ရဟန်ꩻအုံဟဝ်တဝ်း
"ရဟန်ꩻအုံဟဝ်တဝ်းဝတ္ထု (အဟို့ꩻထိုꩻ ဗွေႏဘုရာႏတွမ်ႏ အာနန္ဒာႏ ဝွတ်ပတ်ဗာႏ)"
အွိုးခꩻတလဲင်ႏ ရဟန်ꩻတပါꩻနဝ်ꩻ အဟို့ꩻထိုꩻ၊ ကွဲညည ထွိုင်ႏဗꩻဒွုမ်တဲင် အဝ်ႏသို့သချာစွဉ်ႏဒျာႏ ခွဉ်ႏပေႏခွဉ်ႏတန်ခြာ၊ အဝ်ႏတဝျာႏတဝီႏနေးစွဉ်ႏနောဝ်ꩻသွူ။ ဗွေႏဘုရာꩻ ဟဲ့ꩻအာနန္ဒာႏ ကျွꩻလယ်ႏထွား သံဃာႏကျောင်ꩻ တကျောင်ꩻထွူတကျောင်ꩻ၊ တွိုႏလွေꩻခန်း စင်ꩻဟို့ꩻထိုꩻကျောင်ꩻ၊ နီဗွေႏဘုရာꩻလွေꩻထေ့၊ ကောထွားသား အဲဉ်ထဝ်းတဲင် ဗွေႏအာနန္ဒာႏ လွေꩻတွောင်ထီ၊ ဗွေႏဘုရာꩻကောဆူဖေႏ၊ ဗွေႏအာနန္ဒာႏနဝ်ꩻ ဗွꩻပသေဖေႏ၊ ဗွေႏဘုရာꩻ စွဲအမုနိဖဲ့ꩻ၊ ဗွေႏအာနန္ဒာႏ စွဲအခင်ႏဖဲ့ꩻ၊ အွဉ်ႏကိန်ꩻဒင်ႏကူႏလောင်းနောဝ်ꩻသွူ။ "ရဟန်ꩻသီးဖုံႏဟွေး- ရဟန်ꩻတပါꩻ ဟို့ꩻကထိုꩻထာꩻသူꩻနဝ်ꩻ သီမထွားဗဲင်းတဝ်း တပါꩻပါꩻ၊ ကွပ်ပွိုးထမုဲင်ꩻဟောင်း" "ဩဗွေႏ- ဝွေꩻဗွေႏသူꩻနဝ်ꩻ ကွိုက်ꩻသွꩻညမ်းတန်၊ သူႏသေတဝ်းထာꩻ၊ တစွဲကိုဒါႏတဝ်း ဝင်ꩻထာꩻမာꩻ၊ ဝင်ꩻအုံဟောဝ်တဝ်းတဲ့ တလွေꩻထေ့ဖိုတဝ်း၊ တထွားဖိုတဝ်း၊ ကွပ်ပွိုးနဝ်ꩻမꩻ ဝွေꩻဗွေႏတိန်ႏအုံဟောဝ်တဝ်းတဲ့ ဝင်ꩻကောထွားသားအဲဉ်ထဝ်း၊ ဝင်ꩻစွော်စွော်ထွားတဝ်း-နုဲင်းနုဲင်းဒျာႏ ဗွေႏဩ" "ရဟန်ꩻသီးဖုံႏဟွေး- ဝွေꩻနဝ်ꩻ တသူႏသေတဝ်းထာꩻတဲ့ သိသူႏသေထာꩻနဝ်ꩻဟွေး၊ ပေါႏသီတထွားတဝ်းဟ ပါꩻမုဲင်ꩻအီႏထွား၊ တပဲ့ꩻသီးဖုံႏနဝ်ꩻ မွိုးဖါဖူးဝေး တအဲဉ်ထဝ်းဟ ပေါႏသီတထွားတဝ်းလို့ဝင်ꩻနဝ်ꩻ ပါꩻမုဲင်ꩻအီႏထွားသီဟောင်း၊ အွဉ်ႏမွုန်းအပွေႏ-ဖေႏမွုန်းအပဲစ် နုဲင်းနဝ်ꩻဟုဲင်း။ ရဟန်ꩻသီးဖုံႏဟွေး- ရဟန်ꩻကဝွတ်ပတ်ခွေ ကလꩻအကျိုꩻနဝ်ꩻ တွမ်ႏကဝွတ်ပတ် စင်ꩻအုံဟောဝ်တဝ်း (တွမ်ႏကဝွတ်ပတ်ဗာႏသျင်ႏအုံဟောဝ်တဝ်း) ကလꩻအကျိုꩻနဝ်ꩻ ဗွန်ပီလို့ဝင်ꩻ၊ (အကျိုꩻတန်နုဲင်းနုဲင်းဝင်ꩻ)။ ရဟန်ꩻသီးဖုံႏဟွေး- ဆရာႏမဉ်ႏအုံဟောဝ်တဝ်းတဲ့ တပဲ့ꩻအုံပွေါဗာႏ ရွစ်ကဟောဝ်သူꩻ၊ တပဲ့ꩻမဉ်ႏအုံဟောဝ်တဝ်းတဲ့ ဆရာႏအုံပွေါဗာႏ ရွစ်ကဟောဝ်သူꩻ၊ သွꩻတပါꩻ မဉ်ႏအုံဟောဝ်တဝ်းတဲ့ သွꩻအမျာꩻဖုံႏ အုံပွေါဗာႏ ရွစ်ကဟောဝ်သူꩻ၊ အသွꩻမဉ်ႏအဲဉ်ထောဝ်းလာꩻလာꩻတဲ့ သံဃာႏအမျာꩻ အုံပွေါဗာႏ ရွစ်ကဟောဝ်သူꩻ။ ရဟန်ꩻသီးဖုံႏဟွေး- စင်ꩻတပါꩻပါꩻ (သျင်ႏတပါꩻပါꩻဝ ဆာသွူထာꩻတဲ့ သံဃာႏတပါꩻပါꩻ ပေါႏထွားတဝ်း၊ ပေါႏတပွေါတဝ်း၊ ပေါႏတဝွတ်ပတ်တောဝ်းနောဝ်ꩻ တထွားတောဝ်းသား၊ တပွေါတောဝ်းသား၊ တဝွတ်ပတ်တောဝ်းသားဖုံႏနောဝ်ꩻ 'ဒုက္ကဋ်အာပတ်ဗာႏ"မိန်းစွဉ်ႏဒျာႏနုဲင်းနဝ်ꩻသွူ။ (ဝိနယ၊ မဟာဝဂ္ဂပါလီတောႏ၊ စီဝရက္ခန္ဓက)[၁][၂]