻဒါႏနုဲင်းနဝ်ꩻ၊ ယိုနဝ်ꩻ 'ဆဋ္ဌ'အပဲ့စ်တမျိုꩻသွူ။
- ၇။ အရာႏထို ပါꩻတဖြာꩻဖြာꩻနဝ်ꩻ ခွန်ချꩻဖွိုႏထိုꩻအရာႏ၊ ပါꩻနဝ်ꩻထင်းဒါႏ စင်ꩻဉာဏ်ႏပါ၊ ယိုနဝ်ꩻ 'သတ္တမ'အပဲ့စ်တမျိုꩻသွူ။
- ၈။ အခန်ႏခါႏမွေးတဝ်း စဲ့ꩻသားဖုံႏနဝ်ꩻ ခွန်ထွဉ်ႏလွေꩻပွေါးတခြာ၊ ကလွꩻလွေꩻသားဖုံႏနဝ်ꩻ အလွိုးစင်ꩻဉာဏ်ႏပါသနယ်၊ ယူႏဒါႏနုဲင်းနဝ်ꩻ၊ ယိုနဝ်ꩻ 'အဋ္ဌမ'အပဲ့စ်တမျိုꩻသွူ။
- ၉။ အွဉ်ႏစွꩻလွေꩻစဲ့ꩻတွူ စတွိုႏတဖူꩻလောင်းလွုမ်ꩻ ခွန်ဟဲ့ꩻသဲင်ꩻချာ၊ ဝင်ꩻထင်းစင်ꩻဉာဏ်ႏပါ၊ ယိုနဝ်ꩻ 'နဝမ'အပဲ့စ်တမျိုꩻသွူ။
- ၁၀။ ဟော်ကို (ဟော်တလင်ꩻကို)နဝ်ꩻ လိုꩻအာ၊ သေဆင်၊ လောရထာꩻအာ၊ ထာꩻမွန်းထာꩻပျောႏ၊ (အာႏရွုံႏငတ်ꩻပါꩻ)အာ၊ တွမ်ႏရဟန်ꩻသီး သေန်ႏလျာႏတောဝ်း၊ (ဝင်ꩻသဲ့ꩻသွမ်ꩻဒါႏ) ယိုနောဝ်ꩻ 'ဒသမ'အပဲ့စ်တမျိုꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဒသကနိတ်၊ ရာဇန္တေပုရပ္ပဝေသနသုတ်)[၁][၂]